Aso e Pei “o Ona Po o Noa”

“Ua tumu le lalolagi i le saua . . . ua leaga lava; auā o tagata uma ua leaga ia i latou a latou amio i le lalolagi.”—KENESE 6:11, 12.

1, 2. (a) O a ituaiga o faiga saua e tatau i Molimau a Ieova ona finafinau ai i aso nei? (e) O a tulaga ua faamafanafanaina ai tagata o le Atua i le faamoemoe o le toetu?

SAUA! E pei o ona po o Noa, ua faapena foi aso nei, ua avea ai le upu saua o se upu tauloto. E oo lava i a i latou o loo feoai ma le Atua moni, e pei o Noa, e le o saogalemu i le saua. Sa matua oo atu lenei mea i le vaaiga ma mafaufauga o le lalolagi, ina ua faatafunaina i se pomu se Maota o le Malo o Molimau a Ieova i Sini, i Ausetalia, ia Iulai 21 i le tausaga ua mavae, a o faia se lauga lautele mai le Tusi Paia e uiga i le faamaoni i le Atua ma le aiga. Na o le toatasi le Molimau na fasiotia ai. E sili atu i le 40 e na auina atu i le falemai. Ua toe malolosi uma i latou nei, e ui lava o loo tauaveina pea e nisi faailoga iloga i o latou tino talu ai lena solitulafono faasaua. Na faapea mai se leoleo suesue o faalavelave: “E 110 tagata sa i totonu ma o se vavega lava ona e lei maliliu uma le toa 110.”

² I isi vaega o le lalolagi—e pei o Aialani i Matu, Lepanona, ma El Salvador—ua faalauiloa ai e Molimau a Ieova le “tala lelei” i se siomaga o loo faaauau ai pea faiga saua. E toaitiiti na fasiotia, a o auai i le faiva. I le tele o atunuu “o le mea e tupu,” e pei o faalavelave faafuasei ma mafuie, ua toesea ai foi ola faapelepeleina, ona o nei mea tutupu, ua mafai ona faamafanafanaina tagata o Ieova i le faamoemoe o le toetu.—Failauga 9:11; 1 Tesalonia 4:13, 14.

3. (a) O a nisi o mea atonu o le a tutupu i tagata o Ieova, e pei ona faamaonia e mea na tutupu talu ai nei ma le Luka 21:6? (e) O le a le mautinoa ua ia i tatou i le puipuiga a Ieova i le taimi o le “puapuaga tele.”?

³ Talu ai nei i Mexico, e na o le 23 Molimau ma a latou aumea na aafia i le sili atu i le 5,000 o e na maliliu i se mafuie mataʻutia. I Puerto Rico, e toafitu e na faitauina ia i le 300 o e na toesea o latou ola i lologa ma sologa. O lona uiga o lenei mea ua le taulau ona aumaia e Ieova le puipuiga i ana auauna? E leai. E le mafai ona tatou saoloto mai faalavelave ma mala. I le tulaga o sauaga, sa muai lapataia mai e Iesu i ona soo, i le faapea mai: “O isi foi o outou e fasiotia e i latou.” E faitau afe o tatou uso na maliliu i lima saua o Nazi Hitler. O le a manatua e Ieova i latou uma lava i le toetu. A e peitai, pe a tafiesea e le puapuaga tele na valoia mai le lalolagi, o le a faia e Ieova e mafai ona ia faasaoina i latou o e valaau i le suafa, e pei lava ona sa ia faia i ona po o Noa.—Luka 21:16-19; Mataio 24:14, 21, 22, 37-39; Isaia 26:20, 21; Ioelu 2:32; Roma 10:13.

4. E faapefea ona faatusatusa tulaga o mea i aso nei ma na o loo faamatalaina i le Kenese 6:11, 12?

⁴ Talu mai le 1914 ua oso faataisusue le saua i le kelope atoa. E faitau selau miliona tagata ua fasiotia i taua ma mala lenei senituri. Ua mafatia le fanau a tagata na o le ave faamalosia o vaalele i le ea ma vaa i le sami, o le pomuina e tagata faatupu faalavelave, fasioti tagata i le tulaga lautele,  feitagai i le va o lanu, ma le faamataʻu mai o le faateleina o auupega faaniukelea. E moni lava o “aso e faigata” nei ma le “atuatuvale o nuu, i le fememeai.” (2 Timoteo 3:1-5, 13; Luka 21:25) Peitai, ua ola tagata o Ieova i aso nei i totonu o se mala o le a aumaia ai se mataʻutia e sili atu i le saua, e ui ina e fesootai ma faiga saua. E faasino lea i tua lava e sili atu i le 4,300 tausaga i ona po o Noa. O le a lena mea?

