Pe Ao Ona Papatisoina Pepe?

“E faigata lava ona vaaia o le pepe faapea e agasala. Peitai o le faamamaina o agasala o le uiga lena o lenei sauniga faaanamua. E faatolu lava ona tuliese e le tamātausi Satani ma ana galuega. Ona tago loa lea o le faifeau i se tamai muaulu o le pepe, ma faapea, “Ou te papatiso atu ia te oe i le suafa o le Tamā, ma le Alo, ma le Agaga Paia.”

TOEITIITI lava lua meleniuma o faia pea papatisoga o pepe i se sauniga faapenei. Atonu sa faamatalaina e matua, o se mea e matua uunaia loloto ai. A e peitai, pe o maua ai le amataga o faiga i le Afioga a le Atua? Ua faapea mai faifeau Katoliko e le o i ai.—Tagai i le New Catholic Encyclopedia, Volume 2, itulau 69.

Ia e faitau i le tusi o Galuega i le Tusi Paia, ma o le a vave ona e iloa faapea i le uluai Kerisiano, o le papatisoga e mo i latou ua naunau e ‘faalogo ma talia le upu’ ma ia malamalama ma ‘faia se gaoioiga mo le salamo.’ (Galuega 2:14, 22, 38, 41 Douay Version) O ni mea e matua faigata i se pepe ona fai! E moni, o loo tautala le Tusi Paia i se aiga atoa, e pei o Konelio, na papatisoina. * Ae peitai, i lena taimi, o le papatisoga e mo i latou na “faalogo i le upu”—e le mo pepe.—Galuega 10:44-47.

 Tu a le Atua po o Tagata?

Ina ua le taulau ona faasino atu i se faaaʻoaʻoga faale-Tusi Paia, fai mai le Vatikana, “O le papatisoina o pepe ua mafaufauina o se tulafono o uputuu po o aganuu e le ma iloa.” A e o se aganuu ea lenei na faataatia e Iesu Keriso? E leai, o le papatisoina o pepe na lei maua ai na taimi seia oo ina mavae le maliu o le au aposetolo. I le faaiuga o lona lua o senituri, na finau mai ai se tamā o le lotu o Tertullian faapea, “Ia tuu atu foi (i tamaiti) e avea ma Kerisiano pe a oo ina latou iloa Keriso.”

Sa lapatai mai le aposetolo o Paulo, a e peitai, e oo ina i ai se taimi “latou te le mafafai ai ona talia o le mataupu e ola ai.” (2 Timoteo 4:3, The New American Bible) Ina ua mavae le au aposetolo ma ua le toe ‘avea nei i latou ma taofiofiga,’ ona totolo ane lea o faiga e le faale-Tusi Paia i totonu o le tapuaiga Kerisiano. (2 Tesalonia 2:6) E aofia ai i na mea le papatisoga o pepe. A e sa lei avea le papatisoina o tamaiti ma tulafono seia aulia mai lona lima o senituri. O le taimi lena na faia ai se felafolafoaiga aasa ma i lea ua suia ai e oo mai i aso nei e Kerisinetoma.

Na amata lenei mea ina ua malaga atu se monike Peretania e igoa ia Pelagius i Roma. Na faateʻia o ia i le tulaga iuvale na ia vaai i totonu o e na taʻua o Kerisiano, sa ia taumafai loa e faagaepu manatu o tagata i le “tele o taumafaiga tau amio.” E le tatau i le tagata ona tuuaia ona vaivaiga i le ‘uluai agasala’ sa fai mai ai Pelagius. “O mea lelei ma leaga uma . . . na faia lava e i tatou, a e lei fananau mai ma i tatou.” Sa vave lava ona avea aʻoaʻoga faa-Pelagian ma talanoaga a Kerisinetoma.

