O E Faatagaina le Upu Moni e Mou Ese Atu?

INA ua faasaoina mai i se tu laueleele faamalosi i le vaomatua o le Amasone, o le toatele o pasese sa itiiti lava so latou amanaiaina o le laufanua. Ae sa le faapena se tamaloa toafilemu ma le matau mea! Sa avea o ia o se suesue i mea i le eleele, ma sa ia matauina le valevalenoa o le mea na tu laueleele ai le helikopa. Nai lo o le faataga o lenei avanoa o mou ese atu sa ia matua vaai totoʻa i lenei vaipanoa valevalenoa. I sina taimi puupuu na ia iloa ai atonu o le manatu o isi i lenei laufanua, e foliga mai o se isi foi ogaeleele, sa o se mea e sili ona tele ai minerale o se tamaoaiga maoae i le lalolagi—o se fale teu oa o maa taua, o uamea, bauxite, manganese, o apamemea, ma auro, atonu i se aso ona avea lea ma “manuia fou ua tau i ai.”

O le tagata poto e seasea maua, na te le faatagaina se avanoa e mou atu na i lo o le faia i ai o se mea. Sei manatu mo se faaaʻoaʻoga, i le Kovana Roma o Ponitio Pilato i tuā i le uluai senituri o o tatou Aso Taatele. Sa tuuina atu ia te ia se avanoa e le toe faaluaina. Na momoli atu i ona luma e taʻitaʻi lotu Siu le aʻoaʻo sili o le upu moni o le na i ai i luga o le lalolagi, o Iesu Keriso. Manatu i fesili sa tatau ona fesili ai Pilato! Manatu i tamaoaiga o upu moni sa tatau ona mafai ona ia aʻoaʻoina! A o le mea e malie ai, ina ua latou uluai au mai Iesu i ona luma, sa molia o ia ona e faapea na fai atu o ia o “le tupu o tagata Iutaia.” Mulimuli ane ua foliga mai ua fia iloa Pilato: “O oe ea o le tupu o tagata Iutaia?” sa fesili atu ai Pilato?

I lana tali, sa fetalai atu Iesu: “E le mai le lalolagi nei loʻu malo; . . . O le mea lenei na fanau mai ai aʻu, o le mea foi lenei na ou sau ai i le lalolagi, ina ia ou molimau i le upu moni. O i latou uma lava o i le upu moni, e faalogo mai i latou i loʻu leo.” O le avanoa sili, la lea o Pilato. O loo tu nei i ona luma le tagata sa avea lona olaga ma molimau ola i le upu moni o folafolaga a le Atua, le tagata na loto malie ma mafai ona faamalamalamaina lona olaga sa lei mafai e se tagata ona faia faapea. O lea, o le a le tali a Pilato? “O le a le upu moni?” Ona “toe alu lea o ia i fafo ia Iutaia.”—Ioane 18:33-38.

Ioe, sa faataga e Pilato le upu moni e mou ese atu. Ma o le toatele foi i aso nei ua faia lea lava mea sese. O lenei lomiga o loo e faitauina, Le Olomatamata, ua faasalalauina ina ia faamalamalamaina ai i tagata e uiga i le upu moni. E ui i lea o le toatele ua mumusu e tau lava ina faitau i ai. O isi e faitau ma olioli i mataupu o loo i ai a e leai nisi laasaga e faia e sili atu e uiga i nei mataupu. Faamata e mafai ona faapea atu ua pei lava i latou na o Pilato ua faataga le upu moni e mou ese atu?