Faatuatua o Noa i Totonu o Amioga Leaga

5, 6. (a) Na faapefea ona agai atu Satani e faaseseina le fanau a tagata? (e) O a auala na tulaga ese ai Noa ma lona aiga i le le avea o ni o le lalolagi?

⁵ Mai le fouvalega i Etena ma agai mai ai, ua fuli atu Satani le Tiapolo e “faasese i le lalolagi uma.” (Faaaliga 12:9) Na poloaia e Ieova le tane ma le fafine ina ia faaaoga tatau o la malosi na tuuina atu e le Atua tau i feusuaiga e ala i le tulaga faaipoipoina e “faatumu ai le lalolagi” i tagata e pei o i laua. (Kenese 1:28; Eperu 13:4) Peitai ua liua e le Tiapolo i faiga le mama faaletagata feusuaiga e le faalenatura. Faapefea? Na aufaatasi atalii agaga o le Atua ma Satani i lana fouvalega. I latou ia na avea o “temoni” ma o Satani lo latou “alii”. (Luka 11:15) Ma o a la mea sa aofia i gaoioiga a temoni? Na latou o mai i le lalolagi ma liu tino tagata, ona fai avā lea i afafine lalelei uma o tagata. Mulimuli ane o se iuga mataʻutia!

⁶ Sa fananau mai ai tagata tinoeese na afa temoni afa tagata. O i latou nei o Nefilimi, o “Tagata Maualuluga” fasioti tagata, e pei ona faaalia mai i faamaumauga: “Ua leaga lava le lalolagi i luma o le Atua, ma ua tumu le lalolagi i le saua. Ua silasila mai le Atua i le lalolagi, faauta foi, ua leaga lava; auā o tagata uma ua leaga ia i latou a latou amio i le lalolagi.” Sa oo ina faatuputeleina le saua ma amoga leaga tau feusuaiga le mama, a e na o Noa sa mafai ona taʻua: “O le tagata amiotonu ia ma le sao i e tupulaga ma ia; sa la feoai o le Atua ma Noa.” Na o lona toalua, o ona atalii, ma avā a ona atalii—sa na o i latou lava mai le fanau uma a tagata—na faaalia le faatuatua ma le mataʻu faaleatua. E foliga mai na o le aiga lava o Noa sa le pisia i amioga leaga tau feusuaiga le mama i ona aso.—Kenese 6:4, 9—12, Rf.Bi., footnote.

7. E faapefea ona faamasinoina e Ieova e amio leaga ma e amiotonu e pei ona faataʻitaʻia i aso o Noa? (Faatusatusa Mataio 24:40, 45, 46)

⁷ Na soloiesea e Ieova lena lalolagi faatemoni saua, ma le faavalea i feusuaiga. O lona aumaia o le Lolo tele, na ia tafiesea ai mea leaga uma lava. O Nefilimi ma le fanau iuvale a tagata na tafiesea i se mea e le toe manatuaina ai, a e na toe sosola atu nei temoni o e na avea muamua ma atalii o le Atua i nofoaga o agaga—e faatali ai le faamasinoga a le Atua mo i latou. A e sa i ai nisi na faasaoina! O Noa ma lona lava aiga na faasaoina. Ma ai se a? Ona o lo latou faatuatua, na lagolagoina e galuega o le fauina o le vaa ma talai le amiotonu i lena lalolagi iuvale.—2 Peteru 2:4, 5.

Tagata i Aso Nei, Ia Faaeteete!

