Fesili Mai le Aufaitau

▪ Ina ua uma ona agasala Tavita ma Patisepa, ai se a na oti ai la laua tama, a e o loo fai mai le Teuteronome 24:16 ma le Esekielu 18:20 faapea e le tatau ona oti le atalii ona o le agasala a le tamā?

O Tavita ma Patisepa sa o ni tagata faaipoipo uma i laua ina ua la agasala i le mulilua, ma sa oo ina to ai Patisepa. O la laua mulilua o se agasala mamafa tele e tatau ona faasalaina i le oti i lalo o le tulafono a le Atua. (2 Samuelu 11:1-5; Teuteronome 5:18; 22:22) Ana fai la e faatagaina e le Atua tagata e faamasinoina i laua e tusa ai ma le tulafono, o lona uiga o le pepe i totonu o le manava o Patisepa e tatau ona oti faatasi ma lona tinā. A e na filifili e Ieova se isi auala ese e taulimaina ai lo la faamasinoga, lea e i ai i “Le na te faamasinoina le lalolagi uma” le aiā tatau e faia ai faapea.—Kenese 18:25.

Ina ua faailoa atu i ai lana agasala, sa iloa lelei lava e Tavita: “Ua ou agasala lava ia Ieova.” Ona taʻu atu lea e le avefeau a le Atua ia Tavita: “Ua aveeseina lau agasala e Ieova, e te le oti ai.” (2 Samuelu 12:13) Na faaalia le alofa o Ieova ia Tavita ona o le feagaiga o le Malo. A e le gata i lea, ona o le Atua e mafai ona silasila i loto, atonu sa ia fuatia le faamaoni aʻiaʻi o le salamō o Tavita ma oo ai i lona finagalo faapea e i ai se faavae o le faasalafa atu o le alofa ia Tavita ma Patisepa. Peitai e le mafai ona la aloese mai le tauia o la laua agasala. Sa taʻu ia i laua: “Ua e faatupu le ʻinoʻino o e ita i a Ieova i lenei mea, o le mea lea e oti ai lava le tama ua fanau mai ia te oe.”—2 Samuelu 12:14.

Na ‘taia’ e Ieova le tama lea sa lei tatau ona fanau mai ia i laua; ona maʻi lava lea o le tama ma oti ai. Atonu o le a taulai atu le vaai a se tasi i aso nei i le oti o le tamaitiiti ma manatu ai faapea ua matua leaga tele le faamasinoga. A e peitai o se mea lelei pe a teu i finagalo faapea, ana taulimaina ma faamaonia le agasala i luma o faamasino faaletagata i lalo o le Tulafono, o lona uiga o le toatolu o (Tavita, Patisepa, ma le pepe i lona manava) o le a aveesea uma o latou ola. Pe a vaai la i ai agai i lena itu, i le faatagaina e le Atua o le toalua o i latou e faasaoina o se tulaga alofa tele lena. E le gata i lea, ona o na aso ua tuanai tatou te le iloa mea moni e uiga i le soifua maloloina o le pepe ina ua faatoa fanau mai. E leai se isi mea tatau ona tatou faia, na i lo o le talia o le aaoina e le Atua o le mataupu, ma ia mautinoa o le mea na ia faia o se mea tonu, poto, ma le amiotonu. Na oo lava ina iloa mulimuli ane e Tavita: “O le Atua e sao lava lona ala.”—2 Samuelu 22:31; faatusatusa le Iopu 34:12; Isaia 55:11.

Ua tutusa lava lena ma uiga o Tavita ina ua uma ona ia faalogo i le faamasinoga a Ieova. A o maʻi le tama, sa faanoanoa ma anapogi Tavita. A e ina ua oti le tama, sa talisapaia e Tavita faapea ua iu le mataupu. (2 Samuelu 12:22, 23) O lea, i lona faalagolago i le faamasinoga a Ieova, sa faamafanafana atu ai Tavita ia Patisepa (ua avea nei ma ana avā faaletulafono) ma faamautinoa atu ia te ia o la a laua faiā faalefaaipoipoga o le a faaauau pea. Mulimuli ane sa la fanaua Solomona na avea ma sui o Tavita.

O le aaoina e le Atua o lena faafitauli e le tatau ona manatu ai faapea e fetoai ma le Teuteronome 24:16; Esekielu 18:20.

I le avea o se vaega o le Tulafono sa poloai atu le Atua: “Aua neʻi fasiotia le tamā e sui aʻi le atalii, aua foi neʻi fasiotia le atalii e sui aʻi le tamā; a ia taitasi le tagata ma fasiotia o ia i lana lava agasala.” (Teuteronome 24:16) O na taiala sa mo faamasino Isaraelu na taulimaina faafitauli faaletulafono. E le mafai e faamasino ona iloa loto o tagata. Sa tatau ona latou feutagai ma tagata taitoatasi e faavae i lana amio e pei ona faaalia e mea moni.

E faapena foi le Esekielu 18:20, ua faailoa mai: “O le tagata e agasala e oti lava ia; e le tauia le agasala a le tamā i le atalii, e le tauia foi le agasala a le atalii i le tamā; o le amiotonu a le ua amiotonu e i ona luga lava lea, o le amioleaga foi a le ua amioleaga e i ona luga lava lea.” Sa faasino tonu lenei mea i tagata matutua. O loo tautala le mau e uiga i se atalii ua iloa le amioleaga a lona tamā a e sa lei aufaatasi i ai; a e ua faia e le atalii le tulaga faafaamasinoga a Ieova ma savali i Ana tulafono. E faasaoina lava lena ituaiga o atalii pe a fasiotia lona tamā.—Esekielu 18:14-17.

E ui i lea, e le o se mea na natia le pagatia o tamaiti i aafiaga ona o gaoioiga a o latou matua. O matua e soona faaaluvale mea pe faavalea, atonu o le a matelaina atoa ai le aiga. Po o le manatu foi i aafiaga o le a i ai i tamaiti pe a faafalepuipuiina se matua ona o ni gaoioiga solitulafono. E oo lava i mala na aumaia ma le tonu e le Atua i luga o Isaraelu ona o a latou amioga leaga na aafia ai foi tamaiti i na aso. (Teuteronome 28:15, 20-32; Esekielu 8:6-18; 9:5-10) I le tuufeagai ai, sa uunaia e le Atua ona tagata: “O lenei, ia e filifili i le ola, ina ia ola ai oe atoa ma lau fanau; ina ia e alofa atu ia Ieova lou Atua, ma e faalogo i lona siufofoga, ma ia e pipii atu ia te ia; auā o lou ola ia, ma le na te faafualoaina ou aso.”—Teuteronome 30:19, 20.

Ona o lea, o le mea na tupu ia Tavita ma Patisepa e ao ona faamamafa ai i matua faapea e mafai ona aafia tele a latou fanau ona o a latou amio. Afai ‘e matataʻu matua i le suafa o le Atua, e alu ae ia te i latou le la o le amiotonu’ mo faamanuiaga o le aiga atoa.—Malaki 4:2.