Mea Taua Mai le Tusi Paia Salamo 42 e oo i le 72

Faamoemoe ia Ieova

E mafai e auauna a Ieova ona fetaiai ma tofotofoga o le faatuatua ma tutumau ai ona o le Atua o lo latou Lafitaga ma o lo latou Laveai. Ua faaalia manino lea i le Vaega lona Lua o le Salamo! Ioe, o le Salamo 42 e oo i le 72 ua na faamaonia e mafai ona tatou tutumau pe a tatou tatalo ma faamoemoe i a Ieova e gaoioi mo i tatou.

“Faamoemoe i le Atua”

Faamoemoe faitau le Salamo 42 e oo i le 45. O se tagata sa Levi na faatagataotauaina, ma sa faanoanoa ona sa le mafai ona ia alu atu i le malumalu o Ieova, a e na malie o ia e “faamoemoe i le Atua” e gaoioi o lona Laveai. (Salamo 42, 43) Ona sau lea o se talosaga mai se nuu sa pagatia, atonu sa faasino i le osofaiga e Asuria o Iuta i aso o le Tupu o Esekia. (Salamo 44) Ona sosoo ai lea, ma se pese o le faaipoipoga sa faasino i le Mesia, o Iesu Keriso, o lē o le a ‘tietie ai i le manu ma le manuia, ona o le tupu moni, ma le agamalu, ma le amiotonu.’—Salamo 45.

◆ 42:1—Sa faapefea ona pei le fai Salamo o se ‘aila e naunau i le vaitafe’?

Mo se isi mafuaaga, ona sa faatagataotauaina lenei tagata sa Levi. O lea sa tele ona ia misia le tapuaiga i le malumalu na ia faalogoina ai ua pei o ia o se aila ua tulia, galala i le fia inu, pe pei o se alia fafine ua naunau mo sina vai i se atunuu naumati ua aunoa ma se suavai. Ua ‘fia inu’ o ia pe naunau atu mo Ieova faatasi ma le faaeaga o le tapuai i le Atua i Lona malumalu.—Fuaiupu 2.

◆ 45:1—O le a le “upu lelei” na faagaeetia a le loto o le fai salamo?

O se vaega o lenei salamo na faatatau ia Iesu Keriso. (Salamo 45:6, 7; Eperu 1:8, 9) O lea sa faagaeetia le loto o le fai salamo i se mea o le a tupu i le lumanai—o le faatuina o le Malo faa-Mesia i le 1914. Ua uunaia ai foi Molimau a Ieova, e faalauiloa lenei “upu lelei.”

Lesona mo i Tatou: O lenei mea na tupu a o faatagataotauaina le fai salamo, e tatau a ona uunaia ai tatou e faaalia le talisapaia loloto mo le aufaatasiga ua tatou olioli ai nei ma tagata o Ieova. Afai e faagataina mai ona o sauaga ma taofia ai lo tatou faatasitasi mo se vaitaimi, e mafai ona tatou toe manatunatu i fiafiaga i le taimi ua tea i le auaunaga paia ma e tatau ona tatou tatalo mo le tutumau a o tatou “faamoemoe i le Atua” e toe faafoisia i tatou i se aufaatasiga ola mo na tagata tapuai.—Salamo 42:4, 5, 11; 43:3-5.

Lo Tatou Lafitaga Alofa

Faitau le Salamo 46 e oo i le 51. O le a faagataina e Ieova taua. (Salamo 46) O le “Tupu silisili ia i le lalolagi atoa,” ma o lē o Puipui mai e le ma faatoilaloina o lo tatou Atua ia e faavavau. (Salamo 47, 48) O ē loto vaivai e tatau ona faamoemoe ia Ieova, a o tagata uma lava o ē ‘avatu viiga o le faafetai e fai ma a latou taulaga’ o le a iloa le ‘faaolataga mai le Atua.’ (Salamo 49, 50) Afai tatou te agasala mo toe salamo, e pei o Tavita i lana agasala, ma Patisepa, o le a laveaiina i tatou e Ieova mai le tausalaina auā ‘na te le inosia le loto momomo ma le nutimomoia.’—Salamo 51.

