Aua Le Tuuina Atu Se Nofoaga mo le Tiapolo!
Aua Le Tuuina Atu Se Nofoaga mo le Tiapolo!
“Aua neʻi goto le la o ita pea outou. Aua foi neʻi tuuina atu e outou se mea e mautu ai le tiapolo.”—EFESO 4:26, 27.
1. Sa faapefea ona faamatala e Peteru le Tiapolo, peitai o le a le faamautinoaga o le puipuiga na aumaia e le aposetolo?
O SE MANU FEAI lotoa o loo fealualuai. Ua ia te ia se manaoga o le faamalieina ia ʻaina Kerisiano. Ua lapatai mai Peteru: “Ia outou faautauta, ia outou mataala, ona o le ua fai outou mona fili, o le tiapolo lea, o loo fealualuai o ia e pei o se leona tagi, ua saili se tasi e ʻaina e ia; ia outou tetee atu ia te ia, ma ia mausali outou i le faatuatua . . . I nai aso, ia faaatoatoa outou e ia lava, pe a tigaina outou, A o le Atua e ona le alofa tunoa uma lava . . . ia faamalosia, ma ia faavaeina outou.”—1 Peteru 5:8-10.
2. (a) O a tulaga ua faafaigofie ai ona osofaia i tatou e Satani? (e) Ai se a ua le mafai ai e le ua paū ma faaleagaina i faiga faaaposetasi ona tuuaia se tasi a o ia lava? (i) O le a le vaivaiga sa tatalaina ai le ala mo le Tiapolo e tuuina i le loto o Iuta le Sekara i le faalataina o Iesu?
2 E mafai ona tatou mautinoa o le Tiapolo ma ana ʻau, o temoni ma tagata, o loo nonofo sauniuni e gaoioi i so o se masalosaloga aati, i so o se pona i o tatou uiga totino, i lo tatou faatamala i le tausisia o le malosi faaleagaga i le faatuatua. Peitai ua faamautinoaina i tatou e le Afioga a le Atua faapea o le a le ʻaina i tatou e le Tiapolo pe afai tatou te tutu malosi faasaga ia te ia. (Iakopo 4:7) Mo se faataʻitaʻiga, e leai se isi e faaleagaina e aposetate ona ua le maalofia. E leai se isi ua muai filifilia e lafoaia le faatuatua. Ua aafia ai faalogona o le fatu. O le mea moni, sa taʻua e Ioane o nisi “na latou o ese ia i tatou, a e leʻi ni o tatou i latou.” (1 Ioane 2:19) Peitai na tupu lenei mea talu ai ona sa latou filifilia faiga faaaposetasi po o le o mai foi le faalapotopotoga a Ieova ma se faanaunauga leaga i le amataga. O Iuta le Sekara sa ia te ia se loto lelei ina ua valaauina e avea o se tasi o aposetolo o 12 o Iesu, peitai sa galue le Tiapolo i se tasi o vaivaiga o Iuta o le matapeapea. E oo lava i le po ao lumanai le faalataina o Iesu, “ua tuu e le tiapolo i le loto o Iuta le Sekara, le atalii o Simona ia faalata ia te ia.”—Ioane 13:2.
3. O a mea moni e mafai ona aafia ai se tagata e avea o se ua faaleagaina i faiga faaaposetasi?
3 E agai ina leaga se tagata pe a ia faatagaina ona manatunatuga faapito, ma ona faanaunauga ma tuinanauga, o ana aumea filifilia ma siomaga, e faafilogia ai ona mafaufauga ma filifili ai le taʻitaʻiga o ona manatu. Sa tautala Paulo i nisi o e sa ‘muai faamalamalamaina, na latou tofo foi i le mea foaifuaina mai le lagi, peitai ua pauū ese.’ (Eperu 6:4-6) Afai e le tumau ona tatou faaeteete e mafai e le Tiapolo e ala i ana faiga poto faaoleole ona faia o tatou loto ia talia mafaufauga faaaposetate. Peitai e faapefea e le Tiapolo, ona faatuina se tagata e pei o se tasi ua faaleagaina ua manuʻa i faiga faaaposetasi?
