Talai Atu le Malo o le Atua
Talai Atu le Malo o le Atua
“Ina tuu pea ia i e ua oti e tanu i o latou tagata oti; a o oe, e te alu ma talaʻi atu le malo o le Atua.”—LUKA 9:60.
1. O a fesili taua ua laga i fetalaiga a Iesu i le Luka 9:60?
LE MALO o le Atua—o le faanaunauga sili lena i le soifuaga o Iesu! E faapena foi i aso nei mo i tatou uma lava o ona soo faamaoni o loo mulimulituʻi i ona tulagaao. I le avea o ni Kerisiano, o loo tatou filiga e mulimulitui atu i tulagaao o Iesu e ala lea i le ola e tusa ai ma le Tusi Paia. (1 Peteru 2:21) Ae peitai, a o tatou ulufale atu i le tausaga e 1986, pe ua tatau ea na tatou toe suesueina mea ua faamuamua i o tatou olaga? Mo se faataitaiga, o le a faapefea ona e faamatala i se tasi le fetalaiga a Iesu e “tuu ai pea i e ua oti e tanu i o latou tagata oti”? Ai se a ua e manatu ai faapea sa faamamafa e Iesu le taua o le talai atu o le feau o le Malo, i le faatusatusa atu i mea e foliga mai o mea tatau e manomia i le aiga? O le a sau tala e fai?
2. O ana fea na amata ai le silisiliese o Ieova, ma ua faapefea ona faatumauina?
2 I tua a o lei faaaogaina e Iesu le faaupuga “le Malo o le Atua,” sa tusia e le faisalamo o Tavita i lalo o faagaeega tauatua: “Ua faatumauina e Ieova o lona nofoalii i le lagi; ua pule aoao foi lona malo.” (Salamo 103:19) Na amata le silisili ese o Ieova ina ua amataina lana foafoaga. E le mafai ona faagaeetia le faavae o lona nofoalii. E le ma faoa foi lana pule silisili ese i le vateatea mai ia te ia. E le tioa ona faamafanafana mai le faisalamo: “Ia outou taʻutaʻu atu lona mamalu i nuu ese . . . Aua e silisili Ieova, e tatau foi ona matua viia o ia”!—Salamo 96:3, 4; 109:21, Tanielu 4:34, 35.
3. (a) O a mea na tutupu sa taʻitaʻiina atu ai i le luia o le pulega a Ieova? (e) Ua faapefea ona fuafuaina e le Atua ina ia foia le finauga o le silisiliese i le Vateatea?
3 A e peitai, e le o tagata uma ua faaauau pea ona vivii ia Ieova. Na luia e le uluai aposetate, o Satani le ala na faailoa atu ai ma faatinoina ai e Ieova Lona silisili ese i Ana mea faiola i luga o le lalolagi. (Kenese 3:1-5; Iopu 1:6-12; 2:1-5) O le iuga, i le lalolagi ma mulimuli ane i le lagi, sa aafia ai nisi o mea faiola i uiga fouvale o Satani. Sa faagaeeina foi e Satani tagata e faatuina se faasologa o malo faalelalolagi. Sa ia faaaogaina nei mea e luia ai le tonu o le pulega a le Atua. (Faaaliga 12:1-6) Ina ia faamalie lenei fuafuaga o le silisili ese i le vateatea, na fuafuaina ai loa e Ieova se mea e le masani ai, e pei ona valoia mai i le Tanielu 2:44: “O ona po ia tupu e faatuina ai e le Atua o le lagi o le malo e le faaumatia e faavavau; . . . na te tuimomomoina ma faaumatia ia malo uma lava, a o ia e tumau lava e faavavau.”
Ua Fai ma Tupu o Isaraelu
4. O le a le uiga sa mafai ai ona faapea mai Tavita “o Ieova o le tupu lava ia,” ma o le a sa manaomia e lenei taualumaga mo le lumanai?