◆ 46:2—E faapefea ona “faaliliuina le lalolagi”?

E tusa lava pe mou atu mauga agai i le sami ona o se suiga faalenatura i le lalolagi, a e leai se mafuaaga e matataʻu ai i latou o faalagolago ia Ieova. Tusa lava po o le a e tupu, e mafai ona maua lo latou faatuatuaga le maluelue ia Ieova o lo latou Lafitaga.

◆ 51:5—O le a le agasala na faasino mai e Tavita?

Na te lei faauigaina faapea o feusuaiga tau faaipoipoga, afuafuaina o se pepe, ma le fanau mai, o ni agasala na; na te lei faasino foi i se agasala faapitoa a lona tinā. Na i lo lea, sa ia faailoa mai lana lava agasala faanatura o sē tupuga mai ia Atamu. (Iopu 4:4; Roma 5:12) Sa faaalia e Ieova le alofa mutimutivale ia Tavita ona o le feagaiga o le Malo. e le gata i lea, ona sa ia te ia tuinanauga o le agasala tuufaasolo ma salamo o ia.—2 Samuelu 7:12-16.

Lesona mo i Tatou: E fetaui le Salamo 46 ma le taimi na faamataʻuina ai e Ierusalema e Asuria. Sa iloa e Esekia ‘o Ieova o le lafitaga, o se fesoasoani e mauagofie i taimi faigata,’ o lea sa tatalo le Tupu o Esekia ia Ieova, ma sa lavaeaiina faavavega ai le aai. (2 Tupu, mataupu 19) A oo mai taimi faigata, e tatau foi ia i tatou ona avea le Atua ma o tatou Lafitaga. E faapefea? i le faatuatua ia te ia, i le amanaiaina o lana Afioga, ma le pipii atu i lana faalapotopotoga.

Faamautinoaina le Laveaiina

Faitau le Salamo 52 e oo i le 57. O le a aveesea e Ieova tagata leaga ‘mai le nuu o e ola’ ma “faataapeapeina ivi” o so o se tasi e tetee i ona tagata. (Salamo 52, 53) Ina o lamalamaina e Saulo Tavita, sa mautinoa e Tavita le laveaiga faaleatua, ma talu ai ua lavea fua o ia i le togafiti matuia, o lea sa lafo atu ai e ia lana avega ia Ieova. (Salamo 54, 55) Sa malie le fai salamo e faamoemoe ia Ieova na te faaiuina mea faigata uma.—Salamo 56, 57.

◆ 52:8—E faapefea ona avea le tagata amiotonu e pei o se laau olive?

O se laau olive e mafai ona faaatagia ai le fua tele mai, le matagofie ma le mamalu. (Ieremia 11:16; Hosea 14:6) I le salamo lenei, o le tagata faufau leaga o le a oo i se iʻuga leaga e ese mai le tagata amiotonu e puipuia ma manuia e pei o se laau olive lauusiusi.

◆ 54:1—Ai se a na faapea mai ai Tavita, “Ia e faaola mai ai te au ona o lou suafa”? (NW)

O le suafa paia e leai o sona mana faalilolilo a e mafai ona faia lena suafa ma sui o le Atua lava ia. O le mafuaaga lea, na tautino ai e Tavita e ala i lana talosaga faapea o Ieova e mafai ona faasaoina ona tagata. (Esoto 6:1-8) E ui ina faailoa atu e tagata Sifi i le Tupu o Saulo le mea o i ai Tavita, a e o le osofaia e Filisitia o Isaraelu na faapuupuuina ai le taulamalama   o Saulo ia Tavita. (1 Samuelu 23:13-29; Salamo 54, upu tomua) O lea sa faasaoina e Ieova Tavita.