4. O le a e mafai ona tupu pe a tatou malolo atu i le loto tigā faagaulemalie, ma le vaai masei?
4 O uiga taatele o lo matauina e Satani o le loto tigā, faagau le malie ma le vaaimasei. O ia ituaiga o faalogona e mafai ona tutupu malolosi ma faaitiitia ai le avanoa ma le alofa ma le talisapaia. Atonu e faatigā mai se faafitauli le mafoia, ma mafua ai i se tagata ona lagona le ita ma manatu ai ua tatau ona le auai i sauniga taua faa-Kerisiano. O le tumau ai pea i se a faalogona le malie mo se taimi umi, ua ‘ia tuuina atu ai se nofoaga mo le Tiapolo.’ (Efeso 4:27) O le tagata atuatuvale ua ia vaaia na o vaivaiga faaletagata o lona uso, na i lo le faamagaloina o ia “faafitugafulu ni fitu,” ma le taulau ai ona ia faaaoga taumafaiga i so o se auala o ni avanoa e faaleleia ai uiga faa-Kerisiano. (Mataio 18:22) A o i ai i se tulaga faapea o le mafaufau, ma a sau se tagata ma fautua mai faapea o le faalapotopotoga a Ieova e saua a ma tele faasasaga, po o le sese foi i nisi aʻoaʻoga faitaulia faapitoa, ona talia lea le fatu o le Kerisiano loo maua i le loto mafatia na ituaiga tuuaiga e leai se faavae. Paga la le talafeagai ona alo ese mai le faatagaina o le loto mafatia ma le faagau le malie e tuputupu ae! Aua neʻi goto le la o iai pea lou ita. Na i loa lea, ia faataga le alofa e matua gaoioi ai i lou olaga.
5. (a) E faapefea e le faamaualuga po o le le fiafia i le faasaoga ona faamaonia o se mailei? (e) O le a le vaega ua faia e le loto maulalo i le faatumauina mausali i le faatuatua?
5 O a isi tulaga o le fatu ma le mafaufau o loo tulimataia e le Tiapolo? O loo i ai le faamaualuga, le faalogona fia taʻua, faagau le malie ona o le le maua o le tulaga ua manatu se tasi e tatau ona ia maua. O mailei leaga uma nei ua faaaogaina e le Tiapolo. (Roma 12:3) Afai ua fautuaina oe pe aʻoaia mo se amioga po o le uiga sese, atonu o se taimi fetaui foi lea mo le Tiapolo e vave uunaia ai oe e fesili ifo ia te oe pe o e i ai i le faalapotopotoga saʻo. O lea ia tausisi i le loto maulalo. Ia loto malie e pulea oe “o le aupito itiiti.” Aua le faatagaina le loto faamaualuga po o le faalogona o le fia taʻua e aveesea ai oe mai le tu malosi i le faatuatua.—Luka 9:48; 1 Peteru 5:9.
6, 7. (a) O a nisi faailoga o le le onosai e vave ona gaoioi i ia le Tiapolo? (e) Afai e leai se atamai i se tasi, o lea e tatau ona faia?
6 O le isi mea o loo mataia e le Tiapolo le lava o le onosai. O nisi taimi atonu tatou te lagona ai ua tatau ona fai ni suiga; tatou te mananao i ni gaioiga faatopetope, ma ni tali faavave. ‘Ua tatau ona faaleleia loa le faafitauli lea a leai o le a ou alu ese. E tatau ona ou maua le tali i le fesili i le taimi nei lava, a le o lena o le a leai se isi gaoioga e toe faia. O Amaketo ma le faiga fou o mea ua leva ona “lata tele mai” o la latou faaupuga lea mo le tele o tausaga. Ua ou le lavā faatalitali.’ Ia mautinoa ua sauniuni le Tiapolo e totoina fatu o masalosaloga ma teteega i ia ituaiga uiga o le le onosai. E manaomia tele le onosai ma le faatuatua.—Eperu 10:36, 39.
