Le “Nuu” E Tumu Ai Le Fogaeleele Uma i Ona Fua

“O ona po amuli e sosolo ai aa o Iakopo; e fuga mai ma matala Isaraelu, ona tumu ai lea o le fogaeleele uma i ona fua.”—ISAIA 27:6.

1. Sa faapefea ona faasino le aposetolo o Peteru i le nuu o Isaraelu faaleagaga?

E FAATATAU i le fanau ma o le faapotopotoga o soo o Keriso e avea o se “nuu” i le 33 T.A. na tusia ai e le aposetolo o Peteru nei upu a o toeitiiti lava oo mai le faaumatiaga o Ierusalema i le tausaga e 70 T.A: “A o outou ‘o le tupulaga ua filifilia outou, o tupu ma ositaulaga, o le nuu paia, ma le nuu na faatauina mai, ina ia outou taʻutaʻu atu ona lelei’ na ia valaau ia te outou nai le pouliuli e oo i lona lava malamalama e matua ofo ai; o e na le fai ma nuu anamua, a o ona po nei ua fai ai ma nuu o le Atua; o e na alofaina, a o lenei ua alofaina lava.” (1 Peteru 2:9, 10) Maeu le agalelei i le vaega a le Atua!

2, 3. I le avea o se nuu na faatauina mai a Ieova le Atua, o le a le tiute tauave na tuuina atu i luga o Isaraelu faaleagaga, ma o le a na faatusaina i ai i latou e Iesu Keriso i le Ioane mataupu 15?

² I aso nei, ua tusa ma le 19 senituri talu ona tusia e Peteru o na upu, o loo i ai pea se vaega totoe o lena “nuu” fanauagagaina. Ua faaitiitia nei i latou e itiiti ifo i le sefulu afe lona faitau aofai, e tusa ai ma lipoti faaletausaga o le faamanatuga o le Talisuaga Afiafi a le Alii. O i latou ‘o le nuu na faatauina mai,’ ma i le avea o i latou o ni tagata faapea e tatau ona latou faailoa atu le lelei o Ieova le Atua o le na valaauina i latou nai le lalolagi “pouliuli e oo i lona lava malamalama e matua ofo ai.” O lenei “malamalama” o loo susulu atu a e maise lava i le iuga “ o tausaga o Nuu ese,” po o “le taimi atofaina o nuu,” i le tausaga e 1914. * (Luka 21:24, King James Version; NW) I le avea ma “nuu na faatauina mai” a le Foai Tauatua o lena malamalama e matua ofo ai, ua tauia i latou e ia. Ua pei o latou o se tovine faaleagaga ia te ia.

³ Ua tatou manatua ai i nei le mea na fetalai ai Iesu Keriso i ona aposetolo, o e na fai ma sui o i latou uma o e o le a avea ma ona soo fanauagagaina: “O aʻu nei o le vine moni, a o loʻu Tama o le galue vine ia. O la uma lava o ia te au e le fua, e aveeseina e ia; a o la uma e fua, e teuteu e ia, ina ia fua mai ai atili. Ua uma ona faamamaina o outou i le upu na ou tautala atu ai ia te outou. Ina tumau ia o outou ia te au, o aʻu foi ia te outou. Faapei o le la e le mafai ona fua pe a na o ia, pe afai e le mau i le vine; e faapea foi outou, pe afai tou te le tumau ia te au. O aʻu nei o le vine, o la outou. O le tumau ia te au, ma aʻu ia  te ia, o ia lava e fua tele mai; aua e le mafaia e outou ona fai o se mea e tasi pe a aʻu le i ai.”—Ioane 15:1-5.

4. (a) O le faataitaiga a Iesu ua faamanatu mai ai ia i tatou le a faamatalaga i le Isaia 27? (e) O afea e faataunuuina ai faaonapo nei lenei valoaga, ma i luga o ai? (i) O le a le lagona ua le toe ia i ia Ieova e faatatau i ona tagata?

