Mea Taua Mai le Tusi Paia Salamo 73 e oo i le 106

“Faamanū Atu Ia Ieova”—Ai se a?

O ai o i tatou e le loto faafetai pe a tatou mafaufau i mea uma na faia e Ieova, o loo faia, ma o lea ia faia mo i tatou? O le mea moni, e ao ona uunaia ai tatou e o tatou loto e faamanū i lo tatou Atua. Ua ia i tatou se pogai taua e faamanūina ai Ieova ua matua faamamafaina mai i Tusi e Tolu ma le Fa o Salamo. A o tatou talanoaina nei le Salamo e 73 e oo i le 106, fesili ifo ia te oe, ‘O a ni mafauaaga e tatau ai ona ou faamanūina Ieova?’

Aua le Mataʻua e E Amioleaga

Faamolemole faitau i le Salamo 73 e oo i le 77. Sa tusia nei mea e Asafo, ma e foliga mai na aofia ai ma ona atalii. Na taʻutino e Asafo faapea na ia matauʻa i e amioleaga—seia oo ina poto o ia. (Salamo 73) Ona oo mai lea i le auega ina ua faaumatia Ierusalema. (Salamo 74) Ona sosoo ai lea ma faamatalaga o le loto faafetai i le Atua “matautia” ona mulimuli mai ai lea ma le tatalo i le “Atua silisili” ina ia manatua ona tagata puapuagatia.—Salamo 75-77.

◆ 73:24—O le a le “manuia” na ave i ai e Ieova le faisalamo?

Ina ua talisapaia e le faisalamo faapea ‘o le faalatalata atu i le Atua sa lelei mo ia,’ sa ia lagona e sili ona lelei o e amioleaga na i lo o e amiotonu. (Salamo 73:2-12, 28) O lona faatagaina o “tulafono” a le Atua e taʻitaʻiina o ia na iu ai i lona maua o le “manuia,” o le finagalo malie o Ieova, o se faiā faamanuiaina ma Ia.

◆ 76:6—Na faapefea ona ‘moe gagase’ “le kariota” ma le “solofanua”?

Na aʻoaʻoina tagata Isaraelu ina ia faalagolago ia Ieova a e le o kariota ma solofanua. (Salamo 20:7; Faataoto 21:31) Sa leai se pogai o le a latou matataʻu ai i solofanua ma kariota matautia a ō latou fili, aua e mafai ona faavaivaia e Ieova o latou fili, ma ‘faamomoegaseina’ i latou. O le mea o loo taua i nei “o le moe e faavavau”—o le oti. (Ieremia 51:39) O se lapataiga lenei i taʻitaʻi o le lalolagi o ‘aso nei o ē o loo faalagolago i ā latou auupega.—Salamo 76:12.

Lesona mo i Tatou: O loo maua i le Salamo 75 se lapataiga faasaga i le faamaualuga i lona faapea mai, “Aua tou te matua faamaualuga lo outou nifo.” (Fuaiupu e 5) O le nifo o le faatusa o le malosi, le pule. (Teuteronome 33:17) O le faamaualugaina o se nifo o se tasi o le amio faamaualuga. Ua lapataia i inei e le faisalamo tagata amioleaga ina ia aua neʻi faasausili ma faalagilagi o latou tulaga e foliga mai e saogalemu ma malolosi, aua ‘o nifo uma foi o e amioleaga, e vavaeeseina’ e Ieova. (Salamo 75:10) O le iloa o lenei mea e faalaeiauina ai auauna a le Atua e tumau ma le faamaoni ia te ia e ui lava ina foliga mai e manuia e amioleaga.—Faatusatusa le Salamo 144:11-15a.

