Filemu ma le Saogalemu—E Ala i le Malo o le Atua

“O Fuafuaga a Malo Aufaatasi o: 1. Ina ia tausia le filemu ma le saogalemu faavaomalo.”—Charter of the United Nations.

O se taumafaiga lenei e ao ona faamalo i ai se faaupuga. Ae peitai e pei ona tatou iloa, o taunuuga o le 40 tausaga ua mavae ua mafai ona faamaonia ai faapea ua le taulau Malo Aufaatasi i le ‘tausia ole filemu ma le saogalemu faavaomalo.’ O le a leai lava la ma se eseesega o lona faalauiloa mai o le 1986 o le “Tausaga Faavaomalo o le Filemu.” *

E tasi lava le auala o le a aumaia ai le filemu ma le saogalemu tumau i luga o lenei lalolagi—e ala i le Malo o le Atua i aao o Iesu Keriso. O le malo moni lenei o loo i le lagi lea na aʻoaʻo e Iesu ona soo ina ia tatalo i ai. (Mataio 6:9, 10) Ae ai se a o le a taulau ai o ia ae ua le faamanuiaina Malo Aufaatasi? I ni upu faigofie: O le a faamanuiaina le Malo o le Atua ona o mafuaaga lava ia ua le taulau ai Malo Aufaatasi.

E Manomia e Sili Atu Nai lo le Poto Faaletagata

I la tatou lomiga talu ai nei, sa tatou matauina ai o se tasi o mafuaaga ua matua le taulau ai Malo Aufaatasi ona e lei tuuina mai e le Atua i le tagata le poto po o le aia e pulea ai e ia ia lava. (Ieremia 10:23) O le mea lea, e leai se faalapotopotoga na faia e tagata, tusa lava po o le a le maualuga o ona faanaunauga, e mafai ona taulau i le aumaia o le filemu ma le saogalemu.

 I le eseesega, o Iesu Keriso, le Tupu tofia o le Malo o le Atua, sa ia faataʻitaʻia pea le atamai e sili atu i tagata. (Mataio 13:54) O se faaaoaoga maoae o lana Lauga i luga o le Mauga. (Mataio mataupu 5 e oo i le 7) I lenei lauga sa ia faamatala ai pe faapefea ona maua le fiafiaga moni, faaleleia misa, alofia feusuaiga le mama, ma maua se lumanai saogalemu. E le o se mea tatau ea i se pule ua i ai sea atamai ma le malamalama i le natura o le tagata ona silafia le auala e aumaia ai le filemu ma le saogalemu?

E sili atu i loo lena, o le utaga loloto a Iesu na siitia atili i lona mana faavavega e silafia ai mea o i loto o tagata ma a latou gaoioiga moni ma manatunatuga lilo. (Mataio 9:4; Mareko 2:8) Sei manatunatu po o le a le uiga o lena mea: O se tasi o toatuga o le filemu ma le saogalemu i aso nei o le le le faatuatuaina. O le iloa e isi o mafaufauga ma uiga o isi, ua oo ai i tagata ma malo o le le fefaatuatuaia. O lena le fefaatuatuai ua avea o se pa pupuni i le filemu. Ae peitai o se pule na te mafai ona “silafia mea o i loto o tagata” e le mafai ona aumaia ai se faafitauli.—Ioane 2:25, Knox.

Aveesea Fili Malolosi Atu i lo Tagata

O le tasi mafuaaga sili ua le taulau ai taumafaiga a Malo Aufaatasi e aumaia le filemu ona o aafiaga a le “alii o lenei lalolagi” o Satani le Tiapolo. (Ioane 12:31) Ua iloa e ia ma ana au a temoni ua “saasaa ona po” e aveesea ai i latou. Ua latou maumauai ai e faia le “oi talofa i e o nonofo i le fanua,” sa latou tutu i le ala o le filemu i le vaevaeina lea o le fanau a tagata faapolotiki ma faaleatunuu.—Faaaliga 12:9-12.

