O le Faamaoni o Iopu—O Ai E Mafai Ona Faataʻitaʻi I Ai?

“Ia fuatia aʻu e ia i le fua faatautau tusa, ia silafia ai e le Atua ua sao laʻu amio.”—IOPU 31:6.

1. Ai se a e taua ai le manatunatu i le faaaʻoaʻoga a Iopu, ma o a fesili ua lagā?

SA MATUINOA e Iopu lona faamaoni, o lea sa ia talia ai le suesueina o ia e le Atua. O lana faataʻitaʻiga o se faamalosiau sili lea mo tatou i aso nei a e maise ua matua taumafai Satani e lepetia le faamaoni o i latou uma o auauna i le Atua. (1 Peteru 5:8) O le iloaina o lenei mea, na faapea ane ai Iakopo e “faaaʻoaʻo i le faatoatoa i le leaga, atoa ma le onosai i le au perofeta,” a e maise lava Iopu. (Iakopo 5:10, 11) Peitai o ai na e mafai ona faataʻitaʻi i le faamaoni o Iopu? O a auala na faatuina ai e Iopu se faataʻitaʻiga o le tausisia o le faamaoni mo i tatou?

2. (a) O le a le uiga o le igoa o Iopu? (e) O le a na faataunuuina ona o le ala faamaoni o Iopu?

² I le uiga o le igoa Iopu o le “Taulaiga o Tauemuga,” ma sa faapena lava. Peitai ina  ua talia e Ieova le talosaga a Satani ma aveesea ai le pa o le puipuiga mai ia Iopu, sa leai se mea na mafai e Satani e talepeina ai le faamaoni o Iopu i le Atua. (Iopu 1:1–2:10) Sa aumaia ai e Iopu se tali i le luʻi a Satani faapea na te mafaia ona liliueseina so o se tagata mai le auauna atu i le Atua. (Faataoto 27:11) O le ala o le tausisia e Iopu o lona faamaoni, na iu ai, i le faasilasilaina i le vateatea aoao, o ‘Satani, o oe o le pepelo aiai, aua o Ieova o loʻu Atua, ma o le a ou tausia pea ona faamaoni ia te ia po o le a lava le mea e oo mai!’—Iopu 27:5.

O E Pei o Iopu

3. O ai sa puipuia i le lagi, ma o a fesili na lagā e faatatau ia te ia?

³ I le tulaga faitaulia, o le luʻi i le vao Satani ma Ieova o se luʻi i le aoao o mea e aofia ai ma le nofoaga o agaga. I le lagi, i i lalo o le puipuiga a Ieova, sa i ai le “fanau” folafolaina o le na finagalo Ieova na te faataunuuina Ana fuafuaga sili. (Kenese 3:15) Peitai, ina ua aveesea mai le ‘pa o le puipuiga,’ pe o le a faataʻitaʻi ea o ia i le faamaoni o Iopu? Pe o le a ia faataʻitaʻi ea faapea o se tagata lelei atoatoa, e pei ona sa i ai Atamu, e mafai ona tausisia le faamaoni atoatoa i le Atua? (1 Korinito 15:45) Sa faia e Satani sauniuniga e tuuina ai lenei “fanau” i se tofotofoga sili ona faigata i so o se taimi lava e faaali mai ai o Ia i le lalolagi.

4. (a) O ai le autu sili o tauemuga a Satani, ma e faapefea ona tatou iloa na aveesea e le Atua lana puipuiga mai ia te ia? (e) O le a na saunia e Iesu mo Ieova?

