Mea Taua Mai le Tusi Paia—Salamo 1 e oo i le 41

Ua Pese e le Faisalamo Viiga o Ieova

“Viiga.” O le taʻu Eperu lenei o le tusi o Salamo, ma maeu le talafeagai! O le tusi atoa, o se alagaina o viiga ia Ieova le Atua. Ua faamanatu mai e le Salamo uiga o Ieova ma ana galuega mamana. O loo iai valoaga ma o loo taʻu mai ai foi ia i tatou lagona o tusitala faagaeeina a o latou tumau i sauaga, faifaiga, faalotovaivaia, atoa ma loto fuatiaifo leaga. O le toatele o Kerisiano o loo ogotia i tulaga masani ua latou maua se malosiaga mai upu o le Salamo.

Ua vaevaeina Salamo i vaega e lima. O lea o loo tatou talanoaina i inei le uluai o nei vaega, mai le Salamo 1 e oo i le 41.

Gauai i Fuafuaga a Ieova

Faamolemole faitau le Salamo 1 e oo i le 14. O lenei vaega o Salamo ua faaalia ai nisi o matua autu o le tusi o Salamo: O le taua o le Tulafono, valoaga e faatatau i le afio mai o le Tupu faa-Mesia, atoa ma tatalo mo le fesoasoani i le feagai ai ma omiga mataʻutia. E faaopoopo i ai, ua tatou iloa faapea, e ui ina laualuga le leaga mo sina taimi, a e faamanuiaina e amiotonu.

◆ 2:1—O a “mea le aoga” ua ‘mafaufau ai nuu”?

Ua “mafaufau” pea nuu (po o le “manatunatu mamafa”) i le faatumauina o a latou lava pule, na i lo o le talia o le pule a Le na Faauuina a Ieova. Sa i ai se faatatauga o upu nei i le uluai senituri T.A. ina ua aufaatasi tupu ma alii o Roma ma Iutaia e fasioti le Tupu faauuina a Ieova, O Iesu Keriso. (Galuega 4:26-28) Ae peitai, o le atoaga o lona faataunuuga e talu mai le 1914, ina ua teena e atunuu uma le Tupu faapaleina a le Atua ma taumafai e siitia o latou lava silisili ese.

◆ 2:12—Ai se a ua faatonu mai ai, “Ina sogi ia i le Atalii”?

I le vaitaimi o le Tusi Paia, o le sogi sa faaalia ai le faalefaauo ma sa faaaoga e faafeiloai atu ai i malo i uiga tausaafia i se aiga o se tasi. I le fuaiupu lenei, ua faatonuina ai e Ieova nuu ina ia sogi, pe faafeiloai Lona Alo o Lana Tupu faauuina.—Salamo 2:2, 6-8.

◆ 9:12—Aisea e “suea ai e Ieova e e faamaligi toto”?

E pei o se faamasino, o loo faia se faamasinoga, e sailia e Ieova i latou a faamaligi toto ona o lo latou faamasaaina o le toto o ona tagata le sala. (Kenese 9:5, 6; Luka 11:49, 50) Na te faasalaina foi e amioleaga. A o ana faasalaga e matua filifilia ma le tonu. Ua faamautinoa mai ia i tatou e le faisalamo o Tavita: “Na te le faagalogaloina le tagi o e ua puapuagatia.”—Faatusatusa 2 Peteru 2:9.

◆ 11:3—O a “faavae” ua fulisia?

O faavae o faamasinoga, tulafono, ma faatonuga—faavae ua faalagolago i ai le sosaiete. A i ai se mea ua pau matuia i le faiga o mea a tagata, e leai se faamasinoga tonu, o le a e ao i tagata matataʻu i le Atua ona faia? Faalagolago ia Ieova. O loo afio i lona nofoalii faalelagi, e silafia mea uma o loo faia, ma na te le tuulafoaia i tatou.

Lesona mo i Tatou: Ua uunaia tagata matataʻu i le Atua e le Salamo 4:5 “ina faitaulaga i taulaga tatau.” I aso o Tavita, e tuuina atu e Isaraelu a latou taulaga i luga o le fatafaitaulaga a Ieova. Ae sa tatau foi ona ia i latou le vaaiga saʻo mai ia salamo moni. (Isaia 1:11-17) Pe a ofoina atu e Kerisiano a latou taulaga faaleagaga, e manaomia foi ona ia i latou se vaaiga saʻo ma ia ola e tusa ma mataupu silisili a Ieova—Eperu 13:4, 5, 15, 16; 1 Peteru 2:1, 5.

O le Atua Lemafaatusaina

Faitau Salamo 15 e oo i le 24. O lenei vaega o Salamo o loo i ai ni faamatalaga o viiga ia Ieova. O Ia o le Talita o ona tagata (18), o Le na Faia ma Le Aumaia Tulafono (19), Faaola (20), Faamalumalu o lana Tupu filifilia (21), o le Leoleo Mamoe Sili (23), ma o le Tupu Mamalu (24).

