Le Soifuaga o Iesu ma Lana Faiva

Uluai Soo o Iesu

Ina ua mavae aso e 40 i le vao, sa toe foi atu Iesu ia Ioane o le na papatisoina o ia. A o ia faalatalata atu, sa faapea ane Ioane: “Faauta, i le Tamai Mamoe a le Atua, na te aveesea agasala a le lalolagi! O ia lea na ou faia atu ai, o loo mulimuli mai le tagata, e sili o ia ia te aʻu, aua o ia na muamua ia te aʻu.” E ui lava ina matua Ioane i ona tausaga i lo Iesu, na iloa e Ioane na muamua soifua Iesu ia te ia o se peresona agaga i le lagi.

I le tasi aso na sosoo ai a o tutu Ioane ma ona soo e toalua. A o toe faalatalata atu foi Iesu, sa faapea atu o ia: “Faauta i le Tamai Mamoe a le Atua!” O lea, sa mulimuli atu ai loa soo nei e toa lua o Ioane le Papatiso ia Iesu. O le tasi o i laua o Aneterea, ma o le tasi ua mautinoa lava o le tagata na ia faamaumauina nei mea, o le na igoa foi ia Ioane. O lenei Ioane, e tusa ai ma faamatalaga, o le tausoga o Iesu, o ia o le tama a le uso o Maria o Salome.

Ina ua faliu atu o ia ma iloa ai Aneterea ma Ioane o mulimuli atu ia te ia, sa fesili atu Iesu: “Se a ea la outou feau?”

Ua fai mai i laua, “Le Aʻoaʻo e, o fea e te mau ai?”

“O mai ia, ina matamata,” sa tali atu ai Iesu. E tusa o le itula e fa i le afiafi, sa nonofo ai Aneterea ma Ioane faatasi ma Iesu i lena aso. Mulimuli ane ua matua fiafia tele Aneterea ua ia faanatinati atu nei e saili i lona uso e igoa ia Peteru. Ua ia taʻu atu ia  te ia, “Ua ma maua le Mesia.” Ua ia aumai foi Peteru ia Iesu. Atonu i lea lava taimi ua maua ai foi e Ioane lona uso o Iakopo ma aumai foi ia Iesu; ui i lea, na ia le faailoa mai o ia, pei o lana masani i na o tusia e Ioane lenei faamatalaga i lana Tusi Evagelia.

I le tasi aso, ua maua ai foi e Iesu Filipo ma valaaulia o ia: “Mulimuli mai ia ia te aʻu.” Ona maua lea e Filipo o Natanielu o le ua igoa ia Patolomaio, ma faapea atu: “Ua matou maua o ia le ua tusia e Mose i le tulafono, atoa ma le au perofeta, o Iesu lea o le atalii o Iosefa, o le Nasareta.” Ua faaletonu Natanielu. “E mafai ea ona tupu o se mea lelei mai Nasareta?” sa ia fesili atu ai.

Ua fai mai Filipo, “Ina sau ia e matamata.” Ina ua latou o mai ia Iesu, ona fetalai atu lea o ia ia Natanielu: “Na ou iloa oe i lalo o le mati, a o lei valaau atu Filipo ia te oe.”

Ua ofo Natanielu. ‘Le Aʻoaʻo e, o oe lava o le Alo o le Atua, o oe lava le Tupu o Isaraelu,’ sa ia tali atu ai.

Ina ua mavae lenei mea, ona tuua ai lea e Iesu ma ona soo fou faamaonia le Vanu o Ioritana ma malaga atu loa lava i Kalilaia. Ioane 1:29-51.

◆ O ai uluai soo o Iesu?

◆ Na faapefea ona faafeiloai atu Peteru, ma atonu foi ma Iakopo, ia Iesu?

◆ O le a na faamautinoaina ia Natanielu o Iesu o le Alo o le Atua?