7 Ua faapea mai Iakopo: “Ia atoatoa le galuega a le onosai, ina ia atoatoa ai ma ia sao ona lelei ai outou, ia leai se mea e tasi e mativa ai. A e afai ua leai se poto i so outou, ina ole atu ia i le Atua, o le foai tele mai i tagata uma ma le le toe taʻutaʻua; ona foaiina mai ai lea ia te ia. A ia ole atu ma le faatuatua, aua lava neʻi masalosalo; auā o le masalosalo e tusa ia ma le peau o le sami ua sousou i le matagi ma felafolafoaiina. Aua lava neʻi manatu lea tagata na te maua se mea e tasi mai le Alii; o le tagata faalotolotolua e faaletumau ia ona ala uma.” (Iakopo 1:4-8) Aua le faatagaina le Tiapolo e faia oe ma aposetasi ona ua avea oe o sē le lava le onosai, ma masalosalo e uiga folafolaga a le Atua! Ia onosai, ma ia loto faafetai. Faalagolago ia Ieova.—Salamo 42:5.
8. E faapefea i le faanaunauga e tetee faasaga i le pule ona tatalaina le ala mo le Tiapolo e tofotofo se tagata e lafoaia faasasaga faale-Tusi Paia?
8 O le a se isi mea ua faaaoga e le Tiapolo e taumafai e faaliliuese ai i tatou? E le o taumafai ea o ia e faagaeupu le fouvale, e faia auauna Ieova ia faitio ai e o taimua? ‘E le o malamalama le au toeaina. Ua faitio tele i latou, ma le fia pule,’ atonu o le tala lea a nisi. Atonu o le a oo lava ma faapea o le Vaega Pule o molimau a Ieova poo o isi uso ua aia fua i le saolotoga o loto fuatiaifo ma le “aia tatau” a tagata taitoatasi e faauiga ai le Tusi Paia. Peitai manatua upu faamaulalo a Iosefa: “E le o i le Atua ea faamatalaga.?” (Kenese 40:8) Ma e lei muai taʻua ea e Iesu faapea i nei aso mulimuli o le a tuuina atu ai i se faalapotopotoga o e faauuina, le “auauna faamaoni ma le mafaufau” le sauniunia o mea ʻai faaleagaga i le taimi tatau? (Mataio 24:45-47) Aloalo ese mai ia i latou o e taumafai e faamuamua o latou lava manatu tetee. E le gata i lea, ia faaeteete foi mai ia i latou o e mananao e tulei ese taofiofiga uma po o le folafolaina o le saolotoga, ma tuuaia faapea o Molimau a Ieova o ni pologa! Na faapea mai Peteru e uiga i aʻoaʻo pepelo: “Ua latou folafola atu ia te i latou le saʻolotoga, a o i latou lava ua fai ma pologa o le amio leaga; aua pe a toilalo se tasi i se tasi, ua nofo pologa o ia ia te ia.”—2 Peteru 2:1, 19.
9. O le a le uiga masani o i latou o e faitio i e o taimua?
9 O le a e masani ona avea ma faanaunauga o i latou o e faitioina le Sosaiete po o i latou o loo taimua? E le masasni ea ona o nisi faatatauga o le Tusi Paia ua aafia ai i latou taitoatasi? Nai lo le liliu atu i aʻoaʻoga aoga ma faatonuga, ua latou mananao i le faalapotopotoga ia faia se suiga. Sei o tatou faataʻitaʻia lenei mea i ni nai faaaʻoaʻoga:
10. E faapefea i le maumauai i teu anoai po o ituaiga teuga ona iu ai i le ‘tuuina atu o se mea e mautu ai le tiapolo’?
10 O se uso ua maumaututu i ona laei anoai po o ma le ituaiga o faiga o ana teuga. Ua lagona e le au toeaina e le o ia o se faataʻitaʻiga lelei ma ua le tuuina atu i ai ni faaeaga faapitoa, e pei o le i ai i le pulelaa e aumaia faatonuga. Ua oo ina loto tiga o ia, tuuaia faapea ua taumafai isi e aveesea lona saolotoga faa-Kerisiano. Peitai o le a o i tua o nei mafaufauga? E le masani ea ona o le loto faamaualuga se uiga fia tutoatasi, pe o se faanaunauga faatamaitiiti e tofu le tagata ma ona ala? E ui ina foliga mai o se mea itiiti, ae o se tagata e mafaufau faapea e mafai ona ia “tuu se mea e mautu ai le tiapolo.” Peitai o le alofa ma le loto maulalo e mafua ai ona tatou oofu ma teuteu i tatou lava ia taʻuleleia, ma i se auala e talisapaia e isi. E tatau ona tatou mananao e faia mea uma mo le agai i luma o le tala lelei ae aua neʻi faamalieina i tatou lava.—Roma 15:1, 2; 1 Korinito 10:23, 24.
