Ia Fefaamafanafanai le Tasi i le Tasi a o Tāulata mai le Aso

“Ia fefaamafanafanai; ia atili ai foi ona faapea ina ua outou iloa o le aso o loo tāulata mai.”—EPERU 10:25.

1, 2. O le ā le aso ua tāulata mai, ma o le ā e ao ona avea o le uiga faaalia o tagata o Ieova?

O I LATOU i aso nei o ē o loo auai i le faapea atu, ‘Sau ia ma ave le vai o le ola,’ latou te lē o faatagata esea i latou lava. A o tāulata mai le aso sili o le manumalo o Ieova, ua latou faatatauina ai le fautuaga faale-Tusi Paia: “Ia tatou manatunatu foi le tasi i le tasi, ina ia taufaatupu ai le alofa ma galuega lelei; aua le lafoaiina le faapotopotoina o i tatou, pei o le masani o isi, a ia fefaamafanafanai; ia atili ai foi ona faapea ina ua outou iloa o le aso o loo tāulata mai.”—Eperu 10:24, 25.

 ² Ua vavalo le Tusi Paia e uiga i lena “aso” e faapea o le “aso o [Ieova].” (2 Peteru 3:10) Talu ai ona o Ieova e Silisili ona Maualuga, o le Atua e lē mafaatusatusaina lona mana, e leai ai se aso e mafai ona sili atu na i lo lona aso. (Galuega 2:20) O lona uiga o le manumalo o lana pule silisiliese i le avea o le Atua i le vateatea aoao uma. O lena aso e lē mafaatusaina lona tāua ua lata mai.

3. Na faapefea ona lata mai le aso o Ieova mo Kerisiano i le uluai senituri, ma e faapefea mo i tatou i aso nei?

³ Na taʻu atu e le aposetolo o Paulo i Kerisiano i le uluai senituri o o tatou aso (T.A.) faapea ua lata mai le aso o Ieova. Sa latou tulimataʻi atu i le oo mai o lena aso, ae i tuā i inā, o lena aso sa sili atu na i lo o le 1,900 tausaga le mamao. (2 Tesalonia 2:1-3) E ui lava i lena mea moni, ae sa ao ona faamafanafanaina i latou ona o lena aso e mautinoa lava e tatau ona oo mai, ma afai e agaʻi i luma ma le maumauai Kerisiano i lena faatuatua, o le a latou ulu atu loa i lena aso faamanuiaina. (2 Timoteo 4:8) I tuā i inā, sa vaaia ai le latalata mai o lena aso. Ae mo i tatou i aso nei, o le mea moni ua matuā latalata mai lava le aso o Ieova. O faataunuuga ofoofogia uma o valoaga o le Tusi Paia ua faamaonia ai lenei mea moni faagaee olioli. Ua lē pine, ona faapaiaina lea o le suafa o lo tatou Atua, o Ieova, e oo i le faavavau.—Luka 11:2.

Faamafanafanaina e le Suafa Tauatua

4. E tusa ai ma le Faaaliga 19:6, o ai e avea ma Tupu, ma ua faapefea ona iloa lona suafa?

⁴ E ao ona avea le suafa tauatua o se mataupu o faanaunauga i le aiga atoa faaletagata. Ua taʻua i le Today’s English Version: “Ia Viia le Atua! Auā o le Alii, lo tatou Atua e Ona le Malosi Uma lava, o le Tupu!” (Faaaliga 19:6) E tusa ai ma lena faaliliuga o le Tusi Paia o lona 20 o senituri, o ia o le Alii, o le Atua e ona le malosi uma lava. O lena faaliliuga, faapea foi ma le tele o isi faaliliuga faaonaponei, e lē o aumaia ai le suafa o Lē tauatua o lē na amata ona pule e avea o se Tupu. Ae peitai, o loo aofia le suafa tauatua i le faaupuga “Aleluia!” (“Vivii ia Ioa” po o le, “Vivii ia Ieova”) lea o loo maua i le Revised Standard Version, le New International Version, ma le faaliliuga a Moffatt o le Faaaliga 19:6. Mo le tele o vaitaimi o o tatou aso (T.A.), ua matuā lē manino ai le faamatalaina o le suafa tauatua i faaliliuga o le Tusi Paia. Ae ui i lea, e pei ona o le a tatou vaai i ai, ua avea lena suafa o se faamafanafanaga sili i tagata o le Atua, i aso anamua ma aso nei.

