Aua Nei Faataga le Upu Moni e Mou Ese Atu

ATONU sa iloa e Pilato faapea o le talia o le upu moni o le a aveesea ai se mea mai ia te ia. O le avea lea ma soo o Keriso ma o lona uiga o le a talia lona tulaga tautupu ma o le mea moni atonu e tatau ai foi ona suia lana amio. A e peitai, sa taʻua e Solomona le tusitala o le tusi o Faataoto 23:23: “Ia e faatau mai le mea moni, aua lava le faatau atu; atoa foi ma le poto, ma le aʻoaʻoina, ma le atamai.”

“Faatau mai le mea moni?” atonu o le a e fesili tofotofo mai ai. Ioe, aua ua fesoasoani mai le Tusi Paia ia i tatou i inei ia talisapaia faapea o le maua e se tasi o le upu moni, le poto, atamai ma ia malamalama i lona tau! Peitai, o le upu moni o se mea tautele e le ma faatusaina. Ai se a, sa lapatai mai Solomona, “aua lava le faatau”! Atonu ua faapea mai e uiga ia te ia e leai se mea e faatusatusaina i ai lona taua.

‘Peitai o le a le upu moni?’ o le fesili lea ua fesili ai le toatele o loo latou faaleoina ai le fesili a Pilato. Ona o le toatele i aso nei, ua avea le ‘upu moni’ o se mea e faigata ona maua. Sei manatu mo se faaaʻoaʻoga i le mea na fai mai ai le Albert Einstein i se tasi aso: “E faigata tele e oo lava ina tau faafesootai atu se uiga sao i le faaupuga ‘faasaienitisi moni.’ Talu ai o le uiga o le upu ‘moni’ e tele ona uiga e tusa lava pe tatou te feagai ma mea moni na tutupu, poo o ni faiga faamatematika, o se aʻoaʻoga faasaienisi. O upu ‘moni faalotu’ e leai lava se mea manino o latou faailoa mai ia te aʻu.” (Ideas and Opinions, by Albert Einstein) Peitai poo le mea moni faapea o le upu moni lea na sola ese ai Einstein o lona uiga o le a e sola ese ai foi? E leai lava.

Sa fetalai manino lava Iesu: “O aʻu nei le ala, ma le upu moni, ma le ola.” (Ioane 14:6) Ioe, o “le upu moni” e faaautu ia Keriso Iesu ma lona tulaga i fuafuaga a Ieova le Atua o Le Faataunuuina valoaga, o le Togiola o le fanau agasala a tagata, o le Tupu tofia o le Malo o le Atua, le Ositaulaga Sili, ma Le  Faasala i e amioleaga. (Roma 15:8; 1 Timoteo 2:5, 6; Ioane 3:16; Efeso 1:20-22; Tanielu 7:13, 14; Mataio 6:9, 10; Eperu 4:14; Faaaliga 19:11-21; 2 Tesalonia 1:7-9) E faapefea la, ona “faatau mai” e se tasi lenei upu moni?

“Ia Iloa”

E amata e se tasi ona faatau le upu moni i le mulimuli atu i upu a Iesu i le Ioane 17:3: “O le ola e faavavau foi lenei, ia latou iloa oe le Atua moni e toatasi, atoa ma le ua e auina mai, o Iesu Keriso lea.” O se galuega fitā tele lenei mo se tasi e faia na o ia. I tuā i le uluai senituri, sa i ai se eunuka Aitiope, po o se ofisa i fale faamasino, o le na taumafai e faia faapena. Peitai, ina ua iloa atu le eunuka o taumafai e suʻesuʻe se valoaga faigata mai le Tusi Paia, sa fesili atu le faievagelia o Filipo, “Po ua e lagona ea i mea o e faitauina?” Sa tali atu le tamaloa, “Ou te mafaia faapefea pe a le faasino mai se tasi ia te aʻu?” (Galuega 8:28-31) Atonu e faapena foi lou lagona.

