Vaaiga Faautauta i Tala

Pasia le New World Translation E Suega

I aso ua mavae, o tagata faitau Tusi Paia o se tasi lotu sa masalosalo i faaliliuga na faia e vaega o tagata o isi lotu. O lenei le faatuatuaina e le o se mea tatau na fai mai ai le faifeau o C.Houtman i le mekasini tau aʻoaʻoga o le Nederlands Theologisch Tijdschrift (Mekasini Faafaifeau i Holani) Ina ua uma ona autalu nei faaliliuga, o lona manatu e faapea e seasea ona maua ni faamatalaga e “faaalia mai ai manatu faalotu faapolotiki po o aiaiga o le olaga a tagata faaliliu.” E ui i le vaega tele e moni ai lenei, a o nisi tagata faailoa mai o latou faalogona tau lotu ia latou faaupuga. Mo se faaaoaoga, o nisi tagata faaliliu i ona po nei ua latou matua soloia le suafa patino o le Atua mai a latou faaliliuga. O isi ua latou faaliliu seseina le upu Kena i le “afi i hele.” Ae peitai, soo se tasi na te suia pe aveesea foi se vaega o faamatalaga a le Tusi Paia, ua i ai o ia i se tulaga mataʻutia. E pei ona lapatai mai le tasi tusi o le Tusi Paia: “Ai se tasi foi e ave ese se upu i upu o le tusi o lenei valoaga, e aveeseina e le Atua lona tofi i le tusi o le ola.”—Faaaliga 22:19.

Na i lo o le ave esea o le suafa o le Atua mai le Tusi Paia, ua taofia pea e le New World Translation of the Holy Scriptures lenei suafa e faa-7,210 taimi. O kopi o le Tusi Paia i le uluai gagana ua aumaia ai i mau se faavae i le faia faapea. Ma le fiafia lava, ua faailoa mai e Houtman faapea i le manatu e uiga i lagona o e faaliliu o “le New World Translation a Molimau a Ieova e mafai ona sao mai faitioga o iloiloga.”

Oge Faia e Tagata

O le le maua o le suavai ma mea ʻai i Aferika ua ulutala ai i nusipepa e sili atu i le tausaga. O lea o le faitau aofai o e maliliu e le o se mea fou i lena konetineta. “O le matelaina i Ethiopia na amata i le 1981,” sa fai mai ai se alii suesue i Lloyd Timberlake i le mekasini The Middle East. Ua pagatia Chad i le matelaina mo le 10 tausaga, a o Cape Verde mo le tusa ma le 15 tausaga. Peitai o le fesoasoani i le mala na ona amata ma toe taofia, na sili atu ona faavae le taimi i tala fou e tele na i lo o manaoga moni o tagata.” Sa faavae le autu o faitioga a Timberlake i le leai o ni mea ʻai i Aferika ona o tagata ae le o le natura o mea. Sa ia faasino atu i “malo e leai se poto ma fesoasoani valea atoa ma aiaiga o atinae” o le mea e tuuaia lea ua vaevaeina ai i latou e faia filifiliga autu, mai tagata nuu o e o loo pagatia.

O le pagatia o le fanau a tagata ona o ia lava e le o se mea fou. I le tusa ma le 3,000 tausaga ua mavae, na iloa ai e le tusitala o le Tusi Paia le Tupu o Solomona faapea “ e i ai ona po e pule ai le tasi tagata i le tasi, e leaga ai o ia lava.” (Failauga 8:9) E aunoa ma le manatu i mataupu silisili faaleatua, o fuafuaga a le tagata, e aofia ai ma le maua o mea ʻai ia lava mo e matelaina, o le a matua le taulau ona o le manatu faapito ma le leaga o le fanau a tagata. Maeu le sao ona aofaia mai e le Tusi Paia o le poto o le faaletagata pe a faatusatusa i le Atua: “E tele mafaufau o loo i le loto o le tagata: a o le pule a Ieova e tumau lava lea!”—Faataoto 19:21.

Taotoga o le Fatu i Tamaiti

E teena e Molimau a Ieova le tuiina o le toto ona o mafuaaga faaletapuaiga. ‘Ia taumamao ma le toto,’ ua faatonu mai ai le Tusi Paia. (Galuega 15:20) Pe aumaia e lenei tulaga fale-Tusi Paia se mafatiaga i le tausia o le soifua maloloina o a latou fanau? E leai. Mo se faaaoaoga o le mataupu e uiga i “le taotoga o maʻi fatu o tamaiti Molimau a Ieova i lo latou faatoa fananau mai” ia Iuni 1985 lomiga o le The Journal of Thoracic and Cardiovascular Surgery ua faaiu mai faapea: “O taotoga o maʻi fatu i le faatoa faananau mai e mafai ona faia i se tulaga sologa lelei i tamaiti e aunoa ma le tuʻiina o se toto.”

Na faapea lea mataupu: “Ua sili atu nei i le 20 tausaga na faaiuina ia Iuni, 1983, e 110 fanau a matua o le faatuatuaga Molimau a Ieova, e tai 6 i le 12 tausaga le matutua, na faia ni taotoga mo le suia o le fatu ua le faaaogaina ai taotoga faapitoa mo le fatu i le Texas Heart Institute.” E ui lava e le o aumaia e le mataupu ni faamaumauga tau fuainumera i le manatu, a e fai mai fomaʻi tipitipi o lo latou manatu autu o “tamaiti Molimau a Ieova e masani lava ona sili ona manuia ma lelei” na i lo o e na tui i ai le toto.

O le mea e ofo ai, ina ua uma ona lisiina mai mea e ao i Kerisiano ona taumamao ai—e aofia ai ma le toto—sa tusi atu le au aposetolo ma Kerisiano matutu. “Afai tou te taumamao ma nei mea, e lelei ai outou. Ia outou manuia!”—Galuega 15:29.