⁴ O Iesu Keriso na faamaonia o ia lea o le “fanau” na auina mai le lagi. Ona avea lea o ia ma autu o faanaunauga o Satani, ioe, o ia o le autu o tauemuga a Satani. O le faamaoniga o le aveesea e le Atua o lana puipuiga, o le tagi lea a Iesu a o i ai i le satauro: “Loʻu Atua e, loʻu Atua e, se a le mea ua e tuulafoai mai ai aʻu? (Mataio 27:46; Salamo 22:1) E ui ina sa lagonaina e Iesu le tuuesea o le puipuiga a le Atua mai ia te ia, ae e pei lava o Iopu, sa “le agasala . . . i na mea uma, ua na le taʻu valeina foi le Atua.” (Iopu 1:22) Sa faataʻitaʻi o ia ia Iopu, tausia le faamaoni atoatoa i le Atua, ma faamaonia ai ‘ua leai se tasi e tusa mai ia i le lalolagi.’ (Iopu 1:8) O lea la, o Iesu, ua mafua ai ona i ai se tali atoatoa ma le faavavau a le Atua faasaga i tuuaiga pepelo a Satani faapea e le mafai e le Atua ona tuu se tagata e le tumau pea i le faamaoni i lalo o tofotofoga sili.

5. (a) O le a o loo faia pea e Satani? (e) O lea na faia e Satani ina ua lafoina mai le lagi?

⁵ Ona o le manao pea o Satani i se tali, na tumau ai ona faifai Satani i uso faaleagaga o Iesu o e faatasi ma Iesu, ua faia ae ai le “fanau” a le faalapotopotoga pei o se fafine a le Atua. Ina ua faamatalaina le faatuina o le Malo i le lagi, ua fai mai le Tusi Paia e uiga ia Satani: “Ua lafo i lalo le na molia o tatou uso, o le na molia i latou i luma o lo tatou Atua i le ao ma le po.” Peitai e sili atu na i lo le faifai o loo faia e Satani, ua ia faatuina se osofaiga saua! Ua faamatala e le Tusi Paia ina ua uma ona tulia mai le lagi, “ua ita foi le tarako [Satani] i le fafine, ona alu atu ai lea o ia e tau le taua ma i latou ua totoe o lana fanau, o e ua tausi i poloaiga a le Atua, ma ua taofi le mau ia Iesu Keriso.”—Faaaliga 12:7-12, 17.

6. (a) O ai i aso nei o loo taimua i le galuega talai, ma o ai ua auaufaatasi ma i latou? (e) O le a o loo taumafai Satani e fai ia i latou uma nei?

⁶ O “i latou ua totoe o lana [le fafine] fanau” o molimau faauuina a Ieova o totoe i le lalolagi i aso nei. O lo latou taimua i le “taofi le mau ia Iesu Keriso,” i le faailoa faalauaitele i le lalolagi aoao ua avea nei o ia ma tupu faauuina ma ua toeitiiti ona faaiuina lea o lenei faiga o amioletonu o mea. (Mataio 24:14; Tanielu 2:44) Peitai e le o tuua na o i latou! O le taimi nei o se vaega tele o tagata e silia ma le tolu miliona ua faatasia i latou o ni e aufaatasi, i le lalolagi aoao, o se faalapotopotoga o e tausisia le faamaoni. O nei tagata tausisi i le faamaoni, ua avea foi ma autu o sauaga le motusia a Satani, ma ua fiafia lo latou Tama faalelagi  o Ieova le Atua i lo latou faamaoni.—2 Timoteo 3:12; Faataoto 27:11.

7. Ai se a e mafai ai ona tatou mautinoa pe a feagai ma osofaiga a Satani?

⁷ O le mea moni, tatou te faanoanoa i le iloa, o faiga saua a Satani ia Iopu, ua faia foi ia i tatou o e o taumafai e tausisia le faamaoni i le Atua. Ai se a? Talu ai “ua mutimutivale tele le Atili ma le alofa naunau” ma “na te le tuuna oe, na te le lafoai ia te oe.” (Iakopo 5:11; Teuteronome 31:6) Ioe, e lagolagoina e Ieova i tatou. “O le talita o ia i e ua tonu o latou savali,” e pei ona fai mai ai le Tusi Paia. (Faataoto 2:7) E le o le uiga o lenei mea o le a le faatagaina e le Atua ia tofotofoina i tatou. O le a ia faia faapea, e pei lava ona ia faia ia Iopu. “A ua faamaoni le Atua,” e pei ona faamauina e le aposetolo o Paulo, “o le na te le tuuina atu outou i le tofotofoga e sili i se mea ua outou lavatia, a e sauni foi faatasi ma le tofotofoga se mea e sao ai, ina ia outou lavā oono.”—1 Korinito 10:13.