O le mea lea e ofoina atu ai e Molimau a Ieova le suesueina o le Tusi Paia ma oe i lou aiga. * O na sauniga e faia fua e leai se totogi. “Ua maua fua e outou, ia outou foaifuaina atu,” sa fetalai mai ai Iesu. (Mataio 10:8) Peitai o le faatauina o le upu moni o le a i ai foi sona tau mo oe i se isi itu—o le a manaomia e ia ou taimi ma taumafaiga. E ui i lea, manatua, o loo soifua ma gaoioi Iesu i le lagi—e manao o ia e fesoasoani ia te oe ia aʻoaʻoina le upu moni. (Faatusatusa le Luka 5:13) Na ia folafola atu i ona uluai soo faapea o la taʻitaʻiina i latou e le agaga o le Atua “i le upu moni.’ (Ioane 16:13) I lona faalauteleina la, e mafai foi ona faatatau lenei mea ia te oe. O lea aua e te manatu faapea o le aʻoaʻoina o le upu moni o le a sili ona faigata mo oe.

Ua faafaigofie nei foi na suesueina ma le uigā le Tusi Paia ona ua aumaia e Molimau a Ieova ni fesoasoani mo le faia o suesuega faale-Tusi Paia. Sei tau o se faataʻitaʻiga o matua o nisi nei o lomiga e faaoso ai le mataai o e saili ma le naunautai i le upu moni: O Le Upu Moni E Taʻitaʻiina Ai i Le Ola Faavavau, E Mafai Ona E Ola e Faavavau i Parataiso i Le Lalolagi, Survival Into a New Earth, United in Worship of the Only True God, ma le Life—How Did It Get Here? By Evolution or by Creation? ua na o ni nai tusi na. *

O nei lomiga latou te matuā faamanino mai le Tusi Paia i se gagana faigofie ona malamalama ai, e le gata ina fetaui ma ou lagona, a e faapea foi ma lou fatu. Ua faaalia manino mai ai i nei tusi le leo o le upu moni e ala i le faamaoni, suesuega, ma faatonuga poto. A o e aʻoaʻoina upu moni mai le Tusi Paia ona o le fesoasoani a nei tusi, o le a e talisapaia le uiga moni o le fetalaiga a Iesu i lona faapea mai: “E iloa foi e outou le moni, e tuusaʻoloto foi outou e le upu moni.” (Ioane 8:32) I nei la o le “upu moni” ua aofia ai le tino atoa o aʻoaʻoga faa-Kerisiano e pei ona maua nei i le Afioga a le Atua o le upu moni—le Tusi Paia. (2 Timoteo 2:15; Efeso 1:13) O lea, ai se a o se saolotoga ai pe a iloa le upu moni?

I le avea o se faaaʻoaʻoga, manatu i le “mataʻu i le oti” lea ua na “faapologaina” le fanau a tagata “i o latou olaga uma.” (Eperu 2:15) Ua faapea e ui ina o le toatele o tagata ua taʻua se faamoemoe le mautinoa faalelagi pe a mavae le ola. Ae peitai, ua faasaoloto e upu moni mai le Tusi Paia se tasi mai na mataʻu faalemafaufau. Ua iloa e se tasi faapea o e ua oti e le o faapuapuagaina i se nofoaga e iai se afi aua “o e ua oti, latou te le iloa se mea.” (Failauga 9:5, 10; tagai foi i le Salamo 146:4; ma le Failauga 3:19, 20) Ua faailoa mai foi e le Tusi Paia faapea e leai ni uunaiga i totonu o le tagata pe a fanau mai ia oti ma alu atu i le lagi. O lona faafeagai, ‘na tuu e le Atua le faavavau i o latou loto’; o se tagata maloloina lelei e faanaunau ia ola  e faavavau!—Failauga 3:11; tagai foi i le Roma 5:12; 6:23.

O le a faataunuuina na manaoga uma i le mea ua taʻua e le Tusi Paia o le “lalolagi fou.” (2 Peteru 3:13; faatusatusa Mataio 6:9, 10.) Na faailoa mai e Iesu faapea o i latou o le a maua le ola i le “lalolagi fou” o le a olioli i le “Parataiso.” (Luka 23:43) O isi mau ua fesoasoani mai ia i tatou talisapaia faapea o lenei lalolagi o le a saoloto mai tiga ma loimata! (Faaaliga 21:14; Isaia 11:6-9) Tau lava ina manatu i lenei faamoemoe o le a mafai ona suia ai lou olaga! A e muamua lava e tatau ona ave i fale le poto sao.