8. O a uiga na faaatagia ai e ona po o Noa o tatou aso?

⁸ Sa faaatagia mai e ona po o Noa o tatou aso. E faapefea ona tatou iloa o lenei mea? Auā, sa valoia mai e Iesu se taimi faapea o le saua, solitulafono ma le leai o se alofa o se vaega o le “faailoga” faapea ua tatou tutu nei i faitotoa o le “puapuaga tele, e leai sona  tusa talu le amataga o le lalolagi, ua oo lava i ona po nei; e le toe faapea foi amuli.” Sa ia faapea mai foi: “A o lea aso ma lea itu aso e le iloa e se tasi, . . . ua na o loʻu Tamā lava.” Ona ia toe faaopoopo mai foi lea: “A e pei o ona po o Noa, e faapea foi pe a sau le Atalii o le tagata. Auā e pei ona faia i ona po a o lei oo le lolo, ua latou aai ma inu, ua latou fai avā foi ma faaavaga, ua oo lava i le aso na ulu atu ai Noa i le vaa, na le iloa foi e i latou ina seia oo le lolo, ma aveesea i latou uma; e faapea foi pe a sau le Atalii o le tagata.”—Mataio 24:3-21, 36-39.

9. E faapefea ona tatou alofia le iuga o i latou ‘na lei iloa’?

⁹ Ioe, “na le iloa foi e i latou.” Peitai e le manaomia ona e pei o i latou. E mafai ona e sola ese pe a faaalia mai le Alii o Iesu Keriso mai le lagi e faaumatia “e ua le iloa le Atua, ma ua le anaana i le tala lelei a lo tatou Alii o Iesu Keriso.” (2 Tesalonia 1:7, 8) E le tatau ona pei oe o tagata o le lalolagi o lo latou fiafiaga sili o le faamalie o i latou lava, i le tausia o se galuega e taʻutaʻua ai po o oa faaletino, e aunoa ma se manatu i le Atua. O le mea moni, “o le manava, o lo latou atua lea.”—Filipi 3:19.

“Inoino I Mea Leaga”

10, 11. (a) Ina ia fiafia mai le Atua, o a uiga leaga e tatau ona tatou alo ese ai? (e) O le a le ofu tau e tatau ona tatou ofuina, ma ai se a?

¹⁰ I nei aso e gata ai, o olaga o le toatele o tagata ua matele i feusuaiga, tusa lava pe faaipoipo pe leai foi. A e mo le toatele o i latou ua uma ona faaipoipo, ua sili ia i latou le tatala po o le tuuesea foi o le faaipoipoga. O le le amanaia o lapataiga manino tuusao a soo o Iesu, ua lolo atu ai le toatele o Kerisinetoma i le tauatane. O nisi, “ua tauia foi i latou i o latou lava tino” e ala i le AIDS ma isi faamai pipisi. Peitai, atonu o loo i ai se faamoemoe o le faaolataga mo i latou e faapena. Manatua sa tautala ma le agalelei Iesu i fafine talitane o e na faamamaina o latou olaga, ma talitonu ia te ia, pe a faatusatusa atu i taʻitaʻi lotu faamaualuga, le salamo o ona aso.—Roma 1:26, 27; 2 Peteru 2:9, 10; Iuta 6, 7; Mataio 21:31, 32.

¹¹ So o se tasi o tagata o Ieova o e atonu ua tau pisia, po o e ua maileia e lolo atu i faiga le mama e tatau ona ala mai ma ofu i ofutau atoatoa mai le Atua! (Efeso 6:11-18) E moni o nei aso ua “pei o ona po o Noa.” O lena “leona tagi,” le Tiapolo, ma ana temoni leaga ua galulue faalausosoo e aunoa ma se malologa ina ia maua taitoatasi ma maileia auauna a Ieova. E tatau ona tatou mausali faasaga i na fili, ia tumau i le faatuatua.—1 Peteru 5:8, 9.

12. Ai se a e taua ai le mulimui i faatonuga a le Salamo 97:10?

¹² O se mea e faateia ai, ona e oo lava i e ua iloga i le faapotopotoga a Ieova ua lolo atu i faiga le mama, e aofia ai ma le  tauatane, fesuiai o avā, ma le faaleagaina o fanau iti. E tatau ona matauina foi, faapea i le tausaga talu ai e toa 36,638 tagata na faateaina mai le faapotopotoga Kerisiano, o le vaega tele o i latou o na o le faia o amioga le mamā. E tatau ona tausia ia mama le faalapotopotoga a Ieova! (1 Korinito 5:9-13) O le taimi lenei mo toeaina o le faapotopotoga, auauna o le faiva, ma o tatou uso ma tuafafine uma ia aloese mai so o se tulaga e taʻitaʻiina atu ai i faiga le mama. O le faamaoni i poloaiga a Ieova o le a tauia, e pei ona tusia i le Salamo 97:10: “Outou e ua alolofa atu ia Ieova, ia outou inoino i mea leaga; o loo tausi e ia i agaga o ona tagata amio Atua; na te laveaiina i latou ai lima o e amioleaga.”

