Mekito o Se Laufanua o Taua Anamua Ma Ona Uiga Faavaloaga

“IEOVA e, ia faapea ona fanoia atoa uma o e ita ia te oe.” O le fuaitau lena na faaiuina ai se pese o le manumalo na fatuina ua silia ma le 32 senituri ua mavae. Na faamanatuina ai se manumalo o le taua latalata ane i le aai anamua o Mekito.

E tusa ai ma faamatalaga faale-Tusi Paia, sa faatonuina le faamasino o Parako o Isaraelu e le Atua, e faanonofo ni tane faaauupegaina se 10,000 o ē na tauofo sa faanoanoa ona e lei taitai lava ona faaaupegaina i latou. “Sa lei vaaia se talita po o se tao ia i latou.” (Faamasino 5:8; N.W.) Peitai, sa lei faapena le fili. Sa taitai i latou e le Taʻitaʻi ʻau a Sesera, ma sa faaauupegaina le ʻau tau a sa Kanana i le atamai sili faavaegaau na i ai i lea vaitaimi. “O kariota uamea e iva selau.” (Faamasino 4:3) O nei mea na avatua ai i tagata o Kanana se naunau e gaoioi faatopetope ai ma faamalosia ai o latou mafaufau.

E ui i lea, e le o le manumalo o le iʻuga lea o le malosi faafitafita ma meatau. O le tele o vaega ʻau na a Sesera na tosina atu i le alia o Kisona sa leai ni vai na i ai. Na tuuina e Ieova le faailoga ia Parako e o ifo ai. Sei tau ina manatunatu i le 10,000 tane o faasolosolo mai le mauga agai i le laufanua o le alia! Peitai, sa faafuasei ona faatupu e Ieova se afa. O matagi ma timuga na taia ai mata o le fili. O le vanu o le alia o Kisona, na liua e avea ma tafeaga malolosi, ua le mafai ona toe gaoioi ai kariota tau a Sesera, le tele o palapala e pei o se sami. Sa vevesi ʻau a Sesera ma sosola ai ona o le fefefe, a e na puea ma fasiotia. “E leai lava se tasi na toe.”—Faamasino, mataupu 4 ma le 5.

E le tioa ona faaaogaina nei upu ona o lenei manumalo faafuasei: “Ieova e, ia faapea ona fanoia atoa uma o e ita ia te oe; a o e ua alolofa atu ia te ia, ia pei o le la i latou ina o mu totoʻa.” (Faamasino 5:31) Peitai, sei matau, le upu lena “ia faapea.” Ua fautua mai ai o le taua e faavaloaga, ma faasino ai i le lumanai i se taua sili o le a fano ai fili uma o le Atua.

Peitai, o tagata tetee na latou siosiomia Isaraelu sa vave ona galo ia i latou o mea mataʻutia na latou fetaiai. E na o le 47 tausaga mulimuli ane ai e faatasia ni nuu i lalo o le taʻitaʻiga a Mitiana ma ua “faapotopoto faatasi . . . ua latou tolauapi i le vanu o Isereelu,” o le vanu e sosoo mai ma Mekito. (Faamasino 6:33) O nei fili o loo tolauapi sa  toatele “e pei o se.” Peitai, o le taimi lea, sa na o se ʻau tau toaitiiti a Isaraelu a e o se ʻau malosi o tane e 300 o tutu “e sio ai le togālauapi” i lalo o le taʻitaʻiga a Kitiona. A iloa atu le faailoga, ona ilia lea o pu a le 300, ma taei kate i o latou lima, ma ʻuʻu sulu, ma alalaga i se leo o le taua ma le taufaafefe: “O le pelu a Ieova ma Kitiona.” Sa le toa tagata Mitiana! “Ona faaoo atu ai lea o Ieova o le pelu a le tasi i le tasi,” ona faaiuina lea e le au toaitiiti a Kitiona ē na totoe!—Faamasino, mataupu 7.

