Lipoti a Ē Faalauiloa le Malo

Faatelega Faatiokarate i Venezuela

SA matua i se tulaga uiga ese e le masani ai le vevela mo ni nai aso. Sa maofa tagata na ui ane i le vaai atu i tagata faigaluega o galulue malosi i lalo o le mu tinitini o le la a e o loo malolo le toatele o tagata i lalo o le paolo po o i totonu o se potu o loo i ai se ea malulu. Sa lei pine, a e oso ae le auivi o se fale fou. I le na o le tolu ma le afa masina, a e faaumaina e nei tagata faigaluega se fale fogafale fa—se faaopoopoga fou i fale o le ala o le Sosaiete o le Olomatamata i La Victoria i Venezuela.

O le taimi lona lua lenei ua faateleina ai le lala i Venezuela talu mai lona tatalaina i le 1946, ina o na o le 13 le au talai o le Malo i lena atunuu. I le 1977 na tupu ae ai lo latou faitauaofai i le 13,000. O le mea lea, i le iuga sa faaumaina ai loa se fale fou o le lala ma faapaiaina loa i La Victoria i lena lava tausaga. Talu mai ai lava, o le faitauaofai o Molimau i lena atunuu ua sili atu na i lo o le faaluaina. O lea taimi mo se isi foi faatelega.

O le faaopoopoga fou (i le itu taumatau i tua o le ata), e sili atu i le 20,000 futu faatafafā (1,900 sq m) le vatele o le fola, e sili atu na i lo o le faaluaina o le aofaiga atoa o le lala. O lea auala i totonu i le itu taumatau i tua e ui atu ai i le fale e tutu ai taavale e 15 i lalo. Ua aveesea nei le ofisa lomi tusi mai le fale lea na faia i le 1977 (le fale umi lena e i le ogatotonu) i le fogafale pito i lalo o le faaopoopoga fou, o loo i ai le ofisa e tausi ai mea ma fale kamuta o lo faia ai foi ni ofisa. O le isi vaega atoa o le fale fou o loo i ai potu e nonofo ai le aiga Peteli.

Ua matua faaauupegaina le fale fou e i ai lona tane vai tele e faaputu ai vai ma lona lava fale eletise mo faalavelave faafuasei, ona e masani lava ona pe le eletise ma le lava vai i lena vaega o le lalolagi. Ma, ina ia faaaoga atoa le susulu manaia mai o le la ma le agi mai o le savili ua faatuina ai le fale ta ofu i luga o le fale.

O le a le manatu o tagata o lena atunuu e uiga i le fale? E ui lava na auē nisi ona ua leai le togalaau manaia sa i ai i ina, a e toatele foi nisi ua lagona ua faaopoopo atu le fale i le vaaiga aloia a tuaoi. O se tusitala lauiloa, o lē na faalogo i mea e tele e uiga i le fale na sau ai e vaai i ai, sa ia taʻu atu i uso: “O le mea moni o le fale aupito sili lenei lona fauina i La Victoria atoa.” Sa maofa foi faapena se inisinia o lena atunuu, o lē na fiafia e tuuina atu le pemita e nofoia ai le fale, ma na faapea mai: “O se faaeaga mo au le tuuina atu o le pemita e nofoia ai se fale pei o lenei.”

Sa olioli Molimau a Ieova i Venezuela ia Aperila 21, 1985, ina ua tauaofia le 15,802 o i latou i Valencia e latalata ane mo le faapaiaina, ma e 38,059 na faapotopoto i isi aai e lima ina ia mafai ona faalogologo i le polokalama i fesootaiga i telefoni. Sa sili mamao atu e na auai na i lo o le aofaiga o le au talai i lena atunuu. Ua latou loto faafetai ma le fiafia ona o lenei mea alofa tauatua e faaauupegaina ai i latou i se tulaga sili mo le talaiina maeaea o le tala lelei o le Malo a o lei oo mai le iʻuga o lenei faiga o mea.—Mataio 24:14.