Faataulagaina le Faamaualuga

I le Salamo 25:9 fai mai le Tusi Paia: “E taʻitaʻiina e ia o e agamalu i le faamasinoga; na te aʻoaʻo mai foi i e agamalu i lona ala.” E leai, o le a le tuuina atu e le Atua le upu moni i tagata o e faamaualuga ma fiasili. “E tetee atu le Atua i e faamaualuga, a e foaiina mai le alofa tunoa i e faamaulalo.” (1 Peteru 5:5) Atonu o se mea e le taumatea ona fia iloa pe amanaia e Pilato le upu moni. A e na faamatalaina e tusi tala anamua Pilato o se tagata faamaualuga. I tagata Roma, sa latou taʻuvaleaina tagata Siu ona e ese la latou tapuaiga o se mea na latou fiafia e faatoilaloina! E foliga mai o le faamaualuga ma le naunau faapolotiki sa faavaatuia ai Pilato.—Faataoto 16:18.

E faapena foi na amanaia ma fia iloa e le toatele le feau o loo tauaveina e Molimau a Ieova i aso nei. A e peitai, atonu o le a latou matauina e masani lava ona uiga loto maulalo Molimau a Ieova e ala i o latou nofoaga e fai ai a latou sauniga (Maota o le Malo) faapea e le ma faatusatusaina i falesa feilafi o Kerisinetoma, ma e toaitiiti lava ni Molimau e au i luma tele ni aʻoaʻoga. A e matau le mea o fai mai ai le Tusi Paia i le 1 Korinito 1:26-29: “Auā ua outou iloa lo outou valaauina, le au uso e, e le toatele o e popoto i la le tino, e le toatele faipule, e le toatele alii; a e peitai ua filifilia e le Atua mea vālea a le lalolagi, ina ia faamāina ē popoto, ma mea vaivai a le lalolagi ua filifilia ia e le Atua e faamāina ai mea malolosi; ma mea a tagata nuu, ma mea faatauvaa a le lalolagi, ua filifilia ia e le Atua, atoa ma mea e leai, ina ia faaleaogaina e ia mea o i ai; ina neʻi mitamita se tagata e toatasi i ona luma.”

O lou aʻoaʻoina mai nei tagata ‘loto maulalo’ e mafai ona tauia ai oe i lou faamaualuga. A e pe o se tau taugata ea lenei mo le upu moni?

Ia faafaigaluega le Poto

I le na o le mitia mai o ni faamatalaga—tusa lava po o le upu moni—e le lava. O le mea lena ua uunaia ai i tatou e ‘faatau mai le poto.’ (Faataoto 23:23) O le atamai o le faatatauina lea o le poto! O le mea moni na fai mai Solomona o le “poto o le mea sili lea.” (Faataoto 4:5-7) Ioe, o le a le aoga o le poto pe a le faagaoioia? O lea, pe a uma ona aʻoaʻoina ala o Ieova, o poloaiga, tulafono, faamanatuga ma aʻoaʻiga, e tatau ona e faatatauina nei mea i lou olaga. “A e taʻuamiotonuina le poto i ana galuega,” sa fetalai ai Iesu.—Mataio 11:19. (N.W.)

Sa teena e Ponitio Pilato le upu moni. A e peitai, aua nei e sese ai. O se mea valea tele pe a e faatagaina le upu moni e mou ese ma oe ona o le faamaualuga, fiasili, po o le manao tele i soo se isi lava tulaga e le faale-Tusi Paia. Ia pei o le faisalamo o le na tatalo, “Ia e faalotomatala mai ia te aʻu, ou te ola ai.” (Salamo 119:144) Ioe, o se tasi ua loto malie e totogia le tau e maua ai le upu moni ma le poto e mafai “ona ola ai” auā o le na te maua le poto “ua maua e ia le ola, e maua foi e ia le alofa mai ia Ieova.”—Faataoto 8:35.

Sa faapea mai se tasi tamaloa o lena amata se suesuega faale-Tusi Paia ma Molimau a Ieova: “O se faamanuiaga i le faapea atu ua mafai e le upu moni ona suia o matou olaga.” E mafai foi ona suia lou olaga. O le mea lea, aua nei e faatagaina le upu moni e mou ese atu! Ia avea lenei avanoa matagofie e faatau mai ai le upu moni, le poto ma le malamalama. O le a e le faanoanoa ona ua e faia faapea.

[Faaopoopoga i lalo]

[Ata i le itulau 4]

O le faamaualuga atonu na mafua ai ona faataga e Pilato le upu moni e mou ese atu.