13. O a lapataiga mauaa ua aumaia e aposetolo o Paulo ma Peteru?

¹³ I se taimi e le o toe mamao, ona faamamaina lea e le “puapuaga tele” i latou uma o “e fai mea e inosia.” E tatau ona tatou manatunatu ia tatou inoino, ioe, taumamao, ma aloese mai le faaleagaina e le lalolagi.”! (Faaaliga 21:8; 1 Korinito 9, 10, 18) Ina ua uma ona lapatai mai le aposetolo o Peteru faasaga i aposetate tauemu, ma le faaalia mai o le “aso o Ieova” [NW], ona faatonu mai lea o i tatou i le “amio e tatau ai i le amio lelei ma le amio Atua.” Sa ia faaopoopo mai: “A e faatalitali i tatou i le lagi fou ma le lalolagi fou, e pei o lana na folafola mai, e mau ai le amiotonu. O lenei, le au pele e, ua outou faatalitali i ia mea, o lea ia outou finafinau ai lava ina ia maua outou e ia ma le manuia, ua le pona, ma le mataʻuleagaina.” Maeu se olioli o le a oo atu i le “lalolagi fou” o le a ‘faia ai e le Atua mea uma ia fou’ ma ia mama!—2 Peteru 3:3-7, 10-14; Faaaliga 21:1, 4, 5.

Utagia ‘Apoapoaiga’ Faaopoopo

14. Ai se a sa mo na o sina taimi ai le faamamaina o le lalolagi e le Lolo?

¹⁴ Ina ua maea ona faamamaina e le Lolo tele o le lalolagi mai faiga faatemoni uma ma mea inosia faaletagata, sa toe taʻua e Ieova le uluai poloaiga na tuuina atu ia Atamu, i lona fetalai atu ia Noa ma ona atalii: “Ia outou fanafanau, ma ia uluola, ma ia tumu le lalolagi ia te outou.” (Kenese 9:1) Ma o se auala foi faapena, na latou faia ai lena mea, e 70 “aiga”—o se fuainumera atoatoa faafaatusa—o loo lisiina mai i le Kenese mataupu e 10. A e peitai sa ogotia pea le fanau a tagata i auga o le agasala tuufaasolo mai ia Atamu. O aafiaga faatemoni e foliga mai ua toe taʻitaʻiina atu ai foi le fanau a tagata ia goto atu i amioga leaga o feusuaiga.

15. O le ua tatou aʻoaʻoina mai le faamasinoga a le Atua ia Sotoma?

¹⁵ I se taimi, ona o atu lea o le “uo” a Ieova, o Aperaamo, ma le atalii o le uso o Aperaamo o Lota i le nuu o Kanana. Na filifili e Lota e nofo i le Itumalo o Ioritana, e “pei o le faatoaga a Ieova.” A e pe sa faapena ea i amio? E leai lava! O le aai o Sotoma lea sa nofo ai Lota, ma le nuu tuaoi o Komoro sa faatumulia i le tauatane. E oo lava i ni tagata amiotonu se toasefulu e lei maua ai i ina. O le mafuaaga lea, na aumaia ai e Ieova i luga o na aai “le faasalaina i latou i le afi e faavavau.” E le toe fausia na aai o amioga leaga! Sa taʻua e Iesu le  faamasinoga o Sotoma ma Komoro, faatasi ma mea na tutupu i “ona po o Noa”, e faamatilatila mai ai ia i tatou le manaoga ia leoleoina ai i tatou!—Kenese 13:10; 18:32; Iuta 7; Luka 17:26-30.

