Fausiaina mo se Lumanai e Faavavau
Fausiaina mo se Lumanai e Faavavau
“Auā e taitasi fale ma saunia e se Tufuga, a o le Tufuga o le na te saunia mea uma lava o le Atua lea.”—EPERU 3:4, Weymouth.
1, 2. (a) O ai na fuafuaina le vaa, ma na faapefea ona auiliiliina faatonuga na tuuina atu? (e) Ai se a e taua ai lo tatou usiusitai e pei ona sa faia e Noa?
I LE 4,400 tausaga ua mavae sa poloaia ai e le Atua Noa ia fau se vaa mo le faasaoina o ola. A e sa lei tuuina atu e le Atua ia Noa e fau o so se ituaiga o fausaga atonu e mafai ona opeopea. Na i lo lea, sa ia tuuina atu se faatonuga patino i mea e faaaogaina, lona faataatiaina, le umi, le lautele, le maualuga, alasavili, ma le teuteuina o totonu ma fafo. “Na faia foi e Noa e faapei ona poloai atu ai le Atua ia te ia i mea uma, sa faapea lava ona faia e ia.”—Kenese 6:13-16, 22.
2 Maeu se faaaʻoaʻoga lelei mo Molimau a Ieova i aso nei! E pei o Noa, ua tuuina mai ia i tatou se galuega faasaoola a e mo le taimi nei o loo faatilotilo i le faaolataga o le ‘faitau miliona o e o loo ola nei atonu o le a le oo i ai le oti.’ Maeu le taua o lo tatou usiusitai, e pei ona faia e Noa! Paga le manaomia vave ona tatou mulimuli i le faaaoaoga a Le sili ia Noa, o Iesu Keriso, i le auauana atu e avea o ni ‘e talai le amiotonu’!—2 Peteru 2:5.
O se Galuega o le Fausiaina Faaleagaga
3. (a) O le a e iu i ai pe a atiina ae i luga o afioga a Iesu? (e) Ai se a o se faatupu faatuatua ai le talaiga a Iesu?
3 Ua 1,956 nei tausaga talu ona faateia e Iesu nuu tu lata ane i Kalilaia i lana faasilasilaga: “Ina salamo ia outou; auā ua latalata mai le malo o le lagi.” Sa ia faatusina i latou uma na faalogo i ana upu ma gauai i ai “i tagata poto, ua na faia lona fale i luga o le papa.” Ua tumau ma le le faagaeetia pe maluelue le faatuatua o lena tagata. E le masofa i lalo o omiga. O le talaiga a Iesu sa fausiaina ai le faatuatua. Sa matua pai atu i loto o tagata, auā na ese lava mai upu pepelo i gutu o taʻitaʻi lotu Iutaia. Sa matua ofo tagataanuu i aʻoaʻoga a Iesu. E oo lava i fitafita na auina atu e puea o ia na toe foi mai ma le le mautali, ma latou faapea mai: “Ua leai lava se tagata e tautala pei o lena tagata.”—Mataio 4:17; 7:24, 25, 28; Ioane 7:46.
4. (a) Na faapefea ona atiina ae e Iesu mo le lumanai? (e) O le a le atiina ae sili na faavaeina i le Penetikoso o le 33 T.A.?
4 Sa fausiaina e Iesu mo le lumanai. Sa ia aoaoina mai se aufaigaluega, e pei o Peteru, o le na igoa foi ia Kefa, o lona uiga “o le maa.” Sa fetalai atu Iesu i lenei soo: “O Peteru oe, ou te ati ae foi laʻu ekalesia i luga o lenei papa.” I lena vaitaimi sa avea ai Peteru o se tasi o “maa ola” na fausia i luga o Iesu, “le maa tulimanu ua filifilia, ma le taua” o le ekalesia. O lena faapotopotoga sa faavaeina i le aso Penetekoso i le 33 T.A. ina ua liligiina ifo e Iesu toe faatuina, i le itu taumatau o le Atua i le lagi o le agaga paia i luga o soo o loo faatalitali.—Mataio 16:18; 1 Peteru 2:4-6; Galuega 2:2-4, 32, 33.
