‘Aua Neʻi Vave Luluina o Outou Loto’

“O lenei, matou te aioi atu ia te outou . . . ina neʻi vave luluina o outou loto, pe faaatuatuvaleina i se agaga, po o se upu, po o se tusi, peiseai nai ia i matou.”—2 TESALONIA 2:1, 2.

1. O a ni mafaufauga fiafia e manatuaina pea ao tatou toe manatunatu i le taimi na tatou muai aʻoaʻoina ai le upu moni?

O MANATUNATUGA FIAFIA e masani lava ona manatuaina e Kerisiano a o manatunatu i le taimi na tatou muai aʻoaʻoina ai le upu moni mai le Afioga a le Atua. O se tulaga matagofie, fetaui ma le faamalie loto. Maeu le faatumuina o o tatou loto i le talisapaia ina ua tatou aʻoaʻoina e faatatau ia Ieova ma ona uiga matagofie, e aofia ai lona alofa tele ma le alofa mutimutivale. Sa faafiafiaina i tatou ina ua tatou auau faatasi ma uso talitonu o e faaalia le alofa moni faa-Kerisiano ma ola ae e tusa ma mataupu silisili faale-Tusi Paia.

2. O le a le faamoemoe ua ia i tatou o auauna a Ieova, ma o le a le tulaga faaleagaga ua tatou i ai?

² Maeu lo tatou loto faafetai ina ua aʻoaʻoina ua toe o se aga ona aveesea lea e Ieova tiga, faanoanoaga, e oo lava i le oti.  (Faaaliga 21:3, 4) Sei manatu, i le ola e faavavau i se lalolagi parataiso, faatasi ai ma le soifua maloloina lelei i le atoaga o le fiafia. Sa foliga mai atonu e le taulau ona e lelei tele. Peitai e moni. Sa lagolagoina e le Afioga a le Atua. O se mea faamaniti tino! E aunoa ma le masalosalo, ua tutusa lelei o tatou lagona ma soo o Iesu ina ua faaali tino o ia ia i latou ina ua mavae lona toetu. Sa la fetautalatalaʻi: “E lei mu ea o ta loto i totonu ia te i taua, ina ua fetalai o ia ia te i taua i le ala, ina ua faamatala mai foi e ia o Tusi ia te i taua.?” (Luka 24:32) Ioe, o le aʻoaʻoina o le upu moni ma tuuina atu ai o tatou ola i le Atua, ua tatou o atu ai i tatou lava i totonu o se parataiso faaleagaga. Maeu se faamanuiaga!

3. E faapefea i le Tiapolo ma isi e tetee mai ona sailia le aveesea o aoga o le parataiso faaleagaga mai ia i tatou?

³ A e peitai e le o se mea tatou te manatu faatauvaa i ai le i ai i totonu o le parataiso faaleagaga a Ieova. Na tatou o mai lava i tatou i totonu o lenei parataiso i la tatou faitalia e mafai foi ona tatou o ese atu i fafo (po o le tuuesea i fafo) pea tatou le talitonu po o le solia ma le loto tulafono amiotonu a Ieova. O le mea moni, o le a le tupu lenei mea pe afai tatou te tausia ia malosi lo ‘tatou uluai alofa,’ ma faaauau ona tatou talisapaia fuafuaga uma a Ieova mo le tausia pea o i tatou ia malolosi faaleagaga. (Faaaliga 2:4) Peitai o le Tiapolo ma isi o loo tetee i le tapuaiga moni ua popoto tele i le taufaasese. E le tatau ona galo ia i tatou o loo latou tutu ma sauniuni lelei lepetia lo tatou faamaoni pe afai latou te mafaia. O ō latou manatu ua fuafuaina e faavaivaia ai lo tatou faatuatua, e maalili ai lo tatou alofa mo le Atua, e tuuina ai masalosaloga i o tatou mafaufau—ioe, ina ia foliga mai ai le parataiso faaleagaga e le o se parataiso.

