Pe Tou Te Fetufai ma le Uigā mai le Tusi Paia?
Pe Tou Te Fetufai ma le Uigā mai le Tusi Paia?
“Ua ulufale foi Paulo ia te i latou, o lana lea masani, e tolu foi sapati ua lauga atu o ia ia te i latou i Tusi.”—GALUEGA 17:2.
1. Ai se ua taua ai le Tusi Paia ia i tatou?
Maeu le taua o le Afioga a le Atua! Ua na taliina fesili ua le mafai e isi tusi ona taliina. Ua aumaia e le Tusi paia e le gata i manatu e uiga i le ola; a e faapea foi le upu moni. I lana Afioga, ua taʻu mai ai e Ieova mea ua ia manaomia mai ia i tatou, ma o mea uma na te manaomia e mo lo tatou lelei.—Salamo 19:7-11; Isaia 48:17.
2. (a) A o tatou molimau atu i isi, e faapefea ona tatou faaalia i ai latou le puna o la tatou feau? (e) O a fesili ua faamalosia i tatou e fefulisai taitoatasi i ai?
2 Talu ai ua mautinoa e Molimau a Ieova o le Tusi Paia o le upu moni e mai le Atua o mea o tusia ai e i ai le mana e faaafia ai i latou e faalauiloa i isi mea ua tusia ai. (Eperu 4:12) A o latou auai i le faiva mo le lautele, latou te mananao ia iloa e tagata o le feau o loo latou faailoa e le mai ia i latou lava a e mai le Afioga a le Atua lava ia. O lea ua latou tuusao le faaaogaina o le Tusi Paia, i le faitauina mai ai i isi pe a talafeagai. Pe o e faaaogaina totino le Tusi Paia i lea auala? Pe mafai ona e talanoa i tagata faamaoni mai le Tusi Paia i se auala e fesoasoani ai ia i latou ia malamalama ma talia mea ua ia aʻoaʻoina?—2 Timoteo 2:15.
3, 4. (a) Sa faapefea ona faamamafaina le taua o le tautala i le afioga lava a le Atua i ona po o Ieremia? (e) Ia te ai ma o le a tatou te mananao e faasino tonu i ai tagata o tatou aʻoaʻoina?
3 O le taua o le taʻuina i tagata o mea ua fetalai i ai le Atua na i lo le manatu totino o le tagata lava ia, sa faamamafaina lea i le taimi o le perofeta o Ieremia. O lena vaitaimi o talafaasolopito sa faavaloaga mo o tatou aso. O le tele o perofeta i Ierusalema i lena taimi sa faia ni folafolaga na latou manatu e fia faalogo i ai tagata, peitai latou te lei faamaoni i le folafolaina o le afioga a Ieova. Na fetalai Ieova e uiga ia i latou: “Ua latou tautala atu i le faaaliga mai o latou lava loto—a e le mai le fofoga o Ieova.” Ona ia toe faaopoopo mai lea ma le faamalosi: “ma le ua ia te ia laʻu upu ma le faamaoni.”—Ieremia 23:16-18.
4 O Ieremia sa ‘tautala i le afioga a Ieova ma le faamaoni.’ O i tatou foi, e tatau ona lagona le avega tauave o le piivaa i le Tusi Paia pe a tatou aʻoaʻo i isi. Tatou te le mananao e avea tagata ma o tatou soo. Tatou te mananao ia avea i latou ma e tapuai ia Ieova, ina ia savavali i tulaga aao o Iesu Keriso, ma ia latou talisapaia le faalapotopotoga o lo auala mai ai le taʻitaʻiga a Ieova o ana auauna i aso nei.—Faatusatusa 1 Korinito 1:11-13; 3:5-7.
5. E faapefea i le Ioane 7:16-18 ona aumaia taʻiala (a) mo toeaina? (e) mo i tatou uma a o tatou auai i le faiva i le fanua?
