Tausisi ma le Autasi i le Sini o le Ola
Tausisi ma le Autasi i le Sini o le Ola
“O le ola e faavavau foi lenei ia latou iloa oe, le Atua moni e toatasi, atoa ma le ua e auina mai o Iesu Keriso lea.”—IOANE 17:3.
1. (a) O le a le taimi na uluai taʻua ai e Iesu “le ola e faavavau”? (e) O ai atonu e mafai ona maua lea sini?
UA IA sau faalilolilo i le po ma le le vaaia o ia e se tasi. O Nikotemo lea. Ua matua ofo o ia i faailoga na faia e Iesu i Ierusalema i le taimi o le Paseka i le 30 T.A. O le uluai faaupuga a le Alo o le Atua na tusia e uiga i le “ola e faavavau,” sa fai atu i lenei Faresaio ma sa ia faaopoopo atu nei upu faamafanafana: “Ina ia le fano le tasi e faatuatua ia te ia, a ia maua e ia le ola e faavavau.” (Ioane 3:15, 16) Maeu se avanoa ofoofogia ua tatalaina nei mo le lalolagi o le fanau a tagata ua mafai ona togiolaina! Ioe, e oo lava i se Faresaio faamaualuga e tatau ona faamaulalo o ia ina ia maua lena sini.
2. (a) I lalo o a tulaga na toe taʻua ai e Iesu le “ola e faavavau”? (e) O ai e mafai foi ona maua vai o le ola?
2 E lei umi mulimuli ane, a e malaga atu ia i se vaieli i Samaria a o o atu ona soo e faatau mai ni a latou mea ai. Ona sau ai lea o se fafine e utu vai. Sa fetalai atu Iesu ia te ia: “A o se inu i le vai ou te avatu i a te ia, e le toe fia inu ia e faavavau, a o le vai ou te avatu ia te avatu ia te ia, e avea i totonu ia te ia o le vaipuna, e puna i luga o le ola e faavavau.” (Ioane 4:14) Talu ai ona e taʻuleagaina e Iutaia Samaria, ai se a na faailoa atu ai e Iesu lenei faamoemoe taua i lenei fafine? E le gata foi i lea, a e sa silafia e Iesu, o lenei fafine e toalima ni tane sa ia te ia ma o loo nonofo faapouliuli nei o ia ma se tamaloa e le o sana tane moni. O le mea lea, ua faailoa atu ai e Iesu i inei, e tatau ona avanoa vai ola o le upu moni e oo lava i ē ua taʻuleagaina e le lalolagi o le fanau a tagata tau lava ina latou salamo ma faamamaina o latou olaga.—Faatusatusa le Kolose 3:5-7.
3. (a) O a ituaiga “o mea ai” na fautuaina e Iesu? (e) Ua faapefea ona faataunuuina le Ioane 4:34-36?
3 “Ola e faavavau”! Sa toe taʻua atili e Iesu lenei mataupu ina ua toe foi mai ona soo ma nanati atu ia te ia ia aai loa. Sa ia taʻu atu ia i latou: “O laʻu mea e ʻai, ia ou faia le finagalo o le na auina mai aʻu, ma faaiu lana galuega.” O le ā lena galuega? Ua fetalai mai Iesu: “Ina tepa ae ia o outou mata, ma vaavaai i le fanua ua sinasina mai nei i seleselega saito. O lē selesele foi, e maua lana totogi, ma faaputu le fua e oo i le ola e faavavau.” O le a faatinoina se seleselega faapena e oo lava i Samaria le taualoa, sa avea lea mea o se mea moni e olioli ai e pei ona faaalia i faamaumauga. (Ioane 4:34-36; Galuega 8:1, 14-17) O le seleselega mo le ola e faavavau o loo faia pea e oo mai i aso nei, a e o le fanua o le lalolagi nei. O loo tele pea mea e fai a soo o Iesu Keriso i lenei galuega a le Alii.—Mataio 13:37, 38; 1 Korinito 15:58.
