Ia Tausia le Faatuatua i le Atua ma Keriso

Mea Tāua mai le Kolose

O LE FAATUATUA ia Ieova le Atua ma Iesu Keriso e matuā tāua mo le faaolataga. Peitai o le tausisia o sea faatuatua ua avea o se luʻi. Sa o le tulaga lena mo Kerisiano i Kolose, o se aai i sasae o Efeso i Asia Itiiti. Aiseā? Auā i inā sa taofi sese ai aʻoaʻo pepelo faapea o le faaolataga sa faalagolago i le peritomeina, o mea e ʻai a se tasi, ma le tausia o ni aso faamanatu patino.

Ua malamalama ai la, sa manatu mamafa le aposetolo o Paulo e uiga i le lelei faaleagaga o Kerisiano i Kolose, ma e mautinoa lava sa manao o ia ia i latou ina ia tausisia lo latou faatuatua i le Atua ma Keriso. O lea i le agaʻi atu i le iʻuga o le uluai faafalepuipuiina o le aposetolo i Roma (pe tusa o le 60-61 T. A.), na ia tusi ai se tusi i tagata Kolose ma le fuafuaga ina ia faafetaiaia ai o latou manatu sese ma atiina aʻe ai lo latou faatuatua. Seʻi o tatou vaai pe mafai foi faapefea e i tatou ona maua aogā mai i ana upu alofa.

Talisapaia le Tulaga o Keriso

Muamua lava i lana tusi, sa faatāuaina ai e Paulo le talisapaia mo le tulaga o Iesu. (1:1–2:12) Sa ia faamālo i tagata Kolose mo lo latou faatuatua i le fesootai atu ma Keriso ma lo latou alofa mo uso talitonu. Na taʻua e Paulo le tulaga silisili o Keriso i le avea o Lē na ala mai ai le foafoaina o isi mea uma lava, o le Ulu o le faapotopotoga, o le ulumatua mai ē ua oti. O le faia o se leleiga ma le Atua na aogā e ala ia Keriso, o ia o lē sa natia ai ʻoa tāua uma o le atamai ma le poto. I le manatu i nei mea uma lava, e ao ai i Kerisiano ona faaauau pea ona savavali e ōgatasi ma Keriso ma ia aua lava neʻi faatagaina se tasi e aveesea faatagataotaua i latou e ala i le poto faafilosofia faaletagata.

E ala ia Keriso, na aveesea ai e le Atua le Tulafono. (2:13-23) Sa tuʻituʻia faafaatusa i le satauro lea na maliu ai Iesu. O mea sa manaomia e le Tulafono sa na ona avea o ‘le ata o mea atalī, ae o le mea moni e ā le Keriso.’ E ala i le taofi mau ia Keriso, o le a latou lē faatagaina ai se tagata e aveesea mai ia i latou le taui o le ola e lē mafai ona oti i le lagi.

Talisapaia le Atua ma Keriso

Ona sosoo ai lea ma le uunai atu e Paulo tagata Kolose ina ia oofu i le tagata fou ma gauai atu i le pule a Iesu Keriso. (3:1-17) E ala i le taulai atu pea o o latou mafaufau i mea o i lugā, o le a latou tuuina ai faamuamua faanaunauga faaleagaga i le olaga. O lenei mea e manaomia ai le tuuesea o uiga faaalia ma upu sese. Maeu le faamanuiaina o le a iai i latou pe afai latou te oofu i na uiga e pei o le tiga alofa, loto maulalo, ma le alofa! O le filemu o Keriso o le a pulea ai o latou loto pe afai sa latou faia mea uma i le suafa o Iesu, i le faafetai atu i le Atua e ala ia te ia.

O le talisapaia mo Ieova le Atua ma Iesu Keriso e ao foi ona taaʻina ai le faiā a se Kerisiano ma isi. (3:18–4:18) O avā, tane, fanau, pologa, ma alii sa tatau ona latou faataunuuina o latou tiute faatasi ma le mataʻu i le Atua ma i le iloa lelei o Keriso. Ma maeu le talafeagai i le maumauai pea i le tatalo ma savavali ma le atamai!

Ua mafai ona fesoasoani ia i tatou le tusi a Paulo i tagata Kolose ina ia alofia aʻoaʻoga sese na o le a taofia ai i tatou mai le maua o le taui o le ola. O le faamamafa na tuu atu e le aposetolo i le iloa lelei o le pule a Ieova ma lona Alo ua mafai ona faia ai se taaʻiga lelei i a tatou feutagaiga ma isi. Ma o le ʻoa o faamanuiaga ua faamautinoa ia i tatou pe afai tatou te tausisia lo tatou faatuatua i le Atua ma Keriso.

[Pusa/Ata i le itulau 21]

Le Tusi i Laotikaia: “Pe a uma ona faitau e outou o lenei tusi,” na tusi ai Paulo i tagata Kolose, “ia faitauina foi e le ekalesia i Laotikaia, ia outou faitau foi le tusi mai Laotikaia.” (Kolose 4:16) O Laotikaia sa o se aai mauoa i Asia Itiiti i sisifo, sa fesootai i ni auala ma aai e pei o Filatelefaia ma Efeso. Atonu, o le galuega a Paulo i Efeso sa oo atu lava i Laotikaia, e ui sa leʻi auauna ai o ia i inā. Sa ia auina atu se tusi i Kerisiano i Laotikaia, e ui lava o nisi o tagata aʻoga sa talitonu faapea o se kopi lea o le tusi na ia tusia i tagata Efeso. O le tusi i Laotikaia e lē o maua i le Tusi Paia, atonu ona e lē o iai ni faamatalaga tatou te manaomia mo aso nei, pe atonu ua lava ma totoe lona toe taʻua o manatu na aofia ai i isi tusi faalekanona.

[Ata]

Faatafunaga i Laotikaia