◆ 16:10—O ai le “tagata paia” o loo taʻua i inei?

O nisi tagata aʻoga o le Tusi Paia ua latou faatatauina lenei fuaitau i tagata faamaoni i le lautele, i le faapea mai e lagolagoina ai le mea moni o nisi tusitusiga faa-Eperu o le upu “tagata paia” o loo i lona numera perulale. A e ui i lea, pe a sii mai lenei mau mai Tusitusiga Kerisiano Eleni, o le upu ua i le numera tasi, e faamaonia ai e na o le tasi, le “tagata paia.” O ai o Ia? I le uiga muamua, atonu o Tavita. A e i le tulaga faavaloaga sa faatatauina e Peteru ma Paulo lenei fuaitau ia Iesu.—Galuega 2:25-32; 13:25-37.

◆ 21:3—O le a le “palealii” o auro lelei”?

Atonu o se palealii faaletino, e pei o lea na aveesea mai le tupua o Malekama. (Faatusatusa le 2 Samuelu 12:29, 30) Atonu foʻi o le palealii e faafaatusa, e faaatagia ai le mea moni faapea o le manumalo o Tavita na avatua ai le pupula i lana pulega tautupu mamalu. O lea, i se tulaga faavaloaga, ua faasino lenei Salamo i le faapea ona tuuina atu e Ieova ia Iesu le palealii o le auro lelei” ua faasino i lana pulega i se tulaga sili ona maualuga.

◆ 22:1—Pe na tuulafoaina e le Atua Tavita?

E leai, ae peitai ina o i ai Tavita i lalo o omiga faifai pea mai ona fili, sa tino mai e faapena. Ae peitai, o uiga faaletagata o Tavita i vaivaiga sa lei atagia ai faapea e leai sona faatuatua talu ai na tatalo pea ia Ieova ma le mautinoa mo le faasaoina. (Fuaiupu 16-19) O le mea e fiafia ai ona sa siina mai e Iesu lenei salamo a o lei maliu i le satauro. Pe a fesiligia pe “ai se a”? Sa faamamafa mai e Iesu le omiga sili na i ai o ia, a e i le taimi lava lena sa faalauiloa atu pea lona le sala i le tuuaiga sese na taʻitaʻiina atu ai i lona faasalaina.

 Lesona mo i Tatou: Sa sii mai e le aposetolo o Paulo le Salamo 22:22 ma faatatauina i le auala na taʻitaʻiina ai e Iesu Keriso ona uso faauuina i le faalauiloaina o le suafa o Ieova. (Eperu 2:11, 12) Ua faasino e le Salamo 22:27 i le taimi o le aufaatasi atu ai “aiga uma o nuu ese” ma tagata o Ieova e vivii ia te ia. Ia aso nei o se motu o tagata e toatele faavaomalo ua tapuai atu i le Atua faatasi ma uso o Keriso. (Faaaliga 7:9) E tatau ona tatou piivaa i lenei fuafuaga maopoopo tauatua.

O le Malosi e Tele o Ieova

Faitau le Salamo 25 e oo i le 34. I le Salamo 25 ma le 26, sa faailoa atu e Tavita lona manoga ia savali i lona faamaoni. Ona mulimuli ai lea o faaupuga o le faalagolago ia Ieova ma le loto tele, ma i le Salamo 33, o ni faamatalaga uigaese o le malosi o Ieova.

◆ 28:8—O ai “le faauuina” a Ieova?

I lenei fuaiupu “o le faauuina” o tagata filifilia o Ieova, e pei ona iloa i lo latou malosi ia.” O nei upu e i ai sona faatatauga faavaloaga e tali tutusa ma ia e i le Sapakuka 3:13. Ua latou faasino atu i le faasaoina e Ieova o lana vaega totoe faauuina i le taua ia Amaketo.

◆ 29:5, 6—E faapefea ona gausia e le siufofoga o Ieova arasi?

I lenei Salamo sa tusi faaataina mai ai le faatusaina o le siufofoga o Ieova i se faititili. E amata le afa mai i le itu i matu o Lepanona ma agai atu i le laufanua toafa i le itu i saute, ma oo atu ai i se tulaga e matua ofo ai. (Fuaiupu 9e) O ona matagi e maluelue ai arasi o Lepanona “e osooso ai i latou e pei o se tamai povi,” ma o le emo o ona uila e gausia ai i lalo laau, ma ‘gausia ai i latou.’ E faapena foi, i afa malolosi ona ‘milo ai le vaomatua.’ (Fuaiupu 8) e asuina i luga oneone o le toafa ina ia peiseai ua feminoiai i le tiga.

◆ 33:6—O le a le ‘manava o le fofoga o Ieova’?

O le agaga, po o le manava i inei, o lona uiga o le agaga paia o Ieova, po o le mana galue. E pei ona sau o a tatou upu ma le manava i o tatou gutu i le taimi lava e tasi, e faapena foi i nei i afioga a Ieova po o ana poloaiga, ua faaluaina e lana manava po o lona agaga. Na faaaoga e le Atua lona agaga paia ina o faia le la, masina, fetu, o “au” uma lava faafaatusa o le lagi faitino.—Faatusatusa le Kenese 1:1, 2.

