Filemu, Saogalemu, ma le ‘Faatagata o le Manu Feai’

“Ua ia avea foi aʻu i le vao i le Agaga; ona ou iloa lea o le fafine ua tietie i le manu feai mumu, ua lilo i igoa faifai, e fitu ona ulu ma ona nifo e sefulu.”—FAAALIGA 17:3.

1. Ai se a ua avea ai le faaaliga a Ioane e uiga i le manu feai e fitu ulu ma nifo e sefulu ma mea e aafia ai i tatou?

NA ILOA e le aposetolo o Ioane lenei manu feai e mataʻu ai i se faaaliga faagaeeina tauatua. Ae peitai e le na o Ioane na vaaia lenei mea. E le tau matea, ua faapena foi, ona e vaai oe i ai, po o lou faitau foi i ai e uiga i lenei mea i nusipepa. Na e iloaina la?

2, 3. O a faasologa o meaola na vaaia e Ioane i le faaaliga?

² E moni lava, a tatou vaaia i aso nei le manu feai, e le o tino mai e pei ona sa faamatalaina e Ioane. O le mea na vaaia e Ioane. O le mea na vaaia e Ioane o se faafaatusa o se mea o le a i ai i luga o le lalolagi “i le aso o le Alii.” (Faaaliga 1:10) Ua tatou vaaia lona faataunuuga i aso nei. O foliga mataga o le manu feai na vaaia e Ioane ua faaatagia ai le silafaga a Ieova i le mea o loo fai ma ona sui—o se mea inosia ia te Ia! Ua uma  ona molimauina e Ioane i lana faaaliga le lafoina ifo o Satani le Tiapolo i le lalolagi “ua lotoa tele, aua ua na iloa ua saasaa ona po.” (Faaaliga 12:12) Na ia vaaia foi faiga faapolitiki o le lalolagi a Satani na faaataina mai i se manu feai tele e fitu ona ulu ma nifo e sefulu o sau ma i le “sami” o le fanau a tagata. (Faaaliga 13:2; 17:15; Isaia 57:20; Luka 4:5, 6) Sa i ai i lenei manu feai le pule i le lalolagi uma, ma sa faamalosia tagata ina ia ifo atu i le ‘faailoga o le manu feai’ i o latou lima taumatau po o o latou muaulu, e faailoa ai lo latou lagolagoina o le manu feai.—Faaaliga 13:7, 16, 17.

³ Sa mataʻi e Ioane a o faia e tagata le faatagata o lenei manu feai. (Faaaliga 13:14, 15) O le faatagata la lenei na ia vaaia i le faaaliga o loo faamatalaina i le Faaaliga 17 o loo i luga. O lenei “faatagata” e fitu ulu ma nifo e sefulu o le a faia se vaega taua ai mo i tatou ona iloa o ia. E faapefea ona tatou faia lena mea?

O le “Faatagata” o le Manu Feai i Aso Nei

4, 5. O le a na fai ma sui o ulu o le manu feai i le faaaliga?

⁴ Na tuuina atu e le agelu ia Ioane ni faamatalaga o le a fesoasoani ia i tatou. Sa ia faapea atu: “O ulu e fitu o mauga ia e fitu, ua nofo ai le fafine; o tupu foi ia e toafitu; e toalima ua pauu, o loo i ai le tasi, e lei oo mai nei foi le tasi; pe a oo mai e tusa ona saasaa o ona po e tumau ai.” (Faaaliga 17:9, 10) O le taʻua o “tupu” na “mauga”—i le Tusi Paia ua masani lava ona faaatagia ai malo faapolotiki—ua faailoa mai ai o ulu o le manu feai ua fai ma sui o malo. (Ieremia 51:25) O ai malo e fitu o loo aafia ai?

