Manaomia Vave—Se Aufaigaluega mo le Seleselega!

“E tele le saito e seleseleina, a o le aufaigaluega e toaitiiti ia; o lea ia outou aioi atu ai i le Alii e ana le saito e seleseleina, ina ia aauina mai e ia ni e galulue i lana saito e seleseleina.”—LUKA 10:2.

1. O le a atonu o le a e manatu i ai e uiga i upu a Iesu i le Luka 10:2, a e peitai o le a e lelei ona lapataia oe e faia?

A O E faitauina nei upu a Iesu, o e lagona ea o loo aafia ai oe? Talu ai ona sa tautalagia nei upu i le 19 senituri ua mavae, atonu ua e manatu e le o toe i ai so latou aoga. O se faaiuga faanatinati faapena, o le mea moni e sese. Ina ia iloa le taua atoatoa o upu a Iesu, sei o tatou toe tepa lava i tua i le mea na tupu ina o uluai faia le faamatalaga, ma ia iloilo ai o tatou lava tulaga i aso nei.—Faatusatusa 1 Korinito 10:11.

2. O a tulaga na tapa ai se gaoioiga vave sa fesagai ma Iesu i le 33 T.A., ma na faapefea ona ia taulimaina?

² I le 32 T.A. ina ua mavae le Tausamiga o Faleapitaga, ua toe o le ono masina ona fesagai lea o Iesu ma lona maliu i le satauro. Ina ia fesoasoani e faavaveina le galuega talai, sa auina atu e Iesu soo e toa 70 “e taitoalua ua muamua atu ia te ia, i aai uma ma mea uma o le a maliu atu i ai o ia.” Sa latou o atu a o tagitagi pea i o latou taliga upu a Iesu: “E tele le saito e seleseleina, a o le aufaigaluega e toaitiiti ia; o lea ia outou  aioi ai i le Alii e ana le saito e seleseleina, ina ia aauina mai e ia ni e galulue i lana saito e seleseleina.”—Luka 10:1, 2.

Iuga i se Seleselega Tele

3. Faamatala nisi o iuga o le faatelega o le talaiga i nai masina mulimuli o le faiva a Iesu.

³ O le a sa iu i ai nei taumafaiga o le talaiga ua faateleina? Ua tatou faitau ai: “Ua toe foi mai le toafitugafulu ma le olioli, ua faapea mai, ‘Le Alii e, ua usiusitai mai temoni ia te i matou, ona o lou suafa.’” Maeu le faaaliga o le mana o le Atua i lenei mea i luga o temoni! O se lipoti lelei tele lenei o le auaunaga sa matua faafiafiaina ai Iesu, aua na ia fetalai: “Na ou iloa Satani ua pau mai le lagi pei o le uila.” (Luka 10:17, 18) Sa silafia e Iesu o le a matua lafoina ifo Satani ma ana temoni mai le lagi pe a mavae le fanau mai o le Malo FaaMesia i le lagi. A e ona o loo i ai pea Iesu i le lalolagi, o lenei tulia i fafo o temoni le vaaia e nei tagata faatauvaa ua avea o se faamaoniga i a te ia o lena mea fiafia o le a oo mai. O le mea lea, na tautalagia ai e Iesu le pau ifo o Satani mai le lagi i le lumanai o se mea moni.—Faaaliga 12:5, 7-10.

4. O le a le fuafuaga o le galuega o le seleselega na faia e Iesu ma ona soo a o lei oo ia Nisani 14, 33 T.A.?

⁴ O le seleselega sa tautalagia e Iesu na le o se seleselega o ni saito po oo ni fua a e o le seleselega o tagata, tagata pei ni mamoe o e ua nofo sauni e tali atu i le feau o le Malo. Ua uma ona faailoa atu fua o sea seleselega. A e peitai, na faaumaina Iesu ma ona soo le seleselega i ni nai masina ao lumanai Nisani 14, i le 33 T.A., na o se faataatiaga o se faavae mo le seleselega e sili atu ona tele e mulimuli mai i le maliu ma le toetu o Iesu.—Faatusatusa le Salamo 126:1, 2, 5, 6.