16. O a gaoioiga faatemoni ua manaomia ai ona tatou tauivi malosi mo le faatuatua?

¹⁶ Aua nei faaseseina i tatou! O loo sulusulu solo pea Satani ma ana temoni! E ui lava i se tulaga faafaatusa ua “tuuina atu i latou i maea uamea o le pogisa” ma taofiofia mai le toe liu tino tagata, a e o na agaga amio leaga ua mananao tele ia faaleagaina tagata i le iuvale. A e maise lava auauna a Ieova. (2 Peteru 2:4-6) O le mea moni, na uunaia e temoni Kanana e faia uiga le mama i lona auga tamā o Noa. (Kenese 9:22-25) O le a moni atonu na latou puea mai faiga leaga ia ‘na faia i le nuu o Kanana,’ o lea na luai mulimuli ane ai i e sa nonofo ai. (Levitiko 18:3-25) E faapena ona faamalosia e temoni feusuaiga e le faalenatura lea ua puapuagatia ai le tele o atunuu i aso nei. Pe a faia se tauiviga malosi mo le faatuatua, e tatau ona tatou tetee atu i so o se osofaiga mai agelu ua pauu ai o loo faamalosia tagata ‘e matua faia le faitaaga ma mulimuli atu i nisi tino mo faiga e le tatau ai.’—Iuta 3, 6, 7.

Fausia ae mo le Faasaoina

17. E ao faapefea ona faaalia i tatou e le ni o le lalolagi, e pei o Noa ma lona aiga?

¹⁷ E talu ai le mataʻutia o o tatou aso, e faapefea ona tatou maua se ala e faasaoina ai? Ia, na faapefea ona faasaoina Noa ma lona aiga? “O le faatuatua o Noa . . . na ia faasalaina ai le lalolagi.” (Eperu 11:7) E faapena foi aso nei, o Molimau a Ieova “e le ni o” le lalolagi amio leaga. A e le gata i lea, ua uma ona faaalia lo latou faatuatua i le tuuina atu o o tatou ola ia Ieova ma faia le papatisoga i le vai ina ia avea ma soo o Iesu Keriso.—Ioane 17:14, 16; Mataio 28:19.

18. O le a sa faaatagia mai e le fauina o le vaa?

¹⁸ A e le gata i lea, ua tatou auai i le galuega a Ieova mo aso nei, o se galuega atiina ae faaleagaga o loo taʻitaʻia e le Noa Sili, o Iesu Keriso. I le avea o se nofoaga o le saogalemu ma le faasaoina, ua faaatagia ai e le vaa le parataiso faaleagaga lea na amata fausia e Ieova i totonu o ona tagata tapuai talu mai le 1919. O se tulaga o le toe faafoisia mai o se faia filemu ma le Atua. O Lana fuafuaga lea mo le faasaoina o le aiga faaata o le Noa Sili i le “puapuaga tele.”—Mataio 24:21; 1 Korinito 3:9, 11; 2 Korinito 12:3, 4; Faaaliga 7:13, 14.

19. O le a ua faaatagia e Noa, lona aiga, ma la latou galuega?

¹⁹ “A o Noa, ua alofagia o ia e Ieova.” Maeu le lelei ona faaatagia mai o ia e Iesu Keriso, o le na feoai ma le loto maulalo ma le Atua i luga o lenei lalolagi, i le le faia o se mea na ia loto i ai! (Kenese 6:8; Mataio 17:1, 5; Ioane 8:28) O i laua uma o e talai  le amiotonu—o se faaaʻoaʻoga lelei mo Molimau a Ieova uma lava. Ma tatou te mautinoa faapea o le avā foi a Noa, sa faaatagiaina ai le vaega totoe faauuina i luga o le lalolagi i aso nei, o se faaaʻoaʻoga o le gauai atu. (2 Peteru 2:5; Luka 4:14-19; Efeso 5:21-24.) Pe a tatou manatunatu i le galuega tele o le fauina o le vaa mo le faasaoina, e mafai ona tatou iloa faalemafaufau maeu se fiafia sa i le toeaina o Noa ona o lona maua o ni fesoasoani mai ona atalii malolosi ma le tiotio e toatolu ma a latou avā! O le mea moni ua faaatagia e i latou na “le motu o tagata e toatele i aso nei o loo soosoo tauau ma le vaega tele mo le galuega atiina ae faaleagaga i taimi faaiuiu o le Lolo faafaatusa.—Faaaliga 7:9, 15.

20, 21. (a) O a faamanuiaga pupula o loo faatalitali mai mo tagata tapuai o Ieova i le lalolagi o le a faamamaina? (e) O le a le olioli ia tofo i ai nei?