4 O lea la ua manino nei le mata o le vai e faapea, e ui ina o le silisili ese o Ieova na amata mai lava i le amataga o lana foafoaga, a e ua ia fuafuaina nei e faia se faailoga patino o lana pulega tautupu ia foia e faavavau le fesiligia o le tonu o lona silisili ese. O lenei faaupuga o le Malo faa-Mesia i le lagi. O le Malo faalelalolagi lea na faatuina e Ieova i luga o le nuu o Isaraelu sa avea o se fua itiiti e fai ma sui o lena Malo “e le faaumatia e faavavau.” O lea, ina ua aumaia e le Tupu o Tavita le ato laau o le feagaiga i le aai o Ierusalema, sa ia pese manumalo ai: “Ia fiafia le lagi, ia olioli foi le lalolagi, ia outou fai atu i nuu ese, ‘O Ieova o le tupu lava ia!” (1 Nofoaiga a Tupu 16:31) Ioe, i se uiga faapitoa “ua avea ai Ieova ma tupu” ia Isaraelu uma lava. Sa avea o se taimi o le olioli tele, ma sa manao Tavita e talai atu lena mea ofoofogia!
5, 6. (a) I le a le tulaga na ese ai Tavita mai tupu? (e) O ai na faaatagia e Tavita, ma i le a le tulaga?
5 O le talaaga o le Tupu o Tavita o se leoleo mamoe na faataatia ai se faavae i le avea o ia ma tupu se tupu e tulaga ese. O ia o se tupu leoleo mamoe. Ua faamatala mai e le faisalamo o Tavita na filifilia e le Atua mo lenei tulaga i le faapea mai: “(O Ieova) ua na filifilia foi Tavita lana auauna, ma na aumaia o ia nai lotoa mamoe . . . ina ia fafaga lava e ia Iakopo lona nuu, o Isaraelu foi lona tofi. Na ia fafaga foi e ia ia te i latou e tusa ma le faamaoni o lona loto; na ia taʻitaʻi ia te i latou i le poto o ona lima.”—Salamo 78:70-72.
6 O le tausia pei se leoleo mamoe e Tavita o ona tagata, o le faamoni o lona loto i le Atua, ma lona tomai e avea o se taitai ua tauagavaaina ai o ia e faaatagia le Mesia o loo afio mai, o le o le a faaaogaina i se auala faapitoa e faailoa mai ai le pulega tautupu a Ieova i le vateatea ma ia gaoioi o se Tupu Leoleo Mamoe alofa. O lenei taualumaga ofoofogia i fuafuaga a Ieova na muliai valoia mai e le perofeta o Esekielu: “Ou te faatuina foi le leoleo mamoe e tasi ia te i latou (Isaraelu), na te fagaina i latou, o laʻu auauna o Tavita; . . . o au nei foi o Ieova e fai au mo latou Atua, o laʻu auauna foi o Tavita e fai o ia ma alii sili ia te i latou; o aʻu o Ieova ua ou fai atu ai.”—Esekielu 34:22-24.
Aliai Mai le Tupu-Leoleo Mamoe na Valoia
7, 8. (a) Sa faapefea ona iloa le Tupu Leoleo-mamoe na valoia mai, ma o le a le mea ua tatau mo lona faaalia mai? (e) O le a le fuafuaga na “fiafia” ai Ieova ia Iesu?
7 O le na valoia e Ieova o lona lava Alo, o Iesu. E faatatau ia te ia, sa taʻu atu e le agelu o Kaperielu i le taupou o Maria: “Faauta foi, o le a to oe, ma e fanauina se tama tane, e te faaigoa ia te ia o Iesu. E sili o ia, e taʻua foi o le Alo o le Silisili ese; e foai atu e le Alii o le Atua ia te ia le nofoaiga a Tavita lona Tama; e fai o ia ma tupu i le aiga o Iakopo e faavavau; o lona malo foi e leai sona gataaga.” (Luka 1:31-33) Maeu le matagofie o le faaleaoga o le pulega tautupu a Ieova o le a i ai! E moni lava, o sea ituaiga o mea o le a oo mai e ao ona faalauiloaina i le lalolagi aoao: “O Ieova o le tupu lava ia!”