4. O le a e ono iu i ai pea tatou faatagaina lo tatou faatuatua e faavaivaia ma faaavanoaina le tuputupu ae o masalosaloga matuiā?

⁴ I se isi fuaitau faafaataoto ua tatou oo mai ai i se manatu ua faigata, atonu e matua le mafai lava, ona vaai atu ai i le vaomatua o le parataiso faaleagaga talu ai le taulai atu o le vaai i laau o ni tagata e le lelei atoatoa o loo i ai nei i totonu. o le fiafiaga sa ia i tatou i le aʻoaʻoina o le upu moni o le Afioga a le Atua, le faamoemoe sili na ia i tatou, o le alofa na tatou faatupuina mo le Atua ma o tatou uso faaleagaga, ma lo tatou maelega mo le auaunaga ia Ieova o na mea uma e mafai ona mavae atu. Afai e le faia ni taumafaiga malolosi e faafoisia mai ai so o se solomuli i tua faaleagaga, o le a le pine a e vaaia manaoga lelei o Ieova o se faatiga ia i tatou. O mea ʻai lelei faaleagaga mai “le auauna faamaoni ma le mafaufau” atonu o le a foliga mai e faatauvaa, ma o le auuso o auauna agaalofa a Ieova o le a foliga mai e pei o se auaiga feainai. Ona pau la le loto malie, faalemanuia lea, o le a sau i le fasia o ona uso auauna i faifaiga ma tala e afaafa ona moni.—Mataio 24:45-51.

5. E faapefea e le mea ua melea e se tasi ona mafai ona faatusatusaina i le mea na leiloa ia Atamu ma Eva ina ua tuliesea mai le Parataiso i Etena?

⁵ Ioe, e le gata ina tatou le maua faamanuiaga o le parataiso faaleagaga nei a e peitai, e sili atu ona mataʻutia, o le leiloa ai o le faamoemoe o le ola e faavavau i le lalolagi Parataiso. Ma e mafai ona melea ona o le mafuaaga lava e tasi lea na leiloa ai e Atamu ma Eva le Parataiso. Na i ai laua mea uma la te manaomia ina ia atoatoa lo la fiafia ma mafai ai ona ola e faavavau. Peitai o le tutoatasi—o se aʻoaʻoga ese—na sili atu ona taua ia i laua na i lo le usiusitai ia Ieova ma maua ai faamanuiaga i Etena. Sa faavaleaina Eva. E ui ina e lei faaseseina Atamu ae sa ia faataga le malosi mai lana avā, e mafua ai ona agasala foi o ia. O lea, na tuuesea ai i fafo i laua mai le faatoaga, e ola i se olaga fitā seia oo ina la oti. Na melea le faamoemoe o le ola e faavavau mo i laua ma la aumaia ai le tuufaasolo mo le agasala ma le oti i luga o a la fanau. (Kenese 3:1-7,  14-19, 24; 1 Timoteo 2:14; Roma 5:12) Paga se taui mataʻutia e totogia ai lo la fia tutoatasi!

6. (a) O le a le manatu na faaalia e Paulo e faatatau i nisi i le faapotopotoga i Korinito? (e) Sa faapefea e lenei manatu e tasi ona faaalia i mea na tusia i le faapotopotoga i Tesalonia?

⁶ Na faaalia e le aposetolo o Paulo lona manatu mamafa i ai: “A e ou te fefe, ina neʻi pei ona faaseseina o Eva e le gata i lana togafiti, e faapea ona faaleagaina o outou manatu ina ia le tonu ia Keriso.” (2 Korinito 11:3) Sa iloa e Paulo le tatau ai ona ia tusi atu e faatatau i ni aʻoaʻoga sese sa faasalalauina i na ona po. I lana tusi e lua i le faapotopotoga i Tesalonia, na ia tusi atu: “O lenei, matou te aioi atu ia te outou, . . . ina neʻi luluina o outou loto, pe faaatuatuvaleina i se agaga, po o se upu, po o se tusi, peiseai nai ia i matou, peiseai ua oo mai le aso o Keriso. Aua neʻi faasese se tasi ia te outou i se togafiti e tasi.”—2 Tesalonia 2:1-3.

