Tapuaiga ma Politiki Ua i se Tulaga e Fetaui Ai?

O LE fuafuaga o le tuufaatasia o le malosi politiki ma tapuaiga i le tagata e toatasi e lei amataina ia Enele Vlll. I ona aso ua leva ona avea o se faiga ua uma ona faataitaia sa fuafuaina e aumaia ai le autasi mo le lautele.

Mo se faaaoaoga, o le emepaea o Aikupito anamua sa tele ni ona atua. “O Farao lava ia o se tasi o atua, ma sa avea o se autu taua i olaga o ona tagata,” ua fai mai ai le The Bible Dictionary. Na faapena foi le malo o Roma sa i ai ni atua se tele, e aofia ai ma emeperoa. Sa faamatalaina e se tasi tusitala le tapuaiga i emeperoa o se “malosi sili ona faitaulia i le tapuaiga o le lalolagi o aso o Roma.”

Ae ui i le mea moni faapea o sootaga o malo ma lotu ua faitau senituri le leva, o Kerisinetoma i aso nei ua mafuli atu i faiga faapolitiki ua tuua ai o ia i se tulaga e fetaui ai ma i latou lava o loo ia taumafai e faafiafiaina. Ai se a ua faapea ai? Ina ia taliina lenei fesili, sei o tatou tulimataia nei pe na faapefea ona aafia Kerisenitoma i faiga faapolitiki mai le amataga.

Faa-Kerisiano Moni—E Tueseese

O Iesu Keriso, o le na faavaeina le faa-Kerisiano, sa ia teena aiai malosi faapolitiki uma lava. I se tasi o mea na tupu, sa maofa ai tagata i ana vavega, sa latou taumafai e faamalosia o ia e fai ma tupu. Ae peitai na “toe maliu ese ai lea o ia e toatasi i le mauga.” (Ioane 6:15) Ina ua fesiligia e le kovana Roma po o ai o se tupu, sa tali atu Iesu: “E le mai le lalolagi nei loʻu malo; afai ana mai le lalolagi nei loʻu malo, po ua tau aʻu auauna, ina nei tuuina atu aʻu ia Iutaia.”—Ioane 18:36.

Sa taʻu atili atu e Iesu i ona soo: “A e le ni o le lalolagi outou, a ua oʻu filifilia outou nai le lalolagi, o le mea lea e ʻinoʻino ai le lalolagi ia te outou.” Ioane 15:19) O le mea lea, sa le aafia uluai Kerisiano i ni aiaiga faavafealoaloai pe faapolitiki. Mo se faaaoaoga, o pologa sa avea ma faafitauli autu, a e na lei tetee Kerisiano ina ia tafiesea. Na i lo lea, o pologa Kerisiano sa poloaiina ina ia usiusitai i o latou matai.—Kolose 3:22.

Na i lo o le aafia i faiga faapolotiki, o nei uluai Kerisiano sa aga atu i le faataunuuina o le galuega talai “ma molitino atu i le malo  o le Atua.” (Galuega 28:23) I le na o ni nai tausaga a e sa oo atu la latou feau i tuluiga uma o le lalolagi. (Kolose 1:23) Ma o a auga? E faitau afe sa tali mai ma avea o ni ‘uso ma tuafafine’ faaleagaga. (Mataio 23:8, 9) O tagata Iutaia ma Nuu Ese o e sa avea ma Kerisiano na lafoai o latou eseesega. E oo lava i le va o Samaria ma Iutaia o faafitauli sa mou ese atu ona o le “alofa naunau” o le tasi i le isi sa i ai i Kerisiano.—1 Peteru 4:8.

Ae peitai, o le alofa faa-Kerisiano, e faalauteleina atu e oo lava i o latou fili. (Mataio 5:44) O le mea lea, sa latou teena ai ona auai i vaegaau a Kaisara. ‘Ae peitai,’ atonu o le a tetee nisi, ‘pe sa lei fetalai ea Iesu, “O mea a Kaisara . . . ia outou avatu ia Kaisara?”’ E moni. Ae peitai, pe sa fetalai ea Iesu e faatatau i le auaunaga faavaegaau? E leai, sa na ona ia talanoaina le mataupu ‘pe tatau ona totogi lafoga ia Kaisara pe leai.’ (Mataio 22:15-21) O lea sa totogi ai lafoga a Kerisiano. A e sa latou vaaia o latou olaga o ni e ua tuuina atu i le Atua ma teena ai le faaleagaina o latou uso a tagata.

