O “le Mea Inosia”—Ua Le Taulau ona Aumaia Le Filemu

“A iloa e outou ua siosiomia Ierusalema i ʻau o le taua . . . o e ua i Iutaia ia latou sosola i mauga.”—LUKA 21:20, 21.

1, 2. (a) Ai se a e le mafai ai e tagata ona aumaia se filemu e ala i faalapotopotoga e pei o le Malo Aufaatasi? (e) O le a faapefea ona aumaia e le Atua le filemu i le lalolagi?

E UI LAVA ina taumafai malosi tagata e aumaia le filemu ma le saogalemu i le faatutuina o faalapotopotoga e pei o Malo Aufaatasi, o le a le mafai ona faamanuiaina. Ai se a? Aua e le o tausia e le fanau a tagata i aso nei le filemu ma le Atua, ma o le saogalemu e faavavau e mafai ona faavae i le na o le tausia lea e le tagata o le filemu ma Le na Faia o ia. (Salamo 46:1-9; 127:1; Isaia 11:9; 57:21) E faapefea ona foia lenei faafitauli? E fiafia lava, aua o loo tauaaoina e Ieova le mataupu. O le filemu ma le saogalemu o le a aumaia lava i luga o lenei lalolagi e ala i le Malo o le Atua e ala i lona Alo o Iesu, aua i lona fanau mai sa pepese ai agelu “o le viiga i le Atua i mea aupitoaluga; ma le manuia i le lalolagi; o le finagalo alofa i tagata.”—Luka 2:14; Salamo 72:7.

² I le uluai senituri, sa faalauiloa ai e Iesu le Malo o le Atua ma ofo atu ia i latou o loo tausia le filemu le avanoa e avea ai ma atalii o le Atua ma pule lagolago faatasi ma ia i lena Malo. (Mataio 4:23; 5:9; Luka 12:32) O mea na sosoo mai ai ua tali tutusa lava ma mea o loo tutupu i lo tatou foi senituri. O le iloiloina o nei mea o le a tatou iloa ai le tele o mea e uiga i le ala o le “filemu ma le saogalemu” i le lumanai a le faalapotopotoga a tagata, o Malo Aufaatasi.

Faia le Filifiliga a Tagata Iutaia

3. O ai sa taumafai e tausia le filemu ma le saogalemu i le taimi o Iesu, ma ai se a na matua le atoatoa ai ona faamanuiaina lenei mea?

³ Sa pulea e le emepaea o Roma le tele o vaega o le lalolagi i aso o Iesu, ma sa faia ona lava manatu e uiga i le filemu ma le saogalemu. Sa faia lea, e ala i le faateleina o ana vaegaʻau, ina ia faamalosia le Pax Romana (Filemu o Roma) i le lalolagi lautele. Ae peitai o le Pax Romana e le mafai ona avea ma filemu tumau, aua e le mafai e Roma faapaupau ma ana ʻau e tele ona faia o se leleiga i le va o le Atua ma tagata. O lea, o le Malo na faalauiloa mai e Iesu sa matua silisili lava.

4. Sa faapefea ona tali atu le toatele o tagata Iutaia i le talaiga a Iesu? (e) Ui i lea, o le a na tuputupu malie ae i le uluai senituri?

⁴ Ae peitai, o le toatele o tagata i le atunuu o Iesu sa teena le Malo o le Atua. (Ioane 1:11; 7:47, 48; 9:22) Sa manatu o latou taʻitaʻi o Iesu o se faamataʻu i le saogalemu o le atunuu, ma sa latou tuuina atu o ia ina ia fasiotia i lo latou faapea atu: “E leai so matou tupu, na o Kaisara.” (Ioane 11:48; 19:14, 15) Ae peitai o nisi o Iutaia, ma mulimuli ane ai o tagata o Nuu Ese, sa latou fiafia e iloa Iesu o le tupu filifilia a le Atua. (Kolose 1:13-20) Sa latou talai atu e uiga ia te ia i nuu e tele, ma sa avea ai loa Ierusalema ma ogatotonu o le aufaatasi faavaomalo o Kerisiano.—Galuega 15:2; 1 Peteru 5:9.