5. O a atiina ae faaonaponei ua sili ona aafia ai le faapotopotoga Kerisiano?
5 I aso nei, ua matua aafia tele le faapotopotoga Kerisiano i le galueaiina o fuafuaga a Ieova. O le taimi o le “apokalipise”, po o le “faaali mai”, o mea e “tusa ona vave oo mai” ua faaalia mai i “auauna a le Atua i le lalolagi. (Faaaliga 1:1-3, Ref. Bi, footnote) O le taimi lenei e talaia ai e tatau ai i nei auauna ona ‘talaia le tala lelei o le Malo o le Atua i le lalolagi atoa e fai ma molimau,’ a o ia lei faaoo mai lana faasalaga i luga lenei faiga leaga o mea a Satani. Ua oo mai le taimi mo le tupu o Iesu Keriso ua faapaleina i le lagi, ina ia tuueseeseina tagata lotomaulalo, pei ni mamoe mai tagata faalogogata, pei ni oti o e le mananao i lena Malo, ma ia aoaoina nei “mamoe” i lana faapotopotoga o “uso” faaleagaga a o lei oo ina pa le “puapuaga tele.”—Mataio 24:14, 21; 25:31-40.
6. O le a le “vaa” i aso nei, ma e faapefea ona faasaoina i tatou?
6 O le a le vaa faaonaponei o le faasaoina? O le tulaga faaleagaga na oo i ai Molimau a Ieova i le 1919, o se parataiso faaleagaga. E pei o tagata o le aiga o Noa, e faapena le vaega totoe o Kerisiano faauuina ma a latou aumea ona tausi i ona aiaiga, ma galulue ma le usiusitai, ma le loto atoa, i le faaumaina o le fuafuaga tele faaleagaga na fuafuaina e Ieova. O lenei fuafuaga o le “ina ia na faaopoopoina ia Keriso i le sauniga o le faaatoaga o tausaga, o i latou uma lava i le lagi [amata mai i le 33 T.A. i le faauuina faapitoa mo le lagi] atoa ma i latou o i lalolagi [amataina i se tulaga iloga mai le 1935 i le “motu o tagata e toatele” faavaomalo ua fuafuaina mo le ola e faavavau i luga o le lalolagi].”—Efeso 1:10; Faaaliga 7:9, 14.
‘Faatuina ma Totoina’
7. O le a le galuega sautualua ua agai atu nei i luma, ma e faapefea ona tatou fetufai ai i le fiafia e pei ona sa faia e Noa ma Ieremia?
7 Sa tofia e Ieova le vaega totoe faauuina o Kerisiano i luga o le lalolagi, e pei lava ona ia faiai le perofeta o Ieremia, “e pule i nuu ma malo, ina ia e liaiina, ma lepetia, ma faaumatia ma soloia, ia faatuina foi ma totoina.” O lea o se galuega sautualua ua agai atu nei i luma: (1) o le faalauiloaina o le faamasinoga a Ieova faasaga i le faiga leaga o mea o le lalolagi a Satani ma (2) o le fausiaina ma le faavaeina o se sosaiete o tagata o le Atua mo le faasaoina. (Ieremia 1:10; 24:6, 7; Isaia 26:20, 21) Maeu le fiafia o le vaega totoe o tagata faauuina ma e ua faatuputeleina o a latou aumea a o latou auai i lenei galuega i aso nei! O se ituaiga o fiafia atonu na oo ia Noa maelega ma lona aiga i o latou aso.
8. (a) O le a le faatelega i le au talai i le 22 tausaga ua mavae e ao ona matauina? (e) Pe a faasino atu i le itulau e 20-3, o ai nisi atunuu sa olioli i le faatelega maoae i le 1985?
8 Pe o le a faasaoina se faitau-miliona i le aso o le maemaea o Ieova? Ua i ai le faamoemoe lelei mo lena mea, e pei ona faailoa mai i le Lipoti i le Tausaga Faaleauaunaga a Molimau a Ieova i le 1985. O le auiliilina o lenei lipoti o loo i le itulau e 20-3 [o le Watchtower Ianuari 1, 1986] O se mea e sili ona fiafia ai i le iloa o se faatelelega ofoofogia i le aofai o tumutumuga o le au faigaluega i le fanau. Ua siitia nei i le 3,024,131 le au talai o le Malo. Na ausia le matatia e 1,000,000 i le 3,000,000 i le 1985. I lena 22 tausaga, sa i ai se faatelega e 200 pasene. Maeu so tatou loto faafetai i a Ieova, o le, e ala i lona agaga paia, ona faatuputeleina mea!—Sakaria 4:6; 1 Korinito 3:6.
9. (a) Ai se a ua sili atu ai ona iloga le faatelega i paeonia? (e) O le a ua faataatia i luma o i latou uma e mafai ona faaavanoa mo lea mea, ma ai se a?