²⁰ Pe a fufulu faamamaina lenei lalolagi, saunia mo le faaliliuina i se parataiso moni faaletino, o i latou sa faaatagia e atalii o Noa ma a latou avā atonu mo se taimi o le a latou fananau mai ai ni fanau i le amiotonu. Ona aumaia lea e le vavega o le toetu le faatumuina atoatoa o le lalolagi o tagata. O i latou uma na talia le faaeaga o le avea ma “isi mamoe” a Iesu o le a toe faafoisia i le lelei atoatoa, ma pe a faasaoina i le tofotofoga mulimuli pe a uma ona tuuina atu e Keriso le Malo i lona Tamā, o le a taʻu amiotonuina i latou mo le ola e faavavau.—Ioane 5:28, 29; 10:16; 1 Korinito 15:24-26; Salamo 37:29; Faaaliga 20:7, 8.

²¹ E maeu fiafiaga o loo faatalitali mai mo tagata tapuai faamaoni a Ieova! Peitai e mafai foi ona maua le olioli sili i le taimi nei i le auai ma le loto atoa i le fausiaina o le vaa faaona po nei mo le faasaoina. O faapefea ona faia o lena galuega? O le a maua le tali i le isi a tatou suesuega.

O LE A LAU TALI?

□ E ao faapefea i mea na tutupu a o lei oo i le lolo oona uluai lapataia ai i tatou?

□ O a lesona e ao ona tatou maua mai i le Mataio 24:37-39?

□ Ai se a e sili ai ona taua le “inoino i mea leaga”?

□ E faapefea ona tatau ona auai i le atiina ae o le vaa faafaatusa?

[Fesili mo le Suʻesuʻega]

[Pusa i le itulau 11]

PEI ‘O ONA PO O NOA’—

“Na o le 40 pasene o faiaʻoga o kolisi faalelotu . . . e talitonu o se tulaga le mama mo se tane ma se fafine e lei faaipoipoina ona fai ni feusuaiga.”—Saturday Oklahoman & Times, December 29, 1984.

[Pusa i le itulau 12]

Pe Faitaulia Mataupu Silisili o le Tusi Paia?

O le patele o le lotu Episcopalian sa faalogologo i se sauniga o le maliu na taʻitaʻiina e se tasi o Molimau a Ieova. Mulimuli ane na valaaulia e le patele ni faifeau se toalua mai le Watchtower Society e auai i se felafolafoaiga ma nisi o taʻitaʻi lotu i Brooklyn Heights, New York City.

Na laga ai le fesili e uiga i le tauatane. Sa faamanino atu e Molimau faapea e matua faasaina lava i le Tusi Paia lenei mea ma e faateaeseina e Molimau tagata o e faia so o se faiga le mama tau amio. (Roma 1:24-27; 1 Korinito 6:9, 10; Iuta 7) Sa fesili Molimau i taʻitaʻi lotu po o le a lo latou tulaga e uiga i lea mataupu ma o tali nei na maua mai ai:

O le faifeau o le lotu Faapotopotoga: “Ou te manatu e i ai sa matou tulafono o le tuuesea i tulafono faaopoopo a la matou lotu, a e paga lea, ou te le o manatua pe o matou faaaogaina lena tulafono!”

Le patele Episcopalian: “Afai matou te faatinoina lena tulafono, o le a leai la ni a matou tagata lotu e [totoe].”

Se failotu Katoliko: “Afai matou te faamalosia lea tulafono, o le a le i ai la ni patele e [totoe].”

E ui lava o tali a nei taʻitaʻi lotu atonu e maotua teisi, e fiafia pea Molimau a Ieova i lo latou lava tumau i le tausia o le mama o le faapotopotoga. “E le ni o le lalolagi” i latou.—Ioane 15:19.

[Pusa i le itulau 13]

PEI O ‘ONA PO O NOA’

“O se aʻoga mo le lautele i New York City mo tagata aʻoga maualuga tauatane sa tatalaina i Manhattan.” Fai mai lana faiaʻoga: “Ua matou mananao i se siomaga e le mafai ai e talavou tauatane ma tauafafine ona faatasi atu i talavou e le lava le taumatuaina.”—The New York Times, Iuni 6, 1985.

[Pusa i le itulau 14]

PEI O ‘ONA PO O NOA’—

“O ananafi na pasia ai e sui o le Riverside Church se filifiliga e talia ai se faia faatauatane e avea o se mataupu silisili i le olaga faa-Kerisiano o le aiga.—New York Post, Iuni 3, 1985.