O le Soifuaga o Iesu ma Lana Faiva

Faaitiitia Ioane, Faateleina Iesu

MULIMULI ane ina ua mavae le Paseka i le tau e totogo ai mea o le 30 T.A., sa tuua ai loa e Iesu ma ona soo Ierusalema. A e peitai latou te lei toe foi atu i o latou aiga i Kalilaia a e sa o atu loa i le nuu o Iutaia o i ina na latou faia ai papatisoga. Sa faia foi e Ioane lea lava galuega ua tusa nei ma le tausaga, ma sa i ai pea soo na faatasi ma ia.

E moni e lei faia e Iesu lava ia ni papatisoga, a e na faia e ona soo i lalo o lana taitaiga. O la latou papatisoga e tutusa lelei ma le uiga o le papatisoga a Ioane, o le faatusa lea o le salamo o tagata Iutaia faasaga i le feagaiga o le Tulafono a le Atua. A e peitai, ina ua mavae lona toetu, sa faatonu atu e Iesu ona soo ina ia faia se tasi papatisoga o Kerisiano o le faailoga lea o le tuuina atu o se tagata e auauna ia Ieova le Atua.

A e peitai, o lenei uluai manatu i le faiva a Iesu, e ui lava o ia ma Ioane o loo galulue eseese, a e o loo Ia aʻoaʻo atu ma papatisoina e na salamo. A e sa mulimuli nisi o soo o Ioane ma faitio ia te ia e uiga ia Iesu: “Rapi e, . . . faauta, o loo papatiso ia, ua o atu foi ia te ia tagata uma lava.”

Nai lo o le muimui foi o Ioane ia, sa olioli o ia ina ua faamanuiaina Iesu ma manao ia olioli foi ona soo. Sa ia faamanatu atu ia i latou: “O outou lava o a’u molimau na ou fai atu,E le o le Keriso a’u nei; a ua auina mai lava a’u e muamua ia te ia.” O lea sa ia faaaoga se faataitaiga matagofie: “O le tagata e ana le faatoanofotane, o le faatoafaiava lea; a o le uo a le faatoafaiava, e tu mai ma faalogo ia te ia, e tele lona olioli i le leo o le faatoafaiava; o lea foi ua atoatoa ai loʻu nei olioli.”

 I le avea ma uo a le faatoafaiava, sa uluai olioli ai Ioane i le ono masina muamua ina ua ia faailoa atu ona soo ia Iesu. O i latou taitoatasi o le a avea ma sui o le vasega faatoanofotane faalelagi a Iesu e ao ona faia ae i Kerisiano faauuina e le agaga. Sa manao Ioane ia mulimuli foi ona soo ua i ai nei ia Iesu, ona o lana fuafuaga o le sauni lea o le ala mo le faamanuiaina o le faiva a Keriso. E pei ona faamatala mai e Ioane: “E ao ina tupu pea o ia; peitai aʻu nei, e tauau ina itiiti o aʻu.”

E lei umi lava talu mai lenei mea; a e pueina loa Ioane e le Tupu o Herota. Sa avea e Herota Herotia le ava a Filipi lona uso e fai ma ana ava, ma ina ua tau atu i ai e Ioane i luma o le lautele ana gaioiga sese, sa tuua ai loa o ia e Herota i le falepuipui. Ina ua faalogo Iesu ua tuuina Ioane i le falepuipui, ona tuua lea e Iesu ma ona soo Iutaia ina ia o atu i Kalilaia. Ioane 3:22–4:3; Galuega 19:4; Mataio 28:19; 2 Korinito 11:2; Mareko 1:14; 6:17-20.

◆ O le a le uiga o le papatisoga na faia i lalo o le taitaiga a Iesu a o lei oo i lona toetu? Ma ina ua mavae lona toetu?

◆ Sa faapefea ona faaalia e Ioane e le talafeagai le muimui a ona soo?

◆ Ai se a na tuua ai Ioane i le falepuipui?