O Tapuaiga ma Polotiki O ni Aumea Tumau Ea?

O LE tupu o Rusia o Vladimir 1 sa filifili i se tasi aso faapea e ao ona avea ona tagata faapaupau ma “Kerisiano.” Na liliuina o ia i le 987 T.A. ina ua uma ona faaipoipo i se pulinisese o le Greek Orthodox, ma na ia poloaia ona tagata ina papatiso faatasi—ma faatinoina i le mata o le pelu pe manaomia. Sa lei pine a e maua e le Lotu Rusia le tutoatasi mai lona “faatinā,” le Greek Orthodox, lea na mulimuli ane avea ma vaega o le Setete. Ma o le mea lea e ui ina teena e le malo le soifua pea o le Atua, ae ua faaauau pea ona faifai mea faatasi le Lotu ma le Setete i Rusia e ui ina i se tulaga maaleale.

I senituri mulimuli ane ai, sa faamanuiaina foi le Tupu o Enele Vlll o Egelani i le faia o se aumea vavalalata i le va o le Lotu ma le Setete, e ui ina eseese auala. I le 1532, sa popole tele o ia aua sa le mafai e lana ava, o Katelina o Aragon, ona fanaua mai se tama tane e soloai ane i le nofoaiga. Ina ia foia le faafitauli, na faaipoipo faalilolilo atu Enele i le tamaitai na ia alofa i ai, o Anne Boleyn. Sa faia lenei mea i lalo o le faatagaga a le Aki-epikopo o Canterbury, o lē na ia faailoa mai le soloia o le uluai faaipoipoga a Enele. I le 1534 sa faailoa atu ai e lenei tagata mulilua ma le saua o ia o le ulu o le Lotu Egelani, le taʻu lea o loo olioli ai tupu i Egelani e oo mai i aso nei. O filifiliga a Sinoti o Lotu e tuuina atu mo le faamaonia i le palemene, ma o epikopo, o sui o le Maota o Alii, e i ai sa latou vaega i le pulea o Peretania. Ua faapea ona faaipoipoina ai e Lotu ma le Setete o Egelani mo le sili atu i le 450 tausaga.

Faaipoipoga Faaonaponei a Lotu—Setete

I le 1936 o se fouvalega i Sepania faasaga i le malo faa-Republican na taʻitaʻiina ai i se taua sivili ma tulai mai ai le pulega a General Franco. Sa faateia i latou e matele i le tetee, ina ua tuuina atu e Franco se avanoa tele i taʻitaʻi lotu aua la latou lagolagosua malosi ia te ia.

I le 1938 sa fono ai le WCC (World Council of Churches) i Vancouver, Kanata. Sa taʻu atu e lana failautusi sili, o Philip Potter, ia i latou ina ia “tumau pea i le faapolotiki.” O le foai tau tupe mai le WCC mo vaega eseese faapolotiki e faavaegaau aua taumafaiga i le tele o atunuu ua avea ai ma mafuaaga o le loto popole o le toatele o i latou e o i le lotu.

O le mea lea, ua le tau fesiligia ai le miomio faatasi o lotu ma le faapolotiki. O lea la, o le fesili tuga, E ao ea ona faia faapea? E lelei ea pe leaga? Ua avea ea le aafia o lotu i le faapolotiki ma mea e siitia ai tulaga tau amio o le faapolotiki, pe ua faaleagaina ai lotu? A e ā le lumanai? O le a faaauau pea ea ona olioli ia la ‘feuiaiga o le alofa,’ po o le a faaoonaina ai ma uunaia ai i laua i se tulaga e fetaui ai?

[Ata i le itulau 3]

O le uluai ao o le Lotu Egelani