Ia Faamanū i le Suafa Paia o Ieova!
Ia Faamanū i le Suafa Paia o Ieova!
“O vii o Ieova e taʻu atu e loʻu gutu; e faafetaia e tagata uma o lona suafa paia, e faavavau faavavau lava.”—SALAMO 145:21.
1, 2. (a) I le ā le auala ua luʻia ai e Satani le pulega a le Atua? (e) O ā fesili ua lagā e faatatau i le Salamo 145:11-21?
O IEOVA e lē mafesiligia o le Pule Silisili ese i le vateatea. Ae ua luʻia e Satani le amiotonu ma le moni o le pulega a le Atua. (Kenese 2:16, 17; 3:1-5) Na fesiligia foi e le Tiapolo le faamaoni o auauna uma a le Atua i le lagi ma le lalolagi. (Iopu 1:6-11; 2:1-5; Luka 22:31) O lea ua faatagaina ai e Ieova se taimi mo meafaiola atamamai uma ina ia iloa fua leaga o le fouvale faasaga i lona pulega ma ia faaalia po o fea o latou tutū ai i nei finauga.
2 Ua fesoasoani le Salamo 145 ia i tatou e faia se tulaga mautu mo le pulega a le Atua. Faapefea? O le ā ua fai mai ai Tavita e uiga i le tulaga tautupu o Ieova? Ma ua faapefea ona faia e le Atua ē o lagolagoina lona tulaga tautupu? O loo i le Salamo 145:11-21 tali e fesoasoani mai.
Tautala e Uiga i le Tulaga Tautupu a Ieova
3. Afai e pele ia i tatou le tulaga tautupu a Ieova, o le ā o le a tatou faia?
3 O le pulega a Ieova sa o se mea na manatu mamafa i ai Tavita, o lē na faapea mai: “E tautalatala atu i latou i le mamalu o lou malo, ma taʻutaʻu atu i lou mana; ina ia faailoa atu i le fanau a tagata ana mea mamana, ma le mamalu matagofie o lona malo.” (Salamo 145:11, 12) E talanoa tagata e uiga i mea latou te fiafia i ai. O lea e mafai e se tagata ona tautala e uiga i lona aiga, i lona fale, ma ana laau toto. “Ua au mai mea lelei e le tagata amio lelei i mea lelei ua teu i lona loto,” na fetalai ai Iesu. (Luka 6:45) Afai e pele i o tatou loto le pulega a le Atua, o le a tatou tatalo la mo lona Malo ina ia oo mai, ma o le a tatou taʻu atu i isi e uiga i le faamasinoga tonu, filemu, ma le amiotonu o le a salalau atu i lalo o lana pulega. O le a tatou vivii ia Ieova le “Tupu o le vavau” ma o le a tatou tautala atu e uiga i le faailoaina atu o lana pule silisili ese e ala i le Malo faa-Mesia i aao o lona Alo pele o Iesu Keriso. (Faaaliga 15:3, NW; Isaia 9:6, 7) Maeu se faaeaga o le tautala atu e uiga i le mamalu faalelagi o le pulega tautupu a Ieova, lea o le a lē pine ae faaatagia i le matagofie o se parataiso faalelalolagi e faatumuina i meafaiola fiafia lelei atoatoa!—Luka 23:43.
4. O ā ni avanoa tatou te maua e tautala atu ai i le “mana” o Ieova, ma ua faapefea ona faaolaolaina i tatou i lena galuega?
4 O le talisapaia o le a uunaia ai foi i tatou e tautala atu e uiga i le “mana” o Ieova. E ui lava “e silisili ese lona malosi,” ae lē taitai ona ia faaaogāseseina lea malosi. (Iopu 37:23) Sa ia faaaogāina lona malosi e foafoaina ai le lalolagi ma le fanau a tagata ma o le a ia faaalia lea e faaumatia ai ē amio leaga. Ua ia i tatou ni avanoa e tautala ai e uiga i le malosi o le Atua pe a tatou folafola atu le tala lelei. Ma pe tatou te lē loto faafetai ea faapea o lenei Puna moni o le malosi ua faamalosia ai i tatou e faia lenei galuega? (Isaia 40:29-31) Ioe, i le avea o Molimau a Ieova, ua faaolaolaina i tatou i le auaunaga paia e ala i le malosi ma le agaga o le Atua. Ua na o lenei lava le auala ua folafolaina atu ai le feau o le Malo i se tulaga manuia ofoofogia i le lalolagi aoao.—Salamo 28:7, 8; Sakaria 4:6.