9 E oo foi i e faalauiloa sauatoa o le Malo sa i ai se faatelega mataina i na tausaga. E ui lava i le faateleina o le tulaga leaga tau i le tamaoaiga i le lalolagi atoa, a e na oso i luga le numera o le vaega tele o paeonia i masina taitasi mai le 38,573 i le 1963 i le 322,821 i le 38,573 i le 1963 i le 322,821 i le 1985—o se faatelega e 737 pasene! O le a ua faaalia i lenei mea? Na faaalia ai le agaga o le faataulagaina totino uiga ese i totonu o tagata o le Atua e tusa ai ma upu a Iesu i le Luka 9:23. E masani lava, o fuafuaga lelei ma le le faafitia o i tatou e manaomia ina ia manuia ai le auaunaga paeonia. Peitai e anoanoai taui e maua ai!—Roma 12:1, 2; Malaki 3:10.
10. (a) O le a e ao ai ona faamalo i le au talai o le faapotopotoga? (e) O a tumutumuga fou e tolu o le galuega ua iloa i inei, ma o le a ua latou faailoa mai?
10 O le faitau miliona o tagata talai o le faapotopotoga e tatau foi ona latou tau faasaga i omiga na aumaia ia i latou e Satani ma lana lalolagi. A e, ua latou ofoina atu foi, i le Atua a latou “taulaga o le viiga.” (Eperu 13:15; Roma 10:9, 10) O na itula, pe tele pe itiiti, na lipotia e outou le autalai faamaoni i masina taitasi na avea o se vaega o le tumutumuga fou e 590,540,205 itula i le auaunaga i le fanua i le 1985. O se faatelega lena e 16.8 pasene e sili ai i le 1984! O ni tumutumuga fou e 224,725,918 toe asiga ma le 2,379,146 suesuega faale-Tusi Paia i aiga ma tagata fiafia e faaalia ai faapea o e faaluiloa le Malo i so o se mea o loo tauivi ina ia avea o ni faiaʻoga lelei atoa ma ni tagata talai maelega.—Mataio 28:19, 20.
Fausiaina mo le Filemu ma le Saogalemu
11. Ua faapefea ona faasilasilaina atu le filemu ma le saogalemu moni, ma i lea le mamao?
11 I le tau faaiuga o le 1985, na faalauiloa mai ia e Malo Aufaatasi i le 1986 o se Tausaga Faavaomalo mo Le Filemu. Lata mai nei sa tele lava ni mea na talanoaina e MA e uiga i le filemu ma le saogalemu. A e o se faalauiloaga sili ona taua, faapea o se faamoemoe faale-Tusi Paia mo le filemu ma le saogalemu, na maua ai se vaitaimi iloga i le 1985 a o tufatufaina atu e Molimau a Ieova i le fanua i le lalolagi atoa le 38,805,561 Tusi Paia, tusi, ma tamai tusi, faapea foi le 300,545,609 o mekasini, na maua foi tusiga mo Le Olomatamata ma le Awake! e 1,719,930. E ala i lomiga ma le tautala atu, ua oo ai le faavaeina o le Malo o le “Alii o le Filemu” moni i se molimau atu silisili i aso nei. E moni lava, “e leai se mea e gata mai ai ona tele o lona malo ma le filemu o lona malo.”—Isaia 9:6, 7, King James Version.
12. Ona o le faatelega ua iu ai i a manaoga e tele, ma ua faapefea ona autasi tagata o Ieova i taumafaiga e faafetaiaia na manaoga?
12 O le tuputupu ae i le fanua ua manaomia ai le tuputupu ae i le lagolagosua tau faamopoopoga. I le 1985 na tupu a e ai le aofaiga o faapotopotoga o Molimau a Ieova i le lalolagi atoa mai le 47,869 i le 49,716. I lenei mea ua manaomia ai se faitau selau o nofoaga fou mo sauniga. Maeu le matagofie ua i ai i le tele o atunuu, ua faamanuiaina ai Molimau i a latou taumafaiga e faatupeina Maota o le Malo! Po o fea lava o i ai le manaomia, ua lagolagoina ma le le manatu faapito e tagata taitoatasi ma faapotopotoga fuafuaga taitasi i le polokalama o le fausiaina, ina ia i ai le tulaga “fai faatatau” i le au uso i le lalolagi atoa.—2 Korinito 8:14, 15.
