Faafiafia le Finagalo o Ieova i le Tausisi i le Faamaoni!
Faafiafia le Finagalo o Ieova i le Tausisi i le Faamaoni!
“Pe ola pe oti i tatou, o tagata lava o Ieova i tatou.”—ROMA 14:8 (N.W.)
1, 2. (a) Ai se a ua maumauai ai Molimau a Ieova i le tausia o lo latou faamaoni i le Atua? (e) A e o a fesili ua mapuna ae?
Maeu le lelei ona faailoa mai e na upu a le aposetolo Paulo le lagona o e na o i latou lava e tausisi le faamoni lenei 20 senituri! Pe a faaeaina i tatou e ola atu lava ma vaai i le nutipalaina o lenei faiga o mea i luma o o tatou mata, maeu se fiafia o le a ia i tatou! A e afai o le a tatou fetaiai ma le oti i le auaunaga i le Atua, ia o lena lava. I so o se mea o nei mea, ua tatou maumauai ia avea o ni molimau faamaoni a lo tatou Atua o Ieova. O le a tausia pea lo tatou faamaoni ia te ia. Ai se a? Auā pe tatou te ola pe oti, o i tatou moni lava mo Ieova!
2 O lea, o le a la le faamaoni? O a ni mea ua ia manaomia mai ia i tatou? Ma pe taulia i le Atua lo tatou tausisi i le faamoni?
Faamaoni ma Mea Na te Manaomia
3. E tusa ai ma le Tusi Paia, o le a le uiga o le tausisi i le faamaoni?
3 I le Afioga a le Atua, o le faamaoni o lona uiga ia amio mama ma ia atoatoa, ia le pona, ma leai se sese. O lona uiga, o le tuutoina le ma suia i le amiotonu. O le mea moni, e manaomia e le faamaoni le tuutoina le motusia i se peresona—o Ieova le Atua lea. Ioe, o le faamanino i le faaauau pea lea i le finagalo silisili o Ieova.
4. O ai le uluai le faamaoni, ma o le a na ia uunaia le uluai ulugalii e fai?
4 O le uluai le faamaoni sa o se mea faiola agaga o le na taʻitaʻiina le uluai tagata i se ala fouvale faasaga i Le na Faia i laua. Sa ia Atamu ma Eva le avanoa e faailoa atu ai lo la faamaoni ia Ieova i le faaaloalo i le faasaaga a le Atua e uiga i le laau e iloa ai le lelei ma le leaga. A e i lalo o uunaiga a le Fili, ua gauai atu ai i laua i le manatu faapito, ua la faaavanoa ai le ala i le le usiusitai. Sa lei faamaonia e o la loto e leai se sese i tulafono a Ieova, ma sa la lei tausia le faamaoni ia te ia.—Salamo 119:1, 80.
5. O le a le finauga na laga e le fouvalega a Satani, ma na faapefea ona faamaonia lenei mea e mea na oo i le tagata amiotonu o Iopu?
5 O le fouvalega a Satani ua laga ai se finauga i le tonu o le silisili ese o le Atua i luga o Ana mea fai ola uma, le aia a Ieova e tapa ai lo latou usiusitai atoatoa. O lea o le fesiligia o le faamaoni o le tagata i le finagalo o silisili ese o le Atua na avea ma vaega taua o le finauga i le silisili ese i le vateatea. O le faamaoniga o lenei mea na iloa i le tulaga o le auauna a Ieova o Iopu, o se e le pona, ua sao lana amio, ma o se tagata matau i le Atua. (Iopu 1:1) Sa lei aloese Iopu mai ala tonu o le Atua. Sa lei faaipoipo o ia i se faamasinoga pe lei agalelei atu i fafine ua oti a latou tane, o e ua matua oti, po o e ua matitiva. Na i lo o le faia o oa faaletino ma ona faatuatuaga, sa matua faatuatua atu Iopu i Le Silisili ona Maualuga. (Iopu 31:7-40) I lea ua tuuaia ai e le Tiapolo faapea e auauna Iopu i le Atua ona o mafuaaga manatu faapito. E ui lava ina faatagaina e Ieova Satani na te aveesea mea uma sa ia Iopu e oo lava i lana fanau, a e sa le mafai e le Taufaasese sili ona gausia le faamaoni o lena tagata amiotonu. Na oo lava i maʻi tiga ma faifaiga e taufaatauvaaina ai o ia mai e faamafanafana pepelo sa lei taulau, auā sa faamaoni lava Iopu o se tausisi i le faamaoni.—Iopu 1:6–2:13; 27:5, 6; 31:6; 42:8, 9.
