Pulea—E Tautele Mo Kerisiano

Ina ua o atu leoleo i se aai itiiti i New Mexico, U.S.A. i se lipoti o se tagata na fanaina, sa latou iloa ai le toto ua pisipisia ai le umukuka a se ulugalii talavou ma ua salalau solo ai i totonu ma ni pi lanu mea mata. O le fafine sa ogotia i se manua i lona tino. Ai se a? Sa taʻu atu e le na osofaia o ia, o lana lava paaga, i leoleo: “E te le ita foi oe pe ana e ʻaina na o pi i aso uma lava?”

E faigata ona talitonuina lenei mea a ea? Atonu. Peitai, e mo nai mea faatauvaa ua oo lava ina fasiotia ai tagata. O mea faapenei ua tauau ia taatele i soo se nofoaga. Ua tupu tele lenei mea ona o le le pulea. Ua le mafai ona pulea o latou lagona, e oso atu ai ma le ita—ua faamatalaina e le aposetolo o Paulo o se tasi ia o “galuega a le tino.”—Kalatia 5:19-21.

O lenei faatelega o le pulea o se faamaoniga ua tatou ola i “aso faigata”, “aso e gata ai” o lenei faiga o mea faasatani. I le faamatalaina o aso nei, sa tusia e le aposetolo o Paulo faapea o tane (atoa ma fafine) “e le fia ioe latou i soo se maliega, . . . e le pulea, ma le sasao aʻe o le ita.” (2 Timoteo 3:1, 3 NW) Ua manino lava, “o aso e gata ai” ua i o tatou luga, ma ua matua faateleina le saua.

O le a o le a faia e Kerisiano ona ua iloa lenei mea? Ua uunaia i latou e Paulo ina ia tau ma “galuega a le tino” i le atiaeina lea o fua o le fua o le agaga o le Atua, e aofia ai ma le “pulea.” (Kalatia 5:19, 22, 23) O le a le pulea? Ai se a ua fautuaina ai e Paulo lenei mea? O a nisi o aoga ua ia aumaia?

O le pulea ua avea o se taofiofiga ua faia e se tasi i ona lava uunaiga, faalogona, po o tuinanauga. Sa faaalia e Paulo faapea o lenei taofiofiga ua fesoasoani e faailoa mai ai le Kerisiano moni. O le mea moni, o le faaalia o le pulea e fesoasoani i le atiinae o isi fua o le agaga o le Atua, e pei o le filemu, o le onosai, o le mataalofa, o le agalelei, ma le faamaoni. Ua mafai ai e se Kerisiano ona filiga atoatoa. O lea, na tusi atu ai Paulo i tagata Kalatia: “Ia outou savavali i la le Agaga, ona le faia lea e outou o tuʻinanau o le tino.”—Kalatia 5:16.

Ua matua tatau lava lenei mea aua o o tatou aso ua faailogaina i le leai o se pulea. Mo se faaaʻoaʻoga, ua iloa e leoleo i le tele o atunuu faapea o le toatele o tagata avetaavale ma e tietie uila afi ua latou le amanaia le tulafono tau auala. O ia soligatulafono ua aumaia ai le feei ma le ita pei se afi e taitaiina atu ai ni misa. Ioe, i se tasi auala e fepasiaʻi ai i Houston i Texas, e i ai se saʻoga e taua o le “Altercation Avenue” ona o le tele o misa e tutupu ai i ina. O se tasi faaaʻoaʻoga, manatu i le mea na tupu i se  tasi taimi a o faatali avetaavale i le laina mo ni a latou penisini. O le leai o se pulea na iu ai i le sasao ae o le ita ma oo ai lava ina fasiotia tagata a o isi avetaavale o loo taumafai ma le manatu faapito e momotu le laina ina ia maua ai ni a latou penisini o loo mananao i ai. I nei ma isi omiga faapea, e le tatau i le Kerisiano ona taaina ia i latou o e faasasao atu lo latou ita i isi. E ao lava ona iloa pea o ia i le pulea ma le faamaoni.