Gauai i “Le Silisili Ese”

Faitau le Salamo 78 e oo i le 83. O loo faaauau ai i le Salamo a Asafo. O loo toe taʻua ai lesona o talafaasolopito o Isaraelu. (Salamo 78) Ona auē ai lea ona o le faaumatiaga o le malumalu, a e mulimuli ane o se tatalo mo le toe faafoisia o Isaraelu. (Salamo 79, 80) Ina ua uma se pese na faaatagia ai le faasaoina e le Atua ma apoapoaiga i ona tagata ina ia usiusitai ia te ia, ona faia lea o ni olega ia Ieova ina ia faia ni faamasinoga i luga o faamasino iuvale ma luga o fili o Isaraelu.—Salamo 81-83.

◆ 82:1—Ua faapefea ona faamasino le Atua i “luma o atua”?

O le mea moni, “o atua” o faamasino na o Isaraelu. Sa taʻua i latou o atua ona o le malosi e faia ai faamasinoga. I le avea o le Faamasino Sili sa ia Ieova le aiā tau atua e oo atu ai i totonu o na faamasino aʻoaʻo i latou ona o le le faia o le faamasinoga tonu e tusa ai ma ana tulafono.—Isaia 33:22; Salamo 82:2-4.

◆ 83:9-15—O le taui ma sui ea le lagona o le faisalamo?

E leai lava, sa tatalo o ia mo le faia o le faamasinoga a le Atua i luga o i latou “ua ʻinoʻino ia Ieova. (Fuaiupu 2) O lea, o isi atunuu ua latou iloa faapea o le Atua e ou le suafa o Ieova ua na o ia lava o le “Silisili Ese i le lalolagi uma.” (Fuaiupu 18) O lenei faaalia o le mana o le a iu i le faasilisiliina o le suafa o le Atua, o Ieova, i le lalolagi aoao.

Lesona mo i Tatou: Faapea o Ieova na te matua tauia i latou o e usiusitai ia te ia ua faaali i le faasino atu i le “gaʻo o saito e sili ona lelei.” (Salamo 81:16 N.W.) O le upu “gaʻo” i inei o loo faaaogaina e faaatagia ai le silisili ona lelei. (Faatusatusa le Salamo 63:5) Afai e ‘faalogo Isaraelu i le siufofoga o Ieova’ atonu o le a ia faamanuia i latou i le “gaʻo” o saito”—e sili ona lelei, sili ona manaomia i mea uma lava. (Salamo 81:11; Teuteronome 32:13, 14) O le a faapena foi ona faatamaoaiga mai i tatou e Ieova i faamanuiaga pe a tatou ‘faalogo i lona siufofoga.’—Faataoto 10:22.

Faalatalata Atu i le Atua

Faitau le Salamo 84 e oo i le 89. Ua faamatala ai e faisalamo le momoo mo le fale o Ieova. (Salamo 84) Ona sosoo ai lea ma le o le atu o e na toe foi mai le tafeaga mo le aveesea o le toatamai o le Atua. (Salamo 85) Sa tatalo Tavita mo le taʻitaʻi ma le puipuiga, ma le mautinoa lava o le a tali mai Ieova ia te ia. (Salamo 86) O le pese e faatatau i ‘e na fananau i Siona’ ma mulimuli mai ai ma le faatoga a le tagata ua puapuagatia. (Salamo 87, 88) Ona sosoo mai ai lea ma le salamo e faatatauina ai le alofa tunoa o Ieova e pei ona faaalia i le feagaiga faa-Tavita.—Salamo 89.

◆ 84:3—Ai se a ua taʻua ai manu?

O le faisalamo o se o le ituaiga o Levi e tupuga mai ia Koru, ua manao tele o ia e fia alu atu i “afioaga” o Ieova. (Fuaiupu 1, 2) Peitai sa i ai le faitau sefulu afe o sa Levi. E na o le  faatasi i afa tausaga uma ona tofia o vasega taitasi o le ituaiga o Levi e auauna i le falefetafai mo le vaiaso e tasi. I le faatusatusa atu i ai e oo lava i manuiti e sili atu ona lelei o latou nofoaga tumau i le malumalu i le faia ai i na o o latou ofaga. Maeu se fiafia o le faisalamo e vivii atu ia Ieova i le faapena foi ona i ai o ia i le fale o Ieova!

