E Faapefea Ona e Filifilia se Tusi mo Le Fanau Uma a Tagata?

E UI lava ina tele galuega fai mai lea aso i lea aso, a e afai o oe, e mafai ona e faitauina se tusi e tasi i le vaiaso, e mafai la ona e faitauina le sili atu i le 3,000 tusi i le taimi o lou soifuaga. E foliga mai e maoae, a e ua sili ae i lo sina mataua i le pakete pe a e manatunatu i le sili atu i le faasefulu taimi e lomia ai lomiga fou i le Unaite Setete lava ia i tausaga taitasi. Ma e le o aofia ai i ina le faitau afe o tusi maoae e tatau i so o se tagata aʻoga ona faitauina.

Ua manino lelei, a faatatauina i tusi, ona saʻo ai lea o manatu na faia e tusa ma le 3,000 tausaga ua mavae: “E leai se iuga i tusi o tusi e tele; o le suesue tele foi i upu e vaivai ai le tino.”—Failauga 12:12.

Peitai, mai lenei faatelega o tusi, pe i ai ea se tusi e taua tele ua matilatila ese ai mai isi uma, o se tusi e tatau i tagata uma ona faitau i ai? E i ai ea se tusi e sili atu lona faaleleia o tulaga faaleatunuu, faaleaganuu, feeseeseaiga i gagana ma ua tatau ai ona taʻua o se tusi mo le fanau uma a tagata?

O le fesili i le po o le a e tatau ona tatou faitauina, e sili atu i lo na o sina fiafiaga faaleaʻoaʻoga, auā e mulimuli ane aafia ai ala o tatou mafaufauga, mea tatou te faatauaina, ma a tatou faamasinoga. Ua manatunatu mamafa tagata aʻoga, ma matua, ma isi i lenei fesili—i le taimi ua tea ma i le taimi nei. E tele ni suesuega ua maea ona faia i le po o a e faia ae ai mea e manaomia ona faitauina, ma o iʻuga ua sili atu lona faaalia mai o mea taua.

Filifiliga a le Au Popoto

I le 1890 na tuuina atu ai e sē lomia tusi le mataupu i le au fai tusi popoto o lena vaitaimi. Sa ia fesili ia i latou e taʻu mai po o a tusi latou te manatu sa sili ona taua. O le iuga? “O le Tusi Paia, Shakespeare, ma Homer o tusi sili ia ona fiafia i ai tagata tusitusi i lona sefulu iva senituri,” o le lipoti lea a se tasi o suesuega tusia. “Ma”, na faaopoopo atili mai, “e tatau pea ona tumau faapena lea lisi mamalu seia oo mai i le aso nei.”

O nisi suesuega lata mai ua malilie faatasi foi i lenei mea. Mo se faataʻitaʻiga ia Setema 1982, na tusia ai le mekasini Time le tali mai a ni polofesa taʻutaʻua se toavalu, ni tagata suesue i tala faasolopito, ma ē vaaia faletusi i le fesili lenei, “O a tusi e lima e tatau i so o se tagata aʻoaʻoina ona faitauina?” E ui lava ina sa lei i ai se maliega atoatoa i nei tagata popoto uma, a e lima mai le toavalu—o se numera ua manino lona tele—ua latou faaaofiaina le Tusi Paia i o latou manatu. E tusa ai ma se suesuega tali tutusa,   ua lipoti mai e le Psychology Today faapea “e tusa ma le 165 tusi na lisiina mai, a e na sili ona tele palota mo le Tusi Paia: e 15. E leai se isi tusi na soso atu i ai.”

O se isi mea e sili ona faafiafiaina ai o mea na maua mai i se iʻuga palota na faia e The Korea Times e suesueina ai pe faapei le vaaiga a tagata e le o ni Kerisiano, pe a faatusatusa i ē e le o ni Kerisiano, e sili atu lo latou manatu faapito, sili atu ona papano i tupe ma e itiiti lo latou faamaoni,” o le faamatalaga lea a le pepa. Peitai, na faapea mai atili le lipoti: “E ui lava ina leai so latou faatuatua, o le 70 pasene o tagata na fesiligia, na faatauaina le sili atu o le Tusi Paia.”

Le Toe Filifiliga Sili

E tele palota ma suesuega tai tutusa faapena e mafai ona aumaia e faaalia ai o taimi uma ma e masani ai lava ona filifilia le Tusi Paia o se tusi e tu mamao ese na i lo isi uma. Mo nisi mafuaaga eseese, ua faamaonia foi le Tusi Paia o le toe filifiliga sili lea mai i tusi, o le taimi ua tea ma le taimi nei, i atunuu Europa ma i atunuu Asia foi.

A e sili atu ona taua, o le a lau vaaiga totino? Afai o e soifua i se atunuu i Sisifo, pe mata e te tau lagonaina ua maotua le Tusi Paia mai i lo tatou lalolagi faasaienitisi i ona po nei ma ua itiiti lona aoga i le feagai ai ma faafitauli o aso nei? Afai o e soifua i so o se atunuu o Asia, pe e te manatu ea o le Tusi Paia o se tusi a tagata Europa ma o lea, e leai sona aoga moni ia te oe? Pe o i ai ea se feau a le Tusi Paia o loo manaomia e tagata uma i aso nei ona faalagolago i ai? Pe e fetaui lelei ea le Tusi Paia ma faafitauli o loo feagai ma tagata i so o se mea i aso nei? Pe o se tusi moni ea e mo le fanau uma a tagata?