E Faapea Ona Mafai Ona E Faaalia le Loto Faafetai Mo Mea na Faia e Iesu

E LEO tele galuega a le “Faafetai” i lo upu. O le mea lea, afai e te talisapaia mea na faia e Iesu mo oe, o le a e manao la e faaalia le faatuatua ia te ia o lou Faaola. O le mea moni, ua na o le faia lava faapea e mafai ai ona e faamoemoe e te maua aoga mai le taulaga togiola a Iesu. Manatua faaupuga, “faatuatua” ua maua i le Ioane 3:16? Ioe, e aumaia ai i ina se manatu e sili atu na i lo o lea na ona talitonu ma ioe ai i lea mea moni na ia maliu mo oe. E aafia ai le gaoioi i luga o lena lava talitonuga.

Ia utagia faatonuga na tuuina atu e Peteru i Iutaia na faalogologo ia te ia i se taimi mulimuli ane ina ua mavae le Penetekoso i le 33 T.A.: “O lenei, ina salamo ia outou ma outou liliu, ina ia soloiesea a outou agasala.” (Galuega 3:19) Ua faamaonia mai ai i inei ituaiga o gaoioiga e lua. I le tasi itu, ua tatou tetee atu ma le faamaoni i faanaunauga agasala a o tatou tino ma mafaufau. O le isi itu, ua tatou ole atu i le Atua mo le faamagaloina o a tatou agasala e faavae i le taulaga togiola a Iesu.—1 Ioane 2:1, 2.

 Faataitai i Faaaoaoga a Iesu

O Lolani, o le sa avea ma Kerisiano papatisoina mo le 24 tausaga, na fesiligia pe ai se a ua ia loto faafetai ai ona o mea na faia e Iesu. Sa ia tali mai: “Ou te talisapaia lena taulaga togiola, a e peitai o lana faaaoaoga e sili ona fesoasoani ia te aʻu. O lona soifuaga ua avea o se fua mo au e faataitai i ai.”

Afai tatou te loto faafetai moni, pe tatou te le mananao ea e mulimuli i faaaoaoga a Iesu o le loto maulalo, gauai, ma le alofa faataulagaina totino? Pe a tali mai ou laugutu, “Ioe!” o le a la le tali atu o ou uiga ma au gaoioiga? Mo se faataitaiga, o le a le tali atu a le toatele pea fesagai ma se tofiga e siitia ai le tapuaiga moni a e o loo manomia ai foi le loto maulalo ma le faataulagaina i la latou vaega, e pei o le fufuluina o le fola o se nofoaga o loo fai ai sauniga? O le a lou uiga faaalia? Ona o lou talisapaia o Iesu ma lona Tama faalelagi, pe a o e loto malie e talia se tofiga e toatele tagata o le a manatu maulalo i ai ma e le logo malie? Sa faamaulaloina e Iesu ia lava i le faia o se galuega e fai ma faataitaiga i isi.—Ioane 13:2-17; Filipi 2:7, 8.

Sei tatou talanoaina se tasi foi faaaʻoaʻoga. O le le femalamalamaai i le va o tagata e masani lava ona oo atu ai i le faia o ni upu mamafa ma faalogona tiga. O le a le mea o le a faia e le toatele pe afai o latou i ai i se potu o loo tumu i ni tagata a o loo i ai foi ma se tasi sa faaita ia i latou? O le a o le a e faia? Ona o lou alofa ia Iesu ma Ieova, pe o le a e loto malie e faia le uluai laasaga ina ia faaleleia la outou eseesega ma le na mafua ai, ma faia lea i se auala filemu ma le agaga maulalo? Sa faia faapea e Iesu ma lona Tama faalelagi i le fanau agasala a tagata.—Roma 5:6-10; 1 Ioane 4:9-11.

E faaopoopo i le tuua o lona mamalu faalelagi ina ia avea o se tagata ma tuuina ai i lalo o lona soifuaga faalelalolagi e avea o le Faaola o le fanau a tagata, sa faia ai e Iesu se auaunaga tautele e ala i ana aʻoaʻoga. E leai lava se tagata ola e sili atu ona malosi le aafiaga o le fanau a tagata i mea lelei na i lo Iesu Keriso. O ia o se faiaʻoga e le ma faatusalia. Sa ia aʻoaʻo tagata e uiga i le suafa o le Atua, ona uiga patino, ana fuafuaga, ma lona finagalo mo mea fai ola faaletagata.—Ioane 7:45, 46.

Faatasi ai ma le tele o ana faaaʻoaʻoga faitaulia o le aʻoaʻo atu i lana Lauga i luga o le Mauga. I lena lauga sa faatulaga ai e Iesu le mea ua lauiloa nei o le tulafono faa-auro: “O mea uma foi tou te loto i ai ia faia e tagata ia te outou, ia faapea ona outou faia ia te i latou.” (Mataio 7:12, The New English Bible) Sa ia faailoa mai foi po o oa poloaiga sili e lua o i le Tulafono: ‘Ia alofa atu ia Ieova le Atua ma lou loto atoa, ma lou agaga atoa, manatu atoa, ma le malosi atoa, ma ia alofa i le tuaoi e pei o oe lava.’ (Mareko 12:29-31) o le isi mea ia le faagaloina o ana valoaga, o ona faataunuuga ua faaalia manino ai ia i tatou po o fea ua tatou i ai i le faagasologa o taimi a le Atua.—Mataio, 24 ma le 25.