8 Na muliai mai i le fanau faavavegaina o Iesu ma lona tuputupu ae o se tagata matua, sa tuuina atu o ia mo lona papatisoga i vai o le vaitafe o Ioritana. I lena lava taimi sa faailoa mai ai e le Atua Iesu o lona Alo i le liligiina ifo i ai o le agaga i ona luga ma fetalai ane: “O loʻu Atalii pele oe, ua ou fiafia lava ia te oe.” (Luka 3:22) O le a ua “fiafia” ai ia Iesu? Ua faamatala mai e tusitusiga a Luka: “O Iesu foi, ua faatoa oo i le tolugafulu o ona tausaga (ona amata ai lea o lana galuega).” (Luka 3:23; Ref. Bi footnote: “Po o, le ‘amata ona (aʻoaʻo).’” Ua fai mai le The Revised Standard Version ma le New International Version, “Ina ua amata lana faiva.” O le a le “galuega” po o le “faiva” a Iesu? O le a sa ia “aʻoaʻo atu”? Ua aumaia e le tusitala o Mataio le tali: “Ua faataamilo Iesu i Kalilaia uma, ua ia aʻoaʻo i o latou sunako, ua ia talaʻi atu foi le tala lelei o le malo, ma faamalolo e ia o maʻi uma ma maʻi tiga uma o le nuu.”—Mataio 4:23.
9. I le a le tulaga sa pei ai Iesu o lona auga tama o Tavita?
9 Sa tuutoina atu e Iesu lona soifua ‘e talaʻi atu le Malo o le Atua.’ E pei o lona auga tama o Tavita, sa ia faataitaia le faamaoni o lona loto i le le faagutugutulua i lona faamaoni tau le Malo o Ieova. (Luka 9:60; 4:3-13; Ioane 16:33) Na faamaonia e Iesu o ia o le “leoleo mamoe e tasi” o le na folafolaina e Ieova e faatuina mai. Sa fiafia o ia e fafaga faaleagaga i latou sa “lailoa ma tuulafoaiina, e pei o mamoe e leai so latou leoleo” le au failotu. (Mataio 9:36) E tusa ai ma lona tomai i le galuega faaleoleo mamoe i tagata ma o le a faapefea ona agaigai i luma i tausaga o sau, na fetalai Iesu: “O aʻu nei le leoleo mamoe lelei; ua ou iloa aʻu mamoe, ua iloa foi aʻu e aʻu mamoe . . . Ua ia te au foi isi mamoe e le o i lenei lotoa; e tatau ona ou taʻitaʻiina mai o i latou foi, e faalogo foi i latou i loʻu leo; ona tasi ai lea o le lafu mamoe, ma le leoleo mamoe e toatasi.”—Ioane 10:14, 16.
10. E faapefea ona aʻoaʻoina i tatou i uiga eseese na tali atu ai Iutaia i le valaau a Iesu ina ia mulimuli atu ia te ia?
10 Sa faapefea ona gaoioi tagata Iutaia i le valaau a Iesu ina ia afea ma ona soo e pei ni mamoe e mulimuli ia te ia? Na eseese lava o latou uiga faaalia. A o tatou iloiloina nisi o tali, manatu po o le a lau tali talu ona e fesootai ma le feau a le Malo o le Atua.
“Mulimuli Mai ia te Aʻu”—O Le a Lau Tali?