5, 6. (a) Na faapefea ona tuputupu aʻe le faia i le va o Roma ma Iutaia? (e) O le a le lapataiga na tuuina atu e Iesu, ma na faapefea ona faasaoina ai ola o tagata Kerisiano i le 70 T.A?

 ⁵ E ui lava i le mea moni faapea na filifilia e tagata Iutaia Kaisara na i lo o Iesu, o le faia i le va o Roma ma Ierusalema sa agai atu ina faaleagaina. O tagata Iutaia Tuutoina sa latou faia ni osofaiga faatupu faalavelave lalafi solo faasaga i le malo ma oo ai lava i le 66 T.A. na sasao aʻe se taua tele na le toe faia faalilolilo. Sa taumafai vaegaʻau a Roma e toe faafoisia mai le Pax Romana, ma sa lei pine ae siomia Ierusalema. Sa faitaulia lenei mo Kerisiano. I le tele o tausaga ua mavae sa lapatai mai Iesu: “A iloa e outou ua siosiomia Ierusalema i ʻau o le taua, ia outou iloa i lea aso ua latalata lona faatafunaina. O lea aso, o e ua i Iutaia ia latou sosola i mauga; o e ua i totonu o le aai ia latou o ese.” (Luka 21:20, 21) Ua siomia nei Ierusalema, ma sa faatalitali Kerisiano mo se avanoa latou te sosola ese ai.

⁶ Na vave lava ona taunuu lenei mea. Ua lamatia nei e Roma pa o le malumalu, ma o le toatele o tagata Iutaia ua nonofo sauni e sii lima a e sa toe tuumuli faafuasei le taʻitaʻi ʻau Roma, o Cestius Gallus ma lana vaegaʻau ma o ese. O tagata Iutaia tetee na latou puea le avanoa e toe faamalosia ai la latou tetee, ae peitai na sosola ese Kerisiano mai le aai o le a faaumatia. I le 70 T.A. na toe taliu mai ʻau a Roma, ma tolauapi faataamilo i pa o Ierusalema, ma i lea taimi na matua nutipalaina le aai. Ua faapefea ona aafia i tatou i lenei mala i talatuufaasolo? I lenei mea: o le lapataiga a Iesu na faasaoina ai ola o ona soo, ua i ai foi se uiga mo i tatou i aso nei.

E Sili Atu Na i le Tasi Le Faataunuuga

7-9. (a) E faapefea ona tatou iloa o le valoaga a Iesu e uiga i le siomiaina o Ierusalema e ʻau e sili atu i le tasi lona faataunuuga? (e) E faapefea ona lagolagoina lenei mea e le faitauina ma le malamalama o le tusi o Tanielu?

⁷ O lenei lapataiga sa avea o se vaega o le valoaga umi na fetalai i ai Iesu e tali atu ai i se fesili taua. Sa fesili ona soo: “Pe oo afea ia mea [le faaumatiaga o le malumalu o Iutaia], pe se a foi le faailoga o lou maliu mai, ma le gataaga o le lalolagi?” I lana tali sa taʻu atu e Iesu se faailoga e faia aʻe i ni taualumaga se tele, e aofia ai ma le siomia o Ierusalema. (Mataio 24; Mareko 13: Luka 21) I tausaga mulimuli ane ina ua mavae le maliu o Iesu, o le tele o vala o lenei valoaga sa faataunuuina, faaiuina ai i le faaumatiaga o Ierusalema ma le iuga o le faiga o mea faa-Iutaia i le 70 T.A.—Mataio 24:7, 14; Galuega 11:28; Kolose 1:23.

⁸ Ae peitai, sa fesili foi le au soo e uiga i le  “toe maliu mai” o Iesu, lea o loo faafesootaia e le Tusi Paia ma le iuga o le faiga o mea a le lalolagi. (Tanielu 2:44; Mataio 24:3, 21) Talu ai o le faatasi mai faaleagaga o Iesu ma le iuga o le faiga o mea a le lalolagi sa lei tupu i le uluai senituri, o le lumanai la, ua faatalitalia ai nei se faataunuuga sili o le valoaga a Iesu, faatasi ai ma na mea tutupu i le uluai senituri ua aumaia ai se fua mo se faataunuuga tele. O le a aofia ai lenei mea se faataunuuga e sili atu ona tele o le lapataiga a Iesu e uiga i le faaumatiaga o Ierusalema.

