O le Soifuaga o Iesu ma lana Faiva

Alofaaga mo se Lepela

A O asiasi Iesu ma ona soo e toafa i aai o Kalilaia, sa salalau tala e uiga i mea matagofie na ia faia i lena itumalo. Na oo atu tala e uiga i ana galuega i se tasi aai sa i ai se tamaloa na maʻi i le lepela. Na faamatala mai e le fomaʻi o Luka e uiga ia te ia faapea ua “liloia i le lepela.” I ona tulaga faasolosolo lemu ina faaleagaina ai nisi vaega o le tino. O lea o lenei tagata lepela sa i se tulaga faanoanoa.

Ina ua oo atu Iesu i le aai, sa faalatalata ane le tagata lepela ia te ia. E tusa ai ma le tulafono a le Atua, e tatau i le tagata lepela ona valaau atu o se lapataiga, faapea, “Ua leaga, ua leaga!” e puipuia ai isi mai le faalatalata atu ma pisia ai. Sa faapaʻu i lalo i ana aao le tagata lepela ma aioi atu ia Iesu: “Le Alii e, a e finagalo i ai, e mafai lava ia te oe ona faamamā ia te au.”

Maeu le faatuatua o le tamaloa ia Iesu! Peitai, pagā se vaaiga faanoanoa i lona tino ona o lona maʻi! O lea o le a faia e Iesu? Ana o oe o lea e te faia? Sa uunaia e le alofa Iesu e aapa atu lona aao ma paʻi atu i le tamaloa, ma faapea atu: “Ou te loto i ai; ia mamā ia oe.” Ma na faafuasei ona teʻa ese le maʻi lepela mai ia te ia.

Pe e te fiafia ea i se tagata agaalofa faapenei e avea ma ou tupu? O le mea na faia e Iesu i lenei tagata lepela ua aumaia ai le mautinoa ia i tatou o le a faataunuuina le valoaga a le Tusi Paia i le taimi o le  pulega a lona Malo: “E alofa atu ia i le ua vaivai ma le ua mativa.” Ioe o i ina o le a faataunuu ai e Iesu le faanaunauga a lona fatu e fesoasoani i e uma o pagatia.

E oo lava i le taimi a o lei faamaloloina e Iesu le tagata lepela sa ia faatupu le vavaō tele i tagata. I le faataunuuina o le valoaga a Isaia, na faatonuina ai e Iesu le tamaloa na ia faamaloloina: “Ia oe, neʻi e taʻu atu sina tala i se tasi.” Ona ia faatonu lea ia te ia: “Ia e alu, ia na faaali oe i le ositaulaga; ma avane o mea na poloai ai Mose mo lou faamamāina e fai ma faailoga ia te i latou.”

Peitai na matua fiafia tele le tamaloa ua le mafai ai ona ia natia le vavega ia te ia lava. Sa alu o ia ma faasalalau solo tala i so o se nofoaga, ma faagaepu ai le fiafia ma le naunau o tagata ma ua le mafai ai e Iesu ona alu atu i se aai. O lea sa nofo Iesu i nofoaga tuu fua sa lei nonofo ai nisi, ma ua o ane i ai tagata mai itu uma e faalogologo ia te ia ma ia faamaloloina o latou maʻi. Luka 5:12-16; Mareko 1:40-45; Mataio 8:2-4; Levitiko 13:45; 14:10-13; Salamo 72:13; Isaia 42:1, 2.

◆ O a mea e mafai ona tutupu pe afai ua lepela se tasi, ma o le a le lapataiga sa tatau i se tagata lepela ona avatu?

◆ Sa faapefea ona aioi atu se tasi tagata lepela ia Iesu, ma o le a e mafai ona tatou aʻoaʻoina mai le tali atu a Iesu?

◆ Sa faapefea ona le taulau ona usiusitai le tamaloa na faamaloloina e Iesu, ma o a iʻuga na oo i ai?