“O Le Mea Alofa o le Ola”
4. Ua faapefea ona tali atu Iesu i tagata Iutaia e uiga i le tausia o le Sapati?
4 Ua mavae atu le tausaga. Ua oo atu i le taimi o le Paseka i le 31 T.A. E pei o lana masani, ua maliu atu Iesu i Ierusalema mo le tausamiga. A e ua o atu tagata Iutaia e faasaua ia te ia ona o lona faia o ni galuega alofa o le faia o faamalologa i le Sapati. O le a le tali atu a Iesu ia i latou? Ua faapea atu: “O loo galue loʻu Tamā e oo mai lava i le aso nei; o loo galue foi aʻu.” O le mea lea na latou saili ai e fasioti ia te ia.—Ioane 5:17, 18.
5, 6. (a) O le ā le autasi tāua ua faamatalaina nei e Iesu? (e) O le ā le itu ua maua ai e Iesu le ola e i “totonu ia te ia”?
5 A e peitai sa faaauau pea e Iesu ona faamatala atu se sootaga taua—le autasi, po o le avea ma tino e tasi, o loo ia te ia ma le Tamā. Ua ia taʻu atu i na Iutaia: “Auā o loo alofa le Tamā i le Atalii, ua faaali mai foi ia te ia mea uma lava e faia e ia; e faaali mai foi e ia ia te ia galuega silisili i ia galuega, ina ia outou ofo ai.” Sa ia faailoa mai foi faapea ua tuuina mai e le Tamā ia te ia se isi malosi sili, i lona faapea mai: “O le faalogo mai i laʻu upu, ma talitonu ia te ia na na auina mai aʻu, ua ia te ia le ola e faavavau; e le oo foi ina faasalaina o ia, a ua oo atu i le ola, sa i le oti.”—Ioane 5:20, 24.
6 Ioe, e oo lava ia i latou ua “oti” i le silafaga a le Atua ona o le agasala tuufaasolo, e mafai ona latou “faalogo i le leo o le Atalii o le Atua” ma ola ai i latou. Ae pe faapefea? Sa faamatala mai e Iesu: “Auā e faapei o le Tamā e i totonu ia te ia lava le ola; e faapea foi ona foai mai e ia i le Atalii, ia i totonu ia te ia lava le ola.” O na upu, “totonu ia te ia le ola,” e mafai foi ona faapea, “ua i totonu ia te ia le mea alofa o le ola.” (Ioane 5:25, 26; Ref Bi., footnote) O lea la a ua mafai e Iesu ona avatu i tagata se tulaga lelei i luma o le Atua. E le gata foi i lea, e mafai foi ona ia toe faatutuina ma avatu le ola ia i latou ua momoe i le oti.—Ioane 11:25; Faaaliga 1:18.
7. (a) O le ā ua taʻua mai e le Salamo e 36:5, 9 ia i tatou e uiga i le Atua? (e) Ua faapefea ona tauia e Ieova lona Alo tausisi i le faamaoni?
7 E i ai pea le ola i totonu o Ieova. Ua tusia e uiga ia te ia: “O loo ia te ia o le puna o le ola.” (Salamo 36:5, 9) A e peitai i le taimi nei ua faatuina ae e le Tamā lona Alo tausisi i le faamaoni mai “e ua oti, ua avea ma faapolopolo o e ua momoe i le oti.” I le i ai i totonu ia te “ia le mea alofa o le ola,” ua faamalosia o ia ina ia faamagaloina agasala, e faamasino, ma toe faatuina ē ua oti, ma le faamoemoe i le ola e faavavau.—1 Korinito 15:20-22; Ioane 5:27-29; Galuega 17:31.
Se Autasi Olioli
8, 9. (a) E faapefea ona mafai ona tatou tausia le taui o le ola e faavavau ua i o tatou luma? (e) O le a le fuafuaga a le Atua e uiga i le ola e faavavau? (i) O ai e aofia ai i nei faamanuiaga ma e faapefea la?
8 Ua lapataia ma le mafana i tatou e le soo o Iuta: “Ia outou faatumau ia te outou i le alofa o le Atua, ma faatalitali atu i le alofa o lo tatou Alii o Iesu Keriso, e oo atu i le ola e faavavau.” (Iuta 21) Maeu se taui taua—o le ola e faavavau! Ma o le ola lenei i se tulaga lelei atoatoa, e tusa ai ma le finagalo o Lē na Faia i tatou, e lelei atoatoa ma le fuafuaga na ia faia e ala i lona Alo. O le a saoloto mai tulaga faigata e masani lava ona faailogaina ai tauiviga mo le faasaoina i le faia o mea i aso nei. I le faiga o mea o loo sau, o le a le toe i ai se faanoanoa, leai ni mai, leai se amio leaga, se iuvale e oo lava i le oti, o le a soloiesea uma!—Mika 4:3, 4; 1 Korinito 15:26.