Aoga o le Pulea

E tele aoga e aumaia e le pulea, o nisi atonu e le manino. Mo se faaaʻoaʻoga, ua tauvaleaina e le Afioga a le Atua le ʻai ma le inu tele. (Faataoto 23:20, 21) Ua faatonu mai e le aposetolo o Paulo: “Pe tou te ʻaai, pe tou te inu, po o se tasi mea tou te faia, ia outou faia mea uma lava ia viia ai le Atua.” (1 Korinito 10:31) Ua fesoasoani le pulea ia i tatou e gauai, ma i lea ua aumaia ai aoga mautinoa e maloloina ai. Ae peitai o le inu ma le ʻai tele e le gata ina le maloloina ai ae atonu e oo lava ina aveesea ai se tasi mai le faapotopotoga Kerisiano. Ioe, o le pulea i nei vaipanoa o le a fesoasoani i se Kerisiano e pipii atu ia Ieova.

O le pulea e fesoasoani foi ia i tatou e tetee atu i le maua o le agaga o le lalolagi. (1 Korinito 2:12) I aso nei, atoa ma isi ituaiga o faiga le mama uma ua matua faasalalauina atu i sona tulaga tele, e lelei, ma e leai se leaga. A e peitai, o tane ma fafine Kerisiano ua latou tetee atu i nei faasalalauga ma tauivi ina ia tausia i latou e mamai le silafaga a le Atua. Ua latou iloa faapea “o e faitaaga, ma e ifo i tupua, ma e mulilulua, ma e tauatane, ma e faasotoma, . . . e le fai mo latou tofi le malo o le Atua.” (1 Korinito 6:9, 10) Ua mafai e le pulea ona latou tetee atu ai i le faaonanaina o i latou i mafaufauga le mama tau amio lea se manu e fautuaina i latou e lelei.

Ua salalau atu mafaufauga sese i auala eseese i aso nei a e maise lava i faafiafiaga, pe ala i le televise, tifaga, musika, tala faakoneseti, tusi faitau, po o isi lava auala. E tatau i le Kerisiano ona faaalia le pulea i le taimi o ia faaaluina e fiafia ai i faafiafiaga, i le iloa faapea e manaomia e le tagata le tele o faafiafiaga e faafouina ai o ia, ma pe a mavae lena ua mautu manatu, faapea o le mafuli tele atu i faafiafiaga e maumau ai le taimi. E tatau foi ona ia faaaoga le pulea o se ituaiga o faafiafiaga e tausisi i ai, e iloa o le tele o faafiafiaga lauiloa i aso nei ua matilatila ai amioga le mama, o faiga saua, po o se fesootaiga ma agaga. O nei mea e le tatau mo se Kerisiano.—Efeso 2:1-3.

Pulea e Iu i le Agaigai i Luma

O le pulea ua le na o se puipuiga. E fesoasoani foi i se Kerisiano ia agai i luma i le faaleagaga ma i lana faiva. Sa faamamafa mai e le aposetolo o Peteru lenei mea ina o ia tusi: “Ia faaopoopoina le amio lelei i lo outou faatuatua, ia faaopoopo foi le poto i le amio lelei, ia faaopoopo foi le le gaoia [pulea] i le poto.” Fai mai o ia o nei uiga faatasi ai ma le onosai, amio atua, alofa i le au uso, ma le alofa, “ona avea ai lea o outou ma e ua le paie, a o e fua mai le iloa lelei o lo tatou  Alii o Iesu Keriso. (2 Peteru 1:5-8) Ua faapefea ona fesoasoani mai le pulea ia i tatou ia agaigai i luma i le avea o ni faifeau Kerisiano?

E masani lava ona faaaluina e Kerisiano le tele o taimi i masina taitasi e taʻu atu ai i isi e uiga i le tala lelei o le Malo o le Atua. (Mataio 24:14; 28:19, 20) A e peitai, na i lo le agaigai i luma, ua latou solomuli, ma atonu ua oo lava i le tulaga ‘ua le fua.’ O le a e ao ona latou faia?

‘Ia faaopoopo i lo outou poto le le gaoia [pulea],’ sa lapatai mai ia Peteru. Atonu o le pulea i le itu tau itula e tuuina atu i faafiafiaga, gaoioiga tau i le faalapotopotoga, po o galuega masani foi. Po o le pulea atonu e aafia i le faamalosia pea o se tasi e agaigai i luma na i lo o le fetaiai ma le leai o ni faalogona. E mafai e se tasi ona atiae lenei mea e ala lea i le faia o suesuega totino faale-Tusi Paia e le aunoa, faapea foi ma le auai i sauniga faa-Kerisiano.