Avea ma Uo a le Lalolagi

‘A e faauta i Kerisinetoma o aso nei,’ atonu o le a faapea mai ai nisi. ‘Ua matua fevaevaeaina lava e aunoa ma se faamoemoe, o ona tagata e masani lava ona fasiotia e le tasi le isi, o ona taʻitaʻi lotu o loo aafia i faiga faapolotiki. O le a ua tupu i le faa-Kerisiano?’ Ia, sa lapatai mai Iesu faapea o le a ‘luluina’ Kerisiano pepelo i totonu o Kerisiano moni. (Mataio 13:24-30) Sa faapena foi ona valoia mai e Paulo: “Ua ou iloa lenei mea . . . e oo mai ia te outou luko saua . . . e tupu mai foi ia te outou lava tagata e tautala mai i mea faapiopio, e fetoso ese ai le au soo ia mulimuli ia i latou.”—Galuega 20:29, 30.

 E oo lava i le uluai senituri sa amata ai lenei taualumaga. Sa tatau i le soo o Iakopo ona tusia o nei upu matala: “O outou e le faamoni ua pei o fafine mulilua; tou te lei iloa ea o le faia o le lalolagi ma a outou uo o le faia foi lea o le Atua ma o outou fili?” (Iakopo 4:4, The Jerusalem Bible; o upu faasisipa o a matou.) O le toatele ua latou filifili e faaleamanaiaina lenei faatonuga tauatua—ma i lea tulaga na aliaʻi mai ai se luko e tino mai o se mamoe i lona fa o senituri, o le Emeperoa o Konesetatino, ma sa mafai ai ona ia faatuina se “faa-Kerisiano” faagutugutulua ua atili ai i le avea o lea ma tapuaiga faaaloalogia a le Emeperoa o Roma. Ae peitai i le ‘avea ma uo a le lalolagi,’ ua faia ai Kerisenitoma ma fili o le Atua. O se fetauaiga i le lumanai ua avea nei o se tulaga e lē maalofia.

I lona 13 senituri sa pulea ai le Lotu e lona “pope,” po o “tama,’ ma sa ausia ai le “tumutumuga o lona malosi,” ma sa faatulagaina ai se tulaga faaipoipoina e sili ona vavalalata i le va o le Lotu ma le Setete. Sa i ai le talitonuga o Pope Innocent lll faapea “na tuuina mai e le Alii ia Peteru le pule e le gata i le Lotu o le Vateatea atoa a o le pule foi i le lalolagi aoao.” (O upu faasisipa o a matou.) Ua faaauau mai e le polofesa o talafaasolopito o T.F. Tout i le tusi The Empire and the Papacy: “O le galuega a Innocent ua na o ni faamatalaga a se taʻitaʻi o malo, . . . i le faatuina ma le fulisia o tupu ma emeperoa pe a loto lava i ai.” Ae peitai ua faaopoopo mai lea lava tusitala: “O le tele o le avea o le pulega a le lotu ma faapolotiki, o le sili atu foi lea ona faigata ona faamaualugaina o lana puleaga e avea o se puna o tulafono, tau amioga, ma tapuaiga.”

Tapuaiga ma Taua

O taua o se faapolotiki i lona tulaga e sili atu ona saua i le fua faatatau. Ae peitai, sa faamaopoopoina e Pope Innocent lll lava ia se feagaiga faavaegaau faasaga i Albigenses o Farani i Saute. O lenei mea na taʻitaʻiina atu ai i le matuā fasiotia matuiā o le faitau afe i Beziers i le 1209 ma le susunuina o tagata ona o le Faamasinoga Paia. O se taua, i le amataga sa faatatauina mo Palesetina., na liliuina agai Constantinople ona o ni aiaiga faapolotiki. O i ina sa auai toa “Kerisiano’ i “faiga mataga o aso e tolu o le gaoi, fasioti tagata, tuinanau, ma le faaleaogaina o mea paia.” I luga o ai? I luga o uso a “Kerisiano”! Fai mai se tasi tusitala o tala tuufaasolo: “E oo lava i falesa sa veteina i se tulaga faataumaoi.”

