Faamafanafanaga mo E Tausisi i le Faamaoni

“E te taofia aʻu i luga i loʻu faamaoni.”—SALAMO 41:12, (NW).

1. Ai se a e manaomia ai e tagata o Ieova faamafanafanaga?

O MOLIMAU a Ieova o ē tausisi i le faamaoni, latou te manaomia le faamafanafanaga auā o i latou o taulaiga o sauaga. O le mea moni, e tatau ona latou faatalitalia ia ituaiga faalavelave, auā na taʻu atu e Iesu i ona soo: “E le sili le auauna i lona alii. Afai ua latou faasaua mai ia te au, e faasaua foi ia te outou.” (Ioane 15:20) Ua sili ona manaomia e tagata o Ieova le faamafanafanaga i le taimi nei. Ai se a? Auā o lē na uluai soli le faamaoni o Satani le Tiapolo, ua lafoina mai i le lalolagi, ma ua puupuu lona taimi. O lea, o loo faia lana taumafaiga mulimuli e tau faasaga i le Atua ma Ana auaunaga.—Faaaliga 12:7-9, 17.

2. E faapefea faalogona o Kerisiano e uiga i le sauaina o uso talitonu?

² Ona o i tatou o auauna a Ieova, tatou te faanaunau ai e tatalo mo o tatou uso ma tuafafine o loo galulue i lalo o faasasaga ia po o le faamataʻuina ma agaleagaina e ē faasaua mai. (Galuega 12:1, 2; 2 Tesalonia 1:4) O la tatou faamalo e mo Kerisiano o tutumau ma le faamaoni e ui i faifaiga mai aposetate ma isi. (Mataio 5:11) Tatou te manatunatu alofa foi mo uso a talitonu o loo tetee i ai aiga po o nonofo faatasi ma aiga e eseese tapuaiga. (Mataio 10:34-36) O o tatou moomooga tiga alofa mai le fatu e mo i latou o tausisi pea i le faamaoni, e ui i vaivaiga o le tino po o faamaia mo ni taimi uumi. A e ai se a ua i ai nei mafatiaga? Ma o a faamafanafanaga  e mafai ona maua mo tane ma fafine o tausisi i le faamaoni?

Manatua le Pogai ma le Lafitaga

3. Ua faaaoga e Satani sauaga o se taumafaiga e fai ai le a?

³ O loo saili pea le Tiapolo e “ʻaina” (1 Peteru 5:8) Ioe, ua faaaogaina e Satani sauaga ma isi faafitauli e faaleagaina ai la tatou faiā ma Ieova le Atua, ina ia avea ai tatou ma ē le faamaoni ua gausia le faamaoni. A e i nei mea uma, pe ua le puipuia ea i tatou? E leai lava!

4. O le a ua mautinoa e ē tausisi i le faamaoni, pe a feagai ma sauaga ma nisi faalavelave?

⁴ O Ieova o le a avea ma o tatou Lafitaga pe a fai tatou te tatalo ia te ia mo se fesoasoani. Pe a oo mai sauaga ma nisi fili, e mafai ona tatou talosaga atu ia te ia e pei ona sa faia e le fai salamo o Tavita? “Le Atua e, ia e alofa mai ia te au, ia e alofa mai ia te au; auā ua ou faatuatua lava ia te oe; ou te faatuatua foi i le paolo o ou apaau, seia mavae atu nei mea leaga.” (Salamo 57:1) Ona o i tatou te tausisi i le faamaoni, e mafai ona tatou mautinoa, o le a oo mai se laveai mai ia Ieova lo tatou Lafitaga i le taimi tatau. Ona tatou mautinoa lea e pei o Tavita i lana tatalo i le Atua: “A o aʻu nei, e te taofia aʻu i luga i laʻu amio sao; e te faatuina foi aʻu i ou luma e faavavau.”—Salamo 41:12.