9 O ai o le a auai i le faatinoina o nei folafolaga? O i latou ia ua faaalia lo latou faatuatua i le taulaga a Iesu ma faia ni galuega faale-Atua e faaopoopo i lena faatuatua. O i latou ia ua aufaatasi atu ma o gatasi lelei ma uso Kerisiano i le lalolagi atoa i le autasi i le faatuatua.—Iakopo 2:24; Efeso 4:16.
10. (a) I le “pulega” a le Atua o le ā e muamua i le faasologa? (e) O le ā le isi gaoioiga a le “pulega” e sosoo ai?
10 E tusa ma lona lava finagalo lelei, na fuafuaina ai e le Atua se “pulega . . . ina ia na faaopoopoina ia Keriso i le sauniga . . . o i latou uma lava o i le lagi, atoa ma i latou o i le lalolagi.” (Efeso 1:8-10) O le fuafuaga lenei faaleaiga a le Atua lea na amata i le aoaoina o suli faatasi ma Keriso e 144,000. O i latou nei “o e ua faatauina nai tagata, o e ua faapolopoloina mo le Atua ma le Tamai mamoe [o Iesu Keriso].” Ua i ai sa latou vaega i le “uluai toetu [faalelagi],” ina ia latou auauna o ni tupu ma ositaulaga faatasi ma Keriso i le afe o tausaga. Ona sosoo ai lea ma le agai atu o le pulega a le Atua e aoaoina “mea i le lalolagi” ua amataina i se aofaiga e le mafaitaulia o le “motu o tagata e toatele . . . mai atunuu uma, ma aiga, ma nuu, ma gagana eseese.” O nei auauna a le Atua o le a ō mai nai le “puapuaga tele” ma le faamoemoe e maua le ola e faavavau i “le lalolagi fou.”—Faaaliga 14:1, 4; 20:4, 6; 7:4, 9-17; 21:1, 4.
11. (a) O le ā le ‘autasi’ taua ua faasino i ai le Efeso 1:11? (e) ua faapefea ona faatatauina le Ioane 15:4, 5 ia i tatou o i lenei ‘autasi’?
11 O atalii o le Atua o e ua faauuina e le agaga “o mea i le lagi,” ua olioli i latou i se faiā matuā vavalalata ma Iesu ma le Tamā. Ua ‘maua e i latou o le tofi’ i le Malo i le aufaatasi ma Iesu. (Efeso 1:11) Sa faalaeiauina i latou e Iesu ina ia tumau i le autasi ma ia, e pei o la ona pipii atu i le vine, ina ia fua tele mai ai. Sei vagana ua tausia lenei autasi taua ma Keriso Iesu, faapei o le a “e le mafai ona fua pe a na o ia.”—Ioane 14:10, 11, 20; 15:4, 5; 1 Ioane 2:27.
“O Isi Mamoe” ua Auai Nei
12. (a) O le ā le faiā a “isi mamoe” i le “lafu mamoe itiiti”? (e) O le a le faatatauga o i le 1 Ioane 2:1-6 e tusa ai ma ia vaega taitasi?