⁴ O lena faatusatusaga po o le faataoto, na faia e Iesu Keriso ua faamanatu mai ai ia i tatou fetalaiga a Ieova i le Isaia 27:2-4 (NW) ua tatou faitau ai;

“O lea aso ia outou pepese ai i le tovine. ‘O le tovine o uaina totoo! O au o Ieova, ou te leoleo i ai; ou te faasusu pea lava i ai; ou te leoleo lava i ai i le po ma le ao, nei oo ai i se leaga. Ou te le ita lava aʻu.’”

“O le tovine o uaina totoo” o aso nei i le lalolagi e mafai ona faatusaina i le vaega totoe o la i lena “vine” faafaatusa ua avea ai Kerisiano fanauagagaina o le “nuu paia” o ni sui filifilia. O le iuga, ua i o latou luga nei se avega tauave o le fua tele mai. (Isaia 15:5) E tusa ai ma le valoaga a Isaia, e tatau ona i ai i le taimi e toe faafoisia mai ai tagata o Ieova i lona finagalo lelei lea na peseina le pese i le “tovine o uaina totoo.” (Faatusatusa le Isaia 27:13) Ua faaalia mai ai i inei le faataunuuga i ona po nei o lenei valoaga pupula ao agai atu i lona faatinoga i le vaitaimi o le taua i le tausaga e 1919, ma o mea moni o talatuufaasolo ua faamaonia ai lona faataunuuina seia oo mai i aso nei. Ua le ‘toasa’ lava Ieova i ona tagata i aso nei, e oo i le vaega totoe o lona “nuu paia,” lona “nuu na faatauina mai,” e le o ita foi faasaga i Kerisiano faamaoni o e o vaavaai atu i luma i le ola e faavavau i luga o le lalolagi. Ma le alofa lava ua liliu atu ai lona finagalo lelei ia i latou, o e ua fuafuaina mo lo latou uluola ma le fuatele mai.

5. E ala i le a mai lenei tovine faafaatusa ma faafiafiaina ai tagata, ma o le a na latou toe taʻua e uiga ia te ia?

⁵ O lenei “nuu” faaleagaga faatasi ai ma ana aumea galulue malosi, ua pei o se tovine uluola ua aumaia ai le tele o “uaina totoo.” O le uaina faaleagaga ua faafiafiaina ai le finagalo o Ieova ma tagata. (Faamasino 9:13) Mo lenei mafuaaga taua o tagata ua faafiafiaina ona o le inuina o lenei uaina faaleagaga e mafai ona pepese ma le olioli ma toe manatua mea uma na faia e le Galue Fanua Tauatua o le “tovine.” I le gagana faafaatusa, sa ia ‘faasusuina’ moni lava lenei “tovine” mo lona faafouina pea, ina ia maua mai ai ni fua susua, suamalie, ma ni auga e faafiafiaina ai.

Faaeseesega—“O le Vine o le Lalolagi”

6. Ae peitai, o le a e tupu i le “vine o le lalolagi,” e tusa ai ma le Faaaliga mataupu e 14?

⁶ E le tusa le mea lenei ma le mea o loo taʻua i le tusi mulimuli o le Tusi Paia “o le vine o le lalolagi.” Ua toeitiiti lava tuuina mai le faatonuga tauatua i malosi faaoosala faalelagi: “Ina faaoo atu ia lau selesaito maai, i na sala ia i fuifui vine o le vine.” O lea, ua faaauau pea ona faailoa mai e le Faaaliga faavaloaga, “ona faaoo mai ai lea e le agelu o lana selesaito i le lalolagi, ua sala foi e ia le vine o le lalolagi, ua ia lafo atu foi i totonu o le soligavine tele o le toasa o le Atua. Ua solia foi le soligavine i tua o le aai, ua alu atu foi le toto nai le soligavine e oo i faagutu o le solofanua, e tasi le afe ma le ono o selau o setatio ua pau mai ai.” (Faaaliga 14:18-20_) O le mea lea o le a tupu i vaega a malo o le faalapotopotoga vaaia a le Tiapolo i luga o le lalolagi; o se mea na avea ai o ia ma se galueaiina, ma ua tetee atu i le “vine moni” o le ua avea ai Ieova le Atua ma Galue Fanua. O le a le toe faafoisia lava “le vine o le lalolagi!”