11. Faamatala le tali a Simona, Aneterea, Iakopo, Ioane, ma Mataio i le valaau a Iesu, “Ina mulimuli maia ia te au.”
11 A o afio ane Iesu e latalata i le sami o Kalilaia, sa ia silafia ai Simona ma Aneterea lona uso o fai lo la faiva. “Sa fetalai atu Iesu ia te i laua: ‘Ina mulimuli maia ia te au, ou te faia oulua ma fai faiva i tagata.’ Ona la tuua loa lea o la upega, a e mulimuli atu ia te ia. Ua tuanai atu teisi lea mea, ona silafia lea e ia o Iakopo le atalii o Sepetaio ma Ioane lona uso, . . . ma . . . ua valaau atu loa o ia ia te i laua; ona la tuu loa lea o lo la tama o Sepetaio i le vaa faatasi ma auauna, ua la mulimuli atu ia te ia.” (Mareko 1:16-20) Na faapea foi le tali mautinoa a le ao taulaga o Levi, po o Mataio. Sa fetalai atu (Iesu) ia te ia: ‘Ina mulimuli maia ia te au.’ Ona tuua lea e ia o mea uma, ua tulai ma mulimuli ia te ia.”—Luka 5:27, 28.
12. O le a le faafitauli i le tagata lea na fai atu ia Iesu: “Le Alii e, ou te mulimuli atu ia te oe i mea uma e te maliu atu i ai”?
12 A e ui i lea, e le o tagata uma e tali atu ma le mautinoa i le valaau a Iesu, “Ina mulimuli mai ia te au.” Manatu i le tagata lena o loo faamatalaina i le Luka mataupu 9, lea na fetaiaʻi ma Iesu a o asiasi atu mai lea aai i lea aai. Sa fai atu i ai ia Iesu: “Le Alii e, ou te mulimuli atu ia te oe i mea uma e te maliu atu i ai.” i le tala a Mataio o lenei tagata o se tusiupu. Sa faaaloalogia e tagata tusiupu ma taua i latou o “Rapi.” Sei manatu nei la le tali a Iesu: “E fai lua o alope, e fai foi mea e momoe ai manu felelei; a o le Atalii o le tagata e leai se mea e moe ai o ia.” (Luka 9:57, 58) Sa tau atu e Iesu i le tagata lenei faapea afai e mulimuli solo pe a fai ma ona soo. O le iuga e faapea e faamaualuga tele lenei tagata ma le talia ai lenei ituaiga o olaga. Ua mamafa tele ia te ia lona le mautinoa po o fea o le a moe ai i le po e sosoo ai.
13. Ai se a na tali atu ai Iesu i le tali lava lea na ia tali ai i le tasi lea e mafai ona avea ma soo?
13 Sa fetalai atu Iesu i le tasi foi tagata sa i ona tafatafa: “Ina mulimuli mai ia ia te au.” A ua tali mai o ia ia Iesu: “Le Alii e, tuu mai ia ia te au, seʻi ou alu e muai tanu i loʻu tama.” Matau le tali a Iesu: “Ina tuu pea ia i e ua oti e tanu i o latou tagata oti; a o oe, e te alu ma talaʻi atu le Malo o le Atua.” (Luka 9:59, 60) O le faamolemolega a lenei tagata sa lei faamaonia ai faapea ua oti lona tama. Afai ana oti, o lona uiga e le sau le atalii i le auala e faalogologo ia Iesu. E leai, e foliga mai i le tala a le tama faapea sa ia talosaga mo se taimi e faatali ai le oti o lona tama. Sa lei nofo sauni o ia e faamuamua lava le Malo o le Atua i lona olaga.—Mataio 6:33.
14, 15. (a) O le a o faaalia i le talosaga a le tagata lona tolu ia Iesu? (e) O le a le lesona e mafai ona tatou aʻoaʻoina i aso nei mai le tali atu a Iesu i lenei tagata?
14 O loo taua i faamaumauga le tagata lona tolu, o le na tauofo: “Le Alii e, ou te mulimuli atu ia te oe; a ia tuu mai ia te au, seʻi ou muai faamavae i loʻu aiga.” O lenei tagata e tino mai na fesili atu mo ni tulaga e o faatasi ma lona mulimuli atu ia Iesu. E pei lava o fai atu ia Iesu: ‘Faauta! Ou te mulimuli atu ia te oe, pe a fai . . . ‘O le a le tali a Iesu? “O le tago lona lima i le suotosina, ma tepa i tua, e le tatau ia i le malo o le Atua.” (Luka 9:61, 62) Afai e manao le tagata o uʻuina le suotosina e sua ai se laina saʻo i le fanua, e tatau lava ona tausisi lana vaai ia saʻo lelei i luma. Afai e liliu lona ulu ma tepa i tua, o lona uiga o le a fepiʻopiʻoai le laina. Atonu pe sulu ai foi o ia? E faapena foi la i e mulimuli atu i tulagaao o Iesu: afai e te toe tepa i tua i lenei faiga tuai o mea, tusa lava pe mo sina minute, e aumaia ai faalavelave, ma tuia ai vae ma o ese ai mai le ‘ala vaapiapi e tau atu i le ola.’—Mataio 7:14; tagai foi i le Luka 17:31-35.