6. O a mea e manaomia mo i latou o “tagata lava o Ieova”?
6 O lea, ua maua ai e tagata se faaeaga le ma faatusaina e saosaolaumea ai i le faapaiaina o le suafa paia o le Atua. E faapefea? E ala i le tausia o le faamaoni, ia faailoa atu o loo latou lagolagoina ma le faamaoni le Silisili ese atoatoa o Ieova i le lagi ma le lalolagi. O a la mea e manaomia mai “tagata uma lava o Ieova”? E tatau ona tatou auauna i le Atua i le tuutoina atoatoa, aua neʻi galo o Ieova o le “Atua fua.”—Esoto 20:5.
Ua Tatou Faafiafia le Finagalo o Ieova
7, 8. (a) Ona o i tatou e le lelei atoatoa, e faapefea ona tausia lo tatou faamaoni i le Atua? (e) Afai o i tatou o ni e tausisi i le faamaoni, o le a faapefea ona faatatauina le Faataoto 27:11 ia i tatou?
7 Talu ai ona o i tatou uma e le lelei atoatoa, ua le mafai ai e i tatou ona oo atu i se tulaga lelei atoatoa e tusa ai ma ala amiotonu o le Atua. O le mea lea o lo tatou tausisi i le faamaoni e le o lona uiga o le a lelei atoatoa a tatou gaoioiga ma upu e tautala ai. Na i lo o lena, o lona uiga o le loto atoa, po o le tuutoina atu atoatoa o le loto. O le mea foi lea, e ui lava ina faia e Tavita o agasala matuia, a e sa ‘savavali o ia ma le loto faamaoni.’ (1 Tupu 9:4) O lona talia o aoaiga, sa faasaʻoina ai lona ala ma i lea ua mafai ai ona faamaonia sa tumu lona loto i le alofa mutimutivale ia Ieova. (Salamo 26:1-12) E mafai foi ona ta- tou faaalia lena alofa, pe a gaoioi ‘e tusa ai ma le loto faamaoni.’—Salamo 78:72.
8 O le tausia pea o ala faamaoni e tatau, auā ua ia i tatou se faatuatua loloto ia Ieova le Atua ma faalagolago atoatoa foi i tatou ia te ia ma lona mana e faasaoina ai i tatou. (Salamo 25:21, 41:12) E le o se mea faigofie ona tausisia lo tatou faatuatua, ona o Satani le Tiapolo—le fili sili o Ieova, ma i tatou—ua faatauasoina manatu o e le talitonu ma “ua ia faasese i le lalolagi uma.” (Faaaliga 12:9; 2 Korinito 4:4) Peitai, ia pei o Iopu, e mafai lava ona avea i tatou ma e tausisi i le faamaoni. E ui lava o i tatou o tagata e le lelei atoatoa, e mafai lava i lea ona tatou faafiafiaina le finagalo o lo tatou Atua alofa. E pei ona taʻua mai i le Faataoto 27:11: “Loʻu atalii e, ia poto oe, ma e faafiafia loʻu loto; ona ou mau tali ai lea i le faifai mai.” I le tulaga faafiafiaina, i le avea ma auauana faamoni a Ieova, e mafai ona tatou tali atu ia te ia ma le uigā i le o faifai mai o lona Fili. O lea o lo tatou tausisi i le faamoni e matua tele sona aoga. E pei o i latou na tausia le faamaoni, e mafai ona tatou faafiafia le finagalo o Ieova. Ma maeu se olioli ua aumai e lenei mea ia i tatou!