E le tatau ia i tatou i aso nei ona faia le mea sese lava lea a Mitiana pe aveesea le talitonuga i le tulaga faafaatusa o Mekito. e faa 12 taimi o tautala le Tusi Paia i lenei laufanua anamua ua o le taua. E le gata i lea, ua taʻu mai e valoaga o le Tusi Paia o mea na tutupu i Mekito e i ai ni ona faatatauga taua mo o tatou aso. Sei o tatou vaavaai la i mea ua taʻua mai e le Tusi Paia ma suesuega i mea anamua e uiga i lenei nofoaga faatala faasolopito.

Magaala o le Lalolagi Anamua

O Mekito faatasi ma aai o Hasora ma Kasera na latou pulea ni auala tetele mo vaegaʻau ma mo fefaatauaiga e fesootai ai Asia ma Aferika. O Mekito sa i le va o isi aai e lua ma e tu i se tulaga aupito sili ona lamatia pe a osofaia e meatau. Mai i so o se itu lava, mai ala tatala faanatura, po o ala i mauga ma auala e feitai uma lava i lona vanu laugatasi. O “Mekito” e pei ona faamatalaina e The Geography of the Bible “e tu i le magaala, o le mea moni o se tasi o magaala aupito sili ona leva o le lalolagi anamua.”

E aofia uma i Mekito se fanua laugatasi i le vanu e oo atu i le 20 maila (32 km) i tafatafa o le itu i mautu i sa sae o atu mauga o Karamelu. I le vaitau o timuga oma le malulu, o vai e alu ifo mai mauga o siomia ai sa mafua ia ona tatafe le Vaitafe lata ane i Kisona. Sa taʻua foi lea laufanua o “le alia o Kisona.” (Faamasino 4:13) Fai mai le tusi Geography of Israel: “Ona o timuga i le malulu” ua mafua ia i eleele o le alia “ona avea ma palapala magotogoto . . . O le malifa o Kisona e laititi tele, ma o le ala tatala . . . e faigofie ona punitia; o lea na sosolo mai ai i nei le pala”. Na iloa e Sesera ma lana ʻau le telē e mafai ona oo i ai le palapala o lenei laugatasi. E ui i lea, i le tau mafanafana, o lenei laugatasi sa avea ma nofoaga fetaui lelei mo Kariota e aʻoaʻoina ai mo taua. (Faatusatusa Pese a Solomona 6:11, 12) O vaega ʻau o le taua e mafai foi ona faapotopoto ai i ina.

 E le tioa ona faia e le Tupu o Solomona laasaga e faamalosia ai Mekito: “O le mea foi lenei na totogi ai e le tupu o Solomona o tagata; ia faia . . . le pa o Ierusalema, ma Hasora, ma Mekito, ma Kasera.” (1 Tupu 9:15) O se maupuepue e 70 futu (21 mita) le maualuga, e atagia mamao atu ai le vanu lautele, ua faailogaina ai nei le mea sa i ai muamua Mekito. I aso anamua, sa masani ona fausia fale fou i luga o fale tuai ua faaleaogaina. O lea o ituaiga fausaga taitasi ua faailogaina ai taimi faapitoa o tala faasolopito. O le tagata suesue i mea anamua i le eleele, na amata ona elia mai ana suesuega mai i luga seia oo atu lava i lalo i lea āi ma lea āi o tala faasolopito. A itiiti mai e tusa ma le 20 āi na maua i Mekito, ua faaali ai e tele taimi na toe fausia ai le aai. Ma e faapefea ona fesoasoani le Tusi Paia i nei tagata eli palapala ma le onosai?