⁹ O le a sili atu ona manino o lenei mea pe a tatou iloiloina le auala sa faamauina ai lenei lapataiga i isi tusi e lua o le Tusi Paia ia o loo tusia ai. I le Mataio o le siomiaina e vaegaʻau ua faamatalina faapea o “le mea inosia e faatafunaina ai, na fai mai ai e le perofeta o Tanielu, ua tu i le mea paia.’ (Mataio 24:15) I le faamatalaga a Mareko “o le mea inosia” ua tu “i le mea e le tatau ai.” (Mareko 13:14) Fai mai le faamatalaga a Mataio “o le mea inosia” o loo taʻua foi i le tusi a Tanielu. O le mea moni, o le faaupuga lea “o le mea inosia” e faatolu ona taʻua i lena tusi: e faatasi i le (perulale) Tanielu 9:27 o le vaega lena o le valoaga na faataunuuina ina ua faaumatia Ierusalema i le 70 T.A. atoa foi ma le Tanielu 11:31 ma le Tanielu 12:11. E tusa ai ma mau mulimuli nei e lua, “o le mea inosia” o le a faatuina i se tulaga i “ona po ua tuupoina” po o le taimi “o le iuga.” (Tanielu 11:29; 12:9) Ua tatou ola nei i le taimi o le iuga talu mai le 1914; i lea, e faatatauina foi le valoaga a Iesu i aso nei.—Mataio 24:15.

Filifiliga a Kerisinetoma

10, 11. Ua faapefea e mea tutupu i lo tatou senituri ona pei o na i le uluai senituri?

¹⁰ I lo tatou senituri, o loo mulimuli lava i le fua o mea tutupu e tutusa lelei ma le uluai senituri. I aso nei, e pei foi o aso na, o loo i ai se emepaea o loo pulea le lalolagi. O le malo o aso nei o Amerika ma Peretania, o le o loo taumafai malosi e faaofi ona manatu ma ana auala e uiga i le filemu ma le saogalemu i le fanau a tagata. I le uluai senituri, sa teena e Isaraelu faaletino Iesu i le avea o se Tupu faauuina a le Atua. O le “maliu mai” o Iesu o se Tupu faapaleina a Ieova na amata i le 1914. (Salamo 2:6; Faaaliga 11:15-18) Ae peitai o malo, e aofia ai ma Kerisinetoma, sa mumusu e amanaia o ia. (Salamo 2:2, 3, 10, 11) O le mea moni, ua faaaafia i latou i taua saua a le lalolagi mo le fia silisili faavaomalo. O taʻitaʻi lotu Iutaia—sa taimua i le teena o Iesu. Talu mai le 1914 ua latou galulue faatasi i malae faapolotiki ma tetee atu i le talaiga o le tala lelei o le Malo.—Mareko 13:9.

¹¹ Ae ui i lea, e pei lava o aso o Iesu, e toatele tagata i aso nei ua latou fiafia e amanaia le Tupu a Ieova ma ua faalauiloa atu foi le tala lelei o lona Malo i le lalolagi atoa. (Mataio 24:14) Ua sili atu nei i le lua ma le afa miliona Molimau a Ieova ua i ai lagona faamaoni i le Malo o le Atua. (Faaaliga 7:9, 10) Ona o lo latou solitu i faiga faapolotiki a lenei lalolagi ua ia i latou ai le faatuatua atoatoa i fuafuaga a Ieova i le aumaia o le filemu ma le saogalemu.—Ioane 17:15, 16; Efeso 1:10.