Lesona mo i Tatou: Ua elia e fili o Tavita se lua e maileia ai o ia. (Salamo 57:6) O sea ituaiga lua e maileia ai se tasi, e faaalia ai tulaga mataʻutia po o faufauga lililo e faamataʻuina ai auauna a Ieova. Peitai o tagata tetee i tagata o le Atua e mafai ona maileia e ia latou lava faufauga leaga. O lea afai tatou te faalagolago ia Ieova, ma faaalia le faaeteete, o le a mautinoa lo tatou laveaiga.—Faataoto 11:21; 26:27.

“Faalogologo”

Faitau le Salamo 58 e oo i le 64. Sa tatalo Tavita mo se taui ma sui mai le Atua mo tagata leaga, ona o lona manatunatu i amioga le tonu. (Salamo 58, 59) Ina ua toeitiiti faatoilaloina o ia, sa talosaga o ia mo le laveaiina ma sa ia mautinoa o le a solia i lalo e le Atua ona fili (Salamo 60) Sa avea Ieova ma Lafitaga mo Tavita; o lea sa ia faalologo ma faatalitali mo le laveaiina. (Salamo 61, 62) Ina ua faamalosia e alu i le vaomatua, atonu o le taimi lea sa fouvale ai Apisaloma, sa maua e Tavita le olioli ‘i lalo o apaau o Ieova.’ (Salamo 63) Sa tatalo foi le fai salamo mo se puipuiga mai le “taupulepulega a e amio leaga” ma sa ia mautinoa o le a maua e ē amiotonu le lafitaga ia Ieova.—Salamo 64.

◆ 58:3-5—E faapefea ona avea ē amioleaga e pei o se gata?

O le pepelo, ma upu faifai a ē amio leaga e faaleagaina ai le taʻuleleia o sē ua tuai fuaina, e pei o le u a le gata e mafai ona oti ai se tasi. (Salamo 140: 3; Roma 3:13; Iakopo 3:8) E le gata i lea, o ē amioleaga “e pei o le asipi tutuli ua ia punitia ona taliga,” auā ua latou mumusu e faalogo ma talia le taʻitaʻiga.

◆ 63:3—E faapefea i le alofa agalelei o le Atua ona “sili ona lelei lea i le ola.”?

O le ola e aunoa ma le Atua e leai se fuafuaga moni. Peitai o le alofa faamaoni o Ieova na faaalia ia Tavita na avatu ai se uiga moni i lona olaga. O le faauōga ma le Atua e mafai ona uigā ai olaga o ana auauna ua faamaonia, ma faamautinoa ai le fesoasoani mai o le Atua, ma lana taʻitaʻiga, ma mafai ai e i latou ona vaai i luma i le ola e faavavau ma le fiafia.

Lesona mo i Tatou: Sa malie Tavita e “faalogologo’ i le Atua e gaoioi mo ia. (Salamo 62:1-7) O le usiusitai i le finagalo o Ieova, sa ia lagona ai le saogalemu ma faatuatua i le Atua. Afai tatou te faatuatua faapena ia Ieova, “o le manuia foi mai le Atua” o le a puipuia ai o tatou fatu ma le malosi o tatou mafaufau a o tatou faatalitali mo le laveaiga mai fili ma puapuaga.—Filipi 4:6, 7; Salamo 33:20.

Vivii i lo Tatou Laveai

Faitau le Salamo 65 e oo i le 72. Ua viia Ieova o le puna o le tele o fua, uaga, vao mua lafu lemu, ma lafu manu. (Salamo 65) O pesega e tatau ona faia “i lona suafa mamalu.” (Salamo 66) E tatau ona viia o ia, “o le Atua o le olataga.” (Salamo 67, 68) Na valoia puapuaga o le Mesia, ma o Ieova ua viia ona o le “Faaola” na faatali i ai le fai salamo mo lana fesoasoani. (Salamo 69-71) O lea ituaiga faatuatuaga e tauia, auā o le manuia mo le lalolagi atoa ma le faasaoina mai omiga ua faamautinoaina i le taimi o le pulega faamanuiaina a le Mesia.—Salamo 72.