O se Faasologa Umi o Ē Tausisi i le Faamaoni
9. O ai nisi o le “faapotopotoga tele” o e e tausisi i le faamaoni o molimau a Ieova, ma o a tofotofoga o le faamaoni na latou tumau ai?
9 O le mea moni, o Molimau a Ieova i aso nei o se vaega o le faasologa umi o ē tausisi i le faamaoni. E oo atu lava lena faasologa i tua ia Apelu faamaoni ma aofia ai ma ituaiga o tane ma fafine e pei o Apelu, Enoka, Noa, Aperaamo, Sara, Isaako, Iakopo, Iosefa, Mose, Raava, Kitiona, Parako, Samasoni, Iefata, Tavita, ma Samuelu. O ē tausisi i le faamaoni o Sataraka, Mesako, ma Apeteniko, o ē na teena le tapuai atu i se tupua na faatuina e le tupu o Papelonia o Nepukanesa ma lafoina i latou i totonu o le ogaumu aasa, atonu sa faasino ia i latou o ē “na tineia ai le malosi o le afi.” O isi uluai molimau a Ieova a o lei oo i le vaitaimi o le faa-Kerisiano sa ‘tauemua, sasaina, faafalepuipuiina, fetogia i maa, tofotofoina, vaevaeesea i ʻili, na fasia i le pelu; na feoai solo ma ofu pau mamoe, ma pau oti, na puapuagatia ma faasaunoaina.’ O le mea moni lava ua tatou ioe faatasi ma Paulo, o lē na faailoa mai: “E le aoga le lalolagi ona i ai o i latou.” Maeu se faalogona fiafia i le siosiomia e se “ faapotopotoga” tele o molimau tausisi i le faamaoni!—Eperu 11:1–12:1, tagaʻi foi i le Tanielu, mataupu 3.
10. Na faapefea ona faafiafiaina e le aposetolo o Paulo le finagalo o Ieova?
10 Ona o le malosi ma le loto tele na tuuina atu i ai e le Atua na mafai ai e le aposetolo o Paulo ona onosai i le faafalepuipuiina, le sasaina, le afatia i folauga, le tele o mea mataʻutia, o le mataala soo i po, i le fia ʻai ma le fia inu, i le maalili, le le lavalava, “ua atu lasi i oti.” (2 Korinito 11:23-27) Sa ia oo i nei mea faigata uma ona o le faiva, ma i nei mea uma lava sa ia faafiafiaina ai le finagalo o Ieova pei o se tausisi i le faamaoni ma le loto tele. O lea, e mafai foi ona tatou faia faapea.
11. E tusa ai ma le faaamoni, o a ni faaaʻoaʻoga na faataatia e Iesu Keriso?
11 E tulaga ese mai i e tausisi i le faamaoni “o Le Na te taʻitaʻiina ma Le Na te Faaatoatoaina le Faatuatua” o Iesu Keriso lea. Ina ua tofotofoina o ia e le Tiapolo i le vao, sa taofi mau pea e Iesu lona faaamoni, a e mulimuli ane sa ia faapea atu: “Ina alu ese ia oe Satani; Auā ua tusia, E te ifo atu i le Alii [o Ieova] lou Atua, ua na o ia lava e te auauna i ai.” E manino lava le leai o se malosi o le Tiapolo pea feagai ma le mana mai le Atua, o lea la, sa tuua ai loa e ia Iesu. E le o se mea leaga mulimuli lea na faia e Satani ia Iesu, a e ua matua leai lava se malosi o le Tiapolo e gausia ai le faamaoni o le Alo o le Atua. ‘Ona o le olioli na tuu i ona luma na onosai ai Iesu i le satauro; sa lei avea lava o ia ma se gausia le faamaoni. Sei tatou mulimuli i ana faaaʻoaʻoga sili ma faafiafia le finagalo o Ieova, e pei o ni e tausisi i le faamaoni.—Eperu 12:2, 3; Mataio 4:1-11.