5. O a mea na tutupu e fiafia ai i le Penetekoso 33 T.A., ma na faapefea ona aafia ai i lenei mea le galuega o le seleselega na mulimuli mai?

⁵ O le taimi lenei o le aso Penetekoso i le 33 T.A. E tusa ma le 120 o soo sa faatai ai i Ierusalema. “Ona faafuasei mai lea o le taalili mai le lagi, peiseai o le matagi ua agi tele mai, ua tumu uma ai le fale sa latou nonofo ai . . . Ua faatutumuina foi i latou uma i le Agaga Paia, ua afua ai ona tautala i gagana eseese, pei ona foaiina mai e le Agaga o le gagana ia te i latou.” (Galuega 1:15; 2:1-4, 41) “Ua latou nonofo pea ma le loto gatasi i le malumalu i lea aso ma lea aso, . . . ua latou vivii atu i le Atua, ma ua alofaina e le nuu uma lava. Ua faaopoopoina i le ekalesia e le Alii (Ieova) i aso fai soo o e ua faaolaina.” (Galuega 2:46, 47) Mulimuli ane ua latou maua: “Ua atili ai ona faaopoopoina i le Alii o e ua faatuatua, o taumafa o tane atoa ma fafine.” Toe mulimuli ane: “Ua tupu foi le afioga a le Atua; ua matua faatoateleina le au soo i Ierusalema; ua anaana foi faitaulaga e toatele lava i le faatuatua.—Galuega 5:14; 6:7.

6. O a ni uiga na faia e teteega i le galuega talai i fua o le Malo?

⁶ Ua matua faatuputeleina nei teteega i le feau o le Malo. Pe sa faavaivai e lenei mea le galuega o le seleselega? E leai, aua “ua o solo foi e na faasalalauina, ma latou folafola atu le tala lelei o le upu.” Ua alu ifo foi Filipo i le aai o Samaria; ia naunau le motu o tagata ma le loto gatasi e faalogologo; ua o i fafo agaga leaga, ua faamaloloina foi e sa mamaʻi i le supa ma pipili e toatele. E le tioa ona “ua tele lava le olioli i lea aai.”—Galuega 8:1-8.

7. O le a le mamao na mulimuli ane oo atu i ai le tauaveina o le faatonuga a Iesu i le Galuega 1:8 i le ona soo?

⁷ Na fetalai Iesu toe faatuina i ona soo: “E fai foi outou ma molimau ia te au i Ierusalema ma Iutaia uma lava, ma Samaria, e oo lava i le tuluʻiga o le lalolagi.” (Galuega 1:8) Ona o le tele naua o le fanua mo le galuega ua manomia ai ma le faanatinati se aufaigaluega! Maeu se seleselega o soo o le a faatalitali nei! Ma ua faapea lava ona i ai—i lalo o le taitaiga a le agaga paia o le Atua. Mulimuli ane i le faaliliuga o Saulo fasioti tagata, ua uma ona tatou iloa: “Ona fifilemu lea o ekalesia i Iutaia uma lava, ma Kalilaia, ma Samaria, ua faamafanafanaina i latou; ua savavali foi ma le mataʻu i le Alii [o Ieova],  ma ua faatoateleina i le fesoasoani o le Agaga Paia.” (Galuega 9:13) Ina ua maua le malosi e i latou pei ni mamoe i le seleselega, e le taumate sa toe manatua lelei e na uluai soo upu a Iesu: “Ia outou aioi ai i le Alii e ana le saito seleseleina, ina ia aauina mai e ia ni e galulue i lana saito e seleseleina.” Sa tali mai ea Ieova, “le Alii e ana le saito e seleseleina” i lena tatalo? Ioe na ia tali mai! Aua na leai pe ua faapefea ona faamauina: “I le faamoemoe o i le tala lelei . . . sa talaʻiina atu foi i tagata uma lava i le lalolagi”?—Kolose 1:23.