⁵ Ia, e lima na pauu i aso o Ioane, o loo i ai pea le tasi, o le a oo mai foi le isi. I le talatuufaasolo o le Tusi Paia, e lima emepaea sili ona lauolaola o le lalolagi, faasaua i tagata o le Atua, ona pauu ai lea a o lei oo i aso o Ioane: O Aikupito, Asuria, Papelonia, Metai ma Peresia, atoa ma Eleni. A o ola pea Ioane, sa tulai mai ai le emepaea o Roma i lona malosi. I senituri, talu ona mavae le oti o Ioane, sa mou atu pule i le lalolagi ma sa lei pine a e suia e le emepaea o Peretania. Mulimuli ane ona maua lea e kolone i sisifo o le emepaea o latou tu toatasi ma o mai loa e galulue faatasi ma Peretania e faia aʻe ai le malo malosi o le lalolagi o Peretania-Amerika. O le “tupu” lea “e lei oo mai” i aso o Ioane. O le a le sootaga i le va o le manu feai na vaaia e Ioane ma emepaea e fitu na faaatagia mai e ona ulu? “O lona toavalu lea, nai le toafitu foi o ia.”—-Faaaliga 17:11.

6. (a) O le a na uiga i ai nifo o le manu feai? (e) O le a le auala “na le oo ia maua ia o latou malo”?

⁶ Ia manatua foi, o le manu feai e sefulu ona nifo. Fai mai le agelu e uiga i lea mea: “O nifo foi e sefulu na e iloa, o tupu ia e toasefulu, ua le oo ina maua o latou malo, a e maua e i latou pule pei o tupu e tasi le itu aso faatasi ma le manu feai.” (Faaaliga 17:12) I le Tusi Paia, ua fai le numera sefulu ma ata o le atoaga o mea i luga o le lalolagi. O lea, ua faaatagia e nei nifo pulega uma lava a malo i le lalolagi aoao o loo lagolagoina le manu feai mo sina taimi (“tasi le aso”) i le “aso o le Alii.” E aofia ai ia i latou na le malo malosi lona fitu o le lalolagi, e faapena foi malo i ona po nei ua tupuga mai isi ‘ulu e ono o le manu feai,’ e ui lava o lenei ono ua le o toe avea o ni malo malolosi o le lalolagi. Sa lei i ai nei tupu i aso o Ioane. * Talu ai ua latou maua nei a latou pule, latou “te avatu foi o latou malosi ma a latou pule i le manu feai.”—Faaaliga 17:13.

7, 8. (a) O le a le manu feai na vaaia e Ioane, e pei ona faamatalaina mai i le Faaaliga 17? (e) Ua faapefea ona fesootai i ulu ma nifo?

 ⁷ Ua manino nei la i le manu feai? Ioe, e tutusa lava ma “le mea inosia e faatafunaina aʻi” lea na amata i Malo Sosoo ma ua i ai nei o Malo Aufaatasi. (Mataio 24:15; Tanielu 12:11) Ua faapefea ona ‘oso aʻe lenei faalapotopotoga mai malo malolosi e fitu o le lalolagi’? I le manatu faapea o le faalapotopotoga atoa pei se manu feai, pei se malo malosi lona valu, ua aumaia i lona tulaga e malo ua uma ona i ai, faatasi ai ma le malo malosi o Peretania-Amerika ua avea ma ona sui sili ma le na te lagolagoina.

⁸ E faaopoopo i ai, e pei ona taʻu atu e le agelu ia Ioane, “o nifo e sefulu” latou te “avatu foi o latou malosi ma a latou pule i le manu feai.” (Faaaliga 17:13) O le mea moni, ana fai e aunoa ma le lagolago a malo ia e faaatagia e ulu ma nifo, semanu e leai se malosi o le manu feai. Ai se a? Ua ua na o se faatagata. (Faaaliga 13:14) E pei lava o faatagata uma e leai se malosi o ia i latou. (Isaia 44:14-17) O le ola ua ia te ia na te maua mai lea i e lagolagoina o ia. (Faaaliga 13:15) I nisi taimi sa faia ai e nisi o i latou nei ni gaoioiga maumauai e ala i le Malo Aufaatasi, e pei mo se faaaoaoga, le taimi o le Taua i Korea.