Sa lagolagoina e Iesu ana aʻoaʻoga e ala i ana gaoioiga, ua aumaia ai ia i tatou le mea tonu e fai, le faaaʻoaʻoga lelei atoatoa, e ao ona mulimuli ai. Sa amata lana galuega i le tuuina atu atoatoa lea o ia e faia le finagalo o lona Tama ma faaatagia lea i le papatisoina o ia i le vai. Na auina mai o ia e le Atua i le lalolagi, o le mea sili lava ia molimau i le upu moni. A o lei maliu Iesu, sa mafai ona faapea atu i lona Tama: “Ua ou tuua atu le viiga ia te oe i le lalolagi; ua ou faaumaina le galuega na e tuuina mai ia te au, ou te faia,” ma “ua ou faaalia atu lou suafa i tagata na e foai mai ia te aʻu i le lalolagi.”—Ioane 17:4, 6.

Sa faamoemoe foi Iesu mo isi ia faataitai i lana faaaʻoaʻoga. Ua faaalia lenei i ana lava upu ma upu foi a isi. “Sau ma mulimuli mai ia te aʻu,” ma “Ina mulimuli mai ia te aʻu.” Sa fetalai ai Iesu i le Mataio 4:19 ma le 19:21. “Aua na tigaina Keriso lava o le sui o outou, ua tuuina mai ai e ia le faaaʻoaʻo mo outou, ina ia outou mulimuli atu i ona tulagaaao,” ma “Ia outou faaaʻoaʻo mai ia te aʻu, pei o au ia Keriso,” sa tusia ai e aposetolo o Peteru ma Paulo.—1 Peteru 2:21; 1 Korinito 11:1.

Ina ia faaalia le loto faafetai mo mea ua faia e Iesu Keriso mo oe i le avea o se Faiaʻoga Sili  ma le Faaaʻoaʻo foi, ia faaauau pea ona e faamasani i ana aʻoaʻoga. E manaomia ai la i lenei le suesue e le aunoa o le Afioga a le Atua, a e maise lava Tusitusiga Eleni Faa-Kerisiano, ia o loo maua ai le tele o aʻoaʻoga a Iesu. Talu ai lou manaomia o se fesoasoani ina ia e malamalama ai ma talisapaia i mea o e faitauina, o se mea poto pe a e maua mo oe fesoasoani mo suesuega faale-Tusi Paia ua uma ona lomia faapitoa mo lena lava faamoemoe. * A e le gata foi i lea, ia faia se taumafaiga faapitoa ina ia faatatauina mea ua e aʻoaʻoina i lou olaga i aso fai soo. Ioe, e manaomia se gaoioiga saʻo. Sa matauina e Iesu: “E le sao atu i le malo o le lagi i latou uma o e fai mai ia te aʻu, Le Alii e, le Alii e, na o le na te faia le finagalo o loʻu Tama o i le lagi.”—Mataio 7:21; 4:17; Luka 4:17-21.

Faamuamua le Tapuaiga ia Ieova

I aso nei e sili atu i le 1,056,000,000 tagata e fai mai o Kerisiano. A e paga le itiiti o le loto faafetai ua faaalia e le toatele o i latou mo mea na faia e Iesu mo i latou! E tino mai, ua lagona e le toatele e lava mo i latou pe a latou o i le lotu tau o le faalua i le tausaga, i aso malolo faapitoa a Kerisinetoma. Po o le faapea mai foi o nisi, ‘Ou te alofa i le Atua aua ou te talitonu i Tulafono e Sefulu.’ A e pe toafia o usiusitai i ai pe tausia foi? O lena tusi tulafono sili ona lelei, fusia faatasi ai le nuu o Isaraelu anamua, na aumaia ai se taitaiga mo le tapuaiga moni a Ieova le Atua, a e maise lava ana uluai poloaiga e fa.—Esoto 20:1-11.

E toafia ua tautino mai o ni Kerisiano o loo mulimuli atu i faaaʻoaʻoga a Iesu i le faatatauina o mataupu silisli o i Tulafono e Sefulu i o latou olaga i aso fai soo? O latou avatu ea i le Atua lo latou “tuutoina atu” e pei ona manaomia i le poloaiga e lua? E pei o Iesu,  latou faailoa atu ea le suafa o le Atua i se auala saʻo, lea o loo faamamafa mai i le poloaiga lona tolu. O Kerisiano moni e le gata ina ola i olaga mama a e faamuamua foi le tapuaiga a Ieova i o latou olaga.—Mataio 6:33.