Sili ona Faanatinati i Aso Nei

8. Ai se a ua sili atu ai ona tele le manaoga mo nisi e galulue o le Malo i le faagasologa o le 1980?

⁸ Ona aso nei, i le faagasologa o le 1980, o le manaoga moni e galulue i le seleselega ua sili atu na i lo o se isi lava taimi. Ai se a? Ona ua sili atu ona faalauteleina le oganuu i le lalolagi. O le iuga, ua i ai le tele o fua e tatau ona seleseleina ma aoaoina. Ua talafeagai lenei ma le mea na valoia e Iesu. Na ia fetalai faapea e faia lava e ona soo galuega e sili na i lo o mea na ia faia i luga o le lalolagi, e faatatau lea i le talaiga o le tala lelei o le malo.—Ioane 14:12.

9. (a) O le a le faanatinati o le galuega talai i aso nei ua faamamafa i le faaaliga ia Ioane, o loo faamatalaina i le Faaaliga 7:1-3? (e) O le a le faaiuga aoga e mafai ona maua mai i le fuaitau faapea “ua faapolopoloina mo le Atua ma le Tamai Mamoe” i le Faaaliga 14:4?

⁹ O le lagona faanatinati o le galuega talaʻi i aso nei ua faamatilatila i se faatulagaina uiga ese e pei ona faamatalaina i le faaaliga na tuuina atu ia Ioane, ua faamauina i le Faaaliga 7:1-3. I ina, “ona aʻu iloa ai lea o le agelu e toafa o tutu mai i itu e fa o le lalolagi o taofi i matagi e fa o le lalolagi.” O le a le umi o le a latou taofia ai nei “matagi e fa”? ‘Seia faamaufaailogaina auauna a lo tatou Atua i o latou muaulu. O le a le umi o le a faia ai lenei mea? Ua aumaia se faasinoga e le mea moni faapea i le faamanatuina o le Faamanatuga ia Aperila 15, 1984 e na o le 9,081 na taʻutino o ni sui o le 144,000. O e faauuina i aso nei o sui mulimuli ia o i latou o loo faamatalaina i le Faaaliga 14:4 ua faatauina nai tagata, “o e ua faapolopoloina mo le Atua ma le Tamai Mamoe.” O lea la e tino mai o le toatele “o e ua faapolopoloina’ ua uma ona aoaoina i totonu. A e pe o le faaupuga “o e ua faapolopoloina” o lona uiga e i ai nisi fua o mulimuli mai? Ioe, o le mea moni! Sa faaatagia lelei mai lenei mea i le fua tele ma le tau fuifui o isi fua sa faaputuina i le iuga o le tausaga o le seleselega a Iutaia i le taimi o le Tausamiga o Faleapitaga.—Teuteronome 16:13-15.

10. O a seleselega e lua ua agai atu i luma i aso nei, ma ua faapefea ona faamamafaina e lenei mea moni le manomia vave o ni e galulue i le seleselega?

¹⁰ O lea la ua agai atu ina manino mai faapea, a o tu lata atu le seleselega o le vaega totoe faauuina i lona iuga, a e na tatalaina ai foi le isi seleselega o le aoaoaina. Pe le o faaatagia ai ea i lenei lea mea na vaaia e Ioane i le faaaliga? “Ua mavae atu ia mea, ona ou iloa lea, faauta foi i le motu o tagata e toatele mai atunuu uma, ma aiga, ma nuu, ma gagana eseese, e le ma faitaulia e se tasi.” Sa taʻu atu ia Ioane: “O i latou ia o e o mai nai le puapuaga tele.” (Faaaliga 7:9, 14) Ua na o se taimi faatapulaaina nei o totoe e faaumaina ai le aoaoina o le “motu o tagata e toatele.” Pe a tatalaina “na matagi e fa o le lalolagi,” o le a faailoa ai le amataga “o le puapuaga tele,” o le a le toe lava se taimi! Pe o e vaaia ea le faanatinati o le manaoga mo se aufaigaluega e tele mo le seleselega ina ia aumaia i totonu le toatele o le a maua pea?