9. Ua faapefea ona faamautuina lo tatou iloa o le manu feai?

⁹ Ua faamautuina lo tatou iloa o lenei manu feai mai nisi faamatalaga auiliili na tuuina mai e le agelu: “O le manu feai na e iloa, sa i ai, ua le i ai foi, o le a alu ae foi o i ai le to e le gata, e alu atu foi o ia i le malaia.” (Faaaliga 17:8) Ua uma ona faataunuuina se vaega o lenei mea. Na faaumatia e le taua e lua o le lalolagi Malo Sosoo i sona tulaga aʻiaʻi. I le 1942, ina ua matua malamalama lelei Molimau a Ieova i lenei valoaga, ua mafai ona faapea atu o le Faalapotopotoga o le manu feai: “Ua le i ai foi” * Peitai i le 1945 na ‘sau ai i fafo mai le to e le gata’ e avea o le faalapotopotoga o Malo Aufaatasi. Pe o le a faamanuiaina lana taumafaiga e aumaia le filemu ma le saogalemu? Fai mai le valoaga e leai. Na i lo lea, o le a “alu atu i le malaia.”

O le Tietie i le Manu Feai

10, 11. (a) O ai sa tietie i le manu feai o le faaaliga a Ioane? (e) Ua faapefea ona faataunuuina lenei vaega o le faaaliga i aso nei?

¹⁰ Sa e mitamita se isi mea e uiga i le manu feai? O loo tietie ai se “fafine.” Ua iloa o ia o le emepaea o tapuaiga sese i le lalolagi atoa, o “Papelonia le Aai Tele, le tina o fafine talitane ma mea inosia i le lalolagi.” (Faaaliga 17:3-5, 15) Pe sa tietie tapuaiga a le lalolagi i luga o nei faalapotopotoga, a o taumafai e taʻitaʻi o latou laasaga? Ioe, a e maise lava lotu o Kerisinetoma.

¹¹ Mo se faaaoaoga, sa faamatala e se sui mai Holani o Pierre van Paassen “se mea e tutusa lelei lava ma le lotomu faaletapuaiga” o sui o lotu Porotesano o Amerika, Peretania, ma atunuu o Scandinavia o e na auai i fonotaga a Malo Sosoo. I le 1945, na faalauiloa ai e le Council of Churches of Christ i Amerika e faapea o le faalauteleina o taualumaga e faia ai ma foia ai a le Faalapotopotoga a Malo Aufaatasi.” I le 1965  sa faalauiloa mai ai e Pope Paulo Vl faapea ua ia vaaia i le faalapotopotoga “le atagia o le uiga alofa silisli ese o le Atua mo le agaigai i luma le aiga faaletagata i luga o le lalolagi— le ata lea ua Tatou vaaia ai le feau o le Tala Lelei faalelagi ua avea ma faalelalolagi.” O le mea moni, ua faia e taʻitaʻi lotu lena faalapotopotoga ia “lilo i igoa faifai.”—Faaaliga 17:3; faatusatusa le Mataio 24:15; Mareko 13:14.