Pe a Tofotofoina

8. E faapefea ona aoga mo i tatou i aso nei le faaaʻoaʻoga a Iopu?

⁸ O le faaaʻoaʻoga a Iopu o le faamaoni e mafai ona aoga tele mo i tatou pe a feagai ma sauaga faigata. Sa matua mafatia tele Iopu ma manao ai ia oti ma natia i seoli, le tuugamau taatele o le fanau a tagata. (Iopu 14:13) E i ai nisi i aso nei ua faapena lo latou faalogona, ua faapea mai ua tutusa i latou ma Iopu a o mafatia tele o ia. Atonu i se taimi sa i ai sou faalogona faapena. Ioe, o le  faitau e uiga i ona puapuaga e mafai ona pei le mauaina o faamalosiaga mai se uo o le sa oo i ai tofotofoga e sili atu ona faigata na i lo o tatou. O le iloa ua i ai se isi na tutumau, ma e malamalama, o le mea moni e fesoasoani lea ia i tatou ia tutumau.

9. Ua faapefea ona aoga mo i tatou le tausisia e isi o lo latou faamaoni?

⁹ O le iloaina o o tatou manaoga, ua tuuina mai ai e Ieova faamaumauga i le tusi o Iopu e fesoasoani ia i tatou e tausisia le faamaoni e pei ona faia e Iopu. (Roma 15:4; Iakopo 5:10, 11) E silafia e le Atua e pei lava ona faalagolago isi vaega o le tino i le isi, e faapena foi i ana auauna faamaoni ona manaomia e le tasi le isi. (1 Korinito 12:20, 26) Toe manatunatu i le Tauaofiaga “O E Tausisi i le Faamoni” na auai le faitau miliona o e faitaua lenei mekasini. O i latou sa i ai i ina o le a manatua le lelei i le faalogona pe a auai faatasi ma le toatele o e o lo latou sini autu i le ola o le tumau i le faamaoni i le Atua. Maeu faamalosiaga i le tausisia o le faamaoni mo e na auai ina ua latou iloa o le faitau afe o loo faatasi ma i latou—po o nofoaga faigaluega, po o aʻoga i o latou lava nuu— o loo latou tausisia foi le faamaoni i lalo o omiga e tofotofoina ai!—1 Peteru 5:9.

10. (a) E faapefea ona le taulau i se tagata le tausia o le tulaga saʻo? (e) O le a na amata ona fesiligia e Iopu?

¹⁰ Peitai atonu o le a le mafai ona faatumauina pea lo tatou tulaga saʻo, pe pei foi ona le taulau ona faia e Iopu. O se tagata o lo matua pagatia, ma o loo omia lona mafaufau, atonu e faapea mai, ‘Ai se a ua ia faatagaina ai lenei mea e tupu?’ Atonu e oo lava ina fesili ifo le tagata, ‘O le a le aoga e auauna ai i le Atua?’ E aunoa ma le iloaina o le pogai o ona puapuaga, na fesiligia ai e Iopu aoga o le tausisi i le amiotonu i lea taimi, ona sa foliga mai o le lelei ua tali tutusa lava ma le amioleaga pe sili atu foi. (Iopu 9:22) E tusa ai ma Eliu, na faapea mai Iopu: “O le a se aoga ia te au? O a ni mea sili ou te maua pe ana ou le agasala.” (Iopu 35:3, An American Translation) Peitai tatou te le mafai ona faataga i tatou lava ia lofia i o tatou lava faafitauli ma leiloa ai le tulaga saʻo ma fesiligia ai le taua o le auaunaga i le Atua.