Aua Neʻi Fesootai ma Aposetate

7. (a) O a fesili ua laga pe a mauaina mai lomiga faaaposetate i le meli? (e) E tusa ai ma le leoleoina o se tasi i aafiaga mai aposetate, ai se a e mataʻutia ai le manatu faapea ua lava lou malosi?

⁷ O lea, o le a e te faia pe a e fesagai ma aʻoaʻo faaaposetate—manatunatuga faaoleole—faapea o talitonuga faa-Molimau a Ieova e le o se mea moni? Mo se faataʻitaʻiga, o le a e te faia pe a e maua se tusi po o se lomiga, tatala, ma iloa i le taimi lava lea e sau mai se aposetate? Pe o lou fia iloa ea o le a mafua ai ona e faitau ai, tau lava ina iloa po o le a o fai mai ai? Atonu e oo lava ina e manatunatu ane: ‘O le a le aafia ai aʻu; Ou te malosi tele i le upu moni. Ma, e le gata i lea, afai ua ia i tatou le upu moni, e leai la se mea e fefe ai fua. E mafai e le upu moni ona tu mo le tofotofoga.’ O le mafaufau i lenei itu, ua fafagaina ai e nisi o latou mafaufau i manatunatuga faaaposetate ma pauū atu ai i le mailei ma faailoga fesili ma masalosaloga. (Faatusatusa Iakopo 1:5-8) O lea ia manatua le lapataiga i le 1 Korinito 10:12: “O lenei, o lē manatu o loo o tu ia, ina faaeteete ia neʻi paʻū.”

8. O le a le fesoasoani e manaomia e nisi o ē ua faavaivaia e masalosaloga?

⁸ Faatasi ai ma le fesoasoani alofa mai uso o loo manatu mai, ua toe malolosi ai nisi sa i ai ni faaletonu na luluina i ai e aposetate, ina ua mavae se vaitaimi o atuatuvalega ma faalogona ootia e faateʻia ai faaleagaga. Peitai o lenei tiga sa ono mafai ona alofia. I le Faataoto 11:9 ua taʻu mai ai ia i tatou: “O le gutu o le faalematau e fano ai lē la te tuaoi; a o le poto e laveaiina aʻi ē amiotonu.” Na taʻu atu e Iuta i soo Kerisiano ia “outou alolofa atu i nisi ma ia faatatau; . . . ia sei ia te i latou mai le afi.” (Iuta 22, 23) Sa fautua ma Paulo i le ovasia o Timoteo ina ia aʻoaʻo “atu ma le agamalu i e ua finau mai; pe mafai lava le Atua ona foai atu ia te i latou le salamo, ina ia latou iloa lelei le upu moni; ia latou ala mai foi na moe i le mailei a le tiapolo o e ua maua e ia, ina ia faia lona lava finagalo.”—2 Timoteo 2:25, 26.

9. O le a le iuga matuiā mo i latou e lafoaia le tapuaiga moni?

 ⁹ Ma le faanoanoa lava, o nisi ua o tau i le pogisa atoatoa, ua oo lava ina toe foi i aʻoaʻoga sese a Kerisinetoma. Sa tusia e le aposetolo o Peteru e uiga i auga mataʻutia o nisi sa muai savavali i le upu moni ae ua toe fulitua. Na ia faapea mai: “Auā afai na latou sosola ai mea leaga a le lalolagi ina ua iloa lelei o le Alii o le Faaola lea o Iesu Keriso, a e toe faalavelaveina, ma toilalo i latou i na mea, ona tele ai lea o le leaga o lo latou iuga i lo latou amataga.” Fai mai Peteru ua pei i latou o le ulī na toe foi i lona lava puaiga ma le puaa na faataeleina ua toe foi e taafili i le palapala.—2 Peteru 2:20-22.