E Faitau Afe ua Tali Mai Nei

11. (a) O le a le tele o le auai o “isi mamoe” a Iesu i le seleselega? (e) O le a ua faaalia mai e e ua auai i le Faamanatuga o le 1984?

¹¹ Na valoia e Iesu lona faalauteleina atu o lana galuega o le seleselega o e pei ni mamoe ina o ia fetalai mai: “Ua ia te au foi isi mamoe e le o i lenei lotoa; e tatau ona ou taʻitaʻiina mai o i latou foi, e faalogo foi i latou i loʻu leo; ona tasi ai lea o le lafu mamoe, ma le leoleo mamoe e toatasi.” (Ioane 10:14, 16) Ua  i ai nei le sili atu i le 2,800,000 o i latou o “isi mamoe” o e ua faaalia mai ma le tiotio o i latou e auai i le “tasi o le lafu mamoe” lena. Mai lena fuainumera, e 179,421 e na papatisoina i le tausaga faaleauaunaga o le 1984! Peitai, o e na auai i le faamanatuina o le Faamanatuga e 7,416,974. O le a ua tau mai e lenei mea ia i tatou? Faapea e toatele foi isi ua uma ona faalogo i le siufofoga o le Leoleo Mamoe, a e mo ni mafuaaga eseese ua latou le tali atu ai i le valaau mafana a Iesu: “Ina mulimuli mai ia te au.”—Luka 5:27.

12. O a fesili taua e ao ona tatou fesili ai ia i tatou lava?

¹² O fea o e tu ai e tusa ma lenei galuega taua o le seleselega ‘i le faaiuga o lenei faiga o mea’? (Mataio 13:39) O faitaulia e a oe faatasi ma le anoanoai o e o loo auai i le olioli o le seleselega? Po o avea pea oe o se matamata, ma ua manatu o le a e solomuli na i lo lou talia i luma o le lautele le valaau a le Leoleo Mamoe Lelei: “Mulimui mai ia te au”? O le mea moni e leai se tasi i aso nei e manao e fai se faamolemolega pei o na tagata e toatolu i le Luka mataupu e 9, na talanoaina i la tatou uluai mataupu. Manatu i mea na misia e na tagata e toatolu—le olioli o le auaunaga o le Malo, e aofia ai atonu ma le auai i le faasaolotoina o nisi o i latou na ulutinoina e temoni.—Luka 9:57-62; 10:17.

13. Ua faapefea ona faia e le faatuatua se vaega taua i le avea o oe ma se faigaluega ma le loto i le seleselega?

¹³ Na faapea mai le aposetolo o Paulo: “A leai foi se faatuatua e le mafai ona fiafia mai o ia [le Atua].” (Eperu 11:6) Ioe, e manaomia le faatuatua i le vaega a tagata taitoatasi ina ia tuuesea fiafiaga totino ma ia tuuina atu ma le loto malie le ola i le Atua e avea o se galue i le seleselega. Mo se faaaoaoga, atonu e i ai se faafitauli matuia i lou soifua maloloina; atonu o nisi o lou aiga e matua teteʻe ma le saua i Molimau a Ieova; atonu ua e lagona foi ua e matua tele i le faia o ni suiga manaomia i lou olaga; i le isi itu, atonu ua e manatu e le mafai ona e fesagai ma omiga ua oo ia te oe i le aʻoga. Po o a lava ou tulaga, aua nei galo ua silafia e Ieova ou faafitauli e sili atu i lo so o se tasi. Ua faapea foi ona ia nofo sauni e faalatalata atu ia te oe ma faamalosia au faaiuga e auauna ia te ia pe afai e te faia laasaga e tatau ai.—Salamo 103:13, 14; Iakopo 4:8.