5. O le a le uiga o manaomia e Kerisiano ua sauaina, ma o le a le faamoemoe ua ia i tatou?

⁵ Talu ai atonu o le a uumi taimi o nisi tofotofoga, e manaomia ai ona tatou atiina ae le onosai. Na uunaia e le aposetolo o Paulo Kerisano Eperu ina ia “manatu i aso anamua . . . na [latou] onosai ai i le taua tele o tiga.” Na tusi mai atili foi o ia: “Auā ua aoga ia te outou le onosai, ina ia maua e outou le mea na folafolaina, pe a uma ona faia e outou le finagalo o le Atua.” (Eperu 10:32-36) Mo  Kerisiano faauuina, o le faataunuuina o folafolaga a le Atua o le a aumaia ai le taui o le ola e le uma i le lagi. A e mo le“motu o tagata e toatele, “ e i ai le faamoemoe o le ola e faavavau i se lalolagi parataiso. (Faaaliga 7:9; Luka 23:43) O le mea moni, o le faaolataga i le ola e faavavau e mo i latou uma o ē tutumau seia oo i le iuga e pei o tagata tausisi i le faamaoni—Mareko 13:13.

6. Ai se a ua manaomia faapitoa ai e nisi o Molimau a Ieova le tutumau, ma o le a le fesoasoani ua latou maua?

⁶ Mo le tele o tausaga, sa ‘manaomia ai e tutumau’ o Molimau a Ieova i nisi atunuu. Ai se a? Auā sa tatau ona faaauau la latou auaunaga paia i oganuu faigata, po o i lalo o faafitauli eseese, e aofia ai faasasaga mai malo. Atonu e tatau ona e tumau e ui ina le malosi le soifua maloloina po o teteega mai aiga faasaga i au gaoioiga faa-Kerisiano. O ia tofotofoga o le a taofia ai i latou o faalagolago i na o le malosi faaletagata, a e le mafai ona latou taofia Molimau a Ieova auā o la latou ‘fesoasoani e mai ia Ieova lea, o lē na faia le lagi atoa ma le lalolagi.’—Salamo 121:1-3.

7. (a) O le a le avanoa ua aumaia e tofotofoga faifai pea? (e) Ai se a tatou te talitonu ai i mea na fai mai ai Paulo i le Filipi 4:13?

⁷ O nisi tulaga e tatau ona tutumau ai pea seia oo i le iʻuga o lenei faiga o mea. Peitai o le faaauau pea o tofotofoga ua tuuina mai ai le avanoa e faamaonia ai lo latou tutumau i le Atua ma faafiafia lona finagalo. (Faataoto 27:11) I le taimi lava lea e tasi, ua tuuina mai ai e Ieova le malosi e manaomia e tutumau ai i le faamaoni Na tusia e le aposetolo o Paulo: “Ou te mafaia mea uma lava i le faamalosi mai o Keriso ia te au.” (Filipi 4:13) E mafai ona e talitonu i na upu, auā ua faamaonia pea le moni o na mea i le “au uso o i le lalolagi.”—1 Peteru 5:5, 9, 10.

Faamalosia i Tatou e E Tausisi i le Faamaoni

8. Fai se tala pe atonu e faapefea ona faamanuiaina ē tausisi i le faamaoni o i aiga fevaevaeai.

⁸ O se puna sili ona faamalosiaga le vaai atu o tausisi pea le faamaoni e le ʻau uso atoa o i le lalolagi.’ O nisi o i latou ua tauia i tele ona o le tausisia o lo latou faamaoni ia Ieova i totonu o aiga fevaevaeai. Mo se faaaʻoaʻoga, ina ua amata se suesuega faale-Tusi Paia ma se fafine Katoliko i Aialani, sa tetee le tamaloa ma faafefe ia te ia o le a tatala le la faaipoipoga. E ui i lea, sa faaauau lana suesuega, ma i se tasi aso, na ia avatu i lana tane le tusi E Mafai Ona E Ola e Faavavau i Parataiso i Le Lalolagi. Sa maofa o ia i le faamatalaga manino, tuusaʻo, ma le lelei o lena tusi. E lei umi a e suesue le tane i le Tusi Paia faatasi ma le fesoasoani a lenei tusi. Sa le toe ulaula o ia, ma mulimuli ane ua faamavae le ulugalii mai le lotu Katoliko ma faaleagaina uma a laua ata na taʻua o mea paia. E lei umi, a e papatiso le fafine ma auai i le galuega paeonia lagolago, a o faia se agaigai lelei i luma a lana tane i le faiva. O ia ituaiga tala, e faamalosia moni ai i latou o i aiga fevaevaeai o ē tutumau o ni tagata tausisi i le faamaoni.—1 Korinito 7:12-16.