“O Le Mea Inosia” i Aso Nei

12. O le a “le mea inosia” i ona po nei?

¹² O lea, o le a le “mea inosia e faatafunaina aʻi” i aso nei? I le uluai senituri o vaegaʻau a Roma na o atu e toe faatuina le Pax Romana i Ierusalema. Ae peitai, i aso nei, o malo sa tau i le Taua l a le Lalolagi sa fulisia o latou taofi e uiga i le aoga o faiga taua ina ia toe aumaia ai i le filemu ma faataʻitaʻi ai loa se isi mea fou: o se faalapotopotoga faavaomalo ina ia faatumauina ai le filemu i le lalolagi. Sa amata ona ola aʻe lenei mea i le 1919 o Malo Sosoo ma o loo i ai pea i aso nei o Malo Aufaatasi. O le “mea inosia e faatafunaina aʻi” lena faaona po nei.

13, 14. (a) O a faamatalaga faaviivii na faia e Kerisinetoma faatatau i “le mea inosia”? (e) Ai se a o se ifo i tupua ai lenei mea, ma o fea na ia tuʻu ai “le mea inosia”?

¹³ O le mea malie ai, o le upu Eperu ua faaliliuina i le “mea inosia” i le Tanielu o le  shiq·qutsʹ. I le Tusi Paia, o lenei upu ua faaaogaina faatatau i tupua ma e ifo i tupua. (1 Tupu 11:5, 7) Faatasi ai la ma nei mea i lou manatu, sei faitau ni faamatalaga mai taʻitaʻi lotu e uiga i Malo Sosoo:

“O le a lenei vaaiga o se faatasiga faalelalolagi o le fanau a tagata . . . pe afai e le o faatasia e le Malo o le Atua?” “Ua mauaa Malo Sosoo i le Tala lelei” (Federal Council of the Churches of Christ i Amerika) “O malo taitasi uma [o Malo Sosoo] o mea ma gaoioiga atonu o le a faapea mai ua latou faataunuuina le finagalo o le Atua e pei ona faailoa mai i aʻoaʻoga a Iesu Keriso. (Epikopo o le Lotu Egelani) “O lea ua faamalo mai le fono i le lagolagosua ma tatalo a tagata Kerisiano uma lava i Malo Sosoo ua na o lea le mea faigaluega aoga mo le aumaia o le [filemu i le lalolagi].” (O Vaega Lautele o Lotu Papatiso, Faapotopotoga ma le Presbyterian i Peretania). “[O Malo Sosoo] ua na o lea se taumafaiga soo faatasi ua faia ina ia faatinoina manaoga na toe taʻua a le Vaaiga Paia.”—Katinale Bourne, le Akiepikopo o Westminster.

¹⁴ Ua le gata ina teea e malo le Malo o le Atua a e ua faatuina foi la latou lava faalapotopotoga e aumaia le filemu, o le fouvale le mea lena. Ina ua tuu faatasi e taʻitaʻi lotu lena faalapotopotoga ma le Malo o le Atua atoa ma le Tala Lelei, ma faalauiloa mai ua na o lena le “mea faigaluega aoga” mo le aumaia o le filemu, o le ifo i tupua le mea lena. Ua latou tuu le mea i le tulaga o le Malo o le Atua, “i le paia.” O le mea moni, sa tu i le mea “e le tatau ai.” (Mataio 24:15; Mareko 13:14) Ma ua faaauau pea e taʻitaʻi lotu ona lagolagosua i le sui o Malo Sosoo, o Malo Aufaatasi, na i lo o le faasinoina o tagata i le Malo ua faavaina o le Atua.

Le Mataʻutia mo Kerisinetoma

15, 16. O faapefea ona tuputupu aʻe faia i le va o Kerisinetoma ma malo lagolagoina “le mea inosia”?

¹⁵ E ui lava ina filifilia e lotu o Kerisinetoma Malo Sosoo ma lona sui na i lo o le Malo o le Atua, o la latou faia ma Malo taitasi ua agai atu ina le manuia. O lenei mea ua tali tutusa lava ma le mea na tupu i le va o Iutaia ma Roma. Talu mai le 1945 ua faaopoopo pea e Malo Aufaatasi le tele o atunuu o ē e lē o ni Kerisiano pe tetee foi, ma e le lelei lenei tulaga mo Kerisinetoma.