10. (a) O le a fa a Ieova e uiga i le faalogo atu i aposetate? (e) O le faitauina o tusitusiga faaaposetate e tutusa ma le ā?

¹⁰ Afai e taʻu mai e se uso a tagata i ai tatou, ‘Aua e te faitau i lenei’ po o le, ‘Aua e te faalogo i lena,’ atonu e tofotofoina i tatou ia le amanaiaina le fautuaga. Peitai ia manatua, o lenei tulaga ua taʻu mai e Ieova ia i tatou e ala i lana Afioga mea e tatau ona fai. Ma o le a ua ia fetalai ai e uiga i aposetate? “Ia outou liliu ese foi ia te i latou.” (Roma 16:17, 18); “aua lava neʻi tou feoai” ma i latou (1 Korinito 5:11); ma “aua foi tou te talia [i latou] i o outou fale, aua foi tou te ofo alofa ia te [i latou]” (2 Ioane 9, 10). O ni upu e matua faamamafa nei ma ni faatonuga manino. Afai, ona o le fia iloa ua mafua ai ona tatou faitau i ni lomiga a se tagata ua iloa o se aposetate, pe ua le tusa ea lena ua tatou valaaulia lenei fili o le tapuaiga moni i totonu o o tatou aiga tatou te alaala faatasi ma faamatala mai ona manatu faaaposetate?

11, 12. (a) O le a le faataʻitaʻiga ua tuuina mai e fesoasoani ia i tatou ia talisapaia e mafai ona tatou aafia i le faitauina o lomiga faaaposetate? (e) E mafai faapefea ona faatatauina lenei i le manatu mai o Ieova i ona tagata?

¹¹ Sei tatou faataʻitaʻia le tulaga i le auala lenei: Faapea ua maua e lou atalii talavou ni lomiga o ata o amioga matagā faaleituaiga, mai le meli. O le a o le a e faia? Afai sa naunau o ia e faitau i ai ona o le fia iloa, pe o lea e fai atu: ‘Ioe, atalii, faitau i ai. O le a le afaina ai oe. Mai le taimi o e itiiti sa ma aʻoaʻoina oe e leaga amioga le mamā. E le gata i lea, e manaomia ona e iloa mea o loo faia i le lalolagi ina ia e iloa ai e moni e matuā leaga lava’? Pe i le a e talanoa atu ea i se auala faapena? E leai lava! Peitai, o le a mautinoa ona e faasino atu i ai le mataʻutia o le faitauina o lomiga leaga faapea ma manaomia ai ona susunuina. Ai se a? Aua po o le a lava le malosi o le tagata i le upu moni, a e afai na te fafagaina lona mafaufau i manatu sese ua maua i ia ituaiga lomiga, o le a aafia ai lona mafaufau ma le fatu. O se faanaunauga sese o loo tumau pea ona totoina i le lotolotoi o le fatu mulimuli ane e iu ina faatupuina le manao i faiga sese faaleituaiga. O le iuga? Fai mai Iakopo a to le tuinanau sese, ona fanau mai lea o le agasala, ma o le agasala e taʻitaʻiina ai i le oti. (Iakopo 1:15) O lea ai se a e amata ai se tulaga e faigata ona toe taofi?

¹² O lea, afai tatou te gaoioi ma le maumaututu e puipuia a tatou fanau mai le faaleagaina e lomiga leaga, pe tatou te le faatalitalia ea la o le a faapea foi ona lapataia i tatou e lo tatou Tama alofa faalelagi ma puipuia i tatou mai le faitaaga faaleagaga, e aofia ai faiga aposetasi? Ua ia fetalai ia, Alo ese mai ai!

13. O a e mafai ona faia pe a laga ni fesili tauluʻiluʻi e faavae i tusitusiga a aposetate, a o tatou auai i le galuega talai?