9. E faapefea ona fesoasoani tagata faamaoni o i ai vaivaiga i le tino i isi?

⁹ O isi o ē tausisi i le faamaoni ua faamaonia le tutumau e ui i vaivaiga o le tino. I Peretania, e i ai se tasi Kerisiano e le atoatoa lona malosi ma e tatau ona ia faaaoga se nofoa faataavalevale. A e na faafiafiaina o ia i lana faiva. Sa ia tusi mai: “E ui lava ina ou le toe faigaluega faaletino talu mai le 1949, a e ua fiafia Ieova e faaaoga au i lenei taimi atoa. Na vave le gasologa o tausaga. Ua ou aʻoaʻoina nei tusa lava po o se tagata e matua le atoatoa lona malosi, e mafai lava ona avea o se auauna sili mo isi. Ua avea au ma laʻu avā o ni fesoasoani malolosi e pei o se taula mo isi i le faapotopotoga. Talu ai tulaga o loo i ai i maua, auā e mafai ona avea o ia ma puna o faamafanafanaga mo isi.

10. E faapefea ona fesoasoani ē tausisi i le faamaoni i uso talitonu, ona o lo latou le gauai i sauaga?

¹⁰ E le faamaamulu ē o tausisi i le faamaoni ona o sauaga. Faapea mai se tasi uso na faafalepuipuiina ona o lona solitu faa-Kerisiano: “O le sasaina . . . na avea ma vaega faifai  pea o loʻu olaga, faateleina ma atili ona matuia. Sa faasolo ina ou vaivai i lea aso ma lea aso, ma oo ai foi ina le aumaia ni mea ʻai ia te au. E masani pea ona ou tatalo ia Ieova, ma e mafai ona ou faapea atu na te lei lafoaiina au. O le tele o le sasaina o au, o le itiiti foi lea o loʻu lagonaina. “E ui lava ina faasalaina o ia mo le sili atu i le lua tausaga, a e sa tumau pea le solitu o lenei molimau a Ieova. (Isaia 2:2-4; Ioane 15:19) E toatele isi tagata faamaoni ua latou tausia tulaga tutusa faapena. O le mea moni, o le tausisi i le faamaoni faapenei o se faaaʻoaʻoga faalototele lea e mafai ona uunaia ai uso talitonu i le faamaoni.

Faamafanafanaga Taulau

11. O a faamafanafanaga mautinoa faale-Tusi Paia ua i ai mo Kerisiano?

¹¹ Ua na o nai mea tutupu laiti nei mai le tele o tala e faamaonia ai o loo faatasi Ieova ma ona tagata faamaoni. O ia “o le Tamā e ona le alofa mutimutivale, o le Atua foi e ana le faamafanafanaga uma, o le na te faamafanafanaina mai ia te i matou i lo matou puapuaga uma lava.” (2 Korinito 1:3, 4) Ioe, “o le Atua, o lo tatou malu ia ma lo tatou malosi; e fai o ia ma fesoasoani silisili i puapuaga.” (Salamo 46:1-3) Maeu le faamafanafanaina ona o le iloa na te faatumauina i tatou ma o tatou uso talitonu i o tatou puapuaga uma!