O ai e mafai ona ia aveesea na malosi e sili atu i tagata faatupu taua? Ua tali mai le Tusi paia, o Iesu Keriso le ua taʻua o Mekaeli, ma ana agelu, na latou lafoina mai Satani ma ana temoni mai le lagi. O lea ua tatou faitau ai e faapea: “Na aʻu iloa foi le agelu ua alu ifo i le lagi, ua ia te ia le ki o le to e le gata, ua i lona lima foi le maea uamea tele. Ua puʻe foi e ia le tarako, o le gata tuai o le tiapolo lea ma Satani, ma . . . ua ia lafo foi ia te ia i le to e le gata, ua pupuni foi ia te ia, ma tuuina atu le faamaufaailoga i ona luga.” (Faaaliga 20:1-3) O lea, o le a aveesea Satani mai lona i ai. O le a na o lea le auala e mafai ai ona olioli i le ola i le filemu ma le saogalemu moni.

O le “Tama” a le Atua

I la tatou lomiga talu ai sa matauina ai le mafuaaga lona tolu ua le mafai ai e Malo Aufaatasi ona aumaia le filemu ma le saogalemu: Ona o le tama a lenei lalolagi ma, e i ai vaivaiga, mea leaga, a le iuvale ua faailogaina ai sui o lona malo.

I le eseesega e faafouina ai, o le Malo o le a na aumaia le filemu ma le saogalemu o loo faaata mai i le Faaaliga 12:5 o se “tama” a le Atua. O lana pulega ua faaatagia mai ai uiga o le Atua. Matau nisi o uiga alofa na faaalia e lona pule, o Iesu Keriso: o le alofa faataulagaina totino (Ioane 15:12, 13); e  mafana ma faaleuo (Mataio 9:10-13; Luka 7:36-48) ; lotomaulalo (Ioane 13:3-5, 12-17); agalelei (Mareko 6:30-34); alofa mutimutivale (Eperu 2:17, 18; 4:15); tumau i le amiotonu (Isaia 11:4, 5). E te le fiafia ea e gauai i sea Pule?

I Totonu Faatasi ai ma le “Lalolagi Fou”

O le mafuaaga mulimuli o lea le mafai ai ona taulau Malo Aufaatasi i le auamaia o le filemu sa faailoa mai i upu a le na avea muamua ma ona Failautusi mo le Lautele o Dag Hammarskjold o le, na fai mai i tua lava i le 1953: O lo tatou faamoemoega sili faapea ia faatagaina i tatou e faasaoina le lalolagi tuai.” Afai sa i lona manatu le faasaoina o lenei faiga o mea i le lalolagi aoao, o lona uiga o nei taumafaiga ia faasaoina le “lalolagi tuai” e matua le taulau lava. Ai se a?

Mo se mea e tasi, o lenei “lalolagi tuai” ua faia aʻe i malo ua faia e tagata. O malo taitoatasi ua faia ia le faailoga lanu, lea ua vaeveaina ai tagata; o le faailoga lanu ua faamamafa ai na o fiafiaga o le malo e tasi na i lo o le sailia o le lelei lautele mo malo uma. O le manatu faapito ua tineia ai soo se taumafaiga a Malo Aufaatasi e aumaia le filemu. E pei ona aumaia i le faatonuga a se nusipepa Peretania The Guardian faapea: “Talu ai e leai lava se malo o sui o Malo Aufaatasi ua nofo sauni e faataulagaina ona lava faanaunauga mo le faaleleia e faatauvaa. O le galuega moni lava la a le [United Nations General] Assembly’s o le ua na ona auauna e pei o se fua e fuaina ai manatu o le kelope atoa. Ua tumu lisi i le tele o mataupu sa talanoaina mo le tele o tausaga ae itiiti lava pe a i ai se taumafaiga ua faaleleia.”

