Le Ola pe a Mavae le Oti—O ni Fesili e Leʻi Taliina

“AFAI e oti le tagata, e toe ola mai ea o ia?” (Iopu 14:14) O lenei fesili, sa tuuina mai i senituri ua mavae e le pateliaka o Iopu, ua mafaufauina e tagata i sosaiete uma i le faagasologa o tausaga, ma e leʻi faapea lava ua faaitiitia ni tali na tuuina mai.

Na taʻua e tagata Eleni anamua faapea o solu o tagata oti e ola pea. O nei solu sa feaveaiina i luga o le vaitafe o le Styx i se nofoaga vavaloloa i lalo o le eleele na taʻua o le nofoaga i lalo o le eleele o tagata oti. I inā sa avatu ai e faamasino taui o solu a lē i le faapuapuagatia i se falepuipui e siosiomia e pa maualuluga, ia po o le fiafia atoatoa i laufanua o le fiafiaga sili e pei o se parataiso. Sa manatu isi tagata anamua faapea sa avea solu o ni fetu po o ni tino faalelagi e iai ni o latou siusiu uumi. O loo taofi pea isi faapea o solu sa avea o ni malamalama ma sa tosina atu i le masina; i masina taitasi uma pe a oo ina atoa le masina faatoʻā vaaia, ona auina atu lea o i latou i le la.

I aso nei, o aʻoaʻoga e faatatau i se ola pe a mavae le oti o loo faaauau pea ona taatele. E talitonu tagata Hinitu ma tagata Puta i se ola e toe fanau. Ua aʻoaʻo e tagata Muselimi faapea o le solu e ola pe a mavae le oti o le tino ma i le faamasinoga mulimuli o le a alu atu ai a lē i le parataiso ia po o hele. E toatele tagata Porotesano ua aʻoaʻoina faapea o solu e ola pea pe a mavae le oti ina ia tofo a lē i se fiafiaga atoatoa faalelagi ia po o le faapuapuagatia i le mumū o le afi i hele. I lenei tala ua faaopoopo atu i ai e le faa-Katoliko le Limbo ma pulekatolio.

I nisi atunuu, o talitonuga e faatatau i solu faapena o tagata oti ua avea o se paluga faatasi o masalosaloga o aganuu masani ma i le mea ua taʻua o le Faa-Kerisiano. Mo se faaaʻoaʻoga, o se tu masani a le tele o Katoliko ma Porotesano i Aferika i Sisifo le ufiufi o faata pe a oti se tagata ina ia lē mafai ai e se tasi ona vaai atu ma iloa atu le agaga o le tagata ua oti i le faata. Pe a fasefulu aso talu ona maliu o sē ua pele, ona faia lea e le aiga ma uo se faigaʻai e faamanatuina ai le alu aʻe o le solu i le lagi. Pe a mavae lea, e masani lava i taimi o Kirisimasi po o le Aso o le Tausaga Fou, o le a asiasi atu ai aiga i le tuugamau ma liligi ifo ni meainu o alakaholo i luga o le tuugamau. O le a oo lava foi ina latou tautatala atu i le tagata oti, e talosaga atu i ai i mea e mananao ai ma faamatala atu i ai tala e faatatau i le aiga.

E manino mai la, e iai eseesega i le va o lotu a le lalolagi e faatatau i le mea moni lava e tupu i le tagata pe a oti. Peitai, e iai se maliega toetoe lava i le vateatea aoao i se tasi o aʻoaʻoga faavae: le lē mafai ona oti o le solu faaletagata. O le tele o aʻoaʻoga e uiga i le ola pe a mavae le oti, ua na o ni aʻoaʻoga eseese lava mai lenei matua autū.

Ae peitai, o ni nai fesili ua avea ma faatalatala ua tuuina mai ia i latou lava: O fea na aumai ai le manatu faapea o le solu e lē mafai ona oti? Pe o aʻoaʻoina ea i le Tusi Paia lea mea? Afai o lea, aiseā ua aʻoaʻo ai e oo lava i faatuatuaga e lē faa-Kerisiano lea mea? O fesili nei e lē tatau ona faaleamanaiaina. Po o le ā lava lou talitonuga faalotu, ae o le oti o se mea moni lava e tatau ona fesagaʻia. O mataupu na o loo aafia ai oe i se auala totino matuā loloto. O le mea lea ua matou valaauina ai oe ina ia e tagatagaʻi i ai i nei mataupu faatasi ma se mafaufau matala.