5, 6. (a) Aiseā na manaomia ai e Mose ona iloa le suafa o le Atua o lē o loo ia suia? (e) O le ā sa tatau ona avea ma āuga i tagata Isaraelu ina ua faamamafa atu e Mose le suafa tauatua?

⁵ Tatou te manatua faapea ina ua auina atu e le Atua Silisili ona Maualuga Mose i tagata Isaraelu na faapologaina i le nuu o Aikupito, na mapuna aʻe ai i mafaufau o tagata, o ē na auina atu i ai Mose, se fesili po o ai na auina atu o ia. Sa faatalitalia e Mose faapea o le a mananao tagata Iutaia o loo puapuagatia e fia iloa le suafa o le Atua o lē o loo ia suia. I lenei manatu ua tatou faitau ai i le Esoto 3:15: “Ua toe fetalai mai foi le Atua ia Mose, Ia faapea ona e fai atu i le fanauga a Isaraelu, Ua auina mai aʻu ia te outou e Ieova, le Atua o outou tamā, o le Atua o Aperaamo, o le Atua o Isaako, o le Atua foi o Iakopo, o loʻu igoa lena e faavavau, o laʻu faamanatuga lena i lea tupulaga ma lea tupulaga.”

⁶ Ina ua faamamafa atu lenei faamatalaga ia i latou, e lē taumate sa lagona ai e Isaraelu le matuā faamafanafanaina. O lo latou faasaoina sa faamautinoa atu e le Atua moni e toatasi, o Ieova. Ma maeu le faamafanafanaina atonu sa iai i le iai o le faamoemoe e faamasani lelei ma le Atua pe a ia faaalia le uiga o lona lava suafa totino—ae lē o le faaesea o ia lava ma le faamaualuga!—Esoto 3:13; 4:29-31.

7. (a) E faapefea ona tatou iloa faapea sa masani soʻo o Iesu ma le suafa tauatua? (e) Ua faapefea ona tuleia i tua le suafa o le Atua?

⁷ Sa matuā faamafanafanaina ai foi soʻo o le Alii o Iesu Keriso e ala i le suafa tauatua, o Ieova, ma le mea na ia suitulaga ai. (Ioane 17:6, 26) I le taimi o le faiva faalelalolagi a Iesu, e mautinoa na te leʻi tuleia i tua le suafa tauatua, ma e leai sana fuafuaga e tuu faamuamua lona lava suafa, o Iesu. E na o le taimi lava ina ua uma ona amata le faaaposetasi  lea na valoia mai i le faatuatuaga Kerisiano moni, na tuleia ai i tua le suafa tauatua, ioe, na toeitiiti lava soloiesea ai mai i talanoaga o felafolafoaiga faa-Kerisiano. (Galuega 20:29, 30) O le taimi lava o le a amata ai ona tuuina atu le faamamaluga sili atu i le suafa o le Alo o le Atua, ma ua punitia ai le suafa o le Tamā, na iloa ai e i latou na fai mai o Kerisiano ua faatupulaia le lē patino o la latou tapuaiga i le Tamā, ua tau leai se fesootaiga vavalalata faaleaiga, ma ua faapena foi ona lē toe matuā faamafanafanaina ai.

8. O le ā sa faaauau pea ona avea ma āuga i luga o tagata o le Atua i le taliaina o le suafa Molimau a Ieova?

⁸ O lea, sa avea ai o se mafuaaga mo le olioli lē mataʻua ina ua auaufaatasi Tagata Aʻoga o le Tusi Paia Faavaomalo (International Bible Students) ma le Sosaiete o le Olo Matamata (Watch Tower Society) i le taliaina o le igoa Molimau a Ieova i le 1931. E lē gata sa avea o se faagaee olioli ae sa sili ai foi ona faalaeiauina. I lenei tulaga, sa mafai ai e tagata aʻoga o le Tusi Paia ua faaigoaina i se igoa fou ona faamafanafana o le tasi i le isi.—Faatusatusa Isaia 43:12.