Ae peitai e i ai se mafuaaga sili ua le taulau ai taumafaiga a Malo Aufaatasi ina ia faasaoina le “lalolagi tuai”: Ona e faasagatau i fuafuaga a le Atua. Faapefea? I le silafaga a le Atua e le toe fuataia le “lalolagi tuai.” Ua lata mai le taimi e faataunuuina ai fuafuaga ua uma ona faataatia a le Atua. E pei ona faamatalaina e le aposetolo o Ioane: “Ona aʻu iloa lea o le lagi fou ma le lalolagi fou; aua ua mavae atu le uluai lagi, ma le uluai lalolagi.” (Faaaliga 21:1) I le tafiesea o malo a tagata, o le a aveesea foi e le Atua le lotonuu ua fevaevaeina ai. I lona tulaga o le a i ai le “lalolagi fou,” o se sosaiete amiotonu faaletagata ua fuafuaina lelei, o le a uluola i lalo o le malo faalelagi e tasi, le Malo o le Atua. O lea lava taimi, e mafai ai e le fanau ona olioli i le filemu ma le saogalemu moni i le lalolagi atoa.

‘Tuʻi Pelu e Fai ma Suotosina’

O lena faamoemoe moni ua faamatauina mai i upu o le valoaga a le Tusi Paia o loo tusia i luga o le pa o loo fesagai ma Malo Aufaatasi. I ina ua ia faapea mai: “Ona latou tuʻi ai lea ia latou pelu e fai ma uamea o suotosina, o latou tao foi e fai ma polo e teu aʻi vine; e le sii atu le pelu e le tasi nuu i le tasi nuu, latou te le toe aʻoaʻo foi i taua.” Sii mai i le Isaia 2:4.

E leai, ua le faamanuiaina Malo Aufaatasi mai le puipuia o malo i le ‘sii atu o le pelu’ e le tasi nuu i le isi. Ua i lea, e i ai ni tagata ua latou avatu ni faamaoniga ola ua latou ‘tuʻi a latou pelu e fai ma suotosina.’ Ua latou faataʻitaʻi se autasi ua siitia aʻe nai lo faiga faailoga lanu ma pa pupuni o malo. Po o le a le tele o uunaiga, e le mafai ona faamalosia ai nei Kerisiano solitu e “sii le pelu” i o latou uso a tagata. O ai i latou? O Molimau a Ieova. Ona o le maoti o la latou tali pe a uunaia ia auai i taua a malo o le mea lena na tupu i se tasi o Molimau i se atunuu i Aferika sa i ai le vevesi i faiga saua faapolotiki.

Ina ia maua nisi fitafita fou mo vaegaau faatupu faalavelave, o se vaega taufaamataʻu i lenei atunuu latou e ave faamalosi tane ma tuu atu ia i latou e filifili: Auauna i le vaegaau taufaamataʻu po o le fanaina ia oti. I se tasi aso na latou ave faamalosi ai se tasi o Molimau a Ieova. O taʻitaʻi sa fai la latou inuga ʻava na tuuina atu ia te ia e fai se filifiliga. Na tuu ona luma fagu pia e lua, sa latou faasino atu i le tasi fagu ma fai atu  o le sui lena o le malo, o le isi o la latou vaega faamataʻu: ‘O le fea e te au i ai?’ na latou fesili atu ai ia te ia. Sa mafaufau mo sina minute le Molimau, ma iloa ai isi fagu pia o latalata ane, na ia tago atu nei i se tasi o fagu ma tuu i le va o fagu ia e lua, ma faapea atu: ‘O i ou te i ai.’ Na ia faaopoopo atu: ‘Ou te solitu, talu ai o aʻu e mo le Malo o le Atua.’ Ina ua maea lenei mea, sa sasaina o ia i le tele o taimi. Mulimuli ane, sa faamalosia o ia e auauna o se pologa i le nofoaga o fitafita lalafi solo, ma ua le mautonu pe fana o ia pe leai. Ina ua mavae le valu o masina, ona sola ai lea o ia ina ua osofaia e vaegaau a le Malo le nofoaga lea.