¹⁶ E le gata i lea, i le tele o atunuu e i ai tauvaga i le va o lotu o Kerisinetoma ma le Setete. I Polani ua vaaia ai le Lotu Katiliko o se faatava i le pule. I Aiolani i Matu ma Lepanona, ua faafaigata e lotu Kerisinetoma faafitauli o le filemu ma le saogalemu E faaopoopo i lena ua aumaia e lotu o Kerisinetoma nisi o e pei o Iutaia Tuutoina, ua uunaia sauaga. O lea la, o le Komiti o Lotu Porotesano i le Lalolagi ua latou foai atu meaalofa i faalapotopotoga tau faamatau, a o faifeau Katiliko o loo tau i togavao e avea o ni fitafita lalafi solo faatupu faalavelave ma auauna i fouvalega a malo.

17. (a) O le a Ierusalema faaonapo nei? (e) O le a o le a tupu ia te ia i le iuga?

¹⁷ O le a faaalia lava e le taimi ia le mamao ua oo i ai le le manuia i le va o lotu o Kerisinetoma ma malo, ae peitai o mea lava na tutupu i le uluai senituri na faaatagia ai le iuga o nei mea uma. E pei ona muai iloa e Iesu, i le uluai senituri sa faaumatia ai e ʻau tau a Roma Ierusalema i se puapuaga tele. E moni foi lea e tusa ai ma le ata faavaloaga, o malo atoa ma Malo Aufaatasi o le a osofaia ma faaumatia “Ierusalema,” o lona uiga, o le siomaga o Lotu Kerisinetoma lena.—Luka 21:20, 23.

Sosola i Mauga

18. O le a e ao ia tagata lotomaulalo ona faia pe a latou manino ua tu “le mea inosia” i lona tulaga?

¹⁸ I le uluai senituri, ina ua mavae ona aliaʻi mai le “mea inosia,” sa maua e Kerisinetoma le avanoa e sosola ai. Sa faatonuina e Iesu i latou ia vavave ona faia faapea aua latou te le iloa po o le a le umi o le a tuu mai ai lena avanoa. (Mareko 13:15, 16) I le auala lava lea  e tasi, ina ua iloa e tagata lotu faamaoni i aso nei ua i ai “le mea inosia”, e ao loa ona latou vave sosola ese mai tapuaiga o loo pulea e Kerisinetoma. O sekone uma latou te nonofo ai i ina ua lamatia o latou olaga faaleagaga, ma o ai na te iloa po o le a le umi o le avanoa ua tatalaina mo i latou?

19, 20. (a) O le a na faia e Kerisiano o le uluai i senituri ina ua latou vaaia ua siomia Ierusalema e ʻau a Roma? (e) O le a ua fai ma sui “o mauga” i aso nei, ma o le a e ao ona faanatinati tagata loto maulalo o aso nei e sosola i ina?

¹⁹ O le tala lelei a Luka na lapataia ai Kerisiano o ona aso ina ia sosola e se pe a latou vaaia “ua siosiomia Ierusalema i ʻau o le taua.” E pei ona ua uma ona tatou matauina, na o mai na ʻau i le 66 T.A. ma na maua ai foi le avanoa e sosola ai i lena lava tausaga ina ua tuumuli ʻau a Cestius Gallus. Ina ua sosola Kerisiano, sa faaauau pea le taua i le va o tagata Iutaia ma Roma—e ui lava ina sa le faia i Ierusalema. Na auina atu e Emeperoa o Nero Vasepasana i Palesetina, ma sa faamanuiaina ni taumafaiga faatosina sa faia i ai i ina i le 67 ma le 68. O lea, na maliu ai loa Nero, ma aafia ai Vasepasana i le soloai ane i le pulega tau Tupu. Ae peitai ina ua uma ona faia o ia ma emeperoa i le 69 T.A. na ia auina atu loa lona atalii o Tito ina ia faaumaina le taua i Iutaia. I le 70 T.A. Sa faaumatia ai loa Ierusalema.