12 A e peitai, e faapefea le faitau miliona o isi tagata pei ni mamoe o ē ua vavae ese mai “oti” faalelalolagi i le sili atu i le 50 tausaga ua mavae? (Mataio 25:31-40) O i latou nei e le o nisi o le “lafu mamoe itiiti” a Iesu o ē ua tuuina atu i ai le Malo, a e o “isi mamoe”, ua latou aufaatasi atu ma i latou nei e avea o se vaega o le lafu mamoe tele o loo auauna autasi ma le Tamā ma le Alo. (Luka 12:32; Ioane 10:16) Na tuuina mai e le aposetolo o Ioane se faamaoniga faapea o Iesu Keriso “o le togiola foi o ia mo a tatou agasala [i latou ia o le “lafu mamoe itiiti”] e le gata foi ia tatou, a e atoa foi ma agasala a le lalolagi uma.” O lea, o nei “isi mamoe”, ua aoaoina mai le lalolagi o le fanau a tagata, e mafai foi ona latou olioli i se autasi taua, po o le ogatasi ma le Atua ma Keriso. E tutusa lava ma le mea na toe fai mai atili ai Ioane: “A o le tausi i lana afioga, e moni, ua atoatoa le alofa i le Atua i totonu ia te ia. O le mea lea ua tatou iloa ai o i totonu ia te ia i tatou.” Na uluai ō mai le “lafu mamoe itiiti” ona sosoo ai lea ma “isi mamoe” i lalo o tiute tauave e savavali faapei ona savali o Iesu.—1 Ioane 2:1-6.
13. (a) I le Ioane 17:20, 21 O le ā le mea ua tatalo atu ai Iesu? (e) O le ā ua faaalia ai o lenei faatoga a Iesu e le faapito i suli faatasi o Keriso?
13 O le mea lea, i aso nei, o vaega uma e lua o le faalelagi ma le faalelalolagi, ua ‘autasi ma le Tamā ma le Atalii’—i le ogatasi atoatoa ma i latou i le faaiuina o le galuega a le Atua. Sa tatalo Iesu, “Ina ia tasi latou uma, faapei o oe le Tamā o i totonu ia te au o aʻu foi o i totonu ia te oe ina ia tasi i latou i totonu ia te i taua.” O lenei autasi e le o lona uiga e faapitoa i latou ua avea ma suli faatasi, auā o le mea moni, e le mafai ona avea soo o Iesu o se vaega o le ‘tino o Ieova’ po o ‘ni suli faatasi ma Ieova.’ Ua latou “tasi” ai ma i lena ua latou faaalia ai le autasi i le felagolagomaʻi, i le loto e tasi, ma le manatu e tasi ia Ieova ma Keriso, a o latou molimau atu i le lalolagi o le fanau a tagata.—Ioane 17:20, 21.
14. O le ā le auala faapitoa ua tasi ai le vasega faalelagi ma Iesu, ma o le ā na mafai ai ona latou iloa lenei mea?
14 A e peitai, ua olioli nei i latou o le vasega faauuina faalelagi i lena autasi i se auala faapitoa, auā ua faamaonia lo latou amiotonu i le ola, e ala i le faaaogaina o le tāua o le taulaga togiola a Keriso. O le mea lena, ua mafai ai ona faauuina i latou e le agaga ma le faamoemoe e avea ma suli faatasi ma Keriso Iesu. Ua latou iloa ua faatuina i latou e avea o ni atalii, i le faapea mai: “O loo molimau mai lea lava agaga [le malosi galue o le Atua e fanauagagaina ai] i o tatou agaga, [manatu sili faalemafaufau]4 o fanau i tatou a le Atua.”—Roma 3:23, 24; 5:1; 8:15-18.
15. O le ā ua taofia e le taimi nei ma le lumanai mo i latou ua i ia le faamoemoe o le ola faalelalolagi?
15 E faatatau ia i latou ua i ai le faamoemoe o le ola i luga o le lalolagi, ua faailoa atu nei i latou e amiotonu i se faauōga ma le Atua, e pei lava ona sa faia e Aperaamo, Raava, ma isi o aso anamua. I le taimi o le Pulega a Iesu i le Meleniuma, o le a faasolosolo malie ona siitia i latou i le tulaga lelei atoatoa faaletagata, auā pe a uma le tofotofoga mulimuli ona mafai lea ona “tuusaunoa ia lava mea na faia i le faapologaina e le iuvale, a e oo i le saolotoga o le fanau a le Atua e manuia ai.” (Roma 8:19-21; Iakopo 2:21-26) O lea la, o tagata usiusitai o le a taʻuamiotonuina mo le ola e faavavau i le lalolagi.—Faatusatusa Ioane 10:10; Isaia 9:7, 11: 1-9, 35:1-6, 65:17-25.
