O le Soifuaga o Iesu ma Lana Faiva

O Isi Apoapoaiga Faamavae

UA FUAFUA e Iesu ma le au aposetolo e tuua le potu i luga. “Ua ou fai atu nei mea ia te outou, ina nei tausuai outou,” ua ia faaauau atu ai. Ona ia avatu lea o se lapataiga matuā malosi: “E tulia outou i sunako e i latou; a e oo lava i le aso e manatu ai se na te fasioti ia te outou, ua na faia le taulaga i le Atua.”

E manino le matuā faateʻia ai o le au aposetolo i lenei lapataiga. E ui sa muai taʻu atu e Iesu faapea o le a inoino mai le lalolagi ia i latou, ae sa ia leʻi fetalai atu faapea o le a fasiotia i latou. “Ou te lei fai atu [lenei] mea ia te outou i le amataga,” ua faamatala atu ai e Iesu, “auā na ou i ai ia te outou.” Peitai, maeu le lelei o le muai faaauupegaina o i latou i lenei faamatalaga a o leʻi oo ina maliu ese o ia!

‘Ae nei la,’ ua faaauau ai Iesu, “ou te alu atu nei ia te ia na auina mai aʻu; e lei fesili mai foi se tasi o outou, Po o fea e te alu i ai?” Muamua lava i le afiafi po, sa latou tuu fesili atu ai e uiga i le mea o le a maliu atu i ai o ia, ae i le taimi nei ua matuā gatete lava i latou i mea na ia fetalaia atu ia i latou o lea ua lē mafai ai ona latou toe fesili atu atili ia te ia e uiga i lenei mea. E pei ona fetalai Iesu: “A ua tutumu o outou loto i le faanoanoa, ina ua ou fai atu nei mea ia te outou.” Ua faanoanoa tele le au aposetolo ona e lē gata ina ua latou iloa o le a latou puapuagatia i sauaga sili ona leaga ma fasiotia ai, ae ona o le a tuua foi i latou e lo latou Matai.

Ona faamatala atu lea e Iesu: “E aoga ia te outou pe a aʻu alu ese; auā afai ou te le alu ese, e le maliu mai le Fesoasoani ia te outou; a e afai ou te alu, ou te auina mai o ia ia te outou.” E na o le tasi le nofoaga e mafai ona iai Iesu, ae pe a iai o ia i le lagi, e mafai ona ia auina mai le fesoasoani, o le agaga paia o le Atua, i ona soʻo i so o se mea lava atonu o latou iai i le lalolagi. O le a aogā ai la le maliu ese atu o Iesu.

Ua fetalai atu Iesu, o le agaga paia, “na te faailoa atu i le lalolagi le agasala, ma le amiotonu, ma le faamasinoga.” O le agasala a le lalolagi, o lona lē taulau lea ona faataʻitaʻia le faatuatua i le Alo o le Atua, o le a faaalialia. E faaopoopo atu i ai, o faamaoniga faamautinoa o le amiotonu a Iesu o le a faaalia e ala i lona afio aʻe i le Tamā. Ma o le lē taulau o Satani ma lana lalolagi amio leaga ina ia gausia le faamaoni o Iesu o se faamaoniga mautinoa lea faapea o le pule o le lalolagi ua faamasinoina i se iʻuga lē manuia.

“Ua totoe ia te au mea e tele e fai atu ai ia te outou,” ua faaauau ai Iesu, “a e tou te le mafaia ona talia i nei ona po.” O le mea lea ua folafola atu ai e Iesu faapea pe a ia liligiina ifo le agaga paia, o le malosi galue lea o le Atua, o le a na taʻitaʻia ai i latou i se malamalamaga e uiga i nei mea e tusa ai ma lo latou tomai e taofi mau ai.

E leʻi taulau ona malamalama le au aposetolo ae maise lava i le faapea o le a maliu Iesu ona toe faaali mai lea ia i latou pe a mavae lona toetu aʻe. O lea ua latou tuu fesili ai o le tasi i le isi: “Pe se a lenei mea ua ia fetalai mai ai ia te i tatou, E toe itiiti ona outou le vaai mai ai lea ia te au; e toe itiiti foi ona outou toe vaai mai ai lea ia te au, auā ou te alu atu i le Tamā?”