12, 13. O a tofotofoga o le faamaoni na manumalo ai uluai Kerisiano?
12 Sa fetalai atu Iesu i ona soo: “E inosia foi outou e tagata uma ona o lou igoa.” (Mataio 10:22) Maeu se moni o lena mea, e masani lava ona faapena i Kerisiano moni! I lana tusi Christanity and the Roman Government sa tusia ai e E. G. Hardy: “E foliga mai i le faaiʻuga e faamaonia ai mai nei tusi e lua a Pliny ma tusitusiga a Trajan, faapea sa mafai lava ona faasalaina Kerisiano i le na o le nomen [taʻu] po o le na o le faailoa atu o le faa-Kerisiano, e ese ai mai le faamaonia po o le faia o se agasala patino.
13 Maeu le faigata o tofotofoga o le faamaoni sa mafai e na uluai Kerisiano ona faafetaiaia ona o le malosi mai le Atua! Mo se faaaʻoaʻoga, e faatatau ia i latou, ua taʻua mai e faapea: “I nisi taimi sa faapuapuagatiaina i latou ma lafoina atu i manu feai matelaina i malae mataaga e faaofo ai le au maimoa.” A e peitai, e ui lava i nei mafatiaga, a e ua matauina ua avea “sauaga ma ala e faamalosia ai lo latou faatuatua ma aumaia ai tagata ua liliuina i o latou ala.” (From the Old World to the New, a Eugene A. Colligan ma Maxwell F. Littwin, 1932, itulau 90—1) E tutusa lava ma molimau tausisi i le faamaoni a Ieova i lenei 20 senituri. Ua faamaonia le ma faatusatusaina o sui o le Tiapolo ia i latou.
14, 15. O ai “molimau e toalua” ma o le a le mea na la oo i ai i le 1918 ma le 1919?
14 Sei manatu po o lea na oo i ai auauna faauuina, o molimau faafaatusa “e toalua” i le 1918 ma le 1919, ina ua taumafai o la fili e ‘fafauina ni faalavelave e ala i le tulafono.’ (Faaaliga 11:3, 7-10; Salamo 94:20) Sa faafalepuipuiina J. F. Rutheford (o le na avea ma peresetene o le Sosaiete o le Olomatamata) ma ana aumea e toafitu ona o moliaga sese. I lena taimi, na fasioti ai ni “molimau e toalua” ona o a laua galuega faavaloaga, ma sa olioli o laua fili. I lana tusi o le Preachers Present Arms, sa matauina e Ray H. Abrams: “O le iloiloga i le aotelega o le faamasinoga [na aafia ai Rutherford ma ana aumea] na oo atu ai i se faaiʻuga faapea o lotu ma taʻitaʻi sa faapogaia gaoioiga ina ia soloia [Tagata Aʻoga o le Tusi Paia] . . . Ina ua oo atu tala i o latou faasalaga e taʻi luasefulu tausaga i le falepuipui i faatonu o nusipepa faalotu, atonu o na lomiga uma pe tele pe itiiti sa olioli i lena faaiuga. Sa lei mafai lava ona ou maua ni upu faamafanafana mai so o se tusi faalelotu a lotu Kerisiano taatele.”
15 A e peitai, mulimuli ane sa toe tatalaina ai na Tagata Aʻoga o le Tusi Paia e toavalu ua matua taʻuleleia atoatoa, ma sa matua faanoanoa ai Satani ma ana au faasese. Ina ua toe ulufia e le agaga o le Atua, o “molimau e toalua,” o lena ua toaitiiti o e faauuina ua toe tutu nei i o latou vae e avea o ni e faalauiloa le Malo. (Faaaliga 11:11) Ma na amata mai ai ona le toe manumalo fili o Ieova i le taua faasaga i e tausuai i le faamaoni e oo mai i aso nei.
