“Aua le Faavaivai i le Faia o le Mea Tonu”

Mea Tāua mai le Lua Tesalonia

O LE manatu mamafa o le aposetolo o Paulo mo Kerisiano i Maketonia le aai o Tesalonia na uunaia ai o ia e tusi lana tusi lona lua ia i latou, i le pe tusa ma le tausaga e 51 T.A. Sa faapea mai ma le sese nisi i le faapotopotoga faapea ua lata mai le faatasi mai o Iesu Keriso. Atonu e oo lava i se tusi sa tuuaʻia sese faapea o se tusi a Paulo sa faaliliuina e pei ua faaalia ai faapea ua oo mai “le aso o Ieova.”—2 Tesalonia 2:1, 2, NW.

O le mea lea, sa manaomia ai ona suia manatu o nisi tagata Tesalonia. I lana tusi lona lua, na faamalo atu ai Paulo ia i latou i le tupu aʻe o lo latou faatuatua, le faateleina o le alofa, ma le tumau faamaoni. Ae sa ia faaalia foi faapea o le a oo mai le aposetasi a o leʻi faatasi mai Iesu. O lea o le a iai ni taimi faigata i luma atu, ma o le a fesoasoani le tusi a le aposetolo ia i latou ina ia utagia ai lana apoapoaiga: “Aua le faavaivai i le faia o le mea tonu.” (2 Tesalonia 3:13, NW) O upu a Paulo ua mafai ona fesoasoani ia i tatou i lea lava auala.

Le Faaalia ma le Faatasi mai o Keriso

Sa muai tautala Paulo e uiga i le mapusaga mai i puapuaga. (1:1-12) O le a oo mai lenei mea “pe a faaalia le Alii o Iesu mai le lagi, faatasi ma agelu o lona malosi.” Ona aumaia loa lea o le faaumatiaga e faavavau i luga o i latou e lē usiusitai i le tala lelei. O se mea e faamafanafana ai le manatua o lenei mea pe a tatou tigaina i puapuaga i lima o tagata faasauā.

Na sosoo ai ma le faasino mai e Paulo faapea “o le tagata o le agasala [le tagata lē taupulea, NW]” o le a faaalia mai a o leʻi faatasi mai Keriso. (2:1-17) Sa lē faafiafiaina ai tagata Tesalonia i so o se feau e taʻua ai faapea o “le aso o Ieova” ua oo mai ia i latou. Muamua, o le a oo mai le aposetasi ma o le a faaalia mai le tagata lē taupulea. Mulimuli ane, ona faaumatia ai lea o ia e Iesu, e faia faapea i le faaalia mai o Lona faatasi mai. I le taimi lea, na tatalo Paulo faapea ia faamafanafanaina e le Atua ma Keriso loto o tagata Tesalonia ma faia i latou ina ia “faatumauina . . . i upu lelei uma ma galuega lelei uma.”

Feagai ai ma Tagata Amio Faapiopio

O isi upu atili a Paulo sa aafia ai faatonuga i le feagai ai ma tagata amio faapiopio. (3:1-18) Sa ia faaalia le mautinoa faapea o le a faamalosia e le Alii tagata Tesalonia ma tausia i latou mai lē o leaga, o Satani le Tiapolo. Ae sa latou manaomia le faia o ni laasaga mo lo latou lava lelei faaleagaga. Sa tatau ona latou vavaeese mai i ē faapiopio, i latou e aiā fua i mataupu sa lē mo i latou ma mumusu e galulue. “Pe afai e le fia galue se tasi,” na fai atu ai Paulo, “aua neʻi ʻai foi o ia.” O tagata faapena sa tatau ona faailogaina ma sa lē tatau ona miomiō faatasi ma i latou, e ui lava sa tatau ona apoapoaia i latou e pei o uso. Sa lē tatau i Kerisiano faamaoni i Tesalonia ona faavaivai i le faia o le mea tonu, ma sa faanaunau Paulo faapea ia faatasi ma i latou le alofa tunoa o le Alii o Iesu Keriso.

O le tusi lona lua a Paulo i Tesalonia ua avatu ai i Molimau a Ieova le faamautinoaga faapea o le a oo mai le mapusaga mai puapuaga pe a aumaia e Keriso ma ana agelu le taui ma sui i luga o i latou e lē usiusitai i le tala lelei. O se mea foi e faamalosia ai le faatuatua le iloa faapea “o le tagata o le agasala [le tagata lē taupulea, NW]” (le vasega o taʻitaʻi lotu o Kerisinetoma) ma lotu sese uma o le a lē pine ae faaiʻuina. I le taimi nei, seʻi o tatou utagia le apoapoaiga a Paulo ina ia aua neʻi faavaivai i le faia o le mea tonu.

 [Pusa/Ata i le itulau 22]

O loo Televave le Afioga a Ieova: “Ia outou tatalo mo i matou,” na tusi ai Paulo, “faapea ia tele vave pea le afioga a Ieova [pe “atonu ia tamoe”] ma ia faamamaluina e pei ona iai moni ia te outou.” (2 Tesalonia 3:1; Kingdom Interlinear) O nisi tagata aʻoga ua latou manatu faapea atonu sa tau faasino atu le aposetolo i tagata tamomoe o loo televavave atu i se tuuga. Ona e lē mautinoa lena mea, na talosagaina ai e Paulo tatalo a Kerisiano i Tesalonia ina ia mafai ai e ia ma ē o latou galulue faatasi ona faasalalau atu le upu moni i se tulaga faanatinati e aunoa ma le faatalatu. Talu ai e tali le Atua i tatalo faapena, ua “tele vave” ai lana afioga e pei ona talaʻia ai i se tulaga faanatinati le tala lelei i nei aso e gata ai. Ua ‘faamamaluina’ foi le afioga a Ieova, sa manatu maualuga i ai tagata talitonu faapea “o le mana lava lea o le Atua e ola ai,” e pei ona sa iai i tagata Tesalonia o ē na latou talia. (Roma 1:16; 1 Tesalonia 2:13) Maeu lo tatou loto fiafia faapea o loo faamanuia e le Atua ē folafola o le Malo ma faavave ona faateleina muaʻau a ona tagata tapuai!—Isaia 60:22.