12. Sa faapefea e le ala na tutumau ai pea Paulo ona aafia ai uso Kerisiano?

¹² E mafai ona aumaia faamafanafanaga i le vaai atu i uso tapuai ia Ieova o tutumau o ni Kerisiano faamaoni e ui i faigata eseese. O lea mea lena na tupu ina ua matauina e nisi le faamaoni o le aposetolo o Paulo. Sa ia tusia: “O mea na oo ia te au, ua iu ina tupu atili ai le tala lelei. O lea ua faaalia ai loʻu noanoataga . . . , O le toatele foi o le au uso o i le Alii o loo matuā faatuatua ona o loʻu noanoataga; ua atili ai ona latou faamalosi e tautala i le upu ma le le mataʻu.”—Filipi 1:12-14.

13. O a ni aafiaga e maua i lo tatou lava tausisi i le faamaoni?

¹³ Ioe, o lo tatou iloaina o isi molimau a Ieova o loo tutumau i le faamaoni ia te ia a o feagai ma sauaga, ua faamalosia ai i tatou e tutumau i le faamaoni. I le isi itu, a o tatou e tutumau i le faamaoni i tatou lava i lalo o tofotofoga, ua tatou faamalosia ai isi e tautala i le afioga a le Atua ma le le mataʻu. Ma o le mea moni e mafai ona tatou maua le fiafiaga i le iloaina o lo tatou faamaoni o le puna lea  o faalaeiauga ma faamanuiaga mo i latou.

14. O a ni auala se lua ua faamafanafana mai ai Ieova ia i tatou?

¹⁴ Ua faatumauina i tatou e Ieova e ala i lona agaga paia. O le mea moni, e pei ona tusia e Peteru, ‘afai e upuleagaina i tatou ona o le suafa o Keriso, e amuia i tatou, auā o le agaga mamalu, le agaga o le Atua o loo tutumau ia i tatou.’ (1 Peteru 4:12-16) E faamafanafana mai foi le Atua ia i tatou ma o tatou uso talitonu o mafatia e ala i le tali mai i a tatou tatalo. “Aua neʻi popole outou i se mea e tasi,” na tusi mai ai Paulo, “a ia faailoa atu o outou manao i mea uma lava i le faafetai. O le manuia foi mai le Atua, o lo silisili lava i mea uma e manatu i ai, e leoleoina ai o outou loto, atoa ma o outou mafaufau ia Keriso Iesu.” (Filipi 4:6, 7) Pe o i ai sou faatuatuaga faapena i le “Faafofoga Tatalo”?—Salamo 65:2.

Aumai Faamafanafanaga Mai le Afioga a le Atua

15. E faapefea ona e faamaonia le moni o le Roma 15:4?

¹⁵ O le Afioga paia a le Atua o le isi lea puna o faamafanafanaga sili. E pei ona faamauina e le aposetolo o Paulo: “O mea uma foi na tusia anamua, na tusia ia e aʻoaʻo mai ai ia te i tatou; ina ia tatou maua le faamoemoe e tupu mai i le onosai, ma le faamafanafana mai o Tusi.” (Roma 15:4) Mo se faataʻitaʻiga, a tatou faitau i le laveaiina faavavega o Isaraelu mai Aikupito po o le faasaoina o tagata Siu i aso o le Tupu Fafine o Eseta, pe le faamalosiaina e lo tatou faatuatua ia Ieova o se Laveai le ma faatusatusalia? A e faapefea faamaumauga o le tausia pea o le faamaoni o Iopu ao feagai o ia ma le fili sili? Ma le mautinoa, ua faaalia i lenei mea pe faapefea i auauna a Ieova i ona po nei ona tumau i sauaga i le malosi ua tuuina mai e le Atua. O ‘faamafanafanaga mai i Tusi’ e faatumuina ai ē tausisi i le faamaoni i le faamoemoe ma le loto tele.

