Soifuaga o Iesu ma lana Faiva

O Nisi Vavega i Kapanaumi

I LE Sapati ina ua uma ona valaauina e Iesu ona soo e toafa—o Peteru, Aneterea, Iakopo ma Ioane—ona latou o loa lea i le sunako i Kapanaumi. Na amata ai i ina ona aʻoaʻo atu o Iesu, ma ua matua maofa tagata aua ua ia aʻoaʻo e pei o se o i ai le pule a e le pei o tusiupu.

I lena Sapati, sa i ai se tamaloa ua ia te ia se temoni. Ina ua mavae sina taimi, sa ia alaga atu i se leo tele lava: “Auē, Iesu e le Nasareta! se a lau na ia te i matou? ua e maliu mai ea ia fanoia i matou? Ua ou iloa oe, o le Paia oe o le Atua.”

O le temoni o loo pulea le tagata o se agelu moni lava a Satani. Ona vavao atu lea o Iesu ia te ia ma fetalai atu: “Ina faalologo ia, ma e alu i fafo nai ia te ia”!

Ona faataafiti lea e le agaga ia te ia, ua alaga foi ma le leo tele, ona alu loa lea o ia i fafo nai ia te ia, a e lei afaina le tamaloa. Ona taufaiofo ai lea o i latou uma! Ua latou fesili: “Pe se a lenei?” “Ua pule o ia i agaga leaga, ma fetalai atu i ai, ona latou faalogo lava lea ia te ia.” Ona logo atu lea o le tala i nuu uma o loo siomia ai.

Ua tuua le sunako ona o atu lea o Iesu ma ona soo i le fale o Simona, po o Peteru. O i ina o loo maʻi ai le tinā o le avā a Peteru i se maʻi vevela e maualuga le fiva. Ua latou aioi atu ia te ia. ‘Faamolemole fesoasoani atu ia te ia.’ Ona tago lea o Iesu i lona lima ua faatu ia te ia i luga. Ona teʻa loa lea o le maʻi vevela ma ua auauna loa le fafine ia te i latou i le saunia o se mea taumafa!

Ua oo i le afiafi i le goto o le la, ona o mai ai le o tagata mai itu uma i le fale o Peteru ma o latou tagata mamaʻi. Ua potopoto uma ane foi le aai i le faitotoa! Ona faamaloloina lea e Iesu tagata mamaʻi uma. Ua ia tulia foi temoni. A o o ese nei temoni mai tagata, sa latou alalaga: “O oe o le Alo o le Atua.” A e na faafilemu i latou e Iesu ma ua le toe faatagaina i latou e tautala auā ua latou iloa lava o ia o le Keriso. Mareko 1:21-34; Luka 4:31-41; Mataio 8:14-17.

◆ O le a le mea ua tupu i le sunako i le Aso Sapati ina ua uma ona valaaulia e Iesu ona soo e toafa?

◆ O fea na maliu i ai Iesu ina ua tuua le sunako, ma o a vavega ua ia faia i ina?

◆ O le a le mea na tupu mulimuli ane i lena po?

 [Ata atoa i le itulau 9]