A e lei umi se taimi. Na vaaia e taʻitaʻi lotu lenei lafoaia o le ‘uluai agasala’ o se tetee. Ma na matua taumafai nei Pelagius ina ia latou talia le mea na mulimuli ane avea ma aganuu masani—o le papatisoina o pepe. Na manatu se epikopo e igoa ia Augustine o se mea ua iloga mai lona le talafeagai. Sa finau atu Augustine, ‘Afai e tatau ona papatisoina pepe, a e faapefea la pepe e lei papatisoina? E foliga mai la o le faaiuga tonu sa faapea o i latou na o le a faapuapuagatia i le afi i hele ona sa lei papatisoina i latou. Sa manino lava le faamautuina o lenei manatu, ona tuu mai loa lea e Augustine le toe ta mataʻutia: Afai o le a pagatia moni lava pepe e lei papatisoina i nei faaleagaina, o le a la se isi pogai o lenei mea a e ua na o le ‘uluai agasala’?

Na malepe i lalo aʻoaʻoga a Pelagian. Na mulimuli ane faailoa mai lava e le komiti o le lotu i Carthage faapea, o aʻoaʻoga a Pelagian e faaaposetasi. O le ‘uluai agasala’ sa avea o se vaega tele o faa-Katoliko e pei o le taʻutaʻu o agasala. Ma ua faasaga atu nei le mataupu a le lotu i le faaliliuina i se fuaitau tele—e masani lava ona faamalosia ai—le faasaoina o tagata mai le ‘afi o hele.’ Sa oo atu le papatisoina o pepe mai le avea o se aganuu lauiloa i se mea faigaluega faaaloalogia o le faaolataga, se mea faigaluega e ono faaaogaina e le faa-Porotesano.

‘I Tuaoi o Hele’

O aʻoaʻoga a Augustine na laga ai ni fesili faigata e masiasi ai: E mafai faapefea e se Atua alofa ona faapuapuagatia pepe e leai ni agasala i hele? Pe maua e pepe le papatisoina le taui lava e tasi e pei o tagata e faia agasala mamafa? E lei faigofie mo faifeau ona aumaia tali. Fai mai le faifeau lotu Katoliko o Vincent Wilkin: “Fai mai nisi o pepe e lei papatisoina ua faapuapuagatia i le musaesae o le afi i hele, a e talitonu isi, e le o tuuina atu i le mumū o le afi a e o loo tuu i na o sina vevela e le lelei ai se faalogona; fai mai nisi o lenei le manofo ua na o sina aasa itiiti lava i hele . . . Fai mai nisi ua i ai i se tulaga parataiso faalelalolagi.” *

O le aʻoaʻoga sili ona taatele i so o se mea e faapea, o agaga o pepe e lei papatisoina ua puipuia i se nofoaga i limbo. O le iuga moni o lenei mea o le laina “tuaoi” (e pei o se mamanu po o se afe o se ofu) ma faamatalaina le laina lea o loo tu i tuaoi o hele. Mo faifeau la, o limbo o se manatu talafeagai. Atonu na te faaitiitia ai le vaaiga mataʻutia o le faapuapuagatiaina o pepe.

 A e peitai e pei lava o aʻoaʻoga e faia e tagata, e i ai foi faafitauli i limbo. Ai se a ua le taʻua ai i le Tusi Paia? E mafai ona sao pepe mai limbo? Ma ai se a e o ai i na pepe e leai ni agasala? O le mea lea, fai mai le manatu o le lotu i lona faapea mai o limbo, “e le o se aʻoaʻoga aloaia faa-Katoliko” * New Catholic Encyclopedia.

Ua Toe Sasao Ae Foi Le Felafolafoaiga

Mo le tele o senituri sa taofi mau pea tagata Katoliko i le faavae o manatu o Augustine ma ‘faamaonia limbo’ ina ia papatisoina ai a latou fanau. A e peitai i le 1950 sa toe aumaia ai i se tulaga uiga ese le felafolafoaiga tau le papatisoina o pepe. Na amata e tagata aʻoga Katoliko ona faamatala le faaletalitonuina ona o lenei faiga e le faale-Tusi Paia. Fai mai isi latou te le taliaina le aʻoaʻoga faa-Augustine o le afi i hele atoa ma limbo.