Ua loto malie Molimau a Ieova e falepuipui, pe oo lava i le oti, na i le oo le auai i taua a Malo. O lea, i Siamani Nasi e faitau afe i latou sa tuuina i nofoaga saisaitia aua latou te lei lagolagoina pulega saua faa-Nasi. E faitau selau Molimau na faasalaina po o le maliliu ai lava i ai nofoaga. Peitai o nei, ina ua leva ona mavae pulega aasa faa-Nasi, ua uluola Molimau a Ieova i Siamani mai le kelope atoa.

Ae peitai, ai se a ua mafai ai ona ‘tuʻi a latou pelu e fai ma suotosina’? E mafai ona iloa le tali i upu tomua i le Faavae a le UNESCO, o loo faapea mai: “Talu ai o taua e amataina i manatu o tagata, o manatu foi la o tagata e fausia ai puipuiga mo le filemu.”

E tusa ai ma lena, e faatatau ia i latou ia ua ‘tuʻi a latou pelu e fai ma suotosina,’ fai mai le valoaga a Isaia, “latou te le toe aʻoaʻo foi i taua. O lea, e ala i le suesueina ma le faatatauina o le Tusi Paia, ua latou aʻoaʻoina ala o Ieova ma savavali ai i ona ala.’ (Isaia 2:3, 4) Faatasi ai ma le fesoasoani a lona agaga paia, ua ‘liliuina i latou i le toe fuataiina o latou loto,’ ma oo ai ina avea ma e filemu.—Roma 12:2, 18.

O se faamaoniga manino faapea o Molimau a Ieova ua ‘tuʻi a latou pelu e fai ma suotosina’ ua faamanino ai e mafai ma e tatau ona ola i le filemu ma le saogalemu. Ua faataʻitaʻia mai e o latou olaga o loo ola ai i aso nei i se fua itiiti le mea o le a faataunuuina e le Malo o le Atua e ala ia Keriso i le lalolagi aoao i le lumanai e le o toe mamao.

E lelei nei fuafuaga ia te oe? O le a fiafia Molimau a Ieova e fetufai ma oe le faamaoniga faapea ua toeitiiti ona aumaia lea e le Malo o le Atua le filemu ma le saogalemu tumau. Ai se a e le faafesootai ai i latou i loo outou nuu po o le tusi atu foi i e o loo faasalalauina lenei mekasini? Aoao atili i le pe faapefea ona ‘tuʻi pelu e fai ma suotosina’ nei, ma le faamoemoe ua toeitiiti olioli ai i le ola i le lalolagi atoa e aunoa ma ni taua.

[Faaopoopoga i lalo]

[Pusa i le itulau 5]

Ai se a Ua Le Taulau ai Malo Aufaatasi:

□ E gata mai le poto faaletagata (Ieremia 10:23)

□ Ua faaumatia e Satani ana taumafaiga (Faaaliga 12:12)

□ O se tama a le lalolagi nei ma e i ai vaivaiga tuufaasolo (1 Ioane 5:19)

□ O loo ia taumafai e faasaoina “le lalolagi” tuai o le mea e faasagatau i fuafuaga a le Atua (1 Ioane 2:17)

Ai se a O le a Taulau ai le Malo o le Atua:

□ O lona pule e i ai le atamai ua sili i lo tagata ma e mafai ona silafia mea o i loto o tagata (Ioane 2:25)

□ O le a ia aveesea temoni faatupu taua (Faaaliga 20:1-3)

□ O le “tama” a le Atua, ma o lana pulega e faaataata maia uiga o le Atua (Faaaliga 12:5)

□ O le a na ia faatuina se “lalolagi fou” amiotonu i lalo o le malo faalelagi e tasi. (Faaaliga 21:1)

[Ata i le itulau 7]

O le a faavaeina e le Malo o le Atua “se lalolagi fou,” se sosaiete amiotonu faaletagata, o le a uluola i lalo o le malo e tasi faalelagi.