E mafai foi e le pulea ona fesoasoani i se Kerisiano agaigai i luma i lana faia ma isi. I le atiinae o le pulea, o le a olioli ai o ia i manuia e sili atu i le auaufaatasi ai ma isi i le faapotopotoga, ma o le a manumalo le agaga o le olioli ma le filemu. (Efeso 4:3) O tagata taitoatasi, e ala i le pulea, o le a saili ina ia le avea ma mea e tausuai ai nisi i le faapotopotoga.—Filipi 1:9, 10.

O le pulea e aafia faapitoa a le taofiofia o le laulaufaiva. E tatau lenei mea pe afai ia le manao e tausuai nisi. A e le faigofie lenei mea. Sa tusi atu le soo o Iakopo: “A le sese se tasi i le upu, o le tagata lea ua sao.” (Iakopo 3:2) O lea, sa faamalosia ai e Iakopo Kerisiano uma ina ia galulue e pulea o latou laulaufaiva, ina ia latou vivii atu ai i isi. (Iakopo 3:5-12) O lea na ia tusi atu ai: “Ua luluina foi le fua o le amiotonu ma le filemu e i latou o e faatupuina le filemu.”—Iakopo 3:18.

Pulea i le Talaiga

I se isi tulaga, atonu o le a fetaiai se Kerisiano i le galuega talai ma se tasi e le pulea. I ia itu e tatau i le Kerisiano ona faaalia malosi le le gaoia, ia filemu ma aua le tali atu i se upu po o se gaoioiga. Sa faataatia e se tasi fafine Kerisiano se faaaʻoaʻoga uiga ese i lenei mea. I lona tolu o aiga na ia asiasi atu i ai i le taeao o se tasi aso Toonai, sa tatala mai e le ona le fale le faitotoa ma amata ona tafana mai ia te ia. Peitai, sa tumau pea ona filemu le faifeau. Sa ia faapea atu, “Ua e fana au.” “Ioe,” sa tali atu ai le ona le fale, “Ua ou fanaina oe,” ma tafana pea. Sa lipotia mai e le Molimau: “E lua pulu i lou ofu tele, lua i lau ato ma le tasi i lou vae. E tasi le pulu na oso i le va o ou vae. Sa ou lagona le mu i pauta o pulu i ou vae a o ou taumafai e alu ese mai lona polotito.”

Sa taumafai pea le fafine Kerisiano e tausia le pulea e le o se mea e masani ai i lenei tulaga na tofoina ai. Sa tatalo ia Ieova e fesoasoani ia te ia ia oo atu i le isi fale a e ia le paʻu i le ala. Sa mafai ona ia faia faapea, ma ia oo atu ai i le sitepu ona o le fesoasoani a ona lima. Sa tali mai le ona i lana tuitui atu ma, ina ua iloa ua manua o ia sa aveina o ia i totonu o le fale ma le agalelei tele. Sa faia e lenei fafine ma lana tama teine matua o se tamaitai tausi mai le fesoasoani muamua a o le isi ua telefoni atu i leoleo ma le aufaigaluega a le falemai. O le le gaoia o lenei faifeau Kerisiano na matua ofo ai muamua leoleo, ma le aufaigaluega a le falemai, o le motu o tagata na tumutumu ai, ma mulimuli ane o le aufaigaluega a le falemai.

E moni, o le toatele o faifeau Kerisano e tafanaina. A e masani lava ona latou feagai ma tagata o e loto tiga ma le malilie. E ao ona latou manatua faapea “o le tali filemu e liliueseina ai le ita.” (Faataoto 15:1) O Iesu o lo latou faaaʻoaʻo. Na tusi Peteru e  uiga ia te ia: “O le sa agateleina, a e lei toe agatele atu, na faatigaina o ia a e lei faamatau atu, a ua tuuina atu o ia e ia i le na te faamasino tonu.” (1 Peteru 2:23) Ioe, o le pulea o se uiga lelei lea o se faifeau Kerisiano.

