O E Loto Faafetai mo Mea Na Faia e Iesu?

O LE A se mea e sili ona faigofie ma tuusaʻo e faaleo ai faalogona o le loto malie na i lo le upu, “Faafetai”? Peitai e le o tagata uma e fai mai, “Faafetai” e talisapaia mea ua latou maua. E mafai foi ona faaaoga lena upu i nisi auala e pei ona faaalia o se faaaloalo e tali atu ai i se galuega a se tasi. Ua tatau, ae ui i lea ua na o upu lafo.

Ae peitai, pea a maua se mea alofa, a e maise lava pe afai o se mea tautele ua tatau ma onomea le faaalia o lagona o le loto malie faamaoni mai le fatu. O se mea alofa e mafai ona faafiafiaina ai i tatou; e mafai ona faatumuina ai se manaoga. A faia na mea e lua, ona faatauaina atili ai lea o le mea alofa. Peitai pe a faaleamanaiaina le mea alofa ma faaaogaseseina, po o le a lava se loto faafetai e faaalia, ai o tatou faalogona agai i mea alofa ma le auala tatou te faaaogaina ai.

O le na Faia le fanau a tagata, o Ieova, na ia foai mai le mea e silisili ona taua, o lona Alo, o se mea alofa. Fai mai le Ioane 3:16: “Aua ua faapea lava ona alofa mai o le Atua i le lalolagi, ua ia aumai ai lona Atalii e toatasi, ina ia le fano se tasi e faatuatua ia te ia, a ia maua e ia le ola e faavavau.” O lena mea alofa o le a na faafiafiaina i tatou ma o le a faamalieina o tatou manaoga pe a tatou faaalia le loto faafetai moni. Ui i lea, talu ai o Ieova o le ana le Foai, ai se a e ao ai ona e faafetaia Iesu?

O Le Mea Na Faia e Iesu Mo Oe

‘O le a se mea na faia e Iesu mo aʻu?’ atonu o le a e fesili ai. A o e lei fanau mai, sa faia ai e Iesu se mea mo oe. O le a lena mea? Na tuuina atu e Iesu lona soifuaga faalelagi ina ia fanau mai o se tagata e ala i le taupou o Maria. (Luka 1:26-33) E le o se mea faatauvaa lenei. Faamata e te fiafia e tuua lou aiga, filemu, saogalemu, ma le soifua maloloina, o se nofoaga, sa siomia ai oe e uo faamaoni, ae mau i se nofoaga o misa, matautia, ma faamai tumau eseese, ma fili o taupulepule e faaoo le oti ia te oe? E toatele e le a tali mai, ‘E leai se mea faapena.’ Peitai o le mea lena na faia e Iesu.—Ioane 17:5; Filipi 2:5-8.

Aua o lona Tama o Ieova le Atua a e le o se tagata, o lea, e leai se agasala a Iesu. (Luka 1:34, 35) E lei agasala faatasi lava o ia i i ona  manatu, upu, po omea na ia faia. E ui i tulaga agasala na siomia ai o ia ma teteega sa feagai mai, a mafai ona ia fetalai atu i e na teteʻe mai ia te ia: “O ai ea so outou na te faailoa mai saʻu agasala?” E leai se tasi na mautali! E pei ona faailoa mai e le aposetolo o Peteru: “O le na le agasala lava, na le iloa foi se pepelo i lona fofoga.” (Ioane 8:46; 1 Peteru 2:22) E faavae i nei mea moni, sei o tatou faatusatusaina atili lenei itu, pe faapefea ona aafia ai oe.

E toatele tagata e i ai se lagona faafaufau i le asiasi atu i tagata mamaʻi i se falemaʻi, tuu ai pea ia le nonofo faatasi ma i latou. Sa lelei atoatoa Iesu i le tino, na faapena foi ona atoatoa lelei lona soifua maloloina. Ui i lea, na le faaesea ai o ia mai isi, na te lei sailia foi se siomaga e saoloto mai ai i siama. A e ona o lona alofa, sa ia filifilia ai e taumafa faatasi, tofafa faatasi, ma auaumea faatasi ma le fanau a tagata e mamaʻi ma agai atu i le oti.—Mataio 15:30-37; Mareko 1:40-42.

O lea sa ofoina atu ai e Iesu lena olaga lelei atoatoa o se tagata mo le lelei o le fanau a tagata. I le avea ma tagata lelei atoatoa, sa ia te ia le aia i se olaga e le uma faaletagata, ma o lenei olaga na ia faataulagaina ina ia maua ai e i tatou le avanoa matagofie. E tusa ona ia faailoa mai: “E pei o le Atalii o le tagata e lei sau ia ina ia . . . a ia auauna atu ia, ma foaiina atu lona ola e fai ma togiola e sui aʻi tagata e toatele.” (Mataio 20:28) Sa tuuina mai foi e ona aposetolo se molimau e faatatau i lea mea: “A ua tatou iloa o ia o le na faamaulaloina teisi i agelu, o Iesu lea, . . . ina ia oo ia te ia le oti ona o tagata uma i le alofa tunoa i le Atua.” (Eperu 2:9) O le tuuina i lalo e Iesu o lona soifuaga faaletagata o se faatinoga sili lea o lona alofa na i lo se mea e mafai ona faia e soo se tagata. E ala i lea ua ia saunia ai se mea alofa silisili e mafai ona maua e i tatou o mea faiola le lelei atoatoa, o lona uiga, o le avanoa i le ola e faavavau.—Ioane 3:16; 15:13.

‘E tele naua mea ua faia e Iesu mo aʻu,’ atonu o lau faaiuga lena, ‘a e faapefea ona ou faaalia lou loto faafetai?’