¹³ A e peitai a faapea o loo tatou talaʻia le tala lelei ma ua faatu mai e tagata fesili po o teteega e pei lava ona faia e ē tetee? O le mea moni, afai e le faamaoni se tagata a e na ona manao e finau, e masani ona sili lo tatou o ese mai ma o atu i se isi aiga o sosoo ai. A e afai e fesili ma le faamaoni se tasi e uiga i ni tuuaiga faapitoa a se aposetate, o le a e tatau ona faia? Muamua, e mafai ona tatou fesili po o le a moni, ua mafua ai ona aafia. Atonu e na o le tasi pe lua nai ona manatu. Ona mafai lea ona tatou pii mau atu i manatu ia ma tali i ai mai le Tusi Paia, ma  mai lomiga a le Sosaiete, ma mai mea ua tatou iloa e moni e uiga i le mataupu. E le manaomia na o tatou faaiuina faapea e tatau ona tatou faitauina se tusi poo se pepa ua tumu i tala faifai ma upu moni faaafaafa ina ia mafai ona faamaonia le sese o tuuaiga pepelo ma aʻoaʻoga a ē tetee mai.

Faalagolago ia Ieova

14. O le a le manatu alofa na i lo tatou Tamā faalelagi mo i tatou, ma ai se a e tatau ai ona tatou faalagolago atoatoa ia te ia?

¹⁴ A o tatou agai atu i luma, i le atiina ae o le faatuatua ma galulue maelega i le auaunaga o le Malo, e mafai ona tuu ma le mautinoa lo tatou faatuatuaga ia Ieova, i le iloa, o ia o lo tatou Tamā alofa faalelagi, ma e finagalo o ia i le mea e sili mo i tatou. Ua aʻoaʻoina i tatou e le Atua; na te lapataia foi i tatou. Ua ia faia faapea e ala i lana Afioga ma ala mai i faatonuga manino a lana faalapotopotoga vaaia. Afai tatou te ole atu i se matua alofa mo se areto ma se iʻa, na te le aumaia ia i tatou se maa po o se gata. O le a le faaseseina foi pe faavaleaina i tatou e Ieova. (Mataio 7:7-11) Peitai, o le a le puipuia atoatoa i tatou e le Atua mai faaosoosoga po o pepelo tau faaoleole ma manatunatuga faatiapolo. Ua ia fetalai e uiga ia te ia: “O aʻu o Ieova, o lou Atua, o loo aʻoaʻo ia te oe i mea e aoga, o loo taʻitaʻiina oe i le ala e te ui ai.” (Isaia 48:17) Ioe, o Ieova na te ‘aʻoaʻo i tatou i mea e aoga,’ Ua ia taʻu mai ia i tatou ia o ese mai aposetate ma a latou aʻoaʻoga, ma o lenei tulaga e mo lo tatou puipuiga. E aafia ai o tatou ola.

15. O a lapataiga na aumaia e le aposetolo o Paulo e faatatau i e taumafai e taʻitaʻieseina soo?

¹⁵ Sa lapataia e le aposetolo o Paulo uso Kerisiano toeaina: “E tupu mai foi ia te outou lava tagata e tautala mai mea faapiopio, e fetoso ese ai le au soo ia mulimuli ia i latou.” (Galuega 20:30) Afai tatou te faalogologo pea i finauga taufaasese ma manatu faaoleole o “mea faapiopio’ e mafai ona faalogoina e pei e saʻo. O le umi ona vaavaai o Eva i le laau faasaina ma faalogologo i manatu piopio o le Tiapolo, o le tele foi lea o lona talitonu e moni o ia. Na lapatai mai Paulo: “Ia outou, neʻi faatagataotauaina outou e se tasi i le poto le aoga e faasese ai, e tusa ma le upu tuu a tagata, e tusa ma mataupu a Keriso.” (Kolose 2:8) Na taʻua foi e le aposetolo “ua latou [aposetate] faasese i loto o tagata ua le manatu leaga, i lo latou faaneenee ma alofa faavivii.” (Roma 16:17, 18; faatusatusa 2 Korinito 11:13-15.) Ioe, o le mea moni faapea e toaitiiti nisi ua taʻitaʻia e sea e ia ituaiga manatunatuga ua le faapea ai e tatau ona tatou mulimuli ia i latou. E ui i lea, e manaomia ona tatou mataala pea.