15 Sa e faalogo i le valaau a Iesu: “Ia mulimuli mai ia te au”? O le a sau tali na fai? Sa e faaalia ea le tali mautinoa e pei ona tali atu ai soo o Simona, Aneterea, Iakopo, Ioane, ma Mataio? O e nofo sauni ea e faia soo se faataulagaina e manaomia ina ia e mulimuli atu i tulagaao o le Matai e pei o na tagata? Afai o le ioe lau tali, o le a e olioli foi la i le faaeaga le mafaatusaina o le auai i le faalauiloaina atu o le tala lelei o le Malo o le Atua.
16. Na faapefea ona sauniunia e Iesu ona soo ina ia auai faatasi ma ia i le talaiina o le tala lelei?
16 A o leʻi auai atu e Iesu ona soo e talaʻi le Malo, sa ia aʻoaʻoina ma le tomai i latou i le pe faapefea ona faia e ala i lana lava faaaʻoaʻoga patino. Mulimuli ane, sa avatu e Iesu ia te i latou ni faatonuga auiliili i le pea faapea ona sailia o e pei ni mamoe i oganuu o le a tuuina atu ia i latou. O loo tumau pea ona faatatauina faatonuga a Iesu i lenei 20 senituri. Sei tatou suesueina nisi o nei mea e pei ona faʻamauina i le Mataio mataupu 10.
Faatonuga Tau le Talaʻiina o le Malo
17. Faatusatusa le manatu taua o le feau o le Malo sa talaʻiina i le uluai senituri ma lea i aso nei?
17 O le matua o le feau a le au soo e tatau ona tutusa ma lea na talaia e Iesu: “A outou o, ia outou talaʻi atu, ia faapea atu, ‘Ua latalata mai le malo o le lagi.’” (Mataio 10:7) A e peitai, ua faavae nei lena Malo i le lagi. O le Tupu-Leoleo mamoe a Ieova o Keriso Iesu, ua pule nei! O lea, ua sili ai ona uiga upu a Tavita: “Ia fiafia le lagi, ia olioli foi le lalolagi, ia outou fai atu i nuu ese, ‘O Ieova o le tupu lava ia!’” (1 Nofoaiga Tupu 16:31) I aso nei, ua le gata ina faaeaina i tatou e lagolagoina lenei faailoaga faapitoa o le pulega tautupu a Ieova i le vateatea, a e ua tatou olioli foi ona ua tatou ola i le taimi o le a foia ai le finauga i le silisiliese o Ieova mo aso uma lava o loo sau.
18. O le a sa faamamafa atu e Iesu i ona soo i le Mataio 10:8-10, ma o ai moni lava ua na talisapaia lea i aso nei?
18 Ua faamatala mai e le Mataio 10:8-10 uiga o i latou o loo auai i le galuega talaʻi. E tatau ona faamuamua le Malo o le Atua i o latou olaga, o manaoga faaletino e tulaga lua. Ai se a? Ua fetalai Iesu: “Aua e tatau ona avatu le mea e ʻai i le faigaluega.” E tausia pea e lo tatou Tama faalelagi i latou o e tuu atu lo latou faalagolago ia te ia. Ma e faitau selau afe faifeau auauna faasauatoa o Molimau a Ieova i aso nei ua mafai ona molimau mai i lenei mea moni.—Numera 18:30, 31; Teuteronome 25:4.