9. O le ā le lagona o Kerisiano moni e uiga i Lē o loo avea ai i latou ma Molimau?

⁹ O le mea lea, ua iloa ai e Kerisiano moni i aso nei le alagātatau ona latou faailoaina Lē ua avea ai i latou ma Molimau e pei ona  valoia, e pei foi ona sa faia e lo latou Taʻitaʻi o Iesu Keriso a o iai o ia i inei i le lalolagi. (Faaaliga 1:1, 2) Ioe, ua latou faailoaina ua na o ia o lē e ou le suafa o Ieova.—Salamo 83:18.

Faatumuina i le Olioli ma le Agaga Paia

10-12. (a) O le ā o le a avea ma āuga o le iai o le malosi galue i luga o soʻo o Iesu? (e) Ua faapefea i Molimau a Ieova ua faagaeeina i le olioli ona mananao e tausia ai e le tasi le isi?

¹⁰ Na fetalai Iesu Keriso i ana fetalaiga faamavae i ona aposetolo: “O lenei, ia outou o atu e fai nuu uma lava ma soo, ma papatiso atu ia te i latou i le suafa o le Tamā, ma le Atalii, ma le Agaga Paia; ia outou aʻoaʻo atu ia te i latou ia tausi i mea uma ua ou fai atu ai ia te outou; faauta foi, ou te ia te outou i aso uma lava, e oo lava i le gataaga o le lalolagi.”—Mataio 28:19, 20.

¹¹ Ia matau faapea o Kerisiano fou faatoʻā aʻoaʻoina sa tatau ona papatisoina i le suafa o le agaga paia. O lenei agaga paia e lē o se peresona ae o le mana galue o Ieova le Atua, lea ua Ia faafaigaluegaina e ala ia Iesu Keriso. I le Penetekoso, na liligiifo ai e Ieova le Atua, e ala ia Iesu, lona mana galue i luga o soʻo tuuina atu o Iesu Keriso. (Galuega 2:33) Na faatumuina i latou i lenei agaga paia, ma o se tasi o uiga, po o fua, o le agaga paia o le olioli. (Kalatia 5:22, 23; Efeso 5:18-20) O le olioli o se uiga e faagaee ai. Sa tatau i soʻo ona faatumuina i le olioli o le agaga paia. Ua sili ai ona alagātatau le tatalo na faaupuina e le aposetolo o Paulo: “O le Atua foi e tupu mai ai le faamoemoe, ia faatutumuina outou e ia i le olioli uma atoa ma le filemu, ina ua faatuatua; ina ia tele lava lo outou faamoemoe ona o le mana o le Agaga Paia.”—Roma 15:13.

¹² I le faatumuina i lenei agaga faagaee olioli, o le a mananao ai Molimau a Ieova i aso nei, e aofia ai ma le “motu o tagata e toatele,” ioe, o le a uunaia, e fefaamafanafanai le tasi i le isi i le lotolotoi o lenei faiga o mea lē faauo. Ma le tusa ai, na tautala ai le aposetolo o Paulo e uiga i se “fefaamafanafanai.”—Faaaliga 7:9, 10; Roma 1:12; 14:17.

Mafuaaga Uma e Fefaamafanafanai Ai

13. O ā mafuaaga ua ia i tatou mo le faamafanafanaina ma mo le faamafanafanaina e le tasi o le isi?

¹³ I le iloa o i latou lava ua iai i le lotolotoi o lenei faiga o mea, lea ua avea ai lē tetee i mea tonu uma o le pule po ua avea foi ma atua, o le a mananao ai Kerisiano e fefaamafanafanai i totonu o le faapotopotoga Kerisiano i le lalolagi aoao, lea ua faatumulia e le agaga paia o Ieova le Atua. (Eperu 10:24, 25; Galuega 20:28) Ua ia i tatou mafuaaga uma e fefaamafanafanai ai. Ioe, maeu lo tatou loto faafetai i le maua o le poto saʻo lelei ia Ieova ma Lona Alo ma e uiga i le mana galue ua la faaaogāina, le agaga paia! Maeu lo tatou loto faafetai mo le faamoemoe ua la tuuina mai! O lea o le a faatumuina ai la tatou tapuaiga i le olioli. Na taʻu atu e le aposetolo o Paulo i Kerisiano o ē na ia tusi atu i ai lana tusi faapea e ao ona latou fefaamafanafanai o le tasi i le isi ma atiina aʻe e le tasi le isi i lo latou faatuatua e sili ona paia. E tatau ona latou faia o lenei mea ‘ia atili ai ona ua latou iloa faafaatusa o le aso ua tāulata mai.’ E lē gata i lea, pe a soloiesea e malosi faapolotiki o lenei lalolagi le mea ua na ona taʻua i le igoa o le Faa-Kerisiano, faatasi ai ma isi lotu sese uma lava, o le a manaomia ai i lea tulaga i tatou ia sili atu ona fefaamafanafanai.