O le fausia o ala tatala i le aai atonu o se vaega taua lea o galuega a Solomona e faamalosia ai Mekito, Hasora, ma Kasera. I se taimi ua mavae na maua ai ia ituaiga ala tatala i Mekito. E lei leva mulimuli ane a e maua ala tatala o ia lava fausaga i Hasora. O lea, o se manatu na aumaia i le Tusi Paia, na amata ai suesuega a tagata suesue i le eleele i Kasera. Sa o se mea e maofa ai le mauaina o ia foi ituaiga fausaga i ina. O le a le uiga mo tagata suesue o le Tusi Paia? Na faapea mai se tagata suesue i le eleele lauiloa le Polofesa o Yohanan Aharoni:

“I suesuega i le eleele na faia i nofoaga e tolu, na maua ai ala tatala e tutusa fausaga i āi e tele mai le senituri lona sefulu T.L.M. O ala tatala faapenei, e tai tolu o latou potu o leoleo ma seti o lagolago malolosi e fai i itu taitasi o le auala e savali ai, ua mauaina i nisi nofoaga mamao se lua . . . O lea la, ua i ai se maliega atoatoa ma le tatau ai i tagata aʻoga faapea o ala tatala o Hasora, Mekito ma Kasera faatasi ma o latou potu taitolu sa fausia i le taimi o le pulega a Solomona.”

Sa faapena foi ona faaiu mai e Dr. Yigael Yadin: “O le mauaina o fausaga malolosi a Solomona i Hasora, Mekito ma Kasera o se faataʻitaʻiga faafaatonuga lea o le pe faapefea ona taua ma faatinoina taʻiala mai le Tusi Paia e tagata suesue o le eleele.”

O Se Laufanua o Iʻuga Mautinoa

O le iloaina o le tulaga lamatia o le nofoaga o Mekito, ua malamalama ai lona fesootai ma le manatu i se laufanua o le taua i talafaasolopito anamua. O le mea moni, o le upu Eperu anamua mo “Mekito” o lona uiga “o se nofoaga mo fetaiaiga, po o, se tauaofiaga a vaega ʻau.” Sa tusia e le Polofesa Aharoni faapea:

 “O Mekito sa o se aai malosi e sili ona taua e ui o le mea moni e le o taʻua i tusi o tala faasolopito se faatoa oo mai i lona sefululima senituri T.L.M. I lena taimi na aliali mai ai i tusitusiga a Thutmose lll. O faamaumauga faaletausaga o tala faasolopito a lenei farao na tusi ai faapea na taʻitaʻia e Mekito se faaleleiga o aai tetee o Kanana . . . O le ʻau tau a Aikupito ma kariota a Kanana sa tauina le taua e mautinoa lona iuga i lenei fouvalega . . . latalata i Mekito. O faiga faavavega muamua ia ua faasaoina mai ona tala auiliili. Ina ua maea lelei ona faatoilalo le malosi o Kana i le fanua, ona faoa lea ma avea faagaoi e Farao se oloa tele, e aofia ai le 924 kariota!”

O Dr. Zev Vilnay, le tusitala o The New Israel Atlas na ia faamatala atili e uiga i lena vanu faapea, “o se laufanua o taua taʻutaʻua mai le amataga o tala faasolopito seia oo i le Taua I a le Lalolagi.

Mekito—Vaaiga o le Taua Mulimuli?

O le tusi mulimuli o le Tusi Paia, o le Faaaliga, o lo faamauina ai se vaaiga “o tupu o le lalolagi ma le atu laulau uma” ua faapotopoto faatasi “i le taua i le aso tele o le Atua” ia “Amaketo” (“Mauga o Mekito”) (Faaaliga 16:14, 16) Talu ai o le tutusa o igoa, ua faapea mai ai nisi o le a faia lenei taua i se vaaiga faitino i Mekito. Peitai o le maupuepue o Mekito e faigata ona agavaa e avea o se “mauga”. Manatunatu foi: Pe ua lava le tele o le vanu o Mekito e aofia faatasi uma i ai taʻitaʻi o le lalolagi faatasi ma a latou ʻau tau tetele ma le tele o auupega faavaegaau? “O le gagana faaapokalipise lenei,” o le faamatalaga lea a le International Standard Bible Encyclopedia, “ma ua fetaui le faapea o Amaketo ua le faaaogaina o se igoa mo se nofoaga faapitoa a e peitai o se faaupuga faafaatusa mo le fetaiaiga mulimuli ua mautinoa lona iuga.”