Faatuatua e Siitia ai ‘Mauga’

14. Faamatala po o a uiga o upu a Iesu o loo faamauina i le Mataio 17:20.

¹⁴ Sa fetalai Iesu: “Afai e tusa lo outou faatuatua ma le fua o le sinapi, e fai atu outou i lenei mauga, ‘Alu ia oe i le la mea;’ ona alu ai lea; e leai foi se mea tou te le mafai.” O le mea lenei na oo i ai le toatele o lena faitau selau afe o e na tali atu i le valaau mo nisi tagata o le seleselega i le 1980. O faafitauli ma faigata e foliga mai ua pei o se mauga ia te i latou i se taimi ua mafai ona foia ona o le fesoasoani a Ieova. (Mataio 17:20; 19:26) Manatu i mea na oo i ai o loo mulimuli mai:

15, 16. Faamatala pe na faapefea e se tama talavou i le Iunaite Setete ma se tane Katoliko i Brazil ona foia faafitauli tetele na faavaatuia ai lo la papatisoga.

¹⁵ O se tamaloa talavou i Kalefonia, U.S.A., sa mai i le polio, na pipili ai ma e faanoanoa lava ona sa lafoaia e lona aiga. Sa maua o ia e se tasi o Molimau a Ieova na asiasi atu mai lea fale i lea fale. Sa amataina loa se suesuega faale-Tusi Paia. A e peitai sa matamuli tele o ia o lea pe a taunuu atu le Molimau e faia le suesuega, e faataavale atu lona nofoa i se tulimanu o le potu ma faasaga i le puipui ina ia le iloa atu ai ona foliga. E tele ni masina sa taumafai ai lenei tama talavou e foia ona faafitauli. Peitai, sa ia mafaia lava, ma ua avea nei o ia ma Molimau fiafia papatisoina.

¹⁶ O se ulugalii Katoliko i Brazil sa le malilie i la lau tapuaiga ma sa lei pine ona suesueina le Tusi Paia ma Molimau a Ieova. Na la lagona ua faamalie o la manaoga faaleagaga, a e o loo i ai se faafitauli tele pei se mauga: O le tane o Atonio o se tagata ulaula tele. Sa ulaula o ia mo le 48 tausaga, ina ua faatoa fitu tausaga lona matua! Ua  tele tausaga o taumafai e momotu ese lenei masani a e sa le manuia. A e peitai, i le taimi la lenei, ua ese, e pei ona faaalia e Atonio: “Ua ou iloa nei afai ou te manao e faafiafia le Atua ma tuuina atu au e faia lona finagalo, e ao ona tuu. Ina ua mavae le tele o talosaga, sa iu lava ina mafai ona ou faia faapea.” Maeu se fiafia sa ia te ia ina ua faatinoina lona tuuina atu ia Ieova e ala i le papatisoga i le vai!—Salamo 66:19; Mareko 11:24.

17. (a) O a aafiaga leaga na taua e Iesu ma ona soo ua sili atu ona malolosi i aso nei sa lei faapea muamua? (e) Na faapefea ona feagai Iesu ma ona soo na ulutinoina e temoni i le uluai senituri, ma ua faapefea ona taulimaina i aso nei?