7-9. O le a le faataunuuga talua ua i le Isaia 27:7-13, ma i le fea taimi?

⁷ Ae peitai, o lenei valoaga i le Isaia  mataupu e 27 o se valoaga moni o le toe faafoisia, muamua o le malo o Isaraelu faaletino ona sosoo lea ma Isaraelu faaleagaga i lo tatou 20 senituri. Ua faaalia lenei e le mea ua fai mai ai le valoaga i le Isa 27 fuaiupu e 7 e oo i le fuaiupu e 13-13 lea ua faaiu ai le mataupu. Ua faitauina faapea na fuaiupu:

⁸“Ua na taia ea o ia, e pei ona taia e ia o i latou na taia o ia? Po ua fasia o ia, pei o le fasi na fasia ai e ia? Na e finau faatatau ma ia ina ua tulia o ia; na ia avea o ia i lona matagi tetele i le aso na agi mai ai le matagi mai sasae. O le mea lea e faamagaloina ai le agasala a Iakopo i lea mea; o ona iuga uma foi ia, ina ia faateaeseina ai lana agasala; pe a faia e ia o maa uma o le fata faitaulaga ia pei o maa panisina ua nutililii, e le toe tutu i luga o tupua o Asuria ma tupua o le la. Aua e tuufua le aai nofo ʻolo, e le aina fale, ae tuulafoaiina e pei o se nuu tuufua; e tataa ai tamai povi, ma latou taooto ai, latou te aai ona la laau. Pe a mamago ona la laau, ona gauieseina ai lea: e o mai fafine latou te susunuina; aua e le se nuu mafaufau lea; o lea mea e le alofagia ai i latou e le na faia i latou, o ia foi na faia i latou, na te le alofa lava ia te i latou.”

⁹ “O lea lava aso e sasa ifo ai e Ieova ona fua, e afua i le mea tafe ai le vaitafe, e oo atu i le alia o Aikupito; e faapotopotoina foi outou e toatasi, o outou le fanauga a Isaraelu. O le aso foi lea e ili ai le pu latele, ona o mai ai lea o i latou na faia a fano i le nuu o Asuria, atoa foi ma e na aunuua i le nuu o Aikupito latou te ifo ia Ieova i le mauga paia i Ierusalema.”

10. O ai le malo malosi na pule i le taimi o le valoaga a Isaia, ma o le a na oo i ai e faatatau i le fuafuaina o lana osofaiga i le laumua o le malo o Iuta?

¹⁰ I aso o le valoaga lenei a Isaia, sa avea ai Asuria ma malo malosi e pule i le lalolagi, na suia ai le faasologa o malo malolosi e fitu, e ui lava ina sa i ai pea i Aikupito a e o se pulega lagolago. O le malo o ituaiga e sefulu o Isaraelu sa vavaeese mai i le pulega a le aiga o Tupu o Tavita o le ituaiga o Iuta. O le mea lea, o se faasagatau i le aai o Ierusalema na sau ai le tupu o Asuria ina ia matua sii lima ane pe afai e le manao e faaumatia. Ae peitai, sa tau Ieova mo le malo o Iuta ma tulia ai le Tupu faamaualuga o Sanerivi ma le tautevateva i lona nuu i le toilalo aiai.—Isaia mataupu 36 ma le 37.

11. E ala i le emeperoa o le fea malo malosi i le lalolagi na faataunuuina ai le lafotuina o le malo o Iuta, ma e faapefea ona tautalagia e le Isaia 27 lenei mea?