11. O le a e mafai ona i tua o so o se fesiligia e uiga i le tulafono a le Atua ia taumamao ma le toto?
11 Sei o tatou faia se isi faaaʻoaʻoga. E masani lava ona tatou faalogo o fesili se tasi p oo le faasaina faale-Tusi Paia o le ʻaina o le toto e faatatau moni i le tuiina. Pe o le a o i tua o lea mafaufauga? Pe o le fefe ea—fefe neʻi leiloa le ola o i ai nei po o le ola o se ua pele ia te ia? Ua mou atu ea le Kerisiano faamaoni i tulafono a le Atua po o le vaaia o ni ala e suivaia ai le upu moni. O le taumamao mai le toto ina ia fagaina ai le tino ua tutusa lava lea ma le taumamao mai le faitaaga ma le ifo i tupua, a ua taʻusalaina uma i le iuga fono e tasi a le au aposetolo ma toeaina i Ierusalema na taʻitaʻia e le agaga.—Galuega 15:19, 20, 28, 29.
12. Ai se a e le tatau ai i le faamaoni sese ona faapogaia i tatou e solia mea manaomia faale-Tusi Paia faapea e tatau ona tatou alofia faatasiga faalauaitele ma e ua faateʻaina?
12 O nisi ua i ai le uiga faitio ua latou faapea mai o le faalapotopotoga a Ieova ua mamafi tele i le tipiesea o sootaga lautele ma tagata faateʻaina. (2 Ioane 10, 11) Peitai ai se a ua faapea ai le faalogona o ia tagata faitio? E i ai sa latou faia vavalalata faaleaiga po o se faamaoni sese i se uo ua latou faamuamuaina i lo le faamaoni ia Ieova ma ona ala ma mea e manaomia? Manatua foi, o le faaauau pea ona miomio faatasi i le lautele ma le tagata faateʻaina, tusa lava po o se aiga vavalalata, atonu o le a taʻitaʻiina ai le o ese i se faaiuga faapea o lona ala e leo mataʻutia tele, ma avea ma mea e atili ai ona faaleagaina o ia. Peitai, o le taofia o ia ituaiga aumea atonu e fausia ae ai ia te ia se manaoga mo le mea ua leiloa ma se faanaunauga e toe maua mai. Ua le sili pea ona lelei ala o Ieova, ma e mo le o tatou lava puipuiga.—Faataoto 3:5.
13. O le a le manatu e tatau ona tatou maua e uiga i le talaiga lautele mai lea fale i lea fale?
13 Atonu foi e faitio mai se tagata faapea ua le lagolagoina e le Tusi Paia talaiga i le lautele mai lea fale i lea fale. Peitai ua le mafua ea lea ona e le fiafia o ia i lenei galuega taua ma o loo vaavaai mo se faamolemolega e aloese mai ai? O le alofa mo le Atua ma tuaoi e uunaia ai i tatou e iloa le faanatinati o lenei galuega faasao ola. Ua toe manaomia ai foi le onosai. Sa tautala le aposetolo o Paulo i lona lava tutumau i le ‘molitino ia Iutaia atoa ma Eleni’ a o ia aʻoaʻo i le lautele mai lea fale i lea fale. (Galuega 20:18-21) Na i lo le faitio, pe le tatau ea ona tatou mulimuli ma le faamaoni i lana faataitaiga lelei? Tagai i le afe ma afe ua faapotopotoina i le “lafu e tasi” ona o faamanuiaga a Ieova i le galuega i le fale i le fale! (Ioane 10:16) Ma aua neʻi galo aoga lelei ua tatou maua i le aʻoaʻoina ma le aoaʻiina, i le faamalosia o lo tatou faatuatua, e ala i le o atu i lea fale ma lea fale ina ia maua tagata ma avatu i ai le tala lelei.—Faatusatusa Galuega 5:42; 1 Timoteo 4:16.