14. O ai e ao ona faamafanafanaina le tasi i le isi, ma e faapefea?

¹⁴ A o taʻimua toeaina i le faamafanafanaina o le lafu i a latou faapotopotoga taitasi, e manaomia ai e Kerisiano uma ona fefaamafanafanai le tasi i le tasi, e pei ona apoapoai mai ai le Eperu 10:25. O le mea moni, o se manaoga faa-Kerisiano lenei. Afai o oe o se sui o se faapotopotoga, pe e te avatua lenei faamafanafanaga? Atonu o le a e tau manatu, ‘Ou te mafaia faapefea? O le ā e mafai ona ou faia?’ Muamua lava, i le tau ina e auai i sauniga ma e ala i lou lagolagoina o le faatulagaga faa-Kerisiano, pe ua lē faamafanafanaina ai ea isi uso ma tuafafine, e pei lava foi ona o le a faapena ona faamafanafanaina ai oe pe a vaai atu i isi o auai ma le faamaoni i sauniga a le faapotopotoga? E mafai foi ona faamafanafanaina i latou e ala i lau faaaʻoaʻoga  o le tumau i le faatuatua. E ala i lou faaauau pea i le ala faa-Kerisiano e ui lava i faafitauli ma faigata o le olaga, e aunoa ma le faavaivai, e mafai ona e faataatia se faaaʻoaʻoga e faagaee ai.

Faafetaiaia Faalotovaivaiga mai le Tiapolo

15. Aiseā ua “lotoa tele” ai le Tiapolo, ma e faasaga ia te ai?

¹⁵ E lē na o i tatou ua iloa le lata mai o le aso o Ieova. Ua iloa foi e Satani le Tiapolo. Ua taʻu mai ia i tatou e le Faaaliga 12:12 faapea ua iai nei le ōi mo le lalolagi “aua ua alu ifo ia te outou le tiapolo ua lotoa tele, auā ua na iloa ua saasaa ona po.” E pei ona faaalia e le Faaaliga 12:17, o lona lotoa tele ua faasaga saʻo atu ia i latou “o e ua tausi i poloaiga a le Atua, ma ua taofi le mau ia Iesu.” E lē taumatea lena itu—o loo manao le Tiapolo e faalotovaivaia i tatou! Ma ua ia iloa le auala e taumafai e fai ai. Ua ia iloa o tatou vaivaiga ma faafitauli, ma ua ia faaaogā nei mea.

16. Aiseā ua faaaogā ai e Satani le lotovaivai e fai ma auupega?

¹⁶ Aiseā ua faaaogā ai e le Tiapolo le lotovaivai e fai ma auupega? Ona e masani lava ona taulau. E oo lava i se tagata o lē na tumau mai teteega tuusaʻo ma sauaga e mafai lava ona paʻū atu i le mailei o le lotovaivai. E manao Satani ina ia faifai ia Ieova le Atua ma taumafai e faamaonia atu i ai e mafai ona ia faaliliuese tagata mai le auauna atu ia te Ia. (Faataoto 27:11; faatusatusa Iopu 2:4, 5; Faaaliga 12:10.) A mafai ona ia faalotovaivaia oe, e mafai ona ia faapogaia oe ina ia e faagesegese i lau auaunaga i le Atua; e mafai foi ona oo lava ina ia faapogaia oe ia taofia, ia avea o se tagata e lē toe talaʻi i le talaʻiina o le tala lelei o le Malo.—2 Korinito 2:10, 11; Efeso 6:11; 1 Peteru 5:8.

