O Manu Feai O Le Apokalipise—Ai Se A E Faitau Ai E Uiga Ia I Latou?

APOKALIPISE! O se tasi lena o igoa uiga ese ua tuuina atu i le tusi mulimuli o le Tusi Paia. Ua taʻua foi o le tusi o Faaaliga. Ua tumu lenei tusi i upu manino faaata, ua iloga ai i latou ia, o se tarako ma ni manu feai se tolu. O nisi ua fefefe i le iloa o nei manu feai. O nisi ua na ona faaleamanaia lava e pei o ni manatunatuga o se toeaina. Ai se a la, e ao ai ona e faitau e uiga i nei manu feai o le Apokalipise? Auā o loo aafia ai lou fiafia.

E moni, sa o se toeaina matua le aposetolo o Ioane ina o ia tusia le tusi o Faaaliga ua toeitiiti 1,900 tausaga ua mavae. O lea, o le uiga ea la o lena mea faapea o manu feai ua faamatalaina ua na o ni faasaga a se tagata ua matua naua ua tau galogalo mea? E leai, ma o Ioane e le o se toeaina matua muamua lea na ia iloa ai ituaiga o faaaliga. O le tagata foi e igoa ia Tanielu na ia iloa foi ni faaaliga o ni manu feai i lona tagata matua, ma o nei faaaliga ua faamaonia o ni valoaga sao o suiga o suiga o malo faaletagata. (Tanielu, mataupu 7 ma le 8) E le gata i lea, sa manatu foi Iesu o Tanielu sa faagaeeina faaleatua, ma taʻua o ia o le perofeta ma sii mai ana tusitusiga.—Mataio 24:15.

Sa faailoa atu e Iesu i ona aposetolo faapea o le a latou maua ni poloaiga faaopoopo tauatua pe a mavae lona maliu. (Ioane 16:12, 13) Ma talu ai o le tele o taualumaga i le tusi o Faaaliga ua uma ona faataunuuina i se auala ofoofogia, ua tatou mautinoa ai foi faapea o le faaaliga ia Ioane o manu feai po o le Apokalipise sa faagaeeina foi e le Atua.—2 Timoteo 3:16.

Ua faapea mai o upu tomua o le tusi o Faaaliga: “O le faaaliga a Iesu Keriso na tuuina atu e le Atua ia te ia ina ia faaali mai . . . [faailoga] e tusa ona vave oo mai, ua auina mai foi e ia lana agelu e faailoa mai ai i lana auauna o Ioane.” (Faaaliga 1:1 N.W.) O lea, o faatusa i le tusi o Faaaliga, e aofia ai ana manu feai, e faafaatusa, e le moni. E leai se mea e fefe ai fua e faitau e uiga ia i latou. O nei manu feai faafaatusa ua aumaia ai i Kerisiano se malamalamaga taua, ua latou mafai ai ona faasaoina lo latou faia ma le Atua. O lea, ua mafai ai ona tusi e le aposetolo o Ioane: “Amuia le faitau, atoa ma e faalogologo i upu o lenei valoaga, ma tausi i mea ua tusia ai; auā ua latalata ona po.” Ioe, o lou malamalama i nei mea faafaatusa e mafai ona aumaia ai le fiafia nei ma i le lumanai.—Faaaliga 1:3.