5 Na fetalai Iesu lava ia; “O laʻu mataupu, e le o saʻu lava, a o lana na auina mai aʻu. Ai se tasi e fia faia lona finagalo, e iloa ai e ia le mataupu, pe mai le Atua, pe ou te tautala fua lava aʻu. O le tautala fua ia te ia, ua saili e ia lona lava viiga.” (Ioane 7:16-18) E oo lava i le Alo e lelei atoatoa o le Atua sa ia faaeteete e alofia le tautala ia te ia lava. Maeu la le tatau foi ia i tatou ona faia faapea! Maeu le talafeagai mo toeaina ona “taofi mau i le upu moni” i la latou faiva o le a aʻoaʻo atu! (Tito 1:9) Maeu foi le fetaui o le fautuaga i le 2 Timoteo 4:2: “Talaʻi atu le upu”! O le tulaga lena e tatau ona tatou pipii atu i ai i totonu o le faapotopotoga ma a o auai i le faiva i fafo i le fanua.
6. E faaopoopo atu i lo tatou faitauina o fuaiupu mai le Tusi Paia, o le a le mea e masani ona manaomia? Faataʻitaʻi.
6 Peitai e le o le uiga o lenei mea e na ona tatou faitau lava o fuaiupu mai le Tusi Paia ma leai se isi tala e toe fai atu. Ina ia taofi mauina e tagata le uiga atoatoa o mausii, e taua mo i latou le malamalama lelei lo latou faatatauina. Sa moni lena mea i le eunuka Aitiope o loo faasino i ai le Galuega 8:26-38. Sa faitau le tamaloa i le valoaga a Isaia, a e sa lei malamalama i lona uiga. Peitai, ina ua taliina ana fesili, ina ua ia mauaina le uiga o mea sa ia faitauina ma iloa ai pe faapefea ona aafia ai lona tagata totino, sa avea o ia ma Kerisiano. E tatau ona tatou avatua fesoasoani faapena i tagata a o saili i le upu moni i aso nei ma e tatau pea ona faaalia le faaeteete i le taulimaina o le afioga o le upu moni ma le saʻo.
Sa Faapefea Ona Faaaoga E Iesu Le Tusi Paia
7. O le faataʻitaʻiga matilatila a ai e mafai ona fesoasoani ia i tatou e faaleleia lo tatou tomai e talanoa ai mai le Tusi Paia?
7 Na faatuina e Iesu le faaaʻoaʻoga sili i le faaaogaina ma le uigā o le Tusi Paia. (Mataio 7:28, 29; Ioane 7:45, 46) O le iloiloina o lana auala i le aʻoaʻo atu, e mafai ona fesoasoani ia i tatou e faaleleia ai lo tatou tomai e talanoa ai mai le Tusi Paia. Manatu i faaaʻoaʻoga o loo mulimui mai:
8. (a) O le a le fesili na fesili ai “le tasi aʻoaʻo tulafono” ia Iesu? (e) Sa faapefea ona faafoeina e Iesu le fesili, ma ai se a?
8 I le Luka mataupu 10, fuaiupu 25-28, ua tatou faitau ai e uiga i “le tasi aʻoaʻo tulafono” na saili e tofotofo Iesu i lona fesili atu: “Le aʻoaʻo e, se a le mea ou te faia ina ia ou maua ai le ola e faavavau?” E faapefea ona e tali atu i ai? O le a na faia e Iesu? Sa faigofie ma mafai ona ia tuuina atu se tali tuusaʻo, peitai sa ia iloa ua uma ona i ai se vaaiga mautinoa a lenei tamaloa e uiga i le mataupu. O lea na toe fesili atu Iesu ia te ia e taliina ai lana fesili, i lona faapea atu: “O le a ea ua tusia i le tulafono? O le a lau faitau?” Sa tali atu le tamaloa: “E te alofa atu i le Alii lou Atua ma lou loto atoa, ma lou agaga atoa, ma lou malosi atoa, ma lou manatu atoa; e te alofa atu foi i le lua te tuaoi, ia pei o oe lava ia te oe.” Na tali atu Iesu: “Ua tonu lau tali,” ma i lona toe faaupuina o se vaega o le Levitiko 18:5, sa ia faapea atu: “Ia e faapea ona fai, e te ola ai” I se isi foi mea na tupu sa toe sii mai ai e Iesu na tulafono e lua e tali ai se fesili. (Mareko 12:28-31) Peitai i lea taimi, o le tamaloa na la talanoa sa na iloa lelei le tulafono faa-Mose ma sa na fia iloa pe malie Iesu i mea ua uma ona ia aʻoaʻoina mai ai. Na faamalieina e Iesu le tamaloa i le faaali mai e ia lava o le tali.