17. Na faapefea i iʻuga lē manuia o le lotovaivai ona faaalia i aso o Mose?

¹⁷ O āuga lē manuia o le lotovaivai sa mafai ona matauina i le tulaga o tagata Isaraelu i Aikupito anamua. Ina ua uma ona tautala atu Mose ia Farao, sa matuā faateleina e lena tupu sauā a latou avega mamafa ma ana teteega ia i latou. Na taʻu atu e le Atua ia Mose ina ia faamautinoa ia Isaraelu faapea o le a Ia laveaiina moni lava i latou, ma faia i latou ma Ona nuu, saunia lo latou faasaoina, ma avatu i latou i le nuu o le folafolaga. Na tautala atu Mose e tusa ai o lenei iʻuga i le fanauga a Isaraelu. Peitai ua lipotia mai e le Esoto 6:9: “E lei faalogo i latou ia Mose ona o lo latou loto tiga ma le galuega mamafa.” Ae leʻi faamalosi atu Ieova ia Mose ma faalototeleina o ia, sa oo lava ina faalotovaivaia Mose mai i le manao e tautala atu ia Farao e pei ona poloaiina ai o ia, e lea tali mai.—Esoto 6:10-13.

18. Aiseā ua manaomia tele ai e tagata o le Atua ona faafetaiaia le lotovaivai ua faapogaia e le Tiapolo?

¹⁸ Ua iloa lelei lava e Satani le Tiapolo iʻuga lē manuia e mafai e le lotovaivai ona faia i se auauna a le Atua. E pei ona fai mai le Faataoto 24:10: “Afai e te faavaivai i le aso vale, ua itiiti lava lou malosi.” Talu ai ua tatou ola i le loloto o le taimi o le iʻuga, tatou te manaomia ai se malosi e sili atu ma ia malolosi faaleagaga. Ua faigata lo tatou tauivi ma o tatou lē lelei atoatoa, vaivaiga, ma mea sese na atonu o le a taofia ai i tatou; ae, a o taumafai Satani e faaaogā sese nei masei, tatou te manaomia le fesoasoani.

Faalagolago Mausalī i le Taulaga a Keriso

19. O le ā o le a fesoasoani ia i tatou e faafetaiaia le lotovaivai, ma aiseā?

¹⁹ O se fesoasoani sili e tusa ai ma lenei o le sauniuniga lea i le togiola na faia e Ieova ina ia maua e ala ia Iesu Keriso. E mafai ona avea i tatou o ni ē e manumalo e ala i le faalagolago mausalī i le togiola. O se mea mataʻutia le manatu māmā i lenei sauniuniga. Ioe, o le a tumau pea ona tatou sese, pe agasala, a o tatou lē lelei atoatoa pea. Ae lē tatau ai ona tatou faavaivai ma faamaamulu, i le lagona faapea ua leai se faamoemoe, ma i lea ua paʻūū atu ai i le mailei a Satani. Ua tatou iloa ua tatou maua se taulaga atoatoa mo agasala. E mafai e le togiola ona aveesea agasala. Afai o i tatou e i le “motu o tagata e toatele,” e tatau ona tatou faatuatua atoatoa ma faamoemoe faapea e mafai ona tāina o tatou ofu ma faasinasinaina i le toto o le Tamai mamoe.—Faaaliga 7:9, 14.

20. Ua faaalia faapefea e le Faaaliga 20:11 faapea o le faalotovaivai sili, le Tiapolo, e mafai ona faatoilaloina?

 ²⁰ I le Faaaliga 12:10 ua faamatalaina ai Satani faapea o “le na molia o tatou uso, o le na molia i latou i luma o lo tatou Atua i le ao ma le po.” E mafai faapefea ona tatou manumalo i lena tautuuaʻi amio leaga ma o se faalotovaivai sili ona mataʻutia? Ua saunia e le Faaaliga 12 fuaiupu e 11 o lena mataupu le tali: “Ua latou manumalo ia te ia ona o le toto o le Tamai mamoe, ma le upu a la latou mau, ua latou le faapelepeleina foi lo latou ola ua oo i le oti.” O lea e manaomia e tagata o Ieova ona tausia se mautinoa atoatoa i le taulaga togiola, le toto o le Tamai mamoe. Ia tausia ia malosi le faamafanafanaga lea e sau mai i le molimau atu, i le tufaina atu e lē aunoa o le tala lelei o le Malo o le Atua i tagata uma lava e mafai ona e oo atu i ai.