16. (a) O a mea ua faaalia ai le “tasi” o le “lafu mamoe itiiti” ma “isi mamoe”? (e) A e ai se ā ua faatatau ai le Ioane 3:3-5 na o le “lafu mamoe itiiti”?
16 O tagata taitoatasi uma o le “lafu mamoe itiiti” ma le motu o tagata e toatele o “isi momoe” ua faaalia lea maelega ma le olioli i le auaunaga a le Atua. (Luka 12:32; Ioane 10:16; Tito 2:13, 14) O le toatele o ē totoe o tagata faauuina atonu e sili ona valavala i tausaga atoa foi ma lo latou poto masani faa-Kerisiano, a e ua faaalia e nei vaega uma e lua uiga faa-Kerisiano ma fua o le agaga. (Efeso 4:24; Kalatia 5:22, 23) Ae ui i lea, e i ai se eseesega, e pei lava ona faaali e Iesu ia Nikotemo a o ia lei fetalai atu e uiga i le ola e faavavau. Na fetalai atu o ia: “A le toe fanau le tagata, e le mafai ona iloa e ia le malo o le Atua.” (Ioane 3:3-5) O lea la, o se toe fanau mai faaleagaga ua uma ona oo i ai na Kerisiano papatisoina o ē ua valaauina e le Atua e avea ma suli faatasi ma Iesu i lona Malo. (1 Korinito 1:9, 26-30) O “isi mamoe” e le manaomia lena toe fanauina, auā o lo latou sini o le ola e faavavau i le Parataiso toe faafoisia i le lalolagi e avea o ni tagatanuu o le Malo o le Atua.—Mataio 25:34, 46e; Luka 23:42, 43.
Faamanatuga—Ma le Feagaiga Fou
17. (a) Ai se ā e ao ai ia i latou uma lava o i ai le faamoemoe mo le ola e faavavau na tauaofia ma tagata o le Atua ia Aperila 12? (e) O le a ua tatou matauina e uiga i le Faamanatuga o le 1985?
17 O Aperila 12 i le goto o le la o le taimi lena mo Molimau a Ieova i le lalolagi atoa latou te molimauina ai le Faamanatuga o le maliu o Iesu i le 1987. O le a taulai atu ai manatu i le faataulagaina e Iesu o lona soifuaga lelei atoatoa faaletagata ma lona toto ola i le faalauiloaina o le suafa ma fuafuaga a lona Tamā ma ia fai ma sui o le fanau a tagata agasala. (1 Korinito 11:23-26) O lea, o i latou uma o loo i ai le sini o le ola (pe i le lagi po o o le lalolagi) o le a mananao e auaufaatasi ma tagata o le Atua i le lalolagi atoa mo lenei mea e olioli ai. I le 1985 o se aofaiga tele e 7,792,109 tagata na latou faamanatuina le maliu o Iesu. A e peitai o i latou e tagofia le areto ma le uaina o le Faamanatuga, e faaatagia ai le tino faaletagata o Iesu ma lona toto, e na o le 9,051 le aofai. Ai se ā ua toaitiiti ai?
18, 19 (a) O a feagaiga ua taʻua e Iesu i le Luka mataupu 22? (e) O le ā le fuafuaga o auauna taitoatasi i nei feagaiga? (i) E pei ona faaatagia e Mose, ua faapefea ona auauna Iesu o le ‘puluvaga e tasi’?
18 Ia, o le ā na fetalai ai Iesu i lena po o le faatuina o le Famanatuga o lona maliu? Ina ua uma ona avatu o le areto i ona soo, na sosoo ai ma le avatu o le uaina i le auala lava lea e tasi, i lona faapea atu: “O lenei ipu o le feagaiga fou lea i loʻu toto, ua faamaligiina mo outou.” Mulimuli ane ona ia toe faamamafaina atu lea ia i latou le mafuaaga ua avea ai i latou i le feagaiga fou, i lona fetalai atu: “O outou foi, ua outou tumau ia te au i oʻu tofotofoga. E faapei ona tofia mai e loʻu Tamā o le Malo ia te au, e faapea foi ona ou tofia outou, ina ia outou aai ma inu i lau laoai i loʻu malo, ma ia nonofo i nofoalii ma faamasino atu i itu aiga o Isaraelu e sefulu ma le lua.”—Luka 22:19, 20, 28:-30.