14. O le a se manatu e faapefea ona tatou gaoioi pe a faaleaga e e faitio i Molimau a Ieova faapea o perofeta pepelo?
14 O le mea mulimuli, sei o tatou manatunatu po o lea ua lomia e le Sosaiete i taimi ua tuanai e uiga i le faagasologa mai o mea na tutupu. O nisi tagata tetee ua latou faapea mai o Molimau a Ieova o ni perofeta pepelo. O nei tagata tetee ua latou ua fai mai o aso ua uma ona faatulaga, peitai e leai lava ni mea ua tutupu. Ua tatou toe fesili foi, O le a le faanaunauga o nei tagata saili masei? Pe o latou faalototeleina le mataala o tagata o le Atua, po o latou, taumafai e taʻuamiotonuina i latou lava ona ua pauū i tua ma mamoe ua le toe gaoioi? (1 Tesalonia 5:4-9) A e sili ona tatau o le a e te faia pe a e faalogo i ia ituaiga o faifaiga? A fesili se tasi pe o tatou ola i “aso e gata ai” o lenei faiga o mea, pe o le aumaia o ni manatu faafiafia faapea ua alofa tele le Atua ua mautinoa ai o le ana le aumaia le oti i le faitau miliona o tagata i le “puapuaga tele,” o lona uiga la ua uma ona sauniunia e lea tagata lona loto e faalogo i ia ituaiga faifaiga.—1 Timoteo 3:1; Mataio 24:21.
15. Na i lo le avea o ni perofeta pepelo, o le a ua faamaonia ua i ai i molimau a Ieova le faatuatua i le Afioga a le Atua ma ana folafolaga mautinoa?
15 Ioe, sa tatau i tagata o Ieova ona toe faatulaga mea na faatalitalia mai lea taimi i lea taimi. Ona o lo tatou pulunaunau, ua muamua ai ona tatou faatalitali i le faiga foi o mea na i lo le taimi fuafuaina a le Atua. Peitai ua tatou faaalia le faatuatua i le Afioga a le Atua ma ana folafolaga mautinoa i le faalauiloaina o lana feau i isi. E le gata i lea, o le manomia o le toe faatulagaina o lo tatou malamalama ua le avea ai i tatou o ni perofeta pepelo pe suia ai le mea moni o loo tatou ola nei i “aso e gata ai,” e le o toe mamao ae oo i le “puapuaga tele” ma faaava a i le ala mo le Parataiso faalelalolagi. Paga le valea o le manatu faapea o le faia o fetuutuunaiga manaomia mo mea na faatalitalia, o le a avea ma mea e fesiligia ai le tino atoa o le upu moni! Ua manino faamaoniga sa faaaogaina e Ieova ma o loo faaauau pea ona ia faaaogaina lana faalapotopotoga e tasi, faatasi ai ma le “auauna faamaoni ma le mafaufau” e fai ma taimua. O lea, ua tatou lagona ai e pei o Peteru, o le na faapea mai: “Le Alii e, a matou o ea ia te ai? o ia te oe upu o le ola e faavavau.”—Ioane 6:68.
16, 17. (a) E faapefea i le faatatauina o fetalaiga a Iesu i le Mataio 7:15-20 ona fesoasoani i le iloaina o le faalapotopotoga ua i ai faamanuiaga a Ieova? (e) O a nisi o fua lelei ua fuaina mai i olaga o auauna moni a Ieova?
16 Ua na o le parataiso faaleagaga lava, i totonu o molimau a Ieova, tatou te maua ai le alofa faataulagaina na fetalai Iesu e faailogaina ai ona soo moni. (Ioane 13:34, 35) O o latou fua leaga, ua folasia moni ai o i latou o perofeta pepelo. Peitai na taʻua e Iesu o laau lelei e atagia i o latou fua lelei. (Mataio 7:15-21) Ma maeu ni fua lelei ua tatou maua i le parataiso faaleagaga! O faatelega maoae ua i ai e toeitiiti i atunuu uma. Ua silia ma le 3,000,000 tagata usiusitai o le Malo o le Atua i le kelope o ni faamaoniga ola o lo ia i tagata o Ieova i le lalolagi.