◆ 68:11—O ai e fai ae ai le “au” tele o fafine?

Ina ua maea ona faaaoga e Ieova tagata tau Isaraelu e faatoilaloina se fili, ona folafola atu lea e fafine Isaraelu le tala lelei o le manumalo i musika, pesega, siva. (1 Samuelu 18:6, 7; faatusatusa Esoto 15:20, 21) Ona o le usiusitai i “fetalaiga” a le Atua, po o ana faatonuga, na tau ai tane Isaraelu ma faatoilalo nuu na fai ma fili i le Nuu o le Folafolaga. Na avatu ai i fafine Isaraelu le tala lelei e faailoa i le samiga o le manumalo. I aso nei, ua i ai se vaega taua mo faifeau fafine o ni e faailoa le Malo ma taʻu atu le tala lelei e tusa ma “fetalaiga” a Ieova, e aofia ai le faailoa atu i nuu o le a faatoilaloina i latou e le Tupu faa-Mesia o Iesu Keriso.

◆ 69:23—Ai se a na ole atu ai ia Ieova ia faatetemu sulugatiti o fili?

A faamalosi musele malolosi o le sulugatiti, ona maua lea o se malosi tele. Peitai o le leai o se malosi e iu ai ina tetemu sulugatiti, atonu foi pe ona o le fefe. O lenei faatagi mo le laveaiina, na ole atu ai Tavita ia Ieova ina ia aveesea le malosi na faaaoga sese mai ona fili.

◆ 72:16—O le a ua faaatagia mai lenei fua tele mai?

‘E pei o fua i Lepanona’ atonu e taʻu mai ai o saito o la putuputu ma maualuluga ua pei ai o laau lauusiusi ma lauolaola o Lepanona. Atonu e ola lauusiusi i laufanua seia oo atu i tumutumu mamafa o saito e mafai ona faatusatusa i tumutumu tetele o arasi o Lepanona. Ua faasino lenei seleselega tetele e le o masani ai nei, a o le a maua i le taimi o le pulega a le Mesia. Ma o le mea moni ‘o i latou mai aai o le a lauolaola e pei o laau iti’ e faaalia ai o mea totino faalelalolagi a Iesu o le a matua faatoateleina.

Lesona mo i Tatou: Sa tatalo le fai Salamo: “O le ua faailoa mai ia te au o puapuaga e tele ma le leaga, e (Ieova) te toe faaola mai ia te au.” (Salamo 71:20) E ui lava e lei faatupuina e Ieova nei ituaiga faigata, a e ua ia faatagaina i tatou ia tofotofoina ma saunia se tali i lē Faaluma ia te ia, o le Tiapolo lea. (Iakopo 1:13; Faataoto 27:11) E le mafai ona faataga i tatou e Ieova ia tofotofoina e sili atu na i lo le mea tatou te mafaia ma e mafai ona ia fesoaosani mai ia i tatou e sao mai tofotofoga faatasi ma se faatuatua malosi. (1 Korinito 10:13; 1 Peteru 1:6, 7) Sa vaaia e Kerisiano faauuina le “tele o puapuaga ma faigata” ina ua sauaina i latou i le taualuga o le Taua l a le Lalolagi. Peitai na ‘laveaiina i latou’ e Ieova i le 1919, ma sa latou faamalosi i le auaunaga o le Malo, mulimuli ane sa faatasi mai latou le “motu o tagata e toatele.” (Faaaliga 7:9) O se iʻuga faapenei, ua mautinoa ai le tatau o le viiga mo le Laveaiga Sili.

E manaomia le faatuatua e faamoemoe ai ia Ieova ina ia gaoioi mo i tatou. Atonu e tatau ona tatou faalologo auā e leai se mea tatou te mafaia e suia ai o tatou tulaga faigata. Peitai, e mafai ona tatou tutumau, e pei o le fai salamo, pe afai tatou te malilie e faamoemoe ia Ieova.