Lipoti a Faalauiloa le Malo

Mai le Loto Mafatia i le Fiafia

O IEOVA o se Atua fiafia. (1 Timoteo 1:11) E finagalo o ia ina ia fiafia foi i latou o auauna ia te ia. I lea, afai e mafatia se tasi o ana auauna, o le a fesoasoani Ieova ia te ia ina ia onosai i le tiga ma i nisi taimi e oo lava ina toe maua le loto fiafia. O le tala mai i Uruguay lea o loo mulimuli mai ua faaalia ai lenei mea.

Sa faatalitali se tuafafine i se nofoaga faafomaʻi i Montevideo mo le iʻuga o se suesuega o lona faata. O se fafine o loo nofo pito ane ia te ia sa matuā fefe lava ona o se mea atonu o le a taʻu atu e le fomaʻi ia te ia e avea o le iʻuga o le suesuega sa faia ia te ia. Sa taʻu atu e le tuafafine ia te ia faapea talu lava ona avea o ia ma Molimau mo Ieova, e leʻi fefe lava o ia i se mea e tasi. Peitai na faapea atu le fafine o ia e lē fiafia i Molimau ona latou te faatalitalia se tulaga sili ona maualuga mai tagata.

Ona taʻu atu lea e le tuafafine ia te ia le auala na fesoasoani ai le poto mai le upu moni o le Tusi Paia ia te ia. Na maliu lana tama teine e 18 tausaga ma sa oo ai o ia i se tulaga o le matuā loto mafatia mo le valu tausaga. E oo lava i fomaʻi o le mafaufau po o togafitiga taugata e leʻi fesoasoani ia te ia e foia lenei loto mafatia. E iai ni taimi, na ia faapea mai, sa taofia ai o ia i le falemaʻi, ae leai lava ni iʻuga lelei. Sa tausia lona aiga e ni auauna ona e oo lava foi ia te ia sa lē mafai ona ia tausia so o se mea. Sa ia taumafai e pule i lona ola ona ua leai sona fiafia i le olaga. E leai lava se mea na foliga mai e maua ai se fesoasoani.

Ona ia taʻu atu lea i le fafine, ae i se tasi aso na asiasi atu ai Molimau a Ieova ma tuu ai ni lomiga faale-Tusi Paia ia te ia. O le mea lena na toe fafagu ai lona naunau i le Afioga a le Atua, ma na amata ai ona ia faitau le Tusi Paia atoa. Na iai se mea na amata ona suia i ona faalogona i totonu. Sa amata ona ia ala aʻe i le taeao ma ua naunau i lona aiga. I le iʻuga, sa ia filifili ai e teu e ia lava lona fale ma iloa ai sa mafai ona ia faia faapea. Sa pei lava e leʻi maʻi o ia! O lenei mea na oo ai ia te ia le lagona matuā fiafia.

E leʻi toe foi atu o ia i le fomaʻi o le mafaufau. O lona naunau ina ia ola sa faagaeeina e lona poto i le Afioga a le Atua, ma o lenei mea na faamaonia o se vailaau sili lea. Sa sue e ia Molimau a Ieova, ma sa amata ai ona latou faia se suesuega e lē aunoa faatasi ma ia. Sa amata ona ia auai i sauniga, ma e leʻi pine ae papatisoina o ia. Ua lē o toe faalavelaveina lava o ia e le loto mafatia, ua ia maua nei le olioli i le auauna atu ia Ieova.

Sa faalogologo ma le naunautai le fafine sa i le potu faatalitali. Ona ia faapea atu lea i le tuafafine: “I nisi taimi, ou te fetaui ai i Molimau a Ieova; ae afai i se taimi i le lumanai, o le a avea moni ai aʻu o se tasi o Molimau a Ieova, o le a mafua lea ona o le mea ua e taʻu mai ia te aʻu. O le faalogologo atu ia te oe e pei lava ua faatoʻā amata ona vaai atu i le ataata mai o le malamalama i se nofoaga pogisa.”

E toatele tagata i le lalolagi aoao o loo latou vaai atu i le iʻuvale o le taumafai e foia faafitauli o le olaga e i latou lava, ma ua latou liliu atu ia Ieova le Atua. Maeu le fiafia ua ia i latou i le aʻoaʻoina e uiga i le lalolagi fou a le Atua o loo sau o i inā o le a fiafia ai tagata uma, ma o le a avea ai le loto mafatia o se mea i aso ua mavae!—Faataoto 16:20.