E Le Se Malosiaga mo le Filemu

12. O le a le faia a i latou o lagolagoina le faalapotopotoga o Malo Aufaatasi ma Malo o le Atua?

¹² E le o olioli Malo Aufaatasi i se faia lelei ma le Malo o le Atua. O le ma moni, o ona lagolago e tetee i lena Malo. Sa taʻu atu e le agelu ia Ioane: “[O nifo e sefulu] latou te tau le taua ma le Tamai Mamoe, a e manumalo le Tamai Mamoe ia te i latou aua o le Alii o ia o alii ma le Tupu o tupu; o e ua ia te ia foi ua valaauina i latou, ma filifilia, ma faamaoni.” (Faaaliga 17:14) Ua moni valoaga, maumauai pea ona ‘tau (malo) ma le Tamai Mamoe’ i lenei taimi o le iuga, tetee ma sauaina i latou o lo galulue e avea ma amupasa o Malo. O lea, e le mafai ona faatoilaloina le Tamai Mamoe, ma e faapena foi ana auauna i luga o le lalolagi o e o loo faaauau pea ona talaia le tala lelei o le Malo o le Atua e ui lava i faasasaga, tuuina i le falepuipui, ma e oo lava i le oti.—Mataio 10:16-18; Ioane 16:33; 1 Ioane 5:4.

13. Ai se a ua le mafai ai ona avea Malo Aufaatasi ma malosi e aumaia le filemu moni?

¹³ O le meamoni, e le mafai ona avea Malo Aufaatasi o se malosiaga na te aumaia le filemu moni. O le o loo tietie ai, o “Papelonia le Aai Tele” o se tasi e sili atu ona leaga i le faia o taua i le talafaasolopito, ma “ua ona i le toto o le au paia ma le toto o e na molimau ia Iesu.” (Faaaliga 17:6) O taua a malo o loo lagolagoina lena faalapotopotoga ua lilofia ai le lalolagi i le toto. (Mataio 24:6, 7) Ma o le malosi o loo i o latou tua, o Satani le Tiapolo, le “tarako tele” e le o se tausia le filemu. (Faaaliga 12:9, 17; 13:2) E le mafai ona olioli le fanau a tagata i se saogalemu a o i ai pea nei mea. E tatau ona aveesea.

O Laasaga Tatau Agai i le Filemu

14. (a) I le faaaliga a Ioane, o le a na tupu i le tietie i le manu feai? (e) O le a faapefea ona faataunuuina lenei mea?

¹⁴ E muamua lava ona aveese tapuaiga sese, i se auala e lei faatalitalia. O le auala la lenei o le a faia ai: “O nifo foi e sefulu na e iloa i le manu feai, latou te ʻinoʻino i le fafine talitane, ma faasaunoa ia te ia, ma to ese ona ofu, latou te ʻaai foi i lona tino, ma susunu ia te ia i le afi.” Paga se mea e faateia ai le fanau a tagata! (Faaaliga 17:16; 18:9-19) O le mea e faaumatia ai, o “nifo” lotonuu, ua taulamua i le faalapotopotoga o Malo Aufaatasi, lea o le a faaleagaina o ia. Maeu se ofoofogia ua faamanatu mai e lenei mea ia i tatou le valoaga a Iesu faapea o le a faaumatia e “le mea inosia” “Ierusalema!” (Mareko 13:14-20; Luka 21:20) Ae peitai, e ui lava o malo o le a faia lenei faaoosala, peitai o loo latou tauaveina le faamasinoga a le Atua i le “fafine talitane sili,” e aofia ai ma Kerisinetoma. O le iuga? “E le toe iloa lava” tapuaiga sese.—Faaaliga 17:1; 18:21.

15, 16. (a) O le a le “puapuaga tele”? (e) O le a o le a iu i ai? (i) O le a faapefea ona taofia Satani mai lona faaleaogaina o fuafuaga mo le filemu o le fanau a tagata?

¹⁵ Sa fetalai Iesu faapea o le faaumatiaga o Kerisinetoma o le a avea ma amataga o “le puapuaga tele, e leai sona tusa le amataga o le lalolagi, ua oo lava i ona po nei; e le toe faapea foi amuli.” (Mataio 24:15, 21) A o faaauau pea le puapuaga tele, o le a tuuina atu e le Malo o le Atua le faamasinoga faaoosala i vaega faapolitiki ma e faatauoa o le faalapotopotoga a Satani. (Tanielu 2:44) Ua vaaia nei e Ioane le Tupu i ana gaoioiga: “Na aʻu iloa atu le lagi ua avanoa, faauta foi, o le solofanua sinasina, o le tietie ai foi ua igoa ia o le Faamoni ma le Moni, o le amiotonu foi na te faamasino ai ma tau ai le taua.” O loo faasaga tau atu ia te ia faiga malo faapolitiki o le lalolagi faatasi ai  ma le ‘faatagata o le manu feai.’ O le iuga o le taua? Ua toe taʻua foi o le faaumatiaga mo e faaleaga le filemu!—Faaaliga 19:11, 19-21.