16. O le faatatauina o lapataiga faale-Tusi Paia o le a fesoasoani ai ia i tatou e tetee i taumafaiga a Satani e faasese ma taʻitaʻieseina tagata mai le tapuaiga moni?

¹⁶ O togafiti a le Tiapolo e lei suia lava talu Etena. Na te faaaogaina fesili faaoleole ma se faatosinaga i manaoga totino. Sa tusia e le aposetolo o Peteru: “E pei ona i ai ia te outou, o aʻoaʻo pepelo, latou te faatupuina faalilolilo o vaevaega e fano ai . . . o le matapeapea foi e fai ma outou e i latou ma mea faatau i a latou upu pepelo.” (2 Peteru 2:1-3) O se mea pepelo ua fuafuaina ia foliga mai pe faalogoina e moni. I le 2 Timoteo 2:14-19, ua faamamafa mai ai e Paulo le taua  o le faaaogaina Afioga a Ieova e faasaʻoina ai mataupu peitai ua lapatai mai le manaomia ona alo ese mai aposetate, o a latou ‘upu leaga ma le lē aoga,’ aua, fai mai o ia, “o a latou upu foi e aati pei o se papala.”

17, 18. (a) E faapefea ona avea aʻoaʻoga faaaposetate e pei o se papala? (e) O lea le lapataiga ua aumaia e le aposetolo o Peteru e uiga ia i latou o e taumafai e faaliliuese i tatou mai le tapuaiga moni? (i) O a fesili o le a taliina i le suesuega o sosoo ai?

¹⁷ O le mea moni o se faatusatusaga fetaui lea! O manatu faaaposetate ua pei o ni palapala, a e vave ona faasosoloina le oti faaleagaga. Ma talu ai o tagata o le faapotopotoga ua pei o se tino e tasi, ua i ai la le mataʻutia ina neʻi aafia ai isi. Afai o lē na faasalalauina aʻoaʻoga faaaposetate ua le mafai ona toe faafoi i se malosi faaleagaga e ala i le alofa a e i le faatatauina aʻiaʻi o le faamalologa o le Afioga a le Atua, o le tipiesea o lea tagata (faateʻaina) atonu ona pau lea o le gaoioiga mo le puipuia o isi sui o le tino. (Faatusatusa Tito 1:10, 11) Aua neʻi aafia oe i le papala mate faaleagaga! Tausisi pea i le malosi lelei faaleagaga i le alofia lea mai le faaleagaina i manatu faaaposetate. Usitai i le fautuaga poto i le 2 Peteru 3:17, 18: “O lenei, le au pele e, ia outou faaeteete ia te outou, auā ua muai iloa e outou, neʻi taʻitaʻieseina outou i le sese o e faaletaupulea, tou te pauū ai i le mea sa outou tumau ai. A ia tutupu outou i le alofa tunoa ma le poto i le Alii o lo tatou Faaola lea o Iesu Keriso.”

¹⁸ A e peitai e faapefea ona tatou puipuiga i tatou lava mai aposetate? E faapefea ona tatou taofia o tatou fatu mai le taliaina o manatu faaaposetate? O nei fesili o le a talanoaina i le mataupu o sosoo mai ai.

O E Manatua

□ E mafai faapefea ona tatou melea aoga o le parataiso faaleagaga a Ieova?

□ Ai se a ua tutusa ai le faitauina o tusi faaaposetate ma le faitauina o lomiga matagā faaleituaiga?

□ O le a e mafai ona faia pe a fesiligia i tatou e uiga i ni manatu faaaposetate?

□ Ai se a ua pei ai aʻoaʻoga faaaposetate o ni papala?

[Fesili mo le Suʻesuʻega]

[Ata i le itulau 12]

Pe e te faaalia le poto i le faaleagaina o tusi faaaposetate?