E Faapea Ona Atiae le Pulea

Talu ai o le pulea o se fua o le agaga paia o le Atua, tatou te manaomia la lena agaga e atiinaeina o ia. E pei ona tusi atu ai Paulo, “Ia outou savavali i la le Agaga.” (Kalatia 5:16, 22, 23) O Kerisiano uma e tatau ona avea o ni tagata aʻoga naunau o le Afioga a le Atua, aua o lena tusi na maua mai i le agaga paia. O le suesue e le aunoa o lena Afioga, ma faatatau mea ua tatou aʻoaʻoina mai ia i o tatou olaga i aso uma, o le a mafai ai ona pulea o tatou mafaufauga, “o loo faatoilaloina manatu uma ia anaana ia Keriso.” (2 Korinito 10:5; Roma 12:2) Ioe, o se mea taua mo se Kerisiano ona faamasani i manatu o Iesu ma Ieova le Atua.

O le loto, o le nofoaga o uunaiga, e tatau foi ona aafia malosi i le agaga o le Atua talu ai o le pulea o lona uiga o le le gaoia, po o le taofiofia o ni lagona po o ni manaoga o se tasi e sau mai le loto. (Mataio 15:19) O lea, ia manatua, o se faatonuga lelei lenei: “Ia sili ona leoleoina o lou loto i le leoleoina o mea uma; aua e tupu mai ai le amio [o le puna o le ola ia].” (Faataoto 4:23 NW) Ia pai le agaga o le Atua i lou loto a o e aʻoaʻoina mataupu silisili o le Tusi Paia. Saili ia manatua i lou mafaufau [pei o se tauloto] pe a mafai, faatonuga faale-Tusi Paia e mafai ona e toe manatu i ai pe a fesagai ma ni tulaga tofoina ai.

E lelei le auaufaatasi ma uso a Kerisiano e mafai foi ona fesoasoani i le atiinae o le pulea. (Eperu 10:23-25) O sauniga eseese a le faapotopotoga Kerisiano ua fuafuaina ia fesoasoani i Kerisiano uma lava i a tupu a e i le poto o le Tusi Paia ma ia tomai i le fuaina mai o fua o le agaga o le Atua. E faaopoopo i lena le sailia o aumea ia i latou o loo fai ma faaaʻoaʻo i le faaalia o le pulea. I lea, o le a faalaeiauina ai foi oe ia fuaina mai lenei uiga.—Faataoto 13:20; 27:17.

O se tasi o mea ia le faagaloina o le fesootai atu lea o Ieova i le tatalo. E tatau i le Kerisiano ona tagi atu ma le naunau i lana fesoasoani i le atiinae o le pulea. Ole atu mo le fesoasoani a lona agaga. Ma afai e te iloa ua e le taulau i le faaalia o le pulea i nisi o mea, ia talosaga atu ma le naunau ma le loto maulalo mo lana faamagaloga. Sa aʻoaʻo i tatou e Iesu ia tatalo: “Aua foi e te taʻitaʻiina i matou i le tofotofoga.” Sa faalaeiauina e Paulo Kerisiano ina “ia finafinau i le tatalo.” O lea, ia alu atu ia Ieova “ia tatalo e le aunoa” mo lana fesoasoani a o e taumafai e atiae le pulea o lou olaga.—Mataio 6:13; Roma 12:12; 1 Tesalonia 5:17.

Maeu se uiga silisili ona lelei o le pulea! Ia atiae pea lea uiga. O i latou e faia faapea e sili atu ona faaaloalogia i latou. Latou te olioli i le filemu sili ma le fiafia i totonu o o latou aiga ma soo se faia i totonu o le faapotopotoga, a e faapea foi ma se faia lelei ma isi i o latou olaga i aso uma. A e sili ai ona taua, e fesoasoani le pulea e faamautinoa se faia lelei ma Le na Faia Mea ma galue foi e faailoa i latou o ni auauna Kerisiano moni a lo latou Atua o Ieova.

[Pusa i le itulau 24]

Mo Lau Suesuega

O le mataupu lona iva lenei “fua o le agaga.” E mafai ona e maua isi mataupu i lenei faasologa i lomiga o le Watchtower o Mati 15, Iuni 15, Iulai 1, Aokuso 1, Setema 15, Oketopa 15 ma Novema 15, 1985. O le a e olioli e faia lenei o se fuafuaga e toe autaluina ai lenei faamatalaga sili faale Tusi Paia.