O le fua le faa-Keriso o le lotu na iu lava ina taʻitaʻiina ai Matini Luteru e tuʻituʻi lana luitau i le lotu i le faitotoa o le falesa o se olo foi i Wittenberg i le 1517—ma amataina loa le Toe Fuataina o le Lotu. Ae peitai fai mai H. A. L. Fisher, i le tusi History of Europe: “O le tautinoga fou sa . . . faalagolago tele i luga o manaoga o aloalii ma le malo.” Sa oo ina vaevaeina Siamani i sootaga faapolitiki—tapuaiga. I Farani, sa faapena foi ona fefiloi faatasi tauaiga ma taʻitaʻi o politiki. O le mea lea, o taua sa tauina mulimuli ane, sa le gata ina tau mo le saolotoga o le lotu a e ona o “fevaaiga i le va o aloalii Porotesano ma Katoliko Roma po o ai e malosi lona leo i le pulea o le Tupu.” O lea, o le talafaasolopito o tapuaiga i Europa ua tusia i le loto!

Sa tafa mai ata o le 20 senituri i le fetauiga a Peretania ma Aferika—Holani i se taua i Aferika i Saute. Sa faasasaoina faaafi e taʻitaʻi lotu o itu e lua le taua i le “faalaeiauga ma timaiga mai le pulelaa.” Fai mai le tusi tala o R. Kruger: “O le tele o olega ma faatoga sa tuuina atu i le lagi e itu uma e lua ona o le taua sa fetaui lelei lava ma ituaiga o fetuunaiga faaituaiga a lotu.” O “Kerisiano” papae sa fasiotia e le tasi i le isi a o ole atu i le Atua e fesoasoani ia i latou i le faia o lea mea!

Sa toe faataʻitaʻia lenei fua i se tulaga e sili atu i le 1914 ina ua ulufale atu fitafita Siamani i totonu o Peleseuma sa tusia i o latou fusipau upu “Gott mit uns” (Ua faatasi ma i matou le Atua). Sa matua tuuina atu e itu e lua o lotu tatalo mo le manumalo ma matua faateleina foi le faaleagaina o le fili.

E toatele e sa le mautonu ona o le vaega a tapuaiga i le Taua l a le Lalolagi. I le taua o tapuaiga “o mea e faavalea ai tagata,” ua faateleina ai le faa-Komunisi ma le lē talitonu i le Atua. A e ui i lea, sa tumau pea ona aafia taitai lotu i faiga faapolitiki, i le lagolagoina o Pulega Tautala Tasi e pei o Musolimi  ma Franco. I le 1983 na sainia ai e le Lotu Katoliko Roma se maliega ma Nazis. Sa tusi atu Katinale Faulhaber ia Hitila: “O le lulu lima ma le Pope . . . o se iuga o le faamanuiaina e le mafuafuatia . . . talosia ia faasaoina e le Atua le Taʻitaʻi o Siamani [Hitila].”

E oo lava i le tulai mai o le tasi taua a le lalolagi ua le aveesea ai mai taʻitaʻi lotu mai faiga faapolitki. O se tasi foi mea fou ua tulai mai i lotu o le liliu atu lea i vaega o le itu tauagavale mo se isi foi tulaga faapolitiki. Fai mai le tasi tusitala: “O tupulaga aupito lata mai o faifeau mai Amerika Latina . . . ua talitonu o aʻoaʻoga a Marx o ni faaupuga lē maalofia faapolitiki o le faa-Kerisiano.” A e ua lapatai mai le Tusi Paia: “Na latou luluina le matagi, o le mea lea latou te selesele mai ai le afa.”—Hosea 8:7 J.B.