19. O faapefea ona sailia e ua tatau ai i aso nei, ma i lalo o le taʻitaʻiga a ai?
19 O isi faatonuga a Iesu: “O se aai po o se faoa aai tou te oo atu i ai, ia fesili po o ai se ua tatau; ia outou nonofo ai i le tou o ai.” (Mataio 10:11) Tatau i ai le a? Tatau i ai le faaeaga o le faafiafiaina o lenei auauna a Ieova ma faalogo i le feau o le Malo o le Atua. O le mea moni, i tua atonu sa nonofo le au soo i le fale o lena tagata ua tatau ai ma avea ma nofoaga e faamautu i ai a o latou sailia isi foi ua tatau ai i le oganuu atoa. Ua faapena foi ona mulimuli Molimau a Ieova i lea lava fuafuaga i aso nei. Ua latou faaaluina le faitau miliona o itula ma faia le tele o taumafaiga i le sailia o e ua tatau ai i le tele o oganuu eseese. O lea, afai e maua na tagata, ua matua fiafia tele. Molimau e toe asia i latou ma faamatala ia te i latou le Afioga a le Atua. O lea, i aso nei, ua leoleoina pea ma le tomai e Iesu i latou e pei ni mamoe i le itu taumatau o lona finagalo malie.—Mataio 25:31-33.
20. E faapefea i se ona le aiga ua tatau ai ona tofo i le filemu ua ofoina atu e le talaʻia o le Malo?
20 “A outou ulufale atu i se aiga, ia outou ofo alofa atu i ai. Pe afai foi ua tatau lea aiga, ia oo atu i ai la outou faamanuia.” (Mataio 10:12, 13) “Ia manuia le aiga nei” o se faafeiloaiga masani lea i ona po o Iesu. (Luka 10:5) Sa pepese le au agelu i le taimi o le fanau mai o Iesu: “O le viiga i le Atua i mea aupitoaluga; ma le manuia i le lalolagi; o le finagalo alofa i tagata.” (Luka 2:14) O se ona le aiga e tatau ai o le a na iloa lenei filemu ua valoia mai i lona talia lea o le feau a soo o le Malo. Ua faapena foi auga o le tala lelei o le Malo i aso nei. Ua na aumaia ai tagata i se faia filemu ma le Atua e ala ia Iesu Keriso, ma na aumaia foi le filemu i totonu o uso talitonu.—2 Korinito 5:20, 21; Filipi 4:7; Efeso 4:3.
21. Ai se a ua talafeagai ai le mau o le tausaga 1986?
21 I le kalena faaletausaga o le 1986, o le a faaalia ai i Maota o le Malo a Molimau a Ieova i le lalolagi atoa le mau o le tausaga ua siiina mai i le Luka 9:60: “Ālu ma talaʻi atu le malo o le Atua.” Maeu se faamanatuga lelei ma le poto lenei mo faifeau faamaoni uma lava a le Atua o le auai e le aunoa i le talaiina o le Malo o le Atua! O le mea faigaluega a le Atua i aso o lana Tupu faa-Mesia o le tuʻimomomoina o malo faalelalolagi uma lava a Satani. O lea, e le o se mea e ofo ai, faapea, o le a avea le Malo o le Atua o se mea taua sili i olaga o Molimau taitoatasi uma lava a Ieova. Ua tatou iloa o le uiga o lenei mea o lo tatou faaolataga!—1 Timoteo 4:16.
E Faapefea Ona e Tali?
□ O le a le leva ma le mausali o le afio tupu o Ieova?
□ O le a le finauga tau vateatea ua manaomia nei ona faaiuina?
□ O le a e tatau ona nofo sauni i latou uma e mulimuli i tulaga aao o Iesu e faia?
□ Ai se a ua sili ai ona uiga i aso nei le faaupuga “Ua fai Ieova ma tupu lava ia”?
□ O le a le fuafuaga ua aoga ai le tusitausaga o le 1986?
[Fesili mo le Suʻesuʻega]
[Ata i le itulau 12]
Sa tuua e Mataio mea uma ae mulimuli ia Iesu