O lea, o taʻitaʻi lotu tetee sa mumusu e lolo atu i le amataga. I le 1951 sa lauga atu ai Pope Pio Xll i se vaega o fafine faatosaga. Na toe faailoa atu ai le talitonuga faapea “o le tulaga o le alofa i le taimi e oti ai e talafeagai moni lava mo le faaolataga,” sa ia faalaeiauina ai fafine faatosaga ina ia faia se sauniga o le papatisoga e i latou lava pe a fai o se pepe fou faatoa fanau e foliga mai o le a oti. “O lea, aua lava nei faaletonu i le faia o lea sauniga alofa,” sa ia faamalosi atu ai. E faapena foi i le 1958 na poloaia malosi ai foi e le Vatikana “pepe uma ina ia papatisoina i le vave e mafai ai.”

A e peitai na mapuna ae se finauga mulimuli ane ina ua faatuina le komiti o le Vatikana ll. I se lafo na faateʻia ai, sa taumafai e faia se va i le tulaga o e tetee ma e ioe. ‘O le papatisoga e matua tatau lava mo le faaolataga’ sa fai mai ai le komiti. O lea, e masalomia foi o le faaolataga sa tatau ai mo i latou “o e e leai ni a latou lava agasala a e sa lei iloa le tala lelei a Keriso.” *

I le avea o se mea e mulimuli ai, o lea, sa suia ai loa e le lotu le sauniga o le papatisoina o pepe. Faatasi ai ma isi mea, ua i ia nei i faifeau le malosi e teena ai le papatisoina o se tamaitiiti pe a le taulau i matua ona folafola atu o le a tausia ae le tamaitiiti o se Katiliko moni. Pe ua see ese nei le lotu mai aʻoaʻoga a Augustine? Sa manatu faapena nisi ma sa amata foi ona fesiligia le manaoga mo le papatisoina o pepe.

O lea, na faailoa mai e le Vatikana lana “Poloaiga i le Papatisoina o Pepe,” ua faapea: “E leai lava se isi auala ua iloa e le lotu e ese mai i le papatisoina ina ia faamautinoa ai ua ulu atu tamaiti i se fiafiaga e faavavau.” Sa faatonuina epikopo e “faafoi mai tu ma aganuu ia i latou . . . ua o ese mai ai.” A e faapefea pepe e lei papatisoina? “Na o le lotu lava e mafai ai ona avatua i latou i le finagalo malie o le Atua.

Papatisoga o Pepe ma Lau Tama

Ma le leai o se faaletonu, o le toatele o tagata Katoliko faamaoni ua mautinoa lava le mautonu ona o nei mea uma. E tumau pea ona manatu nisi faapea, o aʻoaʻoga faa-Kerisiano, o le papatisoina o tamaiti atonu o se amataga lelei faalelotu lea o se tamaitiiti. A e pe moni lea? Na faapea mai se tasi tinā Katoliko: “E i ai laʻu fanau iti e toalua, na papatisoina i laua a o pepe, ma ou te le o vaaia ai sina fasi uiga alofa ia i laua, o le mea moni o le tuufaafeagai.”

O le papatisoina o se pepe e le fesoasonai ai ia te ia e atiina ae i le faatuatua. O lea mea moni, e matua solia ai le poloaiga a Iesu: “O lenei, ia outou ō atu e fai nuu uma lava ma soo [po o le “fai ma aʻoaʻo] . . . ma papatiso atu ia i latou.” (Mataio 28:19) E leai se uiga o le papatisoga se vagana ua lava le matua o  se tasi e avea ai ma soo. O le mea moni, e i ai “se tu ua leva” mo le papatisoina o pepe. A e pei na le i faaleaogaina ea e Iesu i latou na ‘faaleaogaina le afioga a le Atua i a latou upu tuu’?—Mataio 15:6.