13. E faapefea ona mafai e tagata taitoatasi ona fai meaalofa i le polokalama o le fauina o Maota o le Malo?
13 I atunuu e sologa lelei ai mea, ua mafai foi ona lagolagosua ofisa o lala o le Watchtower Society i fuafuaga mo Maota o le Malo. I le Iunaite Setete ma Kanata, e toatele tagata taitoatasi o loo fai mea alofa atu i se fuafuaga faapitoa o le Kingdom Hall Fund, o lena ua mafai ia ona faia ni nogatupe mo le fauina o Maota o le Malo ua faateleina. Ua fai meaalofa nisi i lo latou malosi ma tomai, ina ia mafai ai ona vave fausiaina Maota o le Malo i le na o se faaiuga o se vaiaso e tasi. I le galulue i nei fuafuaga ma le “peiseai ua faia i le Alii”, ua mafai ai e ana Molimau ona faaumaina mea ua manatu tagata o le lalolagi e le mafai ona faia.—Kolose 3:23.
14. Sa faapefea ona faafetaiai manaoga mo Maota o Tauaofiaga?
14 I nisi atunuu, o le le lava o mea talafeagai mo fonotaga e faalua i le tausaga tau matagaluega na tulai mai ai ni faafitauli matuia. A e ua toe mafai foi e Molimau ona faafetaiaia lea lui e ala i le fuafuaga o le fausiaina, i le agaga lava lea e tasi e pei ona faaalia mai e auauna a le Atua i aso anamua. Mo se faaaʻoaʻoga, ina ua manaomia mea e fausia ai le fale fetafai, sa utagia ma le autasi e le faapotopotoga o Isaraelu “taitoatasi o lē manatu i ai lona loto, ia ua mai e ia le taulaga ia Ieova.” Sa aumai e lena faapotopotoga mea e sili atu na i lo o mea na manaomia, ma na vave lava ona faaumaina le galuega.—Esoto 35:5-19; 36:7.
15. O le a le faatelega ua i ai nei i lalo le Watchtower Society? (e) Na faapefea ona faataulauina galuega?
15 Ona o le faateleina o le manaoga mo Tusi Paia ma lomiga e faavae mai le Tusi Paia, ua tatau ai la i lala e 94 o le Watch Tower i le lalolagi atoa ona toe faateteleina a latou fale faigaluega. O fale lomitusi i Brooklyn ma Watchtower Farms o loo lava pea lo la tetele, a e 36 isi lala o le Sosaiete ua tausia e i latou le lomia o a latou mekasini, e 6 foi isi lala ua faaauupegaina i le lomia ma tuufaatasia tusi. Ua aofia ai, i Siamani, Italia ma Iapani o loo gaosia Tusi Paia. O le fale lomitusi fou i Selters i Siamani, ua galue nei i lea lava tulaga. I Ebina i Iapani, ua fausia nei se fale faigaluega fogafale ono e pipii atu i ai ma l foga fale valu e mo le Aiga Peteli e nonofo ai tagata faigaluega e 280. E pei lava ona sa lagolagoina e tagata o Ieova le fausiaina o le malumalu o Solomona “ma le loto atoatoa,” e faapena foi aso nei i tagata o le Atua i atunuu eseese ua “foai ma le loto ia Ieova,” ma ua faaopoopo i ai ma ana faamanuiaga ina ia faaumaina le galuega.—1 Nofoaiga a Tupu 22:14, 15; 29:7, 9; vaai i le Ref. Bi., footnotes.
16. Ai se a ua tatau ai lenei fausaga faaopoopo ma le faamaopoopoina?
16 Po o nei fausaga uma ma le faamaopoopoina ua manaomia moni ea? Ioe, pea afai o le a faaauau pea e le “auauna faamaoni ma le mafaufau” ona aumaia mea ʻai faaleagaga “i ona itu aso.” O na mea e ʻai e matua taua ma tatau mo le tuputupu ae “o le aiga o le Atua” ma le talaiga i le lalolagi atoa ua oo atu i le 200 gagana. (Mataio 24:45; Efeso 2:19; 4:15, 16) Ua fai meaalofa tagata o Ieova lava latou i o latou tomai i le fausiaina o se faiga maoae faaonapo nei e lolomiina ai tusi e taua o le (MEPS) multilanguage electronic phototypesetting system, ua auina atu nei i le lala e 26 o le Watch Tower. Ua mafai ai i lenei faiga autasi faalekelope ona fesoasoani i le lomia ma le faasalalauina atu o le feau o le Malo i le taimi lava e tasi i so o se vaega o le lalolagi.—Faatusatusa le Isaia 52:7-9.