16, Na faapefea ona faamatala mai e se tasi talavou tausisi i le faamaoni e uiga ia te ia?
16 Ina ia faataʻitaʻia: Sei manatunatu i upu lototele na tusi atu ai se tasi tama talavou i lona aiga a o faatali o lona oti i lima o le au faasaua a Nasi. Sa ia tusi atu: “Ua mavae atu nei le tulua o po ma ao. O loo totoe pea le taimi mo au e suia ai loʻu mafaufau. Oi! pe mafai ona ou toe maua le fiafia i lenei lalolagi pe a ou faafitia lo tatou Alii? O le mea moni e leai! A e ua ia te outou nei le mautinoa o le a ou tuua lenei lalolagi ma le fiafia ma le filemu.” Pe foliga mai o se faaleoga mai se tagata loto vaivai, palaai, solomuli ma gausia le faamaoni? E leai lava!
17. O le saisaitia o Molimau a Ieova i Rusia na maua ai a iʻuga i la latou galuega talai o Malo?
17 Ua faaauau pea ona faia taumafaiga ina ia gausia le faamaoni o auauna a Ieova. Mo se faaaʻoaʻoga, i lana tusi Religion in the Soviet Union, na taʻu mai ai e le tusi tala o Walter Kolarz e uiga i le anoanoai o moliaga o Molimau a Ieova i le amataga o le 1951 ma faapea mai: “O le fua faatatau i le aofaiga o Molimau e 7,000 na faafoi atu i Urals, Siberia, i Matu Mamao (Vorkuta) ma Kazakhstan,” Sa ia faaopoopo mai: “Sa le o le iʻuga lena o ‘Molimau’ i Rusia, a e ua na o le amataga o se vaega fou i a latou taumafaiga o la latou galuega talai. Sa oo lava ina latou taumafai e faasalalau atu lo latou faatuatua pe a malolo i nofoaga e faaee ai pasese i lo latou ala i le faaaunuuaina o i latou. I le auina atu o i latou e le Malo o Rusia e leai se mea e sili atu ona lelei na i lo o le faailoa atu o lo latou faatuatua. I le tuua o i latou i nuu tutū ese sa avatu ai se Molimau i le lalolagi lautele, tusa lava po o le lalolagi sili ona mataʻutia i nofoaga puipuia ma mea e tolauapi ai o ni pologa.” I ina na maua ai e auauna a Ieova le toatele o tagata sa talia ma le fiafia le feau faamalosi loto o le Malo.—Faatusatusa le Galuega 11:19-21.
Pei o se ʻAu Manumalo
18, 19. E mafai faapefea ona manumalo i le avea o ni e tausisi i le faamaoni?
18 O loo faaauau pea sauaga i tagata o le Atua seia oo mai i aso nei. O lea, na faapefea i Molimau a Ieova ona manumalo e avea o ni e tausisi i le faamaoni? Tatou te mafaia ona o lo tatou usiusitai i le Afioga a le Atua, ma ua ia i tatou le ‘loto fuatia ifo ua aʻoaʻoina e iloa ai le mea ua lelei ma le mea ua leaga.’ I le avea o ni auauna faamaoni a Ieova, tatou te le o ‘amio faatasi ma lenei lalolagi a e ua toe fuataiina o tatou loto.’ Ua tatou fai ai ma le olioli mea uma e fiafia mai ai Ieova, ma ua ia aumaia ia i tatou le manumalo i o tatou fili, o temoni ma tagata.—Eperu 5:12-14; Roma 12:1, 2.
19 O i tatou “o tagata lava o Ieova” ua pei o se ʻau manumalo. O le mea moni, o la tatou taua, e faaleagaga, ma ua tatou “loto tetele i le Alii ma le malosi o lona mana.” Ua tatou oofu i ofu tau atoatoa faaleagaga mai le Atua, ma ua faamalosia i tatou e lona agaga paia. O le mea lena “ua mafai ai ona” tatou tumau i le “tetee atu i togafiti a le Tiapolo.” (Efeso 6:10-20; 2 Korinito 10:3, 4) Ioe, ma o le mea lena o le a mafai ai ona tatou manumalo pea e avea o ni e tausisi i le faamaoni.