¹⁶ O le a tuua ai na o le faasoesa sili e tasi o le filemu: O Satani le Tiapolo. Ua faamatala atili mai e Ioane le faaleaogaina o lenei fili sili o le fanau a tagata: Na au iloa foi le agelu ua alu ifo i le lagi, ua ia te ia le ki o le to e le gata, ua i lona lima foi le maea uamea tele. Ua pue foi e ia le Tarako, o le gata tuai, o le tiapolo lea ma Satani, ua ia fusifusi foi ia te ia i tausaga e afe.”—Faaaliga 20:1-3.

O le Taimi o le Filifiliga

17. O a laasaga e tatau nei ona faia e i latou taitoatasi o e naunau ia vaaia le filemu moni?

¹⁷ Maeu se taimi o le suiga mo le fanau a tagata! Ae peitai a o aveesea faalapotopotoga ma malo, o le mea e tupu i tagata taitoatasi e faalagolago tele lava i le filifiliga a le tagata lava ia. I se faaupuga o lona alofa o lea na poloai ai Ieova: “Ia muai talaʻiina foi lenei tala lelei i nuu uma lava e ao ai,” a o lei oo mai le puapuaga tele. (Mareko 13:10) Ua valaaulia e alolofa i le filemu ina ia “o ese mai” Papelonia le Aai Tele. (Faaaliga 18:4) O i latou o i Kerisinetoma ua faanatinatia ina ia ‘sosola i mauga.’ (Luka 21:21) O i latou e gauai i le Malo o le Atua, e tatau ona alofa i le ‘faailoga o le manu feai.’ (Faaaliga 14:9-12; Ioane 17:15, 16) O le motu o tagata e toatele o e lotofaamaoni o le a “o mai nai le puapuaga tele.” (Faaaliga 7:9-14) O le mea moni, o le a leai se tasi e ono faaumatia fua faatasi ma le faiga o mea a Satani.—Faataoto 2:21, 22.

18, 19. (a) O le a e mafai ona fai atu po o afea e pa ai le puapuaga tele? (e) O faapefea ona sauniunia nei e Kerisiano i latou mo lena taimi?

¹⁸ O afea o le a oo mai ai nei mea e gatete ai le lalolagi? Ia, ua faalogoina le “tala lelei”  i le lalolagi atoa i aso nei. Ua tu nei “le mea inosia” i lona tulaga. (Mataio 24:14-16) O le mea moni o le ‘faatagata o le manu feai,’ ua ausia le laasaga lona lua o lona i ai, ma ua i ai nei i le taimi “e alu atu ai i le malaia.” (Faaaliga 17:8) O le faataunuuga o le “faailoga” ua faaalia ai ua 71 nei tausaga talu ona tatou ola i le taimi o le toe afio mai o Iesu, talu mai le 1914. (Mataio 24:3) Sa fetalai Iesu: “E faapea foi outou, pe a outou iloa ai mea uma, tou te iloa ai, ua latalata ia, ua i faitotoa lava. E moni, ou te fai atu ia te outou, E le mavae atu lava lenei tupulaga, sei oo mai nei mea uma.” (Mataio 24:33, 34) O lea, ua tatau ona matua lalata tele mai le “puapuaga tele.” E mafai ona tatou tautala maoti na i lo o lea? E le o le taimi lenei.