O lea, ua faalaeiauina e le Tusi Paia matua ina ia aʻoaʻo a latou fanau i mea faaleagaga “talu foi ina o e tamaitiiti.” (2 Timoteo 3:14-17) O lea, e matua uigā ona faatatauina e Molimau a Ieova le faatonuga a le Tusi Paia ina ia tausi i a latou fanau i aʻoaʻiga ma apoapoaiga a le Alii [o Ieova].” (Efeso 6:4) E masani ona faia pea lenei mea e ala i se polokalama o suesuega faale-Tusi Paia a aiga e le aunoa. E aʻoaʻoina e nei matua a latou fanau ina ia auai ma faia se vaega e le aunoa i sauniga faa-Kerisiano. (Eperu 10:24, 25) Latou te aʻoaʻo a latou fanau talavou ia “taʻutino” atu lo latou faatuatua. (Roma 10:10) I se taimi, atonu o le a uunaia a latou fanau e faia o latou lava tuuina atu ia Ieova le Atua ma faatinoina i le papatisoga i le vai. O se mea faale-Tusi Paia lenei ma e sili mamao atu ona uigā ma faamalie loto na i lo o le vaavaai i se sauniga e faia i se pepe e le o iloa le mea ua faia.

Afai e oti se tamaitiiti Kerisiano a o lei papatisoina, e leai se mea e popole ai fua matua faapea o le a susunuina i le afi i hele po o nofonofo ai i limbo. Ua aʻoaʻo e le Tusi Paia faapea o e ua oti ua le o toe iloa se mea. (Failauga 9:5, 10) O lea e mafai ona faamafanafanaina matua i le folafolaga a Iesu faapea “aua e oo mai le aso e faalogo ai i lona leo o i latou uma i tuugamau, ma latou o mai ai” ma le faamoemoe o le ola i se Parataiso toe faafoisia. (Ioane 5:28, 29; Luka 23:43) O le faamoemoe e faavae i le Tusi Paia e sili atu ona faaamafanafanaina ai na i lo o le tu faaletagata e—fesuisuiai—ma fetōaʻi.

[Faaopoopoga i lalo]

[Siata i le itulau 7]

Manatu Autu o le Talafaasolopito o le Papatisoga o Pepe

Tausaga (T.A.) Mea Na Tutupu

T. 193 ․ Na finau ai Tertullian mo le

papatisoina o tagata matutua.

253 ․ Na faasilasilaina mai ai e le Fono o

Carthage faapea e ao na vave

papatisoina pepe uma.

412-417 ․ O le felafolafoaiga i le va o Pelagius

ma Augustine e uiga i le ‘uluai

agasala’

417 ․ Na faaleaogaina ai e le Fono o

Carthage manatu o Pelagius o se

aposetasi.

1201, 1208 ․ Na tusi Pope Innocent lll e faaalialia

lona talia o le mataupu o le

papatisoina o pepe.

1545, 1563 ․ Na faalauiloa atu e le Fono o Trent le

“malaia” i luga o so o se tasi e

faafitia le papatisoina o pepe.

1794 ․ Na faia ai e le Pope se lisi e

taʻuseseina ai le aʻoaʻoga Jansenist

Synod na taʻua ai limbo o se

aʻoaʻoga faaaposetasi.

1951 ․ Na faamamafa atu ai e Pope Xll le

tatau ona papatisoina o pepe i le

faalaeiauina o fafine faatosaga ia faia

i le sauniga i le taimi o faalavelave.

1958 ․ Na poloaiina ai e le Vatikana le

‘papatisoina o pepe i le vave e mafai

ai’

1963-1965 ․ Na faia e le Fono lona Lua a le

Vatikana se poloaiga o le faaolataga e

mafai lava ona maua e aunoa ma le tau

papatisoina. Ua poloaia foi le toe

iloiloina o le sauniga o le papatisoga

o pepe.

1980 ․ Na faamalosia ai e le Vatikana le tu o

le papatisonia o pepe, i le faapea mai

‘e leai se isi auala ua iloa e ulu atu

ai tamaiti i le fiafiaga e faavavau’