Seleseleina le Afa

Ioe, ua faaleoina mai e le Tusi Paia se lapataiga taua: O se fetauaiga mataʻutia i le va o tapuaiga ma le faapolitiki o loo sau. I le Faaaliga mataupu 17, ua valoia mai ai e le Tusi Paia le emepaea o tapuaiga sese i le lalolagi ua pisipisia i le toto e pei o le “fafine talitane e sili, o lē tietie i vai e tele.” O nei “vai” o loo faaatagia ai ‘tagata ma atunuu.’ (Fal 17 Fuaiupu 1, 15) O le fafine talitane ua faaigoaina ia “Papelonia le Aai Tele, o le tina o fafine talitane ma mea e inosia i le lalolagi,” ma ua “onā i le toto o le au paia.” (Fal 17 Fuaiupu 5, 6) O “Papelonia” o le igoa tatau lea mo faalapotopotoga o tapuaiga sese, a e maise foi, o le tele o ana aʻoaʻoga e mapuna mai i le aai o Papelonia anamua. * Ua tatau ia te ia lona talaaga fasioti tagata i lona sauaina o Kerisiano i le faagasologa o senituri.

Ua faaatagia atili mai le emepaea o tapuaiga sese o loo tietie i se manu feai e “fitu ona ulu ma ona nifo e sefulu . . . [o lona] uiga o tupu ia e sefulu.” (Fal 17 Fuaiupu 3, 12) I mataupu talu ai nei o lenei mekasini sa faailoa mai ai lenei “manu feai” o se mea faigaluega ua faamoemoeina mo le auamaia o le filemu i le lalolagi, o Malo Aufaatasi. Ua tusia le lagolagoina e lotu o lenei faalapotopotoga. Ia Oketopa 1965, sa faamatalaina ai e Pope Paulo Vl Malo Aufaatasi “o le faamoemoe mulimuli o le autasi ma le filemu.” I le 1919 sa ia lauga atu ai i le Fono Lautele a Malo Aufaatasi. E aunoa ma le taʻua o Keriso po o lona Malo, sa ia tautalagia ai e uiga i Malo Aufaatasi “o se nofoaga sili mo le filemu ma faamasinoga tonu.”

A e ai se a ua mataʻutia ai lenei faatasiga o tapuaiga ma Malo Aufaatasi? Aua “o nifo foi e sefulu . . . ma le manu feai, latou te inoino i le fafine talitane, ma faasaunoa ia te ia, ma to ese ona ofu . . . ma susunu ia te ia i le afi.” (Fal 17 Fuaiupu 16) O le mea lea o tapuaiga sese ua agai atu nei i luma i se mala o se fetaiaʻiga ma politiki. I le faatelenoa ma le le mama o lona tulaga ua faaalia ai, o le a matuā faaumatia lava o ia.

O i ina o le a amata mai ai le “puapuaga tele” lea sa fetalai i ai Iesu, o le a faaiuina i le taua o Amaketo. O le a lagolagoina Iesu Keriso e au e le toilalo faalelagi, o le a “tuimomomoina ma faaumatia” le faiga o mea a Satani i le lalolagi atoa, ma tuua ai na o e ‘agamalu e fai mo latou le nuu.’ O i latou nei o Kerisiano moni o e, na i lo o isi mea, sa ulimasao mai i fevaevaeaiga faapolitiki.—Mataio 24:21; Tanielu 2:44; Salamo 37:10, 11; Mataio 5:5; Faaaliga 6:2; 16:14-16.

Afai o oe o se tasi o loo atuatuvale ona o puapuaga ma tauemuga o loo aumaia e tapuaiga sese i le suafa o le Atua, o le a e ao ona e faia nei? Ua faatonu mai e le Tusi Paia: “Loʻu nuu e, ia outou o ese ia te ia [tapuaiga sese], ina nei faatasia outou i ana agasala.” (Faaaliga 18:4) Ua na o Molimau a Ieova lava o loo uunaia tagata ina ia utagia lenei poloaiga. Ua pei i latou o uluai Kerisiano, sa aloese mai taua ma faiga faapolitiki ma i lea o le a latou lē i ai i le ala o le faaumatiaga pe a fetoai tapuaiga ma faapolotiki. O lea la, faafesootai i latou. O le a latou fiafia e faailoa atu ia te oe le auala i le “faitotoa vaapiapi” e taʻitaʻiina atu ai e lē i le faaumatiaga a e i le ola e faavavau.—Mataio 7:13, 14; Ioane 17:3.

[Faaopoopoga i lalo]

[Ata i le itulau 6]

I se sauniga sa faaaoga atigikalone mo se pulelaa i le faasitepu o St. Paul’s i le 1914, sa faagaee ai e le Epikopo o Lonetona le lotonuu i vaegaau a Peretania.