¹⁹ Sa valoia mai e le aposetolo o Paulo: “Aua pe a latou fai ane: “O loo filemu, ua le afaina! ona oo lea ia te i latou o le fano faafuasei.” (1 Tesalonia 5:3) O le mea lea, o le puapuaga tele o le a avea ma mea e teʻi ma ofo ai le fanau a tagata lautele. Ae peitai, o le a le mafai ona avea ma mea e teʻi pe ofo ai Kerisiano. Ua latou iloa o le a oo mai, ma ua latou mulimuli i le faatonuga a Iesu: “O lea ia outou mataala ai ma tatalo e le aunoa, ina ia taʻuaogaina outou e sao mai ia mea uma ua tali oo mai.”—Luka 21:36.

20. Ai se a e le mafai ai ona faapea atu nei Kerisiano po o afea o le a oo mai ai le puapuaga tele?

²⁰ Ae ui lea, e le mafai ona taʻu atu e Kerisiano mo le auiluma le taimi patino o le a pa ai le puapuaga tele. E lei faailoa maia e Ieova “lea aso ma le itu aso.” (Mareko 13:32; Mataio 24:42) O lea, mo se faaaoaoga, pe a faalauiloa mai e Malo Aufaatasi le tausaga e 1986 o se “Tausaga Faavaomalo mo le Filemu” a e ua matauina ma le naunautai e Kerisiano taualumaga. A e latou te le mafai ona fai atu nei pe o le faamaoniga lenei o mea e faataunuuina ia upu o Paulo o loo taʻua i luga. O le mea lea, ua latou faafetai tele ina ua mafai e Ieova ona faailoa ia te i latou le ‘faatagata o le manu feai’ ma “le mea inosia.” O lea, ua latou vaaia lenei faalapotopotoga e pei ona silasila i ai Ieova ma e le faaseseina i latou i ana taumafaiga e aumaia le filemu.

21. (a) O le a le filemu o olioli ai nei Kerisiano? (e) O le a le mea e mafai ona tulimataia ma le mautinoa o loo i luma?

²¹ O i latou uma lava “o loo mataala” ma gauai atu i le Malo o le Atua ua olioli nei i le filemu. O loo faatasi ma i latou Ieova “le Atua o le manuia [filemu].” ma avatu ia te ia latou “le manuia [filemu] foi mai le Atua o loo silisili lava i mea uma e manatu i ai.” (Filipi 4:7, 9) A e le gata foi i lea, o loo latou tulimataia le taimi o i luma e le o toe mamao o le a olioli ai le lalolagi atoa i le faataunuuga o le valoaga matagofie a Isaia: “O le mea e tupu i le amiotonu o le manuia lea; e tupu mai foi i le amiotonu le filemu ma le saogalemu e faavavau. E nonofo foi loʻu nuu i le mea e manuia ai, ma fale e saogalemu ai, ma mapusaga e filemu ai.” (Isaia 32:16-18) O lenei mea o se saogalemu i le lalolagi aoao i le fuafaatatau. (Isaia 11:9) Ma o le a avea o se filemu moni aua o Ieova lava ia na te aumaia.

[Faaopoopoga i lalo]

O E Manatua?

□ O a nisi o uiga o le manu feai i le Faaaliga 17?

□ O le a ua fai ma sui o lenei manu feai?

□ Ai se a e le mafai ai e lenei manu feai faafaatusa ona aumaia le filemu?

□ O le a faapefea ona aumaia e le Malo o le Atua le filemu ma le saogalemu tumau mo le fanau a tagata?

□ Atonu e faapefea ona maua e tagata taitoatasi aoga mai lenei malamalamaga?

[Fesili mo le Suʻesuʻega]

[Faamatalaga faaopoopo i le itulau 15]

Sa vaaia e Pope Paulo Vl i Malo Aufaatasi “le ata o le uiga o le alofa silisili ese o le Atua mo le agaigai i luma o le aiga faaletagata.”

[Ata i le itulau 17]

O e alolofa i le filemu ua faanatinatia i latou ia ia “o ese mai” Papelonia le Aai Tele