9. (a) O le a na faia e Iesu e fesoasoani ai i le tamaloa ia ona maua le uiga o se tasi o mau na ia sii maia? (e) Ai se a na taulau ai lea auala?
9 A e ui i lea, sa misia e le tamaloa le taua atoatoa o mau na ia siia. O lea, “ua faafiatonu o ia, ua fai mai ia Iesu. O ai foi le tagata ma te tuaoi?” O le auala na tali atu ai Iesu sa na lei toe sii maia ni mau. Sa ia lei avatuina foi se faamatalaga e fai ai se faamolemolega a le tamaloa. Na i lo lea, sa ia faaaoga se faataʻitaʻiga—e sili ona lelei sa fetaui ma manaoga o le tamaloa, o se faataʻitaʻiga e fesoasoani ia te ia e manatunatu ai i le uiga o le mau. Na fetalai Iesu e uiga i se tuaoi lelei o le Samaria o le na fesoasoani i se tagata malaga na gaoia ana mea ma fasia, a e sa lei fesoasoani i ai le ositaulaga ma le tagata sa Levi. O se faataʻitaʻiga lenei ua na faamatalaina ai le faaupuga “tuaoi” i se uiga sa lei manatunatu muamua i ai le tamaloa, ma sa faia i se auala na fuafuaina e paia ai le fatu. O lea, e pei ona faaiu mai e Iesu, na ia faia se fesili ina ia mautinoa ai ua maua e le tamaloa le manatu autu, ma ia uunaia ai o ia e faatatau i lona olaga mea sa la talanoaina.—Luka 10:29-37.
10. (a) O le a e mafai ona tatou aʻoaʻoina mai lena faataʻitaʻiga a Iesu i le aʻoaʻo atu? (e) Atonu e faapefea ona tatou faatatauina nisi o nei manatu pe a faaaogaina la tatou Mataupu mo Talanoaga i le faiva i le fanua?
10 O le a e mafai ona tatou aʻoaʻoina mai lena aʻoaʻoga o le aʻoaʻo atu? Sa e matauina mea o loo mulimuli mai? (1) Sa tatai e Iesu le vaaiga agai i le Tusi Paia mo le tali i le uluai fesili a le tamaloa. (2) Sa tuu atu e Iesu i le tamaloa le avanoa e faia ai se tali, ma sa tuuina atu le faamalo mafana ina ua ia aumaia se tali maumanatu. (3) Sa faamautinoa e Iesu o le sootaga o le fesili ma mau ua tumau pea, e pei ona faaalia e le fuaiupu 28. (4) O se faataʻitaʻiga faatasi ma le loto naunau sa faaaogāina e faamautinoa ai e le o misia e le tamaloa e taua moni o le tali. O le mulimuli i lena laasaga e mafai ona fesoasoani ia i tatou e talatalanoa ma le uigā ma isi i le Tusi Paia.
“Le Aʻoaʻo e, Ua Tonu Lau Upu”
11. (a) Ina o fesiligia e le au Satukaio Iesu e uiga i faaipoipoga e fesootai ma le toetu, o le a le tali na ia avatu? (e) Ai se a na ia le faagata ai i ina?