17. O le a le manaoga ua i ai nei i le ofisa tutotonu i Brooklyn, ma ua faapefea ona taulimaina lenei mea?
17 E foliga mai e leai se iuga o le faatelega o le faalapotopotoga a Ieova i aso nei! E oo lava i le taimi nei, ua tupu ae le aiga Peteli i Brooklyn, New York, le nofoaga autu o le Sosaiete i se faatelega o le faatutumuina uma lea o fale sa avanoa. Afai e tusa ai ma le finagalo o Ieova, atonu o le a fausia se fale maualuga tele ina ia mafai ona nonofo ai se faitau afe o ni tagata faigaluega i Peteli i le fanua o le Sosaiete i Columbia Heights. A e afai e le talafeagai, o le a tatou vaavaai atu atili mo le taʻitaʻiga i lenei mea. E matua talisapaia moni tatalo ma le lagolago i le au uso i le lalolagi atoa e tusa ai ma lenei faatelega.—Faatusatusa Galuega 21:14; 2 Tesalonia 3:1.
18. Ai se a ua soona tele ai fuafuaga mo le fauina o ni fale i aso nei, e ui lava ua lata tele mai Amaketo?
18 Peitai, atonu o le a fesili mai se isi, ʻai se a ua soona tele naua ai nei polokalame o le fauina o fale, a o lea ua tatou fesagai nei ma Amaketo?’ O le tali ‘e le tapunia fale’ o le faalapotopotoga a Ieova ona o le lata mai o Amaketo. O le ‘taimi lena e tapunia’ ai na o le faalapotopotoga a Satani. O le faalapotopotoga a Ieova o loo fausia mo le lumanai e faavavau. Tusa lava po o ni gaioioga a tagata e tatalia Amaketo pe leai, tatou te mautinoa o le a faasaoina le faalapotopotoga a le Atua e avea o se mea e alualu pea ma o le a faaaoga e Ieova lana faalapotopotoga ma i latou o lagolago i ai ma le faamaoni, e faatuina le filemu ma le saogalemu moni i le parataiso mamalu faalelalolagi o le folafolaga a le Atua—Faaaliga 7:9, 14-17; 21:1, 4, 5.
Fau Mo se Fuafuaga
19. O le a le lui ua iloa i le lipoti o le Faamanatuga i le 1985?
19 Na fausia e Noa ma se fuafuaga e vaai agai i luma, ma e tatau foi ona faapea i tatou. I le faatomuaga o le Lipoti Faaleauaunaga o le 1985 ua aumaia a le tele o mea e mafaufau i ai. O lena aofia sa auai i le Faamanatuga o le maliu o Iesu ia Aperila 4, 1985 e 7,792,109—o se faatelega e 375,135 e sili atu ai i l e aofaiga i le 1984. E matua ofoofogia! Ae o lena fuainumera o loo i ai ma se lui. I le tumutumuga e 3,024,131 le autalai o loo auai i le auaunaga o le Malo, e iloa lelei lava la e 4,000,000 isi o loo auaufaatasi ma i tatou, a le itiiti ifo i sona faatelega, i latou ia e tatau ona fafauina mo le lumanai e ala lea i le auai i le faiva faa-Kerisiano. E faapefea la ona tatou fesoasoani ia i latou?
20. O le a le manaoga faanatinati ua i ai i ina mo le faafetaiaia o le lui, ma e faapefea ona tatou o atu i ai i se auala poto?
20 O le tele lava oi latou nei tatou te iloa totino. Atonu o nisi o le aiga, tagata o tatou faia suesuega faale-Tusi Paia, o e fai tusiga ia tatou mekasini, po o nisi lava. Atonu po o fiafia nei nisi talu mai le Faamanatuga ua mavae. E mafai nei ea ona e faia ni taumafaiga faapitoa e tausia nei tagata, atiina ae i latou e ala i suesue faale-Tusi Paia, ina ia latou maua le lafitaga i fuafuaga a Ieova “seia mavae atu nei mea leaga”? (Salamo 57:1) O le “puapuaga tele” o le gaoioiga lea a Ieova o le manumalo, e oo lava i sona tulaga sili ona uiga ma aiai na i lo o le Lolo o Noa. Tatou te mananao ia fausia ae tagata fiafia i upu moni e aumaia ai le ola, ina ia latou “valaau uma lava i le suafa o Ieova” a e ia le tafiesea. (Mataio 24:21, 22, 39; Sefanaia 2:3; 3:8, 9) Sei tatou suesue le Tusi Paia ma i latou, i le faaaogaina o le tusi o le E Mafai Ona E Ola e Faavavau i Parataiso i le Lalolagi po o isi lomiga faale-Tusi Paia e atiina ae ai le faatuatua.