20. O le a le fesoasoani ma le mautinoa ua tatou maua a o tatou galulue mo le tausia o lo tatou faamaoni?
20 E mautinoa lava o i tatou o se vaega ʻau malosi. Ioe, i totonu o i tatou “e oo lava i fafine o e talaiina le tala lelei o se ʻau tele”! (Salamo 68:11, NW) E ui lava ina tatou fesagai ma fili malolosi a e ‘toatele ua ia te i tatou; i e ua ia te i latou.’ (2 Tupu 6:16) E faatasi agelu ma i tatou a o tatou faalauiloa atu le tala lelei i e o ainaina le lalolagi uma. (Faaaliga 14:6) Ma i le avea ma e tausisi i le faamaoni, ua ia i tatou le mautinoa faapea ‘o auupega uma ua faia e tau ma i tatou e le manuia.’—Isaia 54:17.
21. E ui lava i sauaga na tatou oo i ai, o le a o loo faaauau pea?
21 E le ma fesiligia, ua faataatitia nei tini o le taua. Ua matua taumafai malosi nei ʻau tau a Satani e taofia le galuega talai. O lea mea, ua totoe nei mo i tatou ina ia faaauau ona “tau ai le taua lelei.” (1 Timoteo 1:18) I le avea o Iesu Keriso ma o tatou Faatonu ma o tatou Taitai, sei tatou taitoatasi ona auauna e pei o se “tagata tau e lelei ia Iesu Keriso.’ (2 Timoteo 2:3, 4) E ui lava o loo oso faia mai i tatou mai itu uma, e tatau lava ia i tatou,—ona tutumau e avea o ni e tausisi i le faamaoni—ona o le alofa tunoa o le Atua. E fiafia tele o tatou mata a o tatou vaaia lea faatelega ma lea faatelega. Ua tele ma ua faateleina le oo mai o ‘mea e manaomia e nuu’ ma faatumuina ai le fale o Ieova i le mamalu. (Hakai 2:7) E ui lava i sauaga, tuuina i falepuipui, sasaina, faasaina o la tatou galuega i le tele o atunuu, ma taumafaiga fiafia pea ia taofia lo tatou tautala atu, a e ua faia pea le galuega tele o le faia o soo ma maua ai ni tulaga e faavaveina ai.—Mataio 24:14; 28:19, 20.
22. I le avea o tagata mo Ieova, o le a e ao ona tatou faia?
22 O le taimi lenei mo tagata uma i le lalolagi e faia ai ni filifiliga, a o faateleina pea viiga ia Ieova. Maeu se faaeaga o i tatou e faalauiloa le tala lelei ma aʻoaʻo i latou ua talitonu i le tapuaiga moni! O lea mea lea, a o faateleina le “motu o tagata e toatele,” sei tatou o tagata o Ieova.’ O lea sei tatou tausisi i le sini o le ola, ma faafetai ona o lo tatou faaeaga o le faafiafiaina o le finagalo o Ieova e ala i lo tatou tausisi i le faamaoni!
E Mafai Ona E Taliina?
□ O le a le faamaoni?
□ O a mea manaomia ua tuuina atu e le faamaoni i luga o tagata o Ieova?
□ E faapefea ona faailoa atu faapea o lo tatou tausisi i le faamaoni e taulia i le Atua?
□ O a ni auala na faaalia ai e nisi i latou o ni e tausisi i le faamaoni i aso ua mavae?
□ Ua faapefea ona mafai e Molimau a Ieova ona avea ma ni e tausisi i le faamaoni i aso nei?
[Fesili mo le Suʻesuʻega]
[Ata i le itulau 13]
O auauna a Ieova i aso nei o se vaega o le faasologa umi o ana molimau tausisi i le faamaoni. Po o e i ai ia i latou ia?
Enoka
Sara
Iefata
Paulo