¹¹ O lea, o se emeperoa o le malo o le lalolagi na soloai ane, le Malo Malosi o le Lalolagi o Papelonia, sa tofia e faaumatiaina le aai paia o Ierusalema ma lona malumalu. E tusa ai ma faamatalaga a le Tusi Paia, na tupu lenei mea i le 607 T.L.M., I lima o le Emeperoa o Nepukanesa. O ia lenei sa avea faapagotaina tagata i le laueleele o Papelonia, ina ia faaalu ai le 70 tausaga o le tafeaga i ina. Ona o le vaai atu i le faaumatiaga o Ierusalema ua fotuai mai ma le avea faatagata o tauaina o le tafeaga i Papelonia mo le 70 tausaga lea ua tonu ai ona laga ni fesili:

“Ua na taia ea o ia, (le nuu o Isaraelu) e pei ona taia e ia o i latou na taia o ia?” (Isaia 27:7)

I le 1513 T.L.M., na taia ai le nuu o le Atua i se ta matautia e lei faapea ona i ai i lona talatuufaasolo i le 607 T.L.M., na toeitiiti lava a patino ai lona faaumatiaga. E matua toatele na fasiotia o le aai ina ua siomia Ierusalema. Ioe, sa silafia lava e Ieova le manaomia ona faia o lenei gaoioiga matautia, ma e tatau lava ona faia. Sa ia silafia le manaoga faitaulia e faataututu ai ma i latou o e sa tatau ona tumau pea ona avea o ana uo, o e na ia faauoina, o e na ulu atu faatasi ma ia i le feagaiga o le Tulafono e ala i le puluvaga o Mose.

12. O le a le fesili na faagaeeina ai e Ieova le perofeta o Isaia e fesili ai e faatatau i le mea na oo ia Isaraelu, ma i lea o le a na tupu i le faia a Isaraelu ma Ieova?

¹² Sa mafai foi la ona fesili atili Ieova:

“Po ua fasia o ia [le nuu o Isaraelu, po o  Iakopo] e pei o le fasi na fasia ai e ia?” (Isaia 27:7)

Ioe, ua avea nei o se mea tatau mo Ieova ona faatautu ai mo ona tagata sa ia alofa i ai, ua alalaga mai i se tagi leo tele ona o le mataʻu, “o se tagi fefe,” ona o ʻau, o le taua a le Malo Malosi o le Lalolagi o Papelonia, lona tolu i talafaasolopito o le Tusi Paia. O lea, o le faamatalaga tautaua:

“I le tagi ona o le fefe na e finau faatatau ma ia ina ua tulia o ia; na ia avea o ia i lona matagi tetele i le aso na agi mai ai le matagi mai sasae (e faailoa mai le itu o loo sau ai e tagi o le fefe i taua.) ” (Isaia 27:8 NW)

Ma le malosi tele na ia tulia ai le nuu le faamaoni o le sa avea i se taimi ma ona faletua faapitoa o sana faalapotopotoga vaaia i luga o le lalolagi. Nei ua ia tulia o ia mai lona laueleele mai le Atua ma auina atu o ia i lima o Papelonia i se nuu mamao, e peiseai ua faateaina.—Faatusatusa le Isaia 50:1.

13. E tusa ai ma le valoaga a Isaia, na faapefea ona faia e le nuu o Isaraelu se taulaga ona o lona solia o le feagaiga a le Atua?

¹³ Ua oo mai nei le taimi mo le nuu o Isaraelu po o Iakopo e faia ai ni taulaga mo ana “agasala” i se tau e sili atu na i lo o taulaga na osia i manu sa ofoina atu i luga o le fata faitaulaga o le malumalu i Ierusalema. O le mea lenei na faamatalaina mai e Ieova e uiga i lana faalapotopotoga pei se faletua, i lona faapea mai:

“O le mea lea e faamagaloina ai le agasala a Iakopo i lea mea; o ona iuga uma foi ia, ina ia faateaeseina ai lana agasala; pe a faia e ia o maa uma o le fata faitaulaga ia pei o maa panisina ua nutililiia; e le toe tutu i luga o tupua o Asaira ma tupua o le la.” (Isaia 27:9)

Maeu se faamatalaga o le toasa tauatua, po o le ita, o le faataunuuina o lenei valoaga o le a faia lava ma le tusa! O le a le toe ai ni mea paia ifo i tupua, e le toe tutu foi i luga tupua o le nuu ua aoaiina.

14. O le a le ituaiga o faatafunaga na liua i ai le laueleele o Isaraelu, ma na faapefea ona feagai ai i le avea ma se laau faafaatusa?