¹⁷ O le ulutinoina o Iutaia e temoni o se faafitauli lea sa fesagai pea ma Iesu ma ona soo. E faapena foi aafiaga leaga o loo galulue i aso nei, a e maise lava ina ua lafoina ifo nei Satani ma ana au temoni mai le lagi i lenei lalolagi. (Faaaliga 12:7-9, 12, 17) A faatusatusa atu i le faa-Kerisiano ma ana faiga eseese, ua le o tuuina atu e Ieova i ona tagata i aso nei le mana faavavega e tulia ai i fafo temoni. A e peitai, o le ofu tau faaleagaga ua na aumaia i Kerisiano e mafai ona avea o se puipuiga faasaga i aafiaga a temoni, ma e mafai ona faasaoloto ai isi mai le pulea e temoni. (Efeso 6:1-18) O lenei lipoti e sau mai Ghana: “Ona o le maumau ai o taumafaiga a uso, ua faasaolotoina ai le toatele mai taofiofiga a temoni.” Sa feiloai se tasi Molimau ma se fafine i le faiva, ma ina ua faatoa amata lava ona faia se talanoaga faale-Tusi Paia, “sa amata loa ona tagi le fafine.” O le a le fafitauli? Sa faamatala mai e le Molimau: ‘Ua ulutinoina o ia e le agaga leaga, ma afai e faia faapena, e tagi ai o ia, ma so o se tupe lava e ia te ia e nimo foi.’ O le faia pea la o suesuega faale-Tusi Paia sa fesoasoani ia te ia ia saoloto mai i nei faiga leaga a temoni, ma sa mafai ai ona tuuina atu o ia ia Ieova.—Ioane 8:32.

18. O le a se mea na tupu e iloa ai faapea o loo tiotio pea agelu i le taʻitaʻiga o le galuega talaʻi?

¹⁸ O faafitauli e pei o lena o loo taua i luga atonu ua avea o se mea tele i le mafaufau o se tasi ma ua oo mai ai se lagona o le fia pule i lona ola. Manatu i se mea na tupu isi fafine talavou i Niu Sila. Sa iloa e le Molimau na uluai asiasi atu ia te ia faapea “sa le mautonu o ia i ona faalogonaootia ma ua sogasogā lava ona o se mea e le mailoa.” Mulimuli ane sa faapea mai lenei tagata o ia toeitiiti lava a pule i lona ola ma sa filifili loa e tatalo muamua atu i le Atua ina ia fesoasoani mai ia te ia.” Ma i lena lava taimi sa tuitui atu ai loa se Molimau i lona faitotoa, ma i lea “sa ia matua faafetai atu i le Atua ona o le tali mai i lana tatalo.” O se mea na tupu faafuasei ea lenei mea? O lea ai se a ua masani ai pea ona tutupu soo mea faapena? O le a na fetalai i ai Iesu? “Pe a sau le Atalii o le tagata i lona mamalu ma le au agelu paia uma faatasi ma ia, . . . ona tuueseeseina lea o i latou e ia, e pei o le leoleo mamoe ona tuueseeseina o mamoe ma oti.’ (Mataio 25:31, 32; tagai foi i le Faaaliga 14:6) O loo fesoasoani le au agelu ia Iesu i le galuega o le leoleoina, ma latou te taitaiina le “aufaigaluega” a le Matai ia i latou o loo augani atu ia te Ia mo se fesoasoani.—1 Korinito 3:6, 9; tagai i le Galuega 8:26-39; 16:9, 10.

19. O le a le tulaga ua tupu i le lalolagi atoa i aso nei, ua manaomia ai le a le gaoioiga i la tatou vaega?

¹⁹ I aso nei, tusa lava po o fea atonu o tatou mau ai, e faitauafe tagata ua i ai ni avega mamafa ma faanoanoa ona o ia lava faafitauli ua mafai e le toatele o tagata o Ieova ona foia. O nisi o i latou atonu o loo lua tuoi. Ua latou  manaomia vave se fesoasoani. Ua moni lea, e pei ona fetalai ai Iesu: “E tele o saito e seleseleina.” Ua tatou aioi atu i le Matai o le seleselega ina ia auina mai nei nisi e toatele i lana seleselega i le tausaga 1986. Talosia ia uunaia oe e lou loto ina ia tali atu i le valaau: Manaomia Vave—se Aufaigaluega mo le Seleselega!

Fesili mo le Autaluga

□ O ai le Matai o le seleselega?

□ O a seleselega e lua ua agai nei i luma?

□ O a mea e sili na fetalai i ai Iesu o le a faia e ona soo?

□ Ai se a e manaomia ai e le aufaigaluega mo le seleselega le faatuatua?

[Fesili mo le Suʻesuʻega]