11 I le Luka mataupu e 20, fuaiupu e 27-40, ua faamauina ai se aʻoaʻoga maoae o le faaaogaina ma le uigā o le Afioga a le Atua. Na faalatalata atu nisi o le au Satukaio ia Iesu ma fesili ia te ia. Na latou avatu ia Iesu se tulaga na latou manatu e faaalia ai le valea o le talitonuga o le toe tutu mai o e ua oti. Na latou taʻu atu se fafine sa ia te ia tane e toafitu na faalausosoo lava. Sa latou fesili: “A oo foi i le toetu, o ai so latou e ana le avā?” O le tali na tuuina atu e Iesu na manino lelei e leo le tali lea na latou faatalitalia. E foliga mai latou e lei manatunatu e le i ai se avanoa e toe faaipoipo ai e o le a toe faatutuina, a e o le a tulaga, e pei o agelu. Peitai, sa manaomia nisi manatu atili e faatalitonuina ai i le tali.
12. (a) O le a le manatu na faaaogaina e Iesu e lagolago ai le talitonuga i le toetu? (e) Ai se a sa matua talafeagai ai mo le au Satukaio?
12 Na silafia e Iesu o le faafitauli moni i le au Satukaio ona latou te le talitonuga i le toetu. O lea na ia avatu ai faasinoga faapito i le itu lena. O lana finauga sa aumaia i tusitusiga a Mose, mai le Esoto 3:6, sa faatagā talitonu i ai le au Satukaio. Sa ia faapea atu: “A o le faatuina o e ua oti, ua faailoa mai lea mea e Mose i le laau talatala i lona taʻua o le Alii o le Atua o Aperaamo, o le Atua foi o Isaako, o le Atua foi o Iakopo.” Peitai pe sa vaaia ea e le au Satukaio se faasinoga i le toe tu i na upu? Sa faatoa iloa ina ua toe faaopoopo atili atu Iesu: “E le o le Atua ia o e ua oti, a o e ola; auā ua ola uma ia te ia.” Sa manino lava: O mea e leai ni ola faapea ma tagata, e i ai Le na Faia, a e na o tagata o loo ola e mafai ona i ai so latou Atua, o Le ua avea ma se latou te tuutoina atu i ai ma tapuai i ai. Afai sa na ona feoti Aperaamo, Isaako ma Iakopo ma tanumia, e aunoa ma se isi faamoemoe atili mo le ola, atonu e faapea atu Ieova ia Mose, ‘O au sa avea ma o latou Atua.’ A e le o lena na ia fetalai i ai. Ina ua uma ona faalogologo i manatu o Iesu mai le Tusi Paia e uiga i le mataupu, pe na le tatau ea ona tali atu le au Faresaio: “Le aʻoaʻo e, ua tonu lau upu”?
13. O a fautuaga ua tuuina mai e fesoasoani ia i tatou e atiina ae ai le atamai e fetufai ai mai le Tusi Paia? Faamatala pe ai se a ua e lagona ai e taua manatu taitasi.
13 E faapefea ona e maua pe atiina ae atili lea ituaiga o poto e talatalanoa ai mai le Tusi Paia? O nisi nei o mea taua: (1) E tatau ona ia te oe le poto saʻo o le Tusi Paia. O suesuega totino faifai pea ma le auai pea i sauniga o mea taua ia i le mauaina o le poto. (2) E manaomia ona e faaaluina taimi e manatunatu ai, ma suesue faalemafaufau upu moni mai itu eseese ma atiina ae lou talisapaia mo ia mea. (3) A o faia suesuega, ia saili e le gata na o faamatalaga o mau sii, a e faapea foi mafaufauga faale-Tusi Paia mo nei faamatalaga. Ia tusia ni faamatalaga e uiga i ai i tafatafa o mau e te manao e talanoaina. (4) Fefulisai pe faapefea ona e faamatalaina nei mau i ituaiga eseese o tagata. (5) Manatu pe atonu e faapefea ona e faataʻitaʻi ni manatu faapitoa. O nei mea uma e taua i le galueina o le tomai e fetuutuunai ai mai le Tusi Paia.