16. O a faamafanafanaga mautinoa ua maua i le 1 Peteru 5:6, 7 ma le 1 Korinito 10:13?

¹⁶ A e faapefea pe a mafatia i tatou i o tatou faafitauli? O le mea moni, o Tusi faamafanafana ua mautinoa e mafai ona tatou lagona ai le saogalemu o le tausiga a Ieova ma fesoaosani e faaitiitia ai o tatou faalogona mafatia. Na tusia e le aposetolo Peteru: “Ia faamaulalo ai outou i lalo o le aao malosi o le Atua, ina ia faamaualugaina outou e ia i ona po e tatau ai. Ia tuuina atu ia te ia mea uma tou te popole ai, auā o loo manatu mai o ia ia te outou.” (1 Peteru 5:6, 7) Ioe, o Ieova “o loo manatu mai o ia ia te outou.” Maeu se manatu e faamafanafanaina ai! E leai se mea e tupu na te le silafia pe le mafai ona ia pulea. E le gata i lea, ua aumaia ma le mautinoa e Paulo lenei manatu: “A ua faamaoni le Atua, o le na te le tuuina atu outou i le tofotofoga e sili i se mea ua outou lavatia, a e sauni foi faatasi ma le tofotofoga se mea e sao ai, ina ia outou lavā oono.” (1 Korinito 10:13) E pei o se tagata e faanaunau e tausisi i le faamaoni e mafai ona e talitonu i ai!

17. O a isi sauniuniga ua aumaia ai ia i tatou faamafanafanaga?

¹⁷ O le tatalo ma suesue i le Afioga a le Atua faatasi ma lomiga faa-Kerisiano ua saunia e le “auauna faamaoni ma le mafaufau” e mafai foi ona aumaia ai faamafanafanaga i taimi e omia ai. (Mataio 24:45-47; Salamo 119:105) E faapena foi fautuaga lelei faale-Tusi Paia mai toeaina agalelei o le faapotopotoga. O se isi mea e manaomia ona latou faia, o le “faamafanafana i e loto iti, ia fesoasoani i e vaivai, ia outou onosai i tagata uma lava.”—1 Tesalonia 5:14.

18. O le a le faamafanafanaga ua mo i tatou, pe a itiiti a tatou mea i le itu faaletino?

¹⁸ Peitai o a ni faamafanafanaga e maua pe a itiiti a tatou mea i le itu faaletino? O se faamafanafanaga le iloa o le a i ai fale lelei, le tele o mea taumafa, ma isi faamanuiaga faaletino i le Faiga Fou a le Atua. (Salamo 72:16; 2 Peteru 3:13; faatusatusa Isaia 65:17-25) A e oo lava i le taimi nei, ua mafai e le olaga faa-Kerisiano ona tuuese le soona faaalu sese o tupe i le ulaula e faaleagaina ai, le soona inu i le ava malosi, le pelē tupe, ma mea faapena. O tupe faasao e mafai ona faaaoga mo le lelei o le aiga o se tasi. O le  mulimuli i le Afioga a le Atua e mafai ona fesoasoani ia i tatou e maua le loto malie i nai mea itiiti i le itu faaletino. Sa faapena Paulo, auā sa ia faapea mai: “A o le amio Atua ma le loto malie, o le oloa tele lava lea. Auā tatou te lei au mai lava se mea e tasi i le lalolagi, ua mautinoa foi tatou te le mafai ona ave ese ai o se mea. Afai ua maua e i tatou o mea e aai ai ma mea e oofu ai, ia gata ai o tatou manao.” (1 Timoteo 6:6-8; Filipi 4:11, 12) O le mafaufau loloto i o tatou faaeaga i le auaunaga ia Ieova e iʻu ai i le tele o faamanuiaga e faaoaina moni ai i tatou.—Faataoto 10:22.