Lesona mo i tatou: I le Salamo 26:5, sa faapea mai ia Tavita e inoino i le faapotopotoga o e amioleaga. (1 Korinito 15:33) O lea, e pei lava ona faaalia e Tavita lona fiafia tele i le fale o le Atua, ua faapena foi ona fiafia tele Kerisiano e auaufaatasi o le tasi ma le isi i le faapotopotoga a Ieova.—Salamo 26:6-8; 122:1.

“Ia Viia Ieova”

Faitau le Salamo 35 e oo i le 41. E sili ona matilatila i lenei vaega le Salamo 36, ua faailoa ai Ieova o le Puna o le ola, ma i le Salamo 37, e faamautinoa ai ia i tatou le taui sili mo e faalologo. Ae maise lava e sili ona mataina le Salamo 40, o loo maua ai faamatalaga e faavaloaga mo Iesu Keriso.

◆ 35:19—Ai se a e “fegenoai mata” o fili o Tavita?

I tusitusiga Eperu e masani lava ona taʻua i latou “o oʻu fili [i] se mea sese.” O lena la, o lo latou inoino e faavae mai i se gaoioiga le mama E leai se mea ua faia e Tavita e ala ai fua ona fai o ia ma o latou fili, ma na ia tatalo ina ia aua nei i ai se mea e mitamita fua ai ma alalaga ona o ia. (Fuaiupu 19a) O lea, na ia ole atu ai ina ia aua nei “fegenoai mata” o ona fili, aua o le fegenoai lava lena e masani ona avatua ai se faamaoniga o loo latou fiafia ia latou fuafuaga amio leaga. (Faataoto 10:10; 16:29, 30) Sa sii mai e Iesu lenei fuaitau ma faatatauina ia i latou na inoino ia te ia.—Ioane 15:24, 25.

◆ 36:3—Pe sa i ai se faautauta i nei tagata amioleaga i se taimi?

O le faatatauga sa i ai se suiga i amioga a lea tagata ma sa le toe avea nei o ia ma tagata na i ai muamua. Atonu sa ia faaalia i se taimi le poto ma faia mea lelei. Ae peitai ua tuua nei i tua, a e avea ma aposetate. O le Tupu o Saulo sa avea o ia ma tagata faapena i lona lafoaia o le auala poto, ma faaalia lona inoino ia Tavita. (1 Samuelu, mata. 18) Sa lagona foi e nisi tagata aʻoga faapea na faia e Tavita lenei faasinoga i le Salamo 36 agai ia Saulo.

◆ 40:6—O le a le uiga o upu, ‘ua elia e oe oʻu taliga’?

Atonu e mafai ona faapea atu sa uunaia e Ieova taliga o Tavita ina ia uaʻi i taʻitaʻiga a le Atua, pe na faia foi e Ieova taliga ina ia mafai e Tavita ona faalogo i ana poloaiga., Ma le fiafia lava, ua aumaia e le Septuagint Version upu nei: “Ua e saunia se tino mo aʻu.” Po o le a lava le pogai o lenei faaliliuga o loo i ai lava le manatu autu e tasi e pei o le gagana Eperu. O lona uiga, ua faamamafa mai ai le manaoga mo le usiusitai e sili atu na i lo o le na ona ofoina atu o taulaga (Faatusatusa 1 Samuelu 15:22; Hosea 6:6) Sa faatatauina e Paulo lenei fuaiupu ia Iesu Keriso. (Eperu 10:5-10) Talu ai na faaaoga e Paulo le faatatauga a le Septuagint, o le fuaiupu, “ua e saunia se tino mo aʻu,’ ua avea nei o se vaega o “Tusi Paia uma lava” e “mai le agaga o le Atua.”—2 Timoteo 3:16.

Lesona mo i Tatou: O loo i le Salamo 37 le tele o lesona mo i tatou, o loo ola e pei ona i ai i totonu o se tupulaga amioleaga. E ui lava ina i ai le tagata fai mea leaga, e le tatau ona tatou mataʻua ma taumafai e faataʻitaʻi ia i latou. Na i lo lea e ao ona “e faalologo i luma o Ieova,” aua le suesue masei a e ia onosai ma faatuatua ia te ia o le a gaoioi o ia ma sui o i tatou i lana lava taimi.—Salamo 37:5, 7.

Ioe, ua ofo mai e Salamo le tele o upu faagaeeina ma faamafanafana. O nei uluai Salamo e 41 ua faaalia ai pea lava pea faapea, po o a lava le tulaga faigata atonu o tatou i ai, e le tuulafoaiina i tatou e Ieova. E mautinoa lava, pe a uma ona tatou faitauina, o le a uunaia i tatou e faaleoina upu ua faaiuina ai le Salamo 41: “Ia faafetaia Ieova, le Atua o Isaraelu, mai le vavau e oo lava i le faavavau. Amene ma amene.”