19 Na valoia mai e le perofeta o Ieremia le feagaiga fou, i le taʻua faapea e ala i lea feagaiga o le a faamagaloina ai e Ieova sese ma agasala a ona tagata ina ia latou “iloa Ieova” i se faiā sili faauō. (Ieremia 31:31, 34) E faapei ona sa avea o Mose ma “puluvaga” i le feagaiga o le Tulafono ma Isaraelu faaletino, o lea, ua avea ai nei Iesu ma “puluvaga” o [lenei] “feagaiga talafeagai sili ona lelei” ua faia ae e le Atua i le “Isaraelu [faaleagaga] a le Atua.” Ua faia lenei mea ina ia togiolaina ai ē ua valaauina e avea ma suli o le Malo faatasi ma Keriso. O lea ua latou maua ai le “tofi e faavavau na folafolaina.” (Kalatia 3:19, 20; 6:16; Eperu 8:6; 9:15; 12:24) E mautinoa o le uiga patino lava lenei faale-Tusi Paia na auauna ai Keriso Iesu e pei o ‘le puluvaga e toatasi i le Atua ma tagata.’—1 Timoteo 2:5, 6.
20. O ai e tatau ona tagofia ma le tonu le areto ma le uaina i le Faamanatuga?
20 O ai la e tatau ona tagofia ma le tonu le faatusa o le Faamanatuga o le areto ma le uaina? E na o le vaega lava lea na aveina atu e le Atua i se feagaiga fou na faia ae i le taulaga a Iesu. (Salamo 50:5) O le fuafuaga o lenei feagaiga ina ia taʻuamiotonuina ai le 144,000 o suli faatasi ma Iesu i le ola faaletagata muamua, ina ia mafai ona latou faataulagaina lenei aiā i le ola ma aveina atu ai loa i le Malo faalelagi. (Roma 4:25; 2 Timoteo 2:10, 12) A e faapefea “isi mamoe”?
21. (a) Ua faapefea ona maua e “isi mamoe” aoga i le avea o ē maimoa i le Faamanatuga? (e) O le ā ua taulai atu i ai le faamanatuina o le Faamanatuga, ma o le ā le fesili ua mapuna a’e?
21 O i latou o i le vasega o “isi mamoe” e le o i ai i totonu o le feagaiga fou ma o lea latou te le tagofia ai le areto ma le uaina. A e peitai, ua faaʻoaina i latou i le maua mai ai o aoga i lo latou auai i le faamanatuina o le Faamanatuga e avea o ni tagata maimoa faaaloalo. Ua faamalosia loa latou talisapaia o mea faaleagaga a e tusa ai ma upu o le tatalo a Iesu i lona Tamā: “O le ola e faavavau foi lenei, ia latou iloa oe le Atua moni e toatasi, atoa ma le ua e auina mai o Iesu Keriso lea.” (Ioane 17:3) Manatua o le faamanatuina o le Faamanatuina o loo talai atu ai manatu i le tino ma le toto o Iesu. O le taulaga i le toto ma le tino a o Keriso o ni mea sili ia ona taua mo i latou uma lava o loo tausisi i le sini o le ola e faavavau. O lea, e faapefea ona moni lenei mea e tusa ma “isi mamoe”, o ē e le o aveina atu i totonu o le feagaiga fou ma e le o tagofia foi le areto ma le uaina i le Faamanatuga? Sei tatou manatunatu i lenei mea i le mataupu o loo mulimuli mai.
O le A Lau Tali?
□ Na faapefea ona faailoa atu e Iesu le malamalamaga e uiga i le faamoemoe o le ola e faavavau i se auala faasolosolo malie?
□ Ua faapefea ona faagasolo e le Atua lana “pulega”?
□ Ai se ā e mafai ai ona faapea mai o “isi mamoe” o loo “tasi” ma le Tamā ma le Alo, ma uso o Keriso?
□ Ai se ā ua na o Kerisiano faauuina ae e tagofia le areto ma le uaina i le Faamanatuga?
[Fesili mo le Suʻesuʻega]
[Ata i le itulau 13]
Ua “tasi” le “lafu mamoe” ma “isi mamoe”—i le faia o le galuega a le Atua e pei ona faia e Iesu