21. E faapefea ona tatou atiina ae se faatuatua e pei o Noa ia i tatou atoa ma isi?
21 O Ieova o le Matai Tufuga ma o le Foai Sili mo le fanau a tagata. (Salamo 127:1; 145:16; Failauga 3:10-13) O ia o le na taʻitaʻiina Noa i le faia o le ata ma le fauina o le vaa. Ona o le lagolagosua ma le loto i ai o le Noa Sili, o Iesu Keriso, sa ia fuafuaina ina ia togiolaina le fanau usiusitai a tagata mai le agasala ma le oti. E ala lava i lenei Alo na ia mafai ai ona fau le “vaa” faaonaponei, i le paratasio lauolaola faaleagaga e mafai ai e tane ma fafine faatuatua ona maua le faasaoina, ma le vaai atu agai i le ola e faavavau. (Mataio 20:26-28; Ioane 3:16; 17:3) Sei tatou fesoasoani i le toatele o nisi ia atiina ae le faatuatua ma faamalosia noataga o le faia totino ma Ieova ma lona Alo. Sei tatou fesoasoani ia i latou ia alolofa i le amiotonu ma inoino i le leaga. (Eperu 1:9) O lea, o le i ai o se faatuatua e pei o Noa, o le a mafai ai e i tatou ona atiina ae faatasi pea le lumanai e faavavau.—1 Timoteo 4:15, 16.
O NI FESILI MO LE AUTALUGA—
□ Na faapefea ona atiina ae e Iesu mo le lumanai?
□ O le a se mea mataina na e maua i le lipoti o le 1985?
□ Ai se a e manaomia ai se polokalame o le atiina ae faatiokarate?
□ E ao faapefea ia i tatou taitoatasi ona atiina ae se fuafuaga?
[Fesili mo le Suʻesuʻega]
[Pusa i le itulau 20]
O se faapotopotoga i se atunuu o Aferika o loo taofia ai i le galuega a Ieova e 95 le au talai e auai pea i masina uma i le auaunaga. E 130 le aofaiga o a latou sauniga a e 160 i a latou lauga lautele. E tolu a latou paeonia sauatoa ma talu ai nei e valu a latou paeonia lagolago. I le na o le ono masina, a e 21 le au talai fou na amata i le auaunaga i le fanua.
[Pusa/Ata i le itulau 16, 17]
FAUSIAINA FAALEKELOPE O MOLIMAU A IEOVA
I le lalolagi atoa e 322,821 paeonia na lipoti i masina taitasi (o le faatelega e 24.7 pasene)
O le autalai i le lalolagi atoa 3,024,131 (faatelega e 6.4 pasene)
Toe asiga i tagata fiafia o le aofaiga e 244,725,918 mo le tausaga (faatelega 14.8 pasene)
O suesuega faale-Tusi Paia i aiga e faia i masina taitasi e 2,379,146 (faatelega 16.2 pasene)
[Ata]
Ua agai atu nei paeonia mo le faiva mai lea fale i lea fale, Brooklyn, New York
Tauaofiaga e sefulufa gagana, Montreal, Quebec, Canada
Suesuega o vaega i Yap, Micronesia
O nisi o fale o loo faaaogaina i le lagolagoina o le galuega faaleagaga i le lalolagi atoa.
I Brooklyn, o le auina ese atu o Tusi Paia ma tusi faale-Tusi Paia o lo taulimaina mai lenei fale tele e 1,000,000 futu faatafafa i 360 Furman Street
O le Maota o le Malo (i Downpatrick i Aialani i Matu) na fausia i le na o le 31 itula
O lenei Maota mo Tauaofiaga i Roma o se tasi o matatia o ia ituaiga maota o loo faaaogaina i le lalolagi atoa
O le faaopoopoga i le Aiga Peteli i Iapani ua fausia nei
[Pusa i le itulau 21]
E valu atunuu sa lipotia mai ni tumutumuga e sili atu il e 100,000 le au talai i le 1985.
Iunaite Setete 723,220
Brazil 177,904
Mexico 173,037
Italia 127,526
Nigeria 121,729
Siamani 115,604
Peretania 103,522
Iapani 103,117