11. O le a le faaaʻoaʻoga lelei na saunia e Eliu mo Iopu?

¹¹ Na tuuina atu e Eliu ia Iopu le faasaʻoga manaomia, faatulaga mataupu i le vaaiga tonu e ala i le taʻuina atu o Ieova sa sili ona faasilisiliina i lo Iopu. (Iopu 35:4, 5) Na faaalia e Eliu, po o le a lava e tupu e le tatau ona tatou faia se faaiuga ua le popole mai le Atua ma mafua ai ona manatu e mafai ona tatou faatiga ia te Ia ona o mea ua tatou manatu e le o faamasinotonu ai o Ia. “Afai ua e agasala,” o le fesili lea a Eliu ia Iopu, “se a se mea ua e faia ia te ia? Afai foi ua faateleina ou solitulafono, se a se mea ua e fai ia te ia?” (Iopu 35:6) Ioe, afai e te taumafai e faatiga i le Atua i lou lafoaia o ona ala po o lana auaunaga, ua na ona e faatiga la ia te oe lava, a e le o le Atua.

12. E faapefea ona aafia le Atua i lo tatou tausisia o le faamaoni?

¹² I le isi itu, na faaalia e Eliu e leai se aoga totino mo Ieova pe a tatou faia le mea saʻo. O le mea moni e faafiafiaina le Atua pe a tatou tausisi i le faamoni, a e i le taimi lava e tasi, e le o taitai lava faalagolago o ia i la tatou tapuaiga, e pei ona faaalia i le mea na fesili atu ai Eliu ia Iopu: “Afai ua e amiotonu, se a se mea ua e avatua ia te ia? Se a foi se mea ua ia maua mai i lou lima” (Iopu 35:7) Na aumaia e le Atua ia i tatou le ola, ma o ia ua tatou manava, gaoioi ma ola ai. O ia e ana mea uma! (Galuega 17:25; 1 Nofoaiga Tupu 29:14) O lea o o tatou uiga leaga po o la tatou amio saʻo e le mafai ona aafia totino ai le Atua.—Iopu 35:8.

Pe A Faasaʻoina

13. (a) Na faapefea ona gaoioi Iopu i le faasaʻoga na tuuina i ai? (e) O le a le faafitauli ua ia i tatou uma lava?

¹³ Na faapefea ona gaoioi Iopu i le faasaʻoga  na tuuina atu, muamua e Eliu ona sosoo ai lea ma Ieova lava ia? Sa ia taliaina, ma salamo “i le efuefu ma lefulefu.” (Iopu 42:6) Ioe, sa faamaulalo Iopu, i lona taʻutino o lona sese. Ma pe tatou te le mataina ea sea ituaiga o le loto maulalo? A e faapefea i tatou? E ui lava atonu o i tatou o e mausali i le tausia o le faamaoni e pei o Iopu, a e o i tatou uma e uunai ai i le faia o mea sese ma paleni ai i se tasi itu po o le isi foi. (Iakopo 3:2; Kalatia 2:11-14) O le a e tatau ona tatou faia pe a faatepa i tatou i so tatou sese po o se vaivaiga tusa lava pe faasaʻo mai e se tagata talavou e pei o Eliu?—Iopu 32:4.

14. (a) O le a le uiga taatele pe a faasaʻoina se tagata? (e) O le a e mafai ona saosao laumea i sese po o iuga faamasinoga le tonu, ma o a faaaʻoaʻoga na faataatia e Iopu ina ua faasaʻoina o ia?

¹⁴ E masani ona le faigofie le taliaina o se aoaiga. (Eperu 12:11; Faataoto 3:11, 12) o le faanaunauga o le taumafai lea ia tauamiotonuina i tatou lava. E pei o Iopu, atonu tatou te tautala pe faia se mea leaga e aunoa ma le loto i ai. Atonu sa lelei o tatou faanaunauga. A e atonu sa tatou tautala e aunoa ma le poto atoatoa, leai se malamalama po o ni faalogona. Atonu o a tatou faamatalaga e atagia ai le faasilia o se lanu po o se lotonuu, po o le piivaa i se mataupu ua le lagolagoina e le Tusi Paia. Atonu e faatepa ai i tatou i mea na tatou tautatala ai ua atagia ai a tatou lava vaaiga totino ma ua faatiga ai i isi ma oo atu ai i le faaleagaina lo latou itu faaleagaga. Pe a faasaʻoina, pe o le a pei ea i tatou o Iopu, tautino na tatou ‘tautala e aunoa ma le iloa’ ma “inoʻino ai ia te au.”—Iopu 42:3, 6.