Ua iloa e le toatele o e ua taua o Kerisiano faapea o le faapotopoto faatasi o se vaega lea o le tapuaiga a le Atua. A e peitai pe sa e manatu muamua o le auai e le aunoa i sauniga faa-Kerisiano, o se faailoga lea o le loto faafetai? Sa faapena le aposetolo o Paulo. Sa ia manatunatu faapena i le mataupu e 10 o lana tusi i tagata Eperu. Sa ia faaalia ai foi le matautia o le vaai faatauvaa i sauniga faa-Kerisiano. O se ituaiga uiga e mafai ona faavaivaia ai se Kerisiano ma le gaoioi i galuega lelei o le faatuatua. A e mo isi, o lo latou talisapaia o le ala a le Atua mo le faaolataga e ala ia Keriso e mafai ona toe mei i tua. Afai e moni lea ma o lo latou faatuatua ua tauau ina faaitiitia pe a le iloiloina, e mafai ona taitaiina atu ai le agasala ma le loto i ai, e oo lava ina avea ma aposetasi. O lenei mea e tauau ai ina iu atu i le tausia o le mea alofa a le Atua e pei o se “mea e taʻulepaiaina” po o se mea taatele, ma o le faalumaina lea o Ieova ma Iesu Keriso.—Eperu 10:23-31.

Matau le lapataiga a Paulo faatatau ia i latou o e ua laʻa i tua atu o le manatu faatauvaa i sauniga i le matua teena o le mea alofa a le Atua mo le faaolataga. “O le na faaleaogaina le tulafono a Mose na oti o ia i le mau a le toalua po o le toatolu, ua le alofagia; pe ni a fa outou i le sili o le mamafa o le taui e taʻutatauina ai e ua soli le Alo o le Atua, ma ua taʻulepaiaina e ai le toto o le feagaiga na faapaiaina ai o ia, ma ua upu leaga i le Agaga i le alofa tunoa?”—Eperu 10:28, 29.

O le Tulafono o le mea alofa a le Atua e ala ia Mose. O lea sa faamanatu atu ai e Paulo i lana au faitau tusi faapea afai e le salamo i latou ua solia lena Tulafono tauatua o le a maua le faasalaga mamafa, o le oti, o le a la le tele e tatau ona faasalaina ai i latou o e le faaaloalo ma faaleamanaia le meaalofa sili a le Atua e ala ia Iesu Keriso, le Mose Sili. O i latou o e le faaaloalo i le Alo o le Atua o lo latou Faaola ma faaleamanaiaina lana taulaga ua i ai i le faasologa mo le “oti faalua”—o se faasalaga mataʻutia e leai se faamoemoega mo le toetu.—Faaaliga 2:8; Teuteronome 13:6-10; 17:2-7.

Ua faailoa mai e Paulo le le loto faafetai o le a i aposetate ma e agasala ma le loto i ai. E tolu ni auala ua matua faia ai e lenei tagata ni faaiuga e tetee atu ai. Muamua, ua ia “soli le Alo o le Atua.” A le o le vaaia nei o Iesu o lona fili, aua o e na manumalo i aso anamua na latou soli ua o o latou fili faatoilaloina ai, po o le vaavaai atu ia Iesu ma le loto faamaualuga aua ua solia e tagata mea ua latou lafoaiina. (Faatusatusa le Mataio 7:6) O lona lua, “ua taʻulepaiaina e ia le toto o le feagaiga na faapaiaina ai o ia.” Ua ia taʻufaatauvaaina le aoga o le (toto o Keriso) lea ua taʻumamaina ai o ia. Ua ia manatu i lena toto, na faavae ai le feagaiga fou, e le toe i ai sona aoga na i lo o le toto o tagata e le lelei atoatoa, o se mea e le paia. O lona tolu, “ua upu leaga i le Agaga o le alofa tunoa.” Ua ia upu leaga i le mana galue o le Atua, ua tetee ma le loto i ai i aafiaga a Ieova, na fai mai e leai sona aoga ma o le a ua le aoga foi ia te ia.—Efeso 4:30.

O ia gaoioga valea o le le faaaloalo e mafai ona alofia pe a fai tatou te faatauaina pea le mea alofa a le Atua mo le faaolataga. O sauniga faa-Kerisiano o ni auala ia e mafai ai ona tatou tausia le faaaloalo saʻo. Talu ai e faatasi le vaaia mai Ieova ma Iesu Keriso i nei faatasiga, o Kerisiano loto faafetai la latou te le lafoaia i latou, e pei ona faia e aposetate, na i lo o lena, latou te faia mea uma lava e mafai ina ia auai pea i sauniga.—Faatusatusa Malaki 3:16; Mataio 18:20.

O le mea lea, ia e loto faafetai ona o mea ua faia e Iesu mo oe. Faataitai i le faatuatua faamaoni i lana taulaga togiola. Faataitai i ana faaaʻoaʻoga i lou feagai ai ma isi tagata. Ia faamuamua i lou olaga le tapuaiga i lona Tama, o Ieova le Atua. I lea auala e mafai ai ona e faapea atu: “Faafetai i le Atua i lana mea foai fua e le mafaamatalaina” o le alofa tunoa e ala ia Iesu.—2 Korinito 9:15.

[Faaopoopoga i lalo]

[Ata i le itulau 6]

O auala e faaalia ai lou loto faafetai mo Iesu