Faalagolago i le Malosi mai le Atua

Mea Tāua mai le Lua Timoteo

E TUUINA atu e Ieova i ana auauna le mana e tumau ai i tofotofoga ma sauaga. Ma maeu le manaomia e Timoteo ma isi Kerisiano o le malosi mai le Atua! Na sasao se afi ma faaumatia ai Roma i le 64 T.A., ma sa iai tala salatua faapea sa faapogaia e le Emeperoa o Neru. Ina ia puipuia o ia lava, sa ia tuuaʻia ai Kerisiano, ma o lenei mea e foliga mai na uunaia ai se galu o sauaga. O le taimi lena atonu (pe tusa o le 65 T.A.), na toe faafalepuipuiina ai foi le aposetolo o Paulo i Roma. E ui lava sa fesagaʻi ma le oti, ae na ia tusi ai i inā lana tusi lona lua ia Timoteo.

O le tusi a Paulo na sauniunia ai Timoteo e tetee atu i aposetate ma tumau ai i le feagai ai ma sauaga. Sa faalaeiauina ai o ia ina ia tausia pea le agaʻigaʻi i luma faaleagaga ma taʻu atu e uiga i tulaga o Paulo i le falepuipui. Ua fesoasoani foi le tusi i le au faitau e faalagolago atu ai i le malosi mai le Atua.

Ia Tigaina i Mea Leaga ma Aʻoaʻo atu ma le Loto Agamalu

Ua tuuina mai e le Atua le malosi mo i tatou e tumau ai i sauaga e avea o ni ē folafola o le tala lelei. (2 Timoteo 1:1-18) Sa lē taitai ona galo ia Paulo Timoteo i ana tatalo, ma sa ia manatua lona faatuatua lē faatagafai. Sa avatu e le Atua ia Timoteo ‘e lē o le agaga e palaai ai, ae o le agaga e faamalosia ai, alofa, ma manatunatu lelei ai.’ O lea ia aua lava neʻi mā o ia i le molimau atu ma le puapuagatia i mea leaga ona o le tala lelei. Sa uunaia foi o ia ina ia ‘taofimau i le matua o upu e ola ai’ na faalogo ai mai ia Paulo, e pei lava ona ao foi ona tatou pipii mau atu ma le maumauaʻi i le upu moni faa-Kerisiano e ui lava ua liliu ese mai ai nisi.

O mea na aʻoaʻoina e Paulo sa tatau ona tuuina atu i tane faamaoni o ē o le a aʻoaʻo atu i isi. (2:1-26) Sa uunaia Timoteo ina ia avea o se fitafita lelei a Keriso, ia faamaoni pe a tigaina i mea leaga. O Paulo lava ia sa tigaina i noataga i falepuipui ona o le talaʻiina o le tala lelei. Sa ia faalaeiauina Timoteo ina ia faia le mea aupito sili e tuuina atu ai o ia lava o se tagata galue faamaonia a le Atua, ia teena tala e leai se aogā e solia ai le mea e paia. Ma na ia taʻu atu faapea o le auauna a le Alii e tatau ona faatonu atu i isi ma le loto agamalu

Talaʻi le Upu!

O le a manaomia le malosi mai le Atua e fesagaʻi ai ma aso mulimuli ma sapasapaia ai le upu moni faale-Tusi Paia. (3:1-17) Mai i tagata e lē faaleatua o le a tutū mai ai tagata ‘e aʻoaʻo pea ae lē mafai ona oo ina latou iloa le poto saʻo o le upu moni.’ O na ‘tagata amio leaga ma taufaasese o le a latou agaʻi atu mai le leaga i le sili atu ona leaga, o le a taʻitaʻiseseina isi ma o le a faaseseina foi i latou lava.’ Ae peitai, sa tatau ia Timoteo ona ‘faaauau i mea na ia aʻoaʻoina.’ E ao ona faapena i tatou, i le iloa faapea ‘o Tusi Paia uma ua faagaeeina e le Atua ma e aogā e aʻoaʻo ai, aʻoaʻi, faasaʻo ai mea, ma faapoto ai i le amiotonu, ina ia atoatoa ona lelei ai o le tagata o le Atua, ia saunia atoatoa mo galuega lelei uma lava.’

Sa tatau ia Timoteo ona tetee atu i aposetate ma faaiʻuina lana faiva. (4:1-22) Sa ono mafai foi ona ia faia faapea e ala i le ‘talaʻi atu o le upu’ ma ola aʻe ai. Sa matuā tāua lenei mea, talu ai sa fesagaʻi le faapotopotoga ma “aso e le taugalemu ai” ona sa aʻoaʻoina e nisi ni aʻoaʻoga sese. E piimau atu foi e Molimau a Ieova i le Afioga a le Atua i le taimi nei, talaʻi atu faanatinati i le faapotopotoga ma i tagata i fafo, e oo lava i tulaga e lē taugamalie. O Paulo sa “taofi i le upu o le faatuatua,” e ui lava sa lafoaiina o ia e nisi. Ae ‘na tuuina atu e le Alii ia te ia le mana, ina ia faataunuuina atoatoa ia te ia le talaʻiga.’ Seʻi faapea foi ona tatou faalagolago i le malosi mai le Atua ma talaʻi atu pea le tala lelei.

[Pusa/Ata i le itulau 24]

Se Fitafita Lelei: Na uunai atu e Paulo Timoteo: “Ia e onosai i mea e tiga ai, faapei o se tagata tau e lelei ia Iesu Keriso. E leai sē tau i le taua na te faalavelavea e ia ia te ia i mea a lenei olaga, ina ia faafiafia o ia i lē na filifili ia te ia e fai ma tagata tau.” (2 Timoteo 2:3, 4) O se fitafita Roma o lē savali ‘sa tigaina i le leaga’ i le tauaveina o auupega mamafa, o se toʻi, o se ato, ni meaʻai mo aso e tolu, ma isi mea faapena. (Wars of the Jews, Tusi 3, mataupu 5, a Josephus) Na te leʻi tuliloaina ni faanaunauga tau tamaoaiga, auā o le a lē faafiafiaina ai lē e sili ia te ia, ma sa maua lava mea sa ia manaomia. E faapena foi, i se Kerisiano o lē e puapuagatia i tofotofoga e fesootai atu ma le avea o se “tagata tau e lelei ia Iesu Keriso.” E ui lava atonu o le a ia galue i se galuega masani ina ia maua ai mea tatau i le olaga e tusa ma tiute tauave faale-Tusi Paia, ae lē tatau lava ona ia faatagaina ni aafiaga lē manaomia i mea faitino e taofia ai o ia mai le tauina o le taua faaleagaga. (1 Tesalonia 2:9) I le molimau i lea fale ma lea fale na te sasauina ai le “pelu a le Agaga, o le afioga lea a le Atua,” ma fesoasoani e faasaoloto tagata mai sese faalotu. (Efeso 6:11-17; Ioane 8:31, 32) Talu ai ona ua lamatia le ola, seʻi tau ina ia faafiafia pea e fitafita Kerisiano uma Iesu Keriso ma Ieova le Atua i lenei auala.