Talanoaga E Fetaui Ma Le Aofia
14. O a vala mataina o Paulo i lana aʻoaʻo atu ua aumaia i le Galuega 17:2, 3?
14 O se faiaʻoga lelei foi le aposetolo o Paulo, o le e mafai ona tatou aʻoaʻo mai ai. Sa malaga faatasi o ia ma le fomaʻi o Luka mo se taimi, ma o lana faamatalaga e uiga i galuega a Paulo o le tatau ona matauina. Ua ia ripotia mai: “Ona oo lea o i laua i Tesalonia, ua i ai le sunako o tagata Iutaia. Ua ulufale foi Paulo ia te i latou, o lana lea masani, e tolu foi sapati ua lauga atu o ia ia te i latou i Tusi, ua faamatala ma faasino atu, na tatau ona tiga o le Keriso, ma toe tu mai i e ua oti; ma ua faapea atu, o Iesu lenei ou te folafola atu ai ia te outou, o le Keriso ia.” O le a na iu i ai? Na faamanuia e Ieova taumafaiga a Paulo. “Ua talitonu mai foi nisi o i latou . . . o Eleni foi o e matataʻu i le Atua e toatele lava, ma saʻo tamaitai e toatele foi.” O le auala na aʻoaʻo atu ai Paulo ua sili ona matauina: Sa sili atu mea na ia faia na i lo o le na ona faitauina o le Tusi Paia; sa ia fetufai mai le faitauina o mau, ma faafetauia ana fetuunaiga i lana aofia. Sa le na o le taʻu atu o le tala lelei ia i latou, a e na ia faamatala ma tuuina atu faamaoniga mai le Afioga faagaeeina a le Atua. (Galuega 17:1-4) Sei fefulisai i faaaʻoaʻoga e lua o auala a Paulo i le aʻoaʻo atu:
15. (a) A o tautala Paulo i se aofia o tagata Iutaia, i Anetioka i Pisitia, sa faapefea ona taumafai Paulo ia maua so latou manatu autasi? (e) Ai se a e te lagona ai o le mauaina o se manatu autasi e taua i la tatou molimau atu?
15 I le Galuega 13:16-41 ua aumaia ai se lauga na tuuina atu e Paulo i se aofai o tagata Iutaia i Anetioka i Pisitia. Sa ia taumafai muamua e faatuina se autasi i manatu ma lana aofia. (Tagai i fuaiupu 16, 17) Ai se na ia faia ai faapea? Aua e fesoasoani ai ia i latou ia naunau e manatunatu i mataupu o le a ia tuuina atu. Sa ia lei faailoa atu o ia lava o se sui o le faapotopotoga Kerisiano faatasi ma se feau mo i latou e uiga ia Iesu Keriso. Sa talanoa o ia i tagata Iutaia, o le sa ia amanaia foi o latou mafaufauga. Sa ia taʻutino o lana aofia sa i ai tagata o e matataʻu i le Atua, ma sa ia faaalia o ia, o se tagata Eperu, e pei foi o le toatele o i latou. Sa ia talanoaina ni vaega faafaiata o le talafaasolopito o Isaraelu. Peitai sa faapefea ona ia faamautuina se autasi ma i latou a o ia talanoa e uiga i a Iesu?