O le a la “Amaketo”? E manino lava e faafaatusa. I le vaai atu i tala faasolopito o Mekito faapea o se laufanua lea o taua ua mautinoa le iuga, ua faaaoga ai e le Faaaliga e faaatagia ai le tulaga valalata e oo i ai pe a ita “nuu uma” i tagata o le Atua ma oo ai i lona taualuga. (Mataio 24:9, 14) Talu ai o loo faaauau pea ma le faamaoni e Kerisiano moni le lagolagoina o le Malo o le Atua, o le a faapotopoto faatasi ai taʻitaʻi o le lalolagi ma, “faatasitasi” e faaumatia i latou. Peitai, e le taui ma sui Molimau a Ieova. (Isaia 2:1-4) Sa tofia e Ieova lo latou, Tupu le Alii o Iesu Keriso, ina ia tua mo i latou. I lea taimi taua, o lenei Tupu faalelagi faatasi ma “ʻau . . . i le lagi” o le a faalavelave mai ma osofai “tupu o le lalolagi ma a latou ʻau.” o lenei taua faalekelope o le a matuinoa lona iuga e pei lava o ia na faia i Mekito. O fili uma faalelalolagi o le a “fanoia” e pei ona valoia e le pese o le manumalo o Tepora ma Parako!—Faaaliga 19:11-21; Faamasino 5:31.

Pe o le a e i ai i ina faatasi ma ē alolofa ia Ieova—po o le i ai faatasi ma ē o fai mona fili? Ua faamanino mai e le Tusi Paia o ē le o tutu faatasi ma Ieova ma ona tagata ua i se tulaga mataʻutia moni o le le iloa o o latou ola. (Sefanaia 2:3; 2 Tesalonia 1: 7-9) O lea la, e leai se taimi e faatuai ai! “Faauta, ou te alu atu e pei o se gaoi,” o le lapataiga lea a Iesu Keriso faamamaluina faatasi ma se faasinoga patino i le taimi o le taualuga i le “puapuaga tele” ia Amaketo.—Faaaliga 16:15; Mataio 24:21.

“O le taua o le aso tele o le Atua Silisili” o le a i ai sona iʻuga faamamaluina. O le a tatalaina ai le ala mo le Malo o le Atua na te faaliliuina lenei lalolagi i se parataiso. (Mataio 6:9, 10; Faaaliga 21:3-5) A e o le sili o mea uma, o le a viia ai le suafa aupito silisili i le aoao o mea i se faataunuuga matagofie o le tatalo faavaloaga anamua:

“Ia e fai ia te i latou e faapei ona e faia ia Mitiana, ma Sesera, ma Iapino i le alia o Kisona . . . Tuliloa ia te i latou i lou afā, ia e faaatuatuvale ia te i latou i lou asiosio. Ia e matuā faama ia te i latou; ina ia latou saili i lou suafa, Ieova e. Ia faamaina i latou ma ia faaatuatuvaleina i latou e faavavau faavavau lava; ia maasiasi i latou, ma ia fano i latou; ina ia iloa e i latou, o oe, e ou le suafa o Ieova, na o oe lava o le Silisili ese i le lalolagi uma.”—Salamo 83:9, 15-18.

[Faafanua i le itulau 22]

O Mekito sa na pulea se tasi o ala tele faavaegaau ma fefaatauaiga e fesootai ai konitineta o Asia ma Aferika.

(Tagaʻi i le lomiga mo le ata atoa)

Ala o Fefaatauaiga-------

Hasora

Mekito

Kasera

Ierusalema

[Faafanua]

ASIA

AFERIKA

[Ata i le itulau 23]

O le taua faalekelope Amaketo o le a mautinoa lona iʻuga, e pei lava o taua na tauina i Mekito. O fili uma faalelalolagi o le Atua o le a fano.