◆ 89:49—O a nei gaoioiga o “alofa anamua na e tauto ai”?

O le faaupuga “alofa . . . e tauto ai” e faasino i le feagaiga o le Malo ma ona taualumaga uma. I taimi o faigata, sa tatau ai mo Isaraelu ona toe taʻua atu i luma o Ieova nei folafolaga, e le ona ua latou le mautinoa le feagaiga, a e ona o le auala ua latou ole atu ai i le Atua e faavae i lena.

Lesona mo i Tatou: Ua faamamafa mai e le Salamo 85 le mea ua ala ai ona tatou moomoo mo le faiga fou a le Atua. O loo taʻua puupuu ai faamanuiaga i mea faitino. (Fuaiupu 12) A o loo sili ona faamamafaina faamanuiaga faaleagaga: o le alofa ma le faamaoni, ma le filemu. (Fuaiupu 10-13) E le manatu tele Ieova i moomooga i mea faitino a e ua faailoa mai faapea o faamanuiaga faaleagaga i le faiga fou e ao ona avea o se malosi sili lea e uunaia ai i tatou.

‘Ua Fai Ieova ma Tupu!’

Faitau le Salamo 90 e oo i le 100. Sa faatusatusa e Mose le faavavau o le Atua ma le olaga puupuu o le tagata, ma i lea ua ia faatauaina ai Ieova o le puna o lo tatou saogalemu. (Salamo 90, 91) O uiga silisili o Ieova ua viia ma ua faamaualugaina, ma o isi Salamo o i luma o loo faatauaina le mana o le Atua, lona alofa, le amiotonu faapea foi ma le matua o le Malo.—Salamo 92-100.

◆ 90:10—Sa lei ola ea Mose e sili atu i le 80 tausaga?

O Mose, o le na ola mo le 120 tausaga sa lei ese o ia mai tagata lautele. Ona o le tupulaga le faatuatua na o mai Aikupito, i latou na tusia e “afua mai i e ua luafulu o latou tausaga atoa ma e ua matutua ai” e tatau ona oti i le 40 tausaga, e tusa ai ma mea na taʻua e Mose. (Numera 14:29-34) O le faamatalaga faapea, i le taimi o le oti o Mose “e lei puaoa ona mata, e lei mavae foi o lona malosi” e faaalia ai sa ia te ia le malosi mai le Atua e ola ai.—Teuteronome 34:7.

◆ 95:3—Ua faapefea ia Ieova ona “Tupu tele lava o ia e sili i atua uma lava.”?

I le avea o le Silisili ese i le Vateatea, ua avea ai Ieova ma Tupu i luga o atua pepelo uma lava, e sili ia i latou uma. E matua leai lava sina faatusatusaga o Ieova le Atua ma so o se agelu po o so o se isi lava mea faapea e mafai ai ona tuapaia, e aofia ai ma atua pepelo e le o i ai.

Lesona mo i Tatou: Ua faatauaina e le Salamo 91 le isi mafuaaga e tatau ai ona tatou faamanūina Ieova—o le “mea lilo o i ai Le Silisili ese.” (Fuaiupu 1) O se nofoaga o le saogalemu faaleagaga, e puipuia o i latou e faataunuuina mea manaomia o loo taʻua mai i lenei Salamo. E “lilo’ o lea e le iloa e tagata o lenei lalolagi, o e leai se vaaiga faaleagaga. O le mea moni faapea o le mea lilo o i ai “Le Silisili ese” ua faaalia ai faapea ua na o lo tatou lagolagoina o le itu a Ieova i le finauga o le silisili ese i le vateatea, o le a tatou maua ai le saogalemu i ina.

“Ia Outou Vivii Atu ia Ioa!”