17 Talu ai o loo aʻoaʻoina i latou e le Atua, ua faapea ona fuaina ai e Molimau a Ieova fua faa-Kerisiano i o latou olaga. (Isaia 54:13) Ua na o Molimau a Ieova ua vavae ese atoatoa mai i talitonuga faa-Papelonia. Ua na o i latou o i ai i se faalapotopotoga o tusia atoatoa mea o taʻua e le Afioga a le Atua e uiga i amioga le mamā faaleituaiga, faapaū tama, onā, gaoi, ifo i tupua, faailoga lanu, ma isi uiga ma faiga faalelalolagi. Ma ua na o i latou lava o loo usiusitai i le faatonuga e talai le tala lelei o le Malo o Ieova. (Mataio 24:14) Ua faasino mai ma le le fesiligia e le Afioga lava a le Atua o Molimau a Ieova ua na o lea le faalapotopotoga o tagata o loo i ai ana faamanuiaga!
18. Pe a fesagai ma aʻoaʻoga faaaposetate, o le a le tulaga e tatau ona i ai auauna a Ieova?
18 Ioe, o i latou uma o e tutumau faamaoni ma le faatuatua i le ala faa-Kerisiano, tatou te mautinoa o le upu moni a Ieova o loo matagofie pea, faamalieina ai—ma sili atu na i lo le taimi na latou muai faalogo i ai. O lea la, ia mausali i lou fatu o le a e le tago i mea oona o loo mananao aposetate e te tofo i ai. Faalogo i faatonuga poto ma le mausali a Ieova ia matua aloese atoatoa mai e taufaasese ia te oe, ma faaliliu oe i ala o le oti. Afai tatou te alolofa ia Ieova ma o tatou loto atoa, ola, ma le mafaufau a o tatou alolofa i o tatou tuaoi e pei lava o i tatou, o le a tatou le tuua la se nofoaga e utufiaina ai i mafaufauga faaaposetate. (Mataio 22:37-39) O le a tatou le “tuuina atu . . . se mea e mautu ai le tiapolo” ma o le a le i ai se faanaunauga e faatilotilo ai i se tasi nofoaga. O le a le ‘vave luluina o tatou loto’ e ni aʻoaʻoga taufaasese.—2 Tesalonia 2:1, 2.
19. O le a le ala e faamautinoa ai ‘e le mafai ona faaʻoleʻole se tasi ia i tatou i le taui’ o le ola e faavavau?
19 Sei o tatou talisapaia lo tatou faaeaga o le i ai lea i le parataiso faaleagaga, tatou te olioli ai i le tele o faamanuiaga e faatamaoaiga ai. Ua tatou iloa i latou o loo pipii ma le faamaoni i upu o le ola e faavavau. O lea ia tumau i le aumea vavalalata ma i latou, i le iloa o i latou o o tatou uso ma tuafafine moni ma le faamaoni i le faatuatua. Sei faaauau ona ia i tatou le olioli e tasi ma le fiafiaga ina o tatou muai aʻoaʻoina le upu moni, faatasi ma le mautinoa o le taui sili o le ola e faavavau i le faiga fou o mea a Ieova. E pei ona naunau Paulo e taʻu mai: “Aua neʻi faaʻoleʻole se tasi ia te outou i le taui”!—Kolose 2:18.
E Mafai Ona E Taliina?
□ Ai se a ua moni ai faapea e leai se tasi ua muai iloa o le a lafoaia le faatuatua?
□ E faapefea e le loto mafatia, faamaualuga, ma le le onosai ona tatalaina se nofoaiga i le fatu mo le Tiapolo?
□ O le a e masani ona i tua o faitioga i fautuaga ua tuuina mai e i latou o taimua?
□ O a fua o fuaina mai e Molimau a Ieova e faamaonia ai o i latou o le faapotopotoga e tasi ua faaaogaina e le Atua?
[Fesili mo le Suʻesuʻega]
[Ata i le itulau 16]
O le teena o fautuaga, e mafai ona tatou “tuuina ai . . . se mea e mautu ai le tiapolo”
[Ata i le itulau 17]
O le faamaualuga e mafai ona taʻitaʻi atu ai i se paʻū atonu e lē taulau ona toe faafoisia mai ai se tasi.
[Ata i le itulau 19]
O auauna maelega ma le fiafia a Ieova latou te ‘le tuuina atu se mea e mautu ai le Tiapolo’ po o manatu faaaposetate