E Mafai ona E Maua Oloa Tāua e Sili ona Aogā i lo Auro!

O UPU moni i le Tusi Paia e mafai ona faatusaina i le auro, ario, po o isi oloa tāua o loo natia. E ui atonu e te leʻi eliina lava se auro po o se ario faaletino, ae o le a faapena ona e iloa ai, o le faia faapea e manaomia ai le matuā galue mamafa ma ia saga faia pea. Ma e masani lava ona fetaiai le tagata eli auro ma se tulaga e faanoanoa ai.

Ae peitai, e lē mafai lava ona iʻu i sea tulaga faanoanoa pe a e saili i le oloa tāua lilo o i le Tusi Paia. Matau lenei faamaoniga e faalototele ai: “Afai e te sailiili ia te ia, e pei ona sailiili i le ario; afai e te suesue i ai, pei ona suesue i le oloa lilo; ona e lagona ai lea o le mataʻu ia Ieova, ma e maua ai le poto i le Atua.” (Faataoto 2:4, 5) Ae e tatau ona e saili.

‘Ia Saili ma Iloa’

“Ia e saili ma ia e iloa, e le tu mai lava se perofeta mai Kalilaia.” O le fautuaga lenei na avatu e nisi o Faresaio Iutaia o le uluai senituri ia Nikotemo, o se Faresaio foi. “Ia e saili ma ia e iloa.” O le mea moni, o se fautuaga lelei. Sa mafai ona saili ma maua  le upu moni—o se mea e sili mamao atu lona tāua na i lo le auro.

Ae peitai, e tusa ai ma lena tulaga faapitoa, o i latou o ē na avatua le fautuaga ina ia ‘saili ma iloa’ sa lē taulau ona gaoioi e tusa ai. Faapefea?

Na aauina atu e ositaulaga sili ma le au Faresaio ni tagata e pue ia Iesu Keriso. Ae ona o le matuā maofa lava o i latou i le auala o ana aʻoaʻoga, na toe foi mai ai ia tagata e leʻi aumaia Iesu. Mulimuli ane, na fesili atu le au Faresaio ia i latou: “Po ua faaseseina foi outou?” Na tautala atu Nikotemo ma faapea atu: “Pe faasalaina ea se tagata i la tatou tulafono, a o lei muai faalogologo ia te ia, ma iloa ana mea ua faia?” O nei upu ua uunaia ai le fautuaga ina ia ‘saili ma iloa.’—Ioane 7:32, 45-52.

Na faapefea ona lē taulau le au ositaulaga ma le au Faresaio? Latou te leʻi iloa pe na faailoa atu foi faapea e ui lava na tupu aʻe Iesu i Kalilaia, ae na fanau o ia i Peteleema. Na valoia mai e le perofeta o Mika lea mea: “E tupu mai ia te oe [Peteleema] mo aʻu o le na te fai ma faipule ia Isaraelu.” (Mika 5:2) O lea sa lē taulau i na alii taʻitaʻi ona saili ma iloa ai agavaa o Iesu i le avea o se perofeta, o lē o le a avea ma pule ia Isaraelu. O lenei mea na taʻitaʻiina atu ai i ni iʻuga mataʻutia, ma ua faaalia ai le matuā tāua o le saili ma iloa atoatoa le upu moni e uiga i mataupu. Ae o le ā le vaaiga masani i le upu moni?

Ua Oo ina Faafilogia le Upu Moni

“O le upu moni auliuli, e pei o le auro auliuli, ua oo ina iloa ua lē tatau ona feaveai, ona sa iloa e tagata faapea e sili mamao atu le faigofie ona mafai ona faafilogia le upu moni na i lo le toe faamamāina o i latou lava,” na fai mai ai se tusitala o lona 19 o senituri. Maeu le tumau pea ona moni o nei upu e faatatau i lotu a le lalolagi! I tua atu o vaaiga i lenei faafilogiaina o le upu moni o loo iai le “tamā o le pepelo,” o Satani le Tiapolo. (Ioane 8:44; Faaaliga 12:9) Ua ia faaaogā lotu sese e faafilogiaina aʻoaʻoga moni e uiga i na fesili matuā tāua e pei o nei: O ai le Atua? O le ā le fāiā a Iesu ia te ia? O le ā le taunuuga o le lalolagi ma le fanau a tagata?

Sa ono mafai e ositaulaga ma le au Faresaio ona sailiili mo le upu moni ma maua. Sa ono mafai ona latou maua oa e sili atu ona tautele na i lo o le auro. Ioe, sa ono mafai ona latou maua le upu moni atoa e uiga ia Iesu e ala i le ‘faalogo atu ia te ia ma oo ina iloa le mea sa ia faia,’ e pei ona sa fautuaina ai e Nikotemo. Ana fai sa latou faamaoni i le faia o lenei mea, e lē taumate semanū e faamalamalama atu e Iesu mea ia i latou, e pei ona sa ia faia i ona soʻo. (Mareko 4:34) Ae o fea e mafai ona tatou maua ai le upu moni auliuli i aso nei? O le mea moni, pe o iai se faamaoniga faapea e mafai ona manuia la tatou sailiga mo le upu moni atoatoa ma maua?

[Ata i le itulau 4]

Sa ono mafai e taʻitaʻi lotu ona maua le upu moni atoa e uiga ia Iesu e ala i le ‘faalogo atu ia te ia’