16. Sa faapefea ona faatumauina e Paulo se manatu autasi a o ia tautala i na Iutaia e uiga ia Iesu?
16 Na faaalia e Paulo o Iesu o se tupuga mai ia Tavita ma o le na faailoa mai e Ioane le Papatiso, o le na taʻutino faalelauaitele e tagata o ia o se perofeta a le Atua. (Galuega 13:22-25; Luka 20:4-6) Peitai na iloa e Paulo sa malamalama lana aofia na teena Iesu e taʻitaʻi i Ierusalema, o lea na aumaia ai e le aposetolo lava ia lenei mataupu ma ia faamatalaina o le teena ma le fasiotia o Iesu o le faataunuuina lea o valoaga. (Galuega 13:27-29) Na ia faasino atu o le Atua na gaoioi e fai ma sui o Iesu i le toe faatuina ma o ia nai le oti ma sa i ai molimau na vaai i ai o tagata Iutaia i le mea moni e uiga i le toe faatuina mai o Iesu. (Galuega 13:30, 31) Sa iloa lelei e Paulo o se mataupu e faigata ona talia e le toatele, o lea na ia faamatala ai faapea o loo ia talanoa e uiga i le “tala lelei . . . i le mea na folafolaina atu i o outou tama.” Sa ia faaalia o le tulaga lena, o loo sii mai i le Salamo 2:7, ma i le Isaia 55:3, ma mulimuli ane i le Salamo 16:10. Sa ia fetufai i le mau mulimui, ma faaalia e le tatau ona faataunuuina ia Tavita talu ai sa “oo foi ia te ia le pala.” Sa tatau la ona faatatau i le “ua le oo ia te ia le pala” talu ai sa faatuina na i le oti e le Atua. (Galuega 13:32-37) O le folasia atu o lena manatu, na tuuina atu ai e Paulo se faaiuga e faagaoioia ai i latou. Na ia iloa e tatau mo tagata ona manatu mamafa i mea ua latou faalogo i ai. O le toatele na latou talia ma le fiafia.—Galuega 13:13-43.
17. (a) Ai se a na ese ai le taulimaina o le upu moni e Paulo i Atenai? (e) O le a e mafai ona tatou aʻoaʻoina mai le mea na ia faia i ina?
17 A o tautala atu Paulo i se aofia o tagata e le ni Iutaia, sa ia faaaogaina aʻoaʻoga o mataupu silisili lava ia e tasi. O lea, i le Areopako i Atenai, Eleni, sa ia faafetauia lana auala i tulaga ma mafaufauga o tagata Atenai. Sa ia taumafai e faataatia se maliega ma lana aofia, na ia faamalo ai ia i latou ona o i latou o ni tagata lotu. Sa ia taʻua se fatafaitaulaga i le aai, na tusia ai “Mo Le Atua e Le Iloa.” Sa faalauiloa atu e Paulo o lenei Atua o ia lea o Le o loo ia talaia. (Galuega 17:22, 23) Ina ua maea le fai o lena, ona ia sii maia lea o ni vaega o Tusi faagaeeina ma amata ona fetufai e faavae i nei mea. Ma, talu ai sa i ai sona tomai i tusitusiga Eleni, o lea na sii mai ai foi e Paulo a latou fatu solo, e le ona o lona poto, peitai e faaalia ai o nisi mataupu faapitoa sa ia talanoa i ai sa faamauina lava ia latou tusitusiga. O le iuga, sa avea nisi ma e talitonu.—Galuega 17:24-31, 34.
18. O le a e mafai ona fesoasoani ia i tatou ia maua iuga lelei ia tatou taumafaiga e fetufai ma isi mai le Tusi Paia?
18 O le tala lelei na talai e Paulo i Atenai sa tutusa lelei ma le feau na ia tuuina atu i Anetioka. Sa eseese auala na tuuina atu ai ona sa ia iloa le mea sa manaomia ina ia mafai ona talatalanoa ma tagata. Sa ia manatunatu loloto ia i latou ina ia i ai ni taumafaiga atili e faia ai faapea. Ma o ia ituaiga o taumafaiga e aumaia ai iuga lelei. Sei o tatou faia foi ni taumafaiga manaomia ma saili i le faamanuiaga a Ieova ia tatou taumafaiga e talatalanoa ai ma isi mai le Tusi Paia ina ia mafai ai ona tufaina atu le tala lelei i tagata o soo se ituaiga.—1 Korinito 9:19-23.
O Le A Sa Tatou Aʻoaʻoina
□ Ai se a e taua ai le faitau saʻo mai le Tusi Paia i la tatou faiva?
□ I le Luka 10:25-37 o a mataupu silisili o le aʻoaʻo atu ua faataʻitaʻia?
□ O a faiga ua fesoasoani ia i tatou e atiina ae le atamai e fetufai ai mai le Tusi Paia?
□ O le a le tele atonu e aafia ai le auala o loo tatou talatalanoa ai ma tagata ona o lo latou tupuaga?
[Fesili mo le Suʻesuʻega]