21. E mafai faapefea ona tatou auai ma le lē iloa i le galuega a le Tiapolo o le faalotovaivaia o o tatou uso?

²¹ I nisi taimi, tusa lava pe lē iloa, ae ua tatou auai i le galuega a le Tiapolo o le faalotovaivaia o o tatou uso. Faapefea? E ala i le soona faitio naʻuā, le soona faasaulala, po o le fia amiotonu naʻuā. (Failauga 7:16) O i tatou uma lava e iai sese ma vaivaiga. Seʻi aua neʻi o tatou faaaogāina ia vaivaiga e pei ona faia e le Tiapolo. Na i lo lea, seʻi o tatou tautala faalaeiau e uiga i o tatou uso ma tagata o Ieova i le avea o se vaega maopoopo. Tatou te mananao ina ia faalototeleina pea o le tasi i le isi, ma ia aua lava neʻi faalotovaivaia e le tasi le isi.

Ia Fefaamafanafanai a o Tāulata mai le Aso

22, 23. (a) Aiseā e lē ao ai ona tatou tuu atu i na o toeaina e avea o le puna o faamafanafanaga? (e) E mafai faapefea ona faamafanafanaina ovasia o le faapotopotoga Kerisiano?

²² E ao ona avea o la tatou faaiʻuga mausalī le faalototeleina o le tasi i le isi a o tāulata mai le aso. Ia faalaeiauina isi e ala i lau faaaʻoaʻoga faamaoni ma upu faamafanafana. Ia faaaʻoaʻo ia Ieova ma le Alii o Iesu Keriso e tusa ai ma lenei mea. Aua le tuuina atu tau lava o toeaina o le faapotopotoga e avea ma puna o faalaeiauga. Ioe, o toeaina foi latou e manaomia se faalaeiauga. E iai o latou vaivaiga ma sese e pei o isi uma o le lafu, ma e ao foi ona latou feagai ma faafitauli lava na i le saunia o mea mo o latou aiga i lenei lalolagi ua fai ifo. I le faaopoopo atu i lena, ua ia te i latou le mea na faamatalaina e Paulo faapea o le popole mo faapotopotoga. (2 Korinito 11:28, 29) E faigata la latou galuega—latou te manaomia ai se faalaeiauga.

²³ E mafai ona sili atu ona e faalaeiauina i latou i tulaga o le vaavaaia o le faapotopotoga Kerisiano e ala i le felagolagomai ma i latou. Ona e mulimuli ai lea i le fautuaga a le Eperu 13:17: “Ia outou usiusitai i o outou taʻitaʻi ma outou gauai i ai; auā o loo leoleo i latou mo o outou agaga, latou te tala atu le tala i ai, ina ia faia ma le olioli, a e aua ma le tiga; auā e le aoga lea ia te outou.”

24. I nei aso o le lotovaivai, o le ā e ao ona tatou faia, ma aiseā?

²⁴ Ua tatou ola i aso o le lotovaivai. O le mea moni ua vaivai loto o tagata ona o le matataʻu ma le faatalitali i mea o loo oo mai i le lalolagi ʻainā, e pei ona sa valoia e Iesu. (Luka 21:25, 26) Faatasi ai ma le matuā tele o faafitauli ua tauāu ai ina mafatia ma lotovaivai, ia “fefaamafanafanai; ia atili ai foi ona faapea ina ua outou iloa o le aso o loo tāulata mai.” Ia mulimuli i le fautuaga lelei a le aposetolo o Paulo i le 1 Tesalonia 5:11: “Ia outou feapoapoai ai, ma ia fefaamafanafanai, faapei ona outou faia lava.”

O le a Faapefea ona E Tali?

□ Aiseā e ao ai i Kerisiano ona fefaamafanafanaai le tasi i le isi, i se tulaga e sili atu na i lo o muamua?

□ E ao faapefea i le poto e uiga i le suafa tauatua ona avea o se faamafanafanaga i tagata o Ieova?

□ I ā auala e mafai ai e i tatou taitoatasi ona faamafanafana e le tasi le isi?

□ Aiseā e tatau ai ona tatou aloese mai le auai i le galuega a le Tiapolo o le faalotovaivaia o o tatou uso?

[Fesili mo le Suʻesuʻega]

[Ata i le itulau 17]

E taʻimua toeaina i le faamafanafanaina o le lafu i a latou faapotopotoga