Lipoti a E Faalauiloa le Malo

Mauaina o se Aoga i le Olaga

I LENEI lalolagi leaga, ua luga lalo, e i ai se vaega o tagata o loo sailiili mo se mea aoga ma le uiga i le olaga. Ua latou fesili: ‘Aisea ua tatou i ai i nei? O fea na tatou o mai ai? O le a ua taofia e le lumanai?’ E toatele ua liliu atu i le Atua mo le fia mauaina o tali, ma na te le faasaina i latou. (Mataio 7:7, 8) E faapena se mea na oo i ai se tasi i fafine i Eleni. Ua faapea mai o ia:

□ “E 14 tausaga a e amata ona ou tau manatu i le tagata ma le aoga o lona olaga. Ina ua maea au suesuega i le aʻoga e uiga i le tagata, sa ou manatu atonu o le a aumaia e vailaau ni tali i au fesili, a e peitai sa ou lafoaia ia manatu ina ua le mafai ona faamatala mai ia te aʻu le amataga o le tagata.” Sa ia faapea mai atili: “Na liliu atu oʻu manatu i faiga faataulaitu po o e iite i fetu, ma sa ou suesue ai loa tapuaiga i Sasae, e pei o le Isalame ma le tapuaiga Tipeti. Sa amata ona ou faatatauina aʻoaʻoga a Lama i loʻu olaga, ona oo atu ai lea i le faataulaitu. Ina o ou faafesootai agaga, sa ou lagona faapea ua ou maua le upu moni. Ua manatu tapuaiga i Sisifo o o latou talitonuga faavae i le Tusi Paia, a e talu ai sa le mafai e laʻu faiaʻoga tau tapuaiga i le aʻoga ona tali o au fesili mai le Tusi Paia, o lea sa faaauau ai pea ona faia au faiga faaagaga, ma suesuega i fetu, ma faiga e faasioaina ai se tasi i le moe gase.”

I le 1982 sa faafesootaia ai e lenei fafine Molimau a Ieova, ae peitai sa ia faapea mai: “O la latou faamalamalamaga o le Tusi Paia sa matua sili atu ona faigofie pe a faatusatusa atu i aʻoaʻoga. Ae peitai e i ai lava se mea sa uunaia au ia taumafai e suesue le Tusi Paia. O lea, i loʻu lagona faavivii sa ou talia ia se suesuega faale-Tusi Paia ina ia faamaonia ai e sese Molimau.”

Ina ua mavae le tausaga na ou suesueina ai le Tusi Paia ma Molimau a Ieova, ua ia faamatala mai: “Nei ou te faafetai atu ia Ieova ma loʻu loto atoa ona o le fesoasoani mai ia te aʻu e aʻoaʻoina le upu moni. O lenei ua ou saoloto mai aʻoaʻoga e le faamaonia ma faiga faataulaitu. E matua faigofie ma e suegofie foi le upu moni i totonu o le Afioga a le Atua, le Tusi Paia. Ua ou maua nei tali i au fesili; ua ou iloa foi le amataga o le tagata ma le aoga o le olaga.”

□ O se tamaloa Eleni e 27 tausaga sa muai aafia i faiga faakomunisi sa ia maua foi aoga o le olaga., Na ia aʻoga faainisinia i Siamani, ona ia toe foi lea i Eleni ma tusia lona igoa i le vaegaʻau. O mea na oo ia te ia na ia mautinoa ai faapea ua le toe i ai le tagata i se tulaga e foia ai e ia lava ona faafitauli ma faia ai ia lelei lona olaga. A o lei alu lenei tamaloa i Siamani, sa talanoa se Molimau tuaoi ia te ia e uiga i le Tusi Paia, ma ua ia toe manatu na talanoaga. O lea, i nai masina a o lei aluese mai le vaegaʻau, sa ia taʻua atu i lona alii ofisa sili: “Ou te le o toe manatu o aʻu o se fitafita!” Sa lagona e lona aiga ai ua i ai se faafitauli i lona mafaufau ma faamalosia o ia e vaai se fomaʻi o le mafaufau. I lenei mea sa avatu ai ia te ia ni inumaga tetele o ituaiga o vailaau eseese, sa aafia ai o ia faaletino ma le mafaufau seia oo ina mulimuli ane taofia lona toe faaaogaina.

Sa maua o ia e ni Molimau se toalua i le faiva mai lea fale i lea fale ma amata loa ona suesue le Tusi Paia ma i laua. Ina ua uma ona aumaia lona olaga ia talafeagai ma tapulaa a Ieova, sa avea ai loa o ia ma faalauiloa ola o le tala lelei. I le 1984 sa auai o ia ma nisi o lona aiga e toasefulu na ia valaaulia i le Faamanatuga.

Ioe, ua ia maua se mea aoga i le olaga, ma ua ia te ia foi se faanaunauga e auauna ia Ieova o se paeonia faapito. O lona faamoemoe ia maua le ola i le Faiga Fou amiotonu a Ieova.—Isaia 65:17, 18.