Ua silafia e Iesu lo latou mananao e fesili ia te ia, o lea ua ia faamatala ai: “E moni, e moni, ou te fai atu ia te outou, e tagi outou ma taufaitagiaue, a e olioli le lalolagi; e tiga outou a e liua lo outou tiga ma olioli.” I le afiafi na sosoo ai, ina ua fasiotia Iesu, ua olioli taʻitaʻi lotu faalelalolagi, ae ua matuā faanoanoa le au soʻo. Ae peitai, ua suia lo latou faanoanoa i le olioli, ina ua toetu mai Iesu! Ma ua faaauau lo latou olioli ina ua ia faamalosia i latou i le Penetekoso e avea ma ana molimau e ala  i le liligiina ifo i o latou luga o le agaga paia o le Atua!

I le faatusatusa atu o le tulaga o le au aposetolo i le tulaga o se fafine i le taimi o ona tiga ina o le a fanau, ua fetalai Iesu: “A fanau se fafine ua tiga ai o ia, auā ua oo i lona aso.” Ae pei lava ona ia lē toe manatua lona puapuaga i le taimi lava e fanau mai ai lana tama, ua matau ai e Iesu: “O lenei foi, ua maua nei outou e le tiga; a e tatou te toe feiloai ma aʻu [pe a ou toe tu mai], ona olioli ai lea o outou loto, e le aveeseina foi e se tasi lo outou olioli.”

E oo atu i lena taimi, e leʻi faia lava e le au aposetolo ni olega i le suafa o Iesu. Ae ua ia fetalai atu nei: “O mea uma tou te ole atu ai i le Tamā i loʻu igoa, e foai mai e ia ia te outou. . . . Auā e alofa mai lava le Tamā ia te outou, ina ua outou alofa mai ia te au, ma ua outou talitonu o aʻu nei ua ou sau mai le Atua. Ua ou sau mai le Tamā, ma ou sau i le lalolagi; o le a aʻu toe tuua le lalolagi, ma alu atu i le Tamā.”

Ua o se faalaeiauga sili fetalaiga a Iesu i le au aposetolo. “O le mea lea ua matou talitonu ai, na e maliu mai mai le Atua,” ua latou fai mai ai.

“Ua outou talitonu mai nei ea?” ua fesili atu ai Iesu. “Faauta, e oo i le aso, ua oo nei foi i ai, e taapeape ai outou, e taitasi ma alu i lona aiga, a e tuua aʻu e toatasi.” E foliga mai e faigata ona talitonuina lenei mea, ae o le mea lena na tupu a o leʻi iʻu le po!

“Ua ou fai atu nei mea ia te outou, ina ia outou maua le [filemu] ia te au,” ua faaiʻu atu ai Iesu. “E maua foi outou e le puapuaga i le lalolagi, a ia outou loto tetele, ua ou manumalo i le lalolagi.” Sa manumalo Iesu i le lalolagi e ala i le faataunuuina ma le faamaoni o le finagalo o le Atua e ui lava i mea uma sa taumafai Satani ma lana lalolagi e faia ina ia gausia ai le faamaoni o Iesu. Ioane 16:1-33; 13:36.

▪ O le ā le lapataiga a Iesu ua faapopoleina ai lona au aposetolo?

▪ Aiseā ua lē taulau ai i le au aposetolo ona fesili ia Iesu e uiga i le mea o le a ia maliu atu i ai?

▪ O le ā na lē taulau patino i le au aposetolo ona malamalama i ai?

▪ Ua faaalia faapefea e Iesu faapea o le tulaga o le au aposetolo o le a suia mai le faanoanoa i le olioli?

▪ O le ā ua fetalai i ai Iesu e toeitiiti ona faia lea e le au aposetolo?

▪ Ua faapefea ona manumalo Iesu i le lalolagi?