²⁰ O lea, sa lei faatali Kerisiano i Ierusalema sei matamata i nei mea uma. Ina ua latou vaaia ʻau e siosiomia ai, sa latou iloa lelei ua i ai le aai i se tulaga mataʻutia e oti ai. E faapena foi aso nei, o le auupega e faaumatia ai Kerisinetoma ua aliaʻi mai. Ioe, a vaaia loa le tulaga mataʻutia ua i ai Kerisinetoma, e ao loa ona tatou ‘sosola i mauga,’ i lena nofoaga o sulufaiga a Ieova faatasi ma lana faalapotopotoga faatiokarate. O isi valoaga ua le o aumaia ai se faavae e talitonu ai faapea o le a i ai se manavaga i le osofaiga puupuu i luga o le mea moni, e le manaomia se manavaga i le va ma fetauaiga. O tagata loto maulalo ua atamamai e ao ona sosola ese nei mai Kerisinetoma.

Ierusalema ma Kerisinetoma

21. Ai se a na aliaʻi mai ai le “le mea inosia” i le faaiuga o le taimi o le iuga o Ierusalema, a o lenei senituri na aliaʻi mai i le amataga o le iuga o le taimi a lenei faiga o mea?

²¹ E ao ea ona faateʻia tatou faapea i le uluai senituri na aliaʻi mai “le mea inosia” a e toeitiiti lava faaumatiaina Ierusalema, a o aso nei na aliaʻi mai i le amataga lava o le taimi o le iuga o lenei lalolagi? E leai. I tulaga taitasi e aliaʻi mai “le mea inosia,” i le taimi tonu e finagalo ai Ieova ia sosola ese ona tagata. I le uluai senituri, sa nonofo ai pea Kerisiano mo sina taimi i Ierusalema ina ia talai ai i ina. (Galuega 1:8) Na o le 66 T.A. na aliaʻi mai ai “le mea inosia” ina ua latalata mai le faaumatiaga, ma lapataia ai i latou ia sosola ese. A e o le “i ai” i le Ierusalema—faaona po nei o lona uiga o le avea o se vaega o taualumaga faalotu a Kerisinetoma. * E faigata ona auauna ia Ieova i totonu o se siomaga iuvale ma le aposetate. O le mea lea, i le uluai taimi lava o le iuga o lenei lalolagi na aliaʻi mai ai “le mea inosia,” e lapataia Kerisiano ina ia  sosola ese O loo faaauau pea ona faia o lenei solaaga mai Kerisinetoma, o tagata taitoatasi uma ua i ai se lapataiga ina ia sola ese i le taimi lava e manino ai faapea ua tu “le mea inosia” i lona tulaga.

22. O a fesili o tumau pea le manaomia ona taliina?

²² O lea la, atonu o le a tatou fesili, o le a o le a taʻitaʻiina atu i lenei gaoioiga e lei faatalitalia, le faaumatiaga o Kerisinetoma e aiaiga faavaegaʻau mai Malo Aufaatasi? O afea e oo mai ai? Ma o le a faapefea ona mafai ona saosaolaumea lenei tulaga i le filemu ma le saogalemu i lo tatou lalolagi? O le a tatou talanoaina nei fesili i le isi mataupu e sosoo ai.

[Faaopoopoga i lalo]

O e Manatua?

□ Ai se a e tatau ai i le valoaga a Iesu i “le mea inosia” ona i ai sona faataunuuga i aso nei?

□ O le a “le mea inosia” i aso nei, ma o anafea na iai i lona tulaga?

□ Ua faapefea ona fesoasoani le Luka 21:20, 21 ia i latou ia vaaia le faanatinati ona sola ese?

□ O a “mauga” e sosola i ai tagata loto maulalo?

[Fesili mo le Suʻesuʻega]

[Faamatalaga faaopoopo i le itulau 11]

Ina ua tuu faatasi e taʻitaʻi lotu o Kerisinetoma Malo Aufaatasi ma le Malo o le Atua atoa ma le tala lelei, o le ifo i tupua le mea lena