Faalagolago i le Atua, Ae Le o le Tamaoaiga

15. E faapefea ona tatou iloa lelei sa lei faalagolago Iopu i ana ʻoa?

¹⁵ Sa fesiligia e Pilitati le autu o le faalagolago o Iopu, tuuaia faapea ua ia faagaloina le Atua ma ua tuuina lona faatuatua i se isi mea. (Iopu 8:13, 14) Peitai e ui ina sa faamanuiaina Iopu i le tele o mea faitino, ae sa lei tuuina i na mea lona faatuatuaga. Sa lei i ai sina maluelue itiiti o lona faamaoni ina ua leiloa uma ana mea totino. (Iopu 1:21) Ia ana toe upu na faapea atu ai Iopu: “Afai ua ou fai auro ma mea ou te faalagolago i ai, po ua ou fai atu i auro, O loʻu faatuatuaga oe; afai ua ou olioli ina ua tele loʻu oloa, ina ua maua foi e oʻu lima mea e tele, . . . o le agasala lava lea e faasalaina e faamasino; aua o le tuua lea e aʻu o le Atua o i lugā.”—Iopu 31:24-28.

16. (a) O le iloiloga e tatau ona faia e i tatou lava? (e) O le a le folafolaga mo i latou e faalagolago ia te ia?

¹⁶ A e faapefea i tatou? O fea o tuu ai i lo tatou faatuatuaga—ia Ieova po o i mea faitino? Afai na fuaina i tatou i ni fua faatatau saʻo e pei ona sa naunau i ai Iopu, pe o le a silafia ea e Ieova lo tatou faamaoni i lenei mataupu? Po o lo tatou faanaunauga sili ea o le olaga o le saunia lea o se ala o e tausisia o le faamaoni mo Ieova e tali ai i faifaiga a Satani? Pe o tatou naunau i le na ona faamalieina o tatou manaoga mo faafiafiaga ma mea totino? Maeu le lei lelei pe a mafai ona avea i tatou e pei o Iopu ma faafiafia le finagalo o le Atua i le faalagolago ia te Ia, ma aua nei faatauaina i tatou lava po o mea faitino o loo i ai! Afai tatou te faalagolago ia Ieova, i le faamuamuaina o mea o loo ia manaomia, ua ia folafolaina o le a le tuua pe lafoaia i tatou.—Mataio 6:31-33; Eperu 13:5, 6.

Amioga Faaleituaiga

17. O a tuuaiga na faia e “e faamafanafana” ia Iopu, peitai o le a na taʻua e Iopu e uiga i lana amio mama?

¹⁷ O e na faamafanafana pepelo ia Iopu sa lei tuusaoa la latou tuuaiga o ia i amioga le talafeagai faaleituaiga, a e i taimi sa latou manatu ai sa agasala o ia i ni sese faalilolilo e pei ona faasalaina ai o ia e le Atua. Ona o se tagata mauoa o le mea moni “sa sili foi lenei tagata i tagata uma lava i Sasae,” o le mea moni sa i ai avanoa mo nisi faiga  faaituaiga e ese mai le faaipoipoga. (Iopu 1:3; 24:15) O isi auauna a le Atua i luma atu ma tua mai o le taimi o Iopu, sa pauū i faaosoosoga faaleituaiga. (Kenese 38:15-23; 2 Samuelu 11:1-5) Peitai sa puipuia e Iopu ia lava faasaga i soo se tuuaiga o ia faiga sese i le faapea mai: “Ua ou osia le feagaiga ma oʻu mata, se a foi le mea ou te manatu ai i se taupou? Afai ua olegia loʻu loto i se fafine, po ua ou lamalama i le faitotoa o le ma te tuaoi; . . . o le agasala tele lea, o le pagota foi lea e faasalaina e faamasino.”—Iopu 31:1, 9-11.