5. Talu ai e lē o iloa e le vao tagata “mea mamana” a Ieova, o le ā la e ao ona tatou faia?
5 O loo iai se manaoga mo i tatou ina ia faailoa atu i le fanau a tagata “mea mamana” a Ieova, e pei lava ona sa taʻu atu e tagata Isaraelu i a latou fanau e uiga i le auala na laveaiina ai e le Atua i latou mai noataga i Aikupito. (Esoto 13:14-16) Ua fau e tagata maa faamanatu o tagata o ē o a latou galuega ua manatu i ai e mataʻina, ae e toafia ua iloa e uiga i galuega mamana a le Atua? E pei ona taʻua ai e se tasi tagata aʻoga: “Ua latou vaneina galuega a o latou toa i luga o apa memea, ae o galuega mamalu a Ieova o loo tusia i luga o le oneone, ma e mafai e le tai o le faagasologa o taimi ona tafiesea mai o latou mafaufau i lea lava taimi.” O na galuega e lē o tafiesea moni, e ui lava e lē o iloa e le vao tagata. O lea i la tatou galuega mai lea fale i lea fale, pe a faia suesuega faale-Tusi Paia i aiga, ma i isi vala, seʻi o tatou tautala atu ma le maelega e uiga i galuega mamana a le Atua.
6. (a) O le ā le mea na tupu i ni tausaga ua mavae na faailoa lelei mai ai le agaga maelega lea tatou te tauaveina ai la tatou faiva? (e) I se uiga, o le ā na fai mai ai i le 1922 e uiga i le faalauiloaina o le Malo?
6 E ao foi ona tatou maelega i le faailoa atu o le mamalu o le tulaga tautupu o le Atua. O le maelega mo lea auaunaga o le Malo e mautinoa sa faamaonia ina ua lauga atu le peresitene o le Sosaiete o le Olo Matamata, o J. F. Rutherford, i le 1922 i le au usufono i Cedar Point, Ohio, ma faapea atu: “Talu mai le 1914 na tago ai le Tupu o le mamalu i lona mana . . . Ua oo mai le malo o le lagi; o loo pule le Tupu; ua paʻū le emepaea a Satani; e faitau miliona o loo ola nei o le a lē taitai ona maliliu. Pe tou te talitonu i ai? . . . O lea ia toe foi loa i le fanua, O outou o atalii o le Atua aupito silisili ona maualuga! Ina fusi ia o o outou talita! Ia uigā, ia mataala, ia tiotio, ia lototetele. Ia faamaoni ma ia avea ma molimau moni mo le Alii. Ia agaʻi i luma i le taua seia oo ina matuā faatamaʻia tulagavae uma o Papelonia. Ia alaga atu le feau i nuu mamao ma le lautele. E tatau ona iloa e le lalolagi faapea o Ieova o le Atua ma faapea o Iesu Keriso o le Tupu o tupu ma le Alii o alii. O le aso lenei o aso uma lava. Faauta, o loo pule le Tupu! O outou o ona sui i le lautele. O le mea lea, ia faalauiloa, faalauiloa, faalauiloa, le Tupu ma lona malo.”
7. O le ā e ao ona tatou lagona ai e faatatau i la tatou galuega i le avea o ni ē folafola le Malo?
7 Maeu se olioli i le ‘manatunatu i le suafa o le Atua,’ i le taʻu atu i isi e uiga i lana pulega, ma ia faalauiloa le Malo faa-Mesia o lona Alo pele! (Malaki 3:16) I le avea o ē folafola ma ē lagolagoina le Malo, ua tatou faapelepele ai i lo tatou faaeaga o le folafola atu o le tala lelei ma liliuina loto o isi i le Atua, Keriso, ma le Malo. Ia i tatou, e ao ona iai se faanaunauga e pei o loo mumū aʻe i totonu e fia taʻu atu i isi le tulaga tautupu mamalu matagofie o Ieova.—Faatusatusa Ieremia 20:9.
8. (a) O le ā ua suia le tulaga pule o Ieova i aso nei? (e) Aiseā ua mafai ai ona faapea atu “e āu tupulaga” le pule a le Atua?
8 E ao ona uunaia i tatou e folafola atu le Malo o le Atua ma le maelega sili, auā na sosoo ai ona faapea mai Tavita: “O lou malo o le malo lea e faavavau lava; ma lau pule e āu tupulaga lava lea.” (Salamo 145:13) A o faaauau ona mafaufau loloto le faisalamo i le tulaga tautupu o Ieova, na ia suia suinauna mai i “lana” i le “lou,” i le faaupuina atu o lana tatalo tuusaʻo i le Atua. E moni, o le pulega tautupu a Ieova e pei ona fai ai ma sui le Malo faa-Mesia e lē o suia ai le tulaga tautupu e faavavau o le Atua. O le mea moni, pe a siitia le fanau usiusitai a tagata i le lelei atoatoa, o le a tuuina atu ai e Keriso le Malo i lona Tamā. (1 Korinito 15:24-28) O lea o le Atua o loo iai le pule “e āu tupulaga lava lea.” O Ieova sa avea o le Tupu ina ua foafoaina Atamu ma o le a iai le pule e faavavau i le fanau amiotonu a tagata.