Faitau le Salamo 101 e oo i le 106. Ua faamatalaina e Tavita i i nei lana pulega o mataupu a le nuu. (Salamo 101) Ua tatalo ia Ieova ua puapuagatia ina ia “atiina ae Siona.” (Salamo 102) O le valaau ia “faamanū atu ia Ieova “mulimuli ane i Salamo, o le valaau ina ia iloa le alofa mutimutivale o Ieova, e mataʻutia, ma mea na ia faia. I inei foi, o le uluai taʻua lea i lona faa 20 ona taʻua i Salamo le faaupuga “ia outou vivii atu ia Ioa!” (Salamo 103, 104) E mulimuli lava o Salamo e lua o talafaasolopito o loo faamanūina ai Ieova ona o ana galuega e fai ma sui o ona tagata.—Salamo 105, 106.

◆ 102:25—O ai na “faavaeina le lalolagi”?

Sa tautala le faisalamo e uiga i le Atua, a e na faatatauina e le aposetolo o Paulo nei upu ia Iesu Keriso. (Eperu 1:10, 11) E foliga mai na mulimuli ane faatatau nei upu ia Iesu aua sa gaoioi o ia o se Sui o Ieova i le faia o le vateatea. (Kolose 1:15, 16) E mafai foi la ona faapea o Iesu na “faavaeina le lalolagi.”

◆ 103:14—O le a ua faamaonia e le “mea na fai ai”?

O upu i inei ua faatatauina i le “fai aʻi” e i ai se sootaga ma le veape “faia” o loo faaaogaina i le Kenese 2:7. ma le nauna “tufuga” o loo faaaogaina i le na te faia ipu o mea. (Isaia 29:16; Ieremia 18:2-6) O lea ua faamanatu mai ai e le faisalamo ia i tatou o Ieova o le Tufuga Sili, o loo aaoina ma le alofa i tatou, ua ia silafia e maʻaleʻale i tatou pei o ipu omea.—Faatusatusa 2 Korinito 4:7.

◆ 104:4—Ua faapea ona faia e Ieova ana ‘agelu o matagi’?

Talu ai ua avea agelu o mea o mea faiola agaga, e le faasino la lenei i o latou tino agaga. O le upu agaga e mafai foi ona uiga i le “matagi” po o le “malosi galue.” O lea la e mafai foi e le Atua ona faaaoga ana agelu o ni mana malolosi e faataunuuina lona finagalo. E mafai foi ona faaaoga i latou o ni faaoosala e pei “o le afi mumu.” E mafai foi ona faamautinoa atu i Kerisiano ina ia latou iloa o loo lagolagoina la latou galuega talai e nei mea faiola agaga malolosi faaagelu.—Faatusatusa le Faaaliga 14:6, 7.

Lesona mo i Tatou: Ua fesoasoani le Salamo 106 ia i tatou e talisapaia faapea o le fouvale o Koru, Tatano ma Apiramo sa mataʻua i latou i le tulaga o Mose o se pule i le nuu o le Atua. (Salamo 106:16; Numera 16:2-11) I le iuga, na olopalaina nei tagata tetee ina ua “susunuina i le afi mumu o e na amio leaga.’ (Salamo 106:18) Ua faaalia i inei le mataʻutia o e faamaualuga ma le mataʻua. O le tautala faasaga i auauna tofia a Ieova i aso nei e faapena foi ona aumaia ai lona le fiafia.—Eperu 13:17; Iuta 4, 8, 11.

O le mea moni, e sili ona tele mea ua aumaia e Ieova ia i tatou e ao ai ona tatou loto faafetai. Pe a tatou manatunatu i le tele o faamanuiaga ua ia liligi mai ia i tatou, pe tatou te le faia ea e pei ona uunaia ai i tatou e le faisalamo, “Lou agaga e, ia e faamanū atu ia Ieova”?—Salamo 103:1.