Pelesara—O se Perenise Faapaleina po o se Tupu?

UA leva ona fefinauai tagata aʻoga o le Tusi Paia e uiga i a Pelesara. E tusa ai ma le tusi o le Tusi Paia o le Tanielu, “O Pelesara le tupu” sa pule i Papelonia, sa faia e ia se faigāʻai tele i lena po taua tele i le 539 T.L.M. ina ua faatoilaloina e Kuresa le Peresia lena aai. (Tanielu 5:1) E i ai se faalavelave ona e na o le Tusi Paia o loo ta’ua ai le igoa o Pelesara. Na tineia e isi uluai talafaasolopito lena igoa ma lipotia mai o le pule o Papelonia i lena taimi sa o Naponita. Na vaaia lenei mea e le toatele faapea o le faamaoniga lenei faatala tuufaasolo o le le aoga o le tusi a Tanielu ma atonu na tusi i ni senituri mulimuli ane i na ua mavae le paʻu o Papelonia.

A e peitai, e matua aale lava lena faamasinoga. E tusa ai ma le mataupu i le Biblical Archaeology Review a Alan Millard (o Me/Iuni 1985), i le 1854 sa maua ai i lalo o le eleele i Iraq se tusitusiga sa i ai se tatalo mo le ola faafualoa soifua maloloina lelei o Naponita ma lona atalii matua. O ai le igoa o lenei atalii? O Pelesara! O lea la sa i ai Pelesara i Papelonia! Talu mai le 1854, na toe maua ai foi le tele o nisi tusitusiga e faailoa mai ai lenei mea, A e peitai, sa lei taʻua lava e se tasi o nei tusitusiga Pelesara o se tupu. Sa latou faasino ia te ia o le alo o le tupu po o le perenise faapaleina. O le mea lea, ua taʻutino mai i faitioga a tagata faapea o le tusitala o le tusi a Tanielu ua sese i lona faaaogaina o le faaupuga o “Pelesara le tupu.”

E ui i lea, e oo lava i lenei mea o loo sese ai i latou. E faapefea ona tatou iloa? Mo le mea lava lea e tasi e tusa ia ma le faamatalaga a Alan Millard, o faamatalaga moni sa eliina ae mai le eleele mai lena taimi na faaalia ni tautoga a tagata na faia feagaiga i le igoa o Naponita ma Pelesara. Ai se a ua taua ai lenei mea? Auā o le faavae masani o le faia o ni tautoga a na tagata i le igoa o atua ma le tupu. O le tautoga na faia i le igoa o Pelesara na o lea se faiga fou, o lea la, ua manino ai lava sa i ai se tulaga faapitoa o Pelesara. O mea moni, e foliga mai sa pule lava na o Pelesara i Papelonia mo i tausaga se tele, a o nofo lona tamā o oase o Teima i Arapi i Matu. Talu mai na taimi, e tusa ai ma le maa ua faasaoina nei i totonu o le Fale Mataaga i Peretania, “na tuuina atu” e Naponita “le tulaga tautupu” ia Pelesara.

Ai se a la ua taʻua ai e tusi faalemalo o ia o le “perenise ua faapaleina” a e o loo faaaogaina i le tusi o Tanielu le upu “tupu”? O ni suesuega i mea tau le eleele i Suria i Matu ua aumaia ai se tali. I le 1979 sa eliina ae ai mai le eleele le faatusa lapoa o le tupu o Kosena anamua i le taimi o lona soifuaga i ina. I lona ofu sa tusia ai ni tusitusiga se lua, o le tasi le gagana Asuria a o le isi o le gagana Arama. O nei tusitusiga e lua e toeitiiti lava tutusa, na o le tasi lava le mea faaoso manatu e eseese ai. O le mau i le gagana a alii maualuluga o Asuria sa faapea mai o le tupu e ona le faatusa o le “kovana o Kosena.” O le mau i le gagana Arama, le gagana taatele a tagata lautele, na faamatalaina o ia o le “tupu”.

I le faatusatusa atu i lenei mea, sa faaiʻu mai Alan Millard faapea e ui lava sa faasino atu tusitusiga faalemalo ia Pelesara o se perenise faapaleina, “atonu ua faamanatu ai o se mea lelei mo tusi e le ni tusi faalemalo e pei o le Tusi a Tanielu ona taʻua o Pelesara o se ‘tupu’. Sa galue o ia e pei o se tupu, o le sui o lona tamā, atonu sa le avea moni o ia ma tupu. Pe ana fai sa faaaogaina lena eseesega autu, e le talafeagai la ma e fenuminumi ai le tala e pei ona tusia e Tanielu.”

O nei mea uma ua manaomia ai ona fesili: Afai e moni lava na tusia le tusi a Tanielu i senituri ina ua mavae le paʻu o Papelonia ma na faapefea la ona iloa e lona tusitala e uiga ia Pelesara, o lē na le amanaia e isi tusitala? Ma ai se a na ia taʻua ai o ia o le “tupu” ona o le mulimuli i le tu na malamalama i ai i le taimi sa ola ai Pelesara, a e ua faagaloina i senituri mulimuli ane ai? O le mea moni, o le faasinoga o loo i le tusi o Tanielu ia “Pelesara le tupu” o se faamaoniga maumaututu malosi lea e iloa ai o le tusi na tusia moni lava e se tagata na ola i Papelonia i le ono senituri T.L.M.