18. Ai se a ua faigata ai ona faatumauina le tulaga mama faaleituaiga, peitai ai se a tatou te fiafia ai pe a tatou tumau ai?

¹⁸ Atonu ua leai se isi auala o loo manuia ai taumafaiga a Satani e faavaivaia le faamaoni o auauna a le Atua na i lo le faia o le faitaaga. (Numera mataupu 25) E mafai ona e faataʻitaʻi i le faamaoni o Iopu i le teena o faatosinaga uma tau amio le tatau faaleituaiga? O le mea moni o se luʻi a e maise i lenei lalolagi maʻivalea i faiga faaituaiga ua taatele ai amioga le mama. Peitai manatu i le lelei o le toe manatunatu, pe a mafai ona faapea atu ma le mautinoa e pei o Iopu: “Ia silafia ai e le Atua ua sao laʻu amio”!—Iopu 31:6.

O Le Mea e Mafai Ona Fesoasoani Ia i Tatou

19. O le a e manaomia e fesoasoani ai ia i tatou e tausisi le faamaoni?

¹⁹ E le faigofie ona faataʻitaʻi i le faamaoni o Iopu, talu ai o Satani i aso nei o loo taumafai malosi e lepetia le faamaoni o Iopu. O lea, e manaomia, ona tatou ofuina le ofu tau atoatoa mai le Atua. (Efeso 6:10-18) O lenei mea e aofia ai le o faatasi ma le Atua, e pei o Iopu, i lona faamalieina o Ia i soo se mea e faia e o tatou aiga po o i tatou. (Iopu 1:5) O lea, o se suesue i le Tusi Paia, ma le auai pea faatasi ma uso talitonu, ma le faalauiloaina i le lautele o lo tatou faatuatua o mea ia e tatau ma manaomia.—2 Timoteo 2:15; Eperu 10:25; Roma 10:10.

20. (a) O le a le faamoemoe e faatumauina ai i tatou i lalo o tofotofoga? (e) O le a le taui mo e tausisia le faamaoni ua taʻua e le faisalamo e mafai ona tatou mauaina?

²⁰ Ae peitai o le mea sili e mafai ona faatumauina ai i tatou o lea foi na faatumauina Iopu—o lona mautinoa lea e le na o le pau lenei o le ola. “Afai e oti le tagata, e toe ola mai ea o ia?” o le fesili lea a Iopu. Ma sa tali o ia: “Ia e valaau mai, ona ou tali atu ai lea ia te oe.” (Iopu 14:13-15) O le i ai o lena mautinoa mausali e tasi faapea o le faatutu e Ieova ana auauna faamaoni e mafai foi ona fesoasoani ia i tatou e fesagai ai ma soo se tofotofoga e tuuina mai e Satani. (Eperu 6:10) A o mamao lava, na tusia ai e le faisalamo o le Tusi Paia: “A o aʻu nei, e te taofia aʻu i luga i laʻu amio sao; e te faatuina foi aʻu i ou luma e faavavau.” (Salamo 41:12) Tau ina ia avea lena ma lumanai fiafia mo i tatou taitoatasi—ia faatutu e Ieova i tatou ma faasaoina i tatou e faavavau ona o le avea o i tatou ma ana auauna o e tausisi i le faamoni!

E Mafai Ona E Taliina?

□ O ai ua faamaonia e pei o Iopu ma o a faatusatusaga e mafai ona aumaia i le va o i latou ma Iopu?

□ O le a e mafai ona tatou aʻoaʻoina mai le auala na gaoioi ai Iopu i ona tofotofoga?

□ Sa faapei ona tali Iopu i le faasaʻoga, ma o le a ua tatou aʻoaʻoina mai lenei?

□ O le a le faaaʻoaʻoga lelei na saunia e Iopu i le feagai ai ma mea faitino ma amioga faaleituaiga?

□ O le a e mafai ona fesoasoani ia i tatou ia faatumauina le faamaoni e pei ona sa faia e Iopu?

[Fesili mo le Suʻesuʻega]

[Ata i le itulau 14]

Ua e fesiligia ea, e pei o Iopu, le aoga o le tausisia nei o le faamaoni?