¹⁴ E faatatau i le faatafunaina lea o le a aumaia i luga o lenei nuu e pei o se faletua o Isaraelu anamua sa toe faaopoopo mai Ieova:

“Aua e tuufua le aai nofo ʻolo, e le aina fale, a e tuulafoaiina e e pei o se nuu tuufua.”

O le nuu na lafulemu o le a avea ma toafa, o le a avea ma mea e ʻaai ai manu mo sina taimi.

“E tataa ai tamai povi, ma latou taooto ai; ma o le a ia (Ieova e ala i lona sui) faaumatia ona la laau. Pe a mamago ona la laau, ona gauieseina ai lea; e o mai fafine latou te susunuina.” (Isaia 27:10, 11 NW)

O lea o le nuu pei se faletua patino o le a avea ma fafie tafu afi; aua o le a le faigata i fafine e lava le malosi ona faaaoga mea sa totoe ai. Paga se tulaga faanoanoa o le a oo i ai lenei faalapotopotoga pei se faletua totino o Isaraelu! Ae peitai ai se a o le  a faia ai lenei laasaga o le olopalaina e le Atua ua pei se tane o Ieova? Faalogo:

15. I le manatu atu i le tausiga faapitoa a Ieova, o a ituaiga tagata sa ao i le nuu o Isaraelu ona faamaonia ai i latou, ae ai se a na avea ai i latou e pei o nuu e tapuai i tupua?

¹⁵ “Aua e le se nuu mafaufau lea; o le mea lea e le alofagia ai i latou e Le na Faia i latou; o ia foi na faia i latou na te le alofa lava ia te i latou.” (Isaia 27:11)

Faatasi ai ma mea uma lava na faia e Ieova mo le aʻoaʻoina ma le faamalamalamaina o lana faalapotopotoga na faia i se tulaga ofoofogia, sa tatau ona faamaonia tagata Isaraelu o ni tagata e tele le tomai. Sa tatau ona avea ona tagata mataalia ma le faautauta lelei e iloa ai le mataʻutia o le ifo i tupua, ioe, lava le malamalama e iloa ai le valea o le tapuai i tupua, ua faia e nuu valelea i fafo o le faia o le feagaiga ma le Atua soifua moni e toatasi o Ieova. Ae peitai ona e le vaaia Le na Faia i latou o i le lagi, Le Na Foafoaina i latou, ua leai se faatuatua ma latou filifili e liliu atu i atua na faia e tagata, ma oo atu ai i lo latou malaia. O le mafuaaga lena na aveesea ai le finagalo lelei ma le onosai tauatua mai na tagata ua maaa.

Faasaoina Mai le Tafeaga

16. Ina ia toe faafoisia lona nuu, o le a na toe liuliualo atu i ai Ieova?

¹⁶ O lenei la, ina ia toe faafoisia mai i latou i lana tapuaiga i lona laueleele, sa tatau ai ia Ieova ona liuliualo atu i le nuu o Papelonia lea e tafe atu i ai le “Vaitafe” tele, o le Eufirate. O le a mafai foi ona ia silasila atu i le itu i saute i le laueleele o Aikupito, aua o na nofoaga na faatafea i ai ona tagata mai ia te ia mo le aoaia o i latou. I lenei tulaga ua tatau ai ia Ieova ona faataunuuina le isi ana faamatalaga o lana fuafuaga:

“O lea lava aso e sasa ifo ai e Ieova ona fua, e afua i le mea e tafe ai le Vaitafe (Eufirate) e oo atu i le alia o Aikupito; (o le pa i saute sisifo o le tuaoi o le Nuu Folafolaina), e faapotopotoina foi outou e taitoatasi, o outou le fanauga a Isaraelu.”—Isaia 27:12; faatusatusa le Numera 34:2, 5.