19. E faapefea ona onosaia maʻi mo se taimi umi?

¹⁹ A e faapefea pe a tatau ona tatou tutumau pea ma mamaʻi o se taimi umi? E mafai ona tatou onosaia e ala i le fesoasoani mai o Ieova ma faamafanafanaga ua ala mai i lana Afioga. E pei ona fai mai le fai salamo o Tavita: “Amuia le tagata ua manatua le ua mativa, . . . E lagolago ane Ieova ia te ia i le taotoga o lona maʻi.” (Salamo 41:1-3) E le o le taimi lenei mo faamalologa faavavega. A e ua tuuina atu e Ieova i Kerisiano ua gasegase le poto ma le malosi manaomia e feagai ai ma o latou gasegase a o tuu faamuamua mea tau i le malo i o latou olaga.—Mataio 6:33; 2 Korinito 12:7-10.

20. E faapefea ona tatou foia le faanoanoa pe a maliu sē e pele?

²⁰ E faapefea ona tatou ona tatou foia le faanoanoa pe a maliu se tasi e pele ia te oe? E mafai ona aumai faamafanafanaga mai le faamoemoe faale-Tusi Paia o le toetu. (Ioane 5:28, 29; Galuega 24:15) E ui lava ina tatou faanoanoa i le maliu o sē pele, e le tatau ona tatou “faanoanoa pei o isi ua leai so latou faamoemoe.” (1 Tesalonia 4:13) Maeu faamafanafanaga ua aumaia e le faamoemoe o le toetu mo ē tausisi i le faamaoni!

Mausali le Talitonuga i le Atua o Faamafanafaga

21. O le tutumau i sauaga e masani ona iʻu i le a?

²¹ Ia mautinoa o Ieova, “o le Atua foi e ana faamafanafanaga uma,” ma e le mafai ona tuulafoaiina ona tagata tuuina atu ma le faamaoni. (2 Korinito 1:3; Salamo 94:14) O se fesoasoani foi le manatuaina pea, o le tutumau o Kerisiano i sauaga e mafai ona faamamaluina pe viia ai le Atua. O ia ituaiga faiga e tosina ai isi i ona tagata ma la latou galuega talai o le Malo, ma e masani ona iʻu ai i le faateleina o le numera o ē vivii ia Ieova.—Faatusatusa Galuega 8:4-8; 11:19-21.

22. O le a le mea e tatau ona avea ma o tatou faanaunauga, e tusa ai ma le faamaoni?

²² O lea, faatasi ai ma le fesoasoani a le Atua, ia aua tatou te malolo atu i togafiti a Satani e gausia ai lo tatou tausisi i le faamaoni. Gaoioi e tusa ai ma le faatuatua, ma ia faaauau ona tatou faalagolago ia Ieova. Aua neʻi o tatou faagaloina le tele o auala ua ia faamanuia, sapasapaia, ma faamafanafana mai ai ia i tatou o ana auauna. Sei o tatou faamaonia lo tatou tuutoina atu ia te ia ma ana mataupu silisili amiotonu, e lagolago ai lona silisili ese. Ia manatua foi, o le mataupu totino lenei mo le tagata lava ia. Tumau pea i le faia o le finagalo paia o e galue faatasi ma le faapotopotoga a Ieova i nei aso iloga. Ia olioli i o tou faaeaga o le faafiafiaina o le finagalo o Ieova e ala i le tumau i le faamaoni ia te ia, ma aua neʻi galo na e saunia faamafanafanaga mo ē tausisi i le faaamaoni.

O Le a Lau Tali?

□ Ai se a e sili ai ona manaomia e auauna a Ieova faamafanafanaga?

□ Ai se a e faaaoga ai e Satani sauaga faasaga i Kerisiano?

□ E faapefea ona faalaeiauina i tatou o ē tausisi i le faamaoni?

□ O a mea o faamautinoa mai ia i tatou i le 1 Peteru 5:6, 7 ma le 1 Korinito 10:13?

[Fesili mo le Suʻesuʻega]

[Ata i le itulau 16]

O loo saili Satani e ʻaina auauna a Ieova, a e o loo malu puipuia i tatou.

[Ata i le itulau 18]

E taliina e Ieova tatalo a ē tausisi i le faamaoni. Pe e masani ona e tatalo soo?