O le Soifuaga o Iesu ma lana Faiva

I le Sunako i Lana Lava Aai

INA ua foi atu Iesu i lona aiga, e mafai ona tatou vaaia faalemafaufau le fiafia na faagaeeina i Nasareta. I le sili atu itiiti i se tausaga a o ia lei alu atu ia Ioane ina ia papatisoina o ia, sa iloa o ia o se kamuta. A e i le taimi nei ua salalau atu le tala e uiga ia te ia o se fai vavega. Sa matua naunau lava tagata o lona nuu i le fia vaai o ia faia ni mea ofoofogia i totonu ia i latou.

Na tupu lo latou fiafia a o ulufale atu Iesu i le sunako e tusa ai ma lana lava masani. A o faia le sauniga, na tulai o ia e faitau, ma na tuuina atu ia te ia le tusi taai a le perofeta o Isaia. Na maua e ia le mea ua tusia ai e uiga i Le ua faauuina e le agaga o Ieova, o loo i le mataupu e 61 o la tatou Tusi Paia i aso nei.

Ina ua uma ona ia faitau e uiga i le auala o le a Ia folafola atu ai le saolotoga i le tafeaga, ma ia pupula mata o ē tauaso, ma le tausaga e talileleia mai ai e Ieova, ona tuuina atu ai lea e Iesu le tusi i le tautua ma nofo i lalo. Ua pulatoa uma atu tagata ia te ia. Ona ia fetalai atu lea ia i latou, atonu pe mo sina taimi, ma faamatala atu: O le aso nei ua taunuu ai lenei Tusi o outou o faalogologo i ai.”

Na maofa tagata i ana “upu lelei” ma fetautalatalai ua fai ane: “E le o le atalii ea lenei o Iosefa?” A e ina ua ia silafia o loo latou mananao na te faia ni vavega, sa toe faapea atu Iesu: “E fai mai lava e outou lenei upu faatusa ia te au, ‘Le fomai e, ina faamalolo ia oe ia te oe; o mea uma na faia i Kapanaumi, na matou faalogo i ai, ia e faia foi inei i lou nuu moni.” O le mea moni, sa lagona e uluai tuaoi o Iesu faapea e tatau ona amata muamua faamalologa i le aiga, mo le lelei o ona lava tagata. Ua latou lagona ua le amanaia i latou e Iesu.

Ina ua silafia e ia o latou manatunatu, sa faamatala atu e ia se talatuufaasolo e faatatau ia i latou. E toatele fafine ua oti a latou tane sa i ai i Isaraelu i ona po o Elia, sa ia iloa, a e sa lei auina atu Elia i se tasi o i latou na. Na i lo o lea, sa ia alu atu i se fafine ua oti lana tane e le se Isaraelu i Saitonu, lea na ia faia ai se vavega faasaoola. Mai aso foi o Elisaia, sa toatele ni lepela sa i ai, a e na faamamaina e Elisaia na o Naamanu mai Suria.

 Na matua lilivau i latou i nei faatusatusaga faatalatuufaasolo le manuia, na faaalialia ai lo latou manatu faapito ma le leai o se faatuatua, o lea na tutu ai i luga ē na i le sunako ma ave faavave ia te ia i tua o le aai. Ma o ina i tafatafa o le mauga lea o loo faatuina i Nasareta, na latou taumafai e faatito ifo ia te ia i le auvae mauga. A e na maliu faalilolilo ese Iesu mai ia te i latou ma le saogalemu. Luka 4:16-30; 1 Tupu 17:8-16; 2 Tupu 5:8-14.

◆ Ai se a na tupu ai se fiafia tele i Nasareta?

◆ O le ā le manatu o tagata i le lauga a Iesu, a e o lea le mea na lilivau ai i latou?

◆ O le a na taumafai tagata e fai ia Iesu?