17. Na faapefea ona faʻiesea e Ieova ona tagata mai lo latou tulaga faatafeaina, ma e ala i le a le auala?

¹⁷ Ina ia toe faafoisia mai e Ieova ona tagata i lo latou laueleele o Iuta, e tatau ona ia faʻiesea mai tagata o le tafeaga e pei o se fua, ma ua faapea ona tatalaina ai o i latou. Na ia faatinoina lenei mea i le fulisia lea o le malo malosi o Papelonia ma faatulaia i ai le Emupaea o Metai ma Peresia, le malo malosi lona fa o talafaasolopito o le Tusi Paia. O le poloaiga a le emeperoa Peresia o Kuresa le Sili i le amataga o lana nofoaiga sa tuuina atu mo le faasaolotoina o le tafeaga o tagata o Ieova ma toe foi atu ai i le tulaga o Ierusalema anamua ina ia toe fausia le malumalu o Ieova. O lenei toe faafoisia na faatinoina i le iuga o le 70 tausaga o le tafeaga a sa Iuta, i le 537 T.L.M.—Isaia 45:1-7.

18. O le a atonu na uiga i ai le tafeaga i le avatua o le poloaiga mo lo latou saolotoga?

¹⁸ O Isaraelu aoaia i Papelonia, faapea foi Asuria atoa ma Aikupito, o ni mea totino a Ieova, ma sa tofia o ia e faʻiesea i latou  e pei o se fua faafaatusa mai le tafeaga e lei fuafuaina ma faataapeapeina maua faapea ona faaalia ia te i latou le agalelei ma le alofa tunoa. Ioe, maeu se olioli o na Isaraelu anamua i le poloaiga a Kuresa, ma maeu foi se maelega atonu na latou faatinoina i le faaaogaina atoatoa o le avanoa faaeaina sa tuuina atu mo i latou! O lea, o le a la na mafai ona fai atu e uiga i lena “aso” faitaulia?

19. (a) Ia te ai na valoia mai e ifo i ai tagata Isaraelu ia na aumau solo i Asuria ma Aikupito? (e) O le a le uiga o lenei mea e faatatau i le tapuaiga a Ieova i le lotoa o le uluai malumalu, ma i lenei lava tulaga mo le fea nuu faaleagaga i ona po nei?

¹⁹ “O le aso foi lea e ili ai le pu latele, ona o mai ai lea o i latou na fai a fano i le nuu o Asuria, atoa foi ma e na auauna i le nuu o Aikupito, latou te ifo ia Ieova i le mauga paia i Ierusalema.” (Isaia 27:13)

O le a ea se isi uiga o lena mea pe a le o le toe faatoateleina o le Nuu Folafolaina ma le toe fausia o le malumalu i Ierusalema, na fausia aua le tapuaiga a le na Foafoaina ma Le na Faia le nuu faatafeaina o Isaraelu? Sa tatau ona tupu lenei mea e tusa ai ma uluai upu a le perofeta o Isaia na faailoa mai i le fuaiupu e 6. O le nuu o ona tagata toe faafoisia sa tatau ona avea ma nuu ua faatumuina i e latou te ainaina, ua aufaatasi i le autasi i lana tapuaiga i lona malumalu, e ui lava o lenei nofoaiga toe faafoisia o le tapuaiga o le a le i ai le matagofie o le malumalu uiga ese na fausia e le Tupu o Solomona. I lena auala na faaatagia ai le faataunuuga faaleagaga i aso nei i luga o “le Isaraelu a le Atua,” i le faatumuina o le “laueleele i ona fua” faatasi ai ma fua e aumaia ai le ola, po o “fuatele.”—Kalatia 6:16; Isaia 27:6.

[Faaopoopoga i lalo]

E Faapefea Ona E Taliina?

□ O anafea ma na faapefea ona tofo Isaraelu faaletino i le “taia,” e pei ona valoia i le Isaia 27:7?

□ Na faapefea ona “mauaa” Isaraelu? (Isaia 27:2, 6)

□ O ai i aso nei ua aafia i le faataunuuga o le valoaga i le Isaia 27?

□ Ua faapefea ona avea i latou nei e pei o se tovine fua tele e aumaia ai “uaina totoo”?

[Fesili mo le Suʻesuʻega]

[Ata i le itulau 13]

E ala i le Papelonia, na tuuina atu ai e Ieova se ta mataʻutia i le 607 T.L.M.