9. I le Salamo 145, o le ā e mafai ona fai atu ai e uiga i le fuaiupu lea e amata i le mataitusi Eperu o le nun?
9 I lenei salamo faasolo, ua lē faaaofia ai e le tusi paia Masoretic se fuaiupu sa amata i le mataitusi faa-Eperu nun. Ae e tusa ai ma le Septuagint faa-Eleni, le Peshitta faa-Suria, ma le Vulgate faa-Latina, ua faitauina ai faapenei se tasi o manusikulipi faa-Eperu: “E faamaoni Ieova i ana afioga uma, ma e agalelei ma alofa [pe “loyal”] i ana galuega uma.” (New World Translation of the Holy Scriptures—With References, faamatalaga i le pito i lalo) E faataunuuina e le Atua ana folafolaga uma ma e faamaoni, e alofa, ma e agalelei ia i latou uma o ē talisapaia lona lelei.—Iosua 23:14.
E Lē Mafai ona Lē Taulau le Lagolago a Ieova
10. Ua faapefea ona ‘lagolagoina i tatou e le Atua’?
10 O le Tupu o le Vavau e lē taitai ona ia lē amanaia tulaga faigata o ana auauna. I lea, ua mafai ai ona faapea mai Tavita: “E taofia i luga e Ieova atoa uma ē pauu; o ia foi lē faatusaʻoina o ē ua faanoʻunoʻu uma lava.” (Salamo 145:14) Talu mai aso o Apelu, ua lagolagoina ai pea e Ieova Ona tagata tapuai. I le tuua na o i tatou, o le a tatou paʻūū ai i le tele o taimi i lalo o a tatou avega mamafa. Ua lē lava lo tatou malosi e tauave ai tiga uma o le olaga, ma sauaga e oo mai i o tatou auala i le avea o tagata o Ieova, ae e faamalosia i tatou e Ieova. O le ituaiga o veape Eperu sa faaaogāina i inei ua faailoa ai faapea e faaauau pea e le Atua ona ‘lagolagoina i tatou.’ Atonu e mafai ona matauina faapea o Ioane le Papatiso ma le Alo lava o le Atua ia sa fesoasoani e faatutū i luga tagata na paʻūū i agasala tau amio. Ina ua salamō nei tagata uma ma avea ma auauna a Ieova, na latou olioli i faamanuiaga ofoofogia o le lagolagosua tauatua.—Mataio 21:28-32; Mareko 2:15-17.
11. I le ā le auala ua ‘faatusaʻoina ai e Ieova i latou uma o ē ua faanoʻunoʻu’?
11 O se mea e faamafanafana loto le iloa faapea ‘ua faatusaʻoina e Ieova i latou uma o ē ua faanoʻunoʻu’ e ala i tofotofoga eseese. Ua ia faafiafia i tagata faanoanoa o ia i tatou, faamafanafana i o tatou tagata loto momomo, ma fesoasoani ia i tatou e tautala i lana afioga ma le faamalosi pe a sauāina i tatou. (Galuega 4:29-31) Na te lē taitai ona faatagaina a tatou avega mamafa e nutimomoia i tatou pe afai tatou te talia lana fesoasoani. (Salamo 55:22) O lea, i le pei o le “afafine o Aperaamo” o lē na “faanoʻunoʻu lava ia” ae sa faamalōlōina faaletino e Iesu, e ao ona tatou “vivii atu foi . . . i le Atua” pe afai na te faatusaʻoina ma le alofa i tatou faaleagaga. (Luka 13:10-17) O i latou faauuina na faanoʻunoʻu i noataga faa-Papelonia sa matuā loto faafetai ina ua faaeaina i latou i luga e le Atua i le 1919, ma sa ia faatusaʻoina ai foi i luga “isi mamoe” loto talisapaia talu mai le 1935.—Ioane 10:16.
12. Ua faapefea ona ‘vaavaai atu mata o tagata uma ma le faamoemoe’ i le Atua?
12 E lē taitai ona faalētaulauina e Ieova ona tagata, e pei ona sosoo ai ona taʻua manino mai e Tavita: “E faasaga atu ia te oe mata o mea uma lava; e te avatua foi a latou mea e ʻai i ona aso e tatau ai. O loo e faamafola lou aao, ma faamaoona le manao o mea ola uma lava.” (Salamo 145:15, 16) E pei lava o loo tepa taulaʻi atu mata o meafaiola uma lava i le faamoemoe atu i le Pule Silisili ese i le Vateatea. O loo vaavaai atu agelu i le Atua mo le faaauauina pea o le ola. Ma e pei ona vaavaai atu se tamaitiiti i se matua mo mea manaomia, ua faapena foi ona tatou vaavaai atu ai i lo tatou Tamā faalelagi. O le mea moni, mai ia te ia ua faapena ona maua ai e tagata ma manu mea e ola ai. E leai lava se isi e mafai ona faamalieina o latou manaoga. Ua avatu e le Atua ia i latou “a latou mea e ʻai i ona itu aso e tatau ai,” o lona uiga, pe afai e manaomia.
13. I ā auala ua ‘faamafola atu ai e Ieova lona aao ma faamaoona manao o mea ola uma’?
13 O le Atua ‘o loo ia faamafola lona aao ma faamalie le manao o meaola uma lava.’ (Salamo 104:10-28) E moni, o nisi manu e mamate ona o le leai o ni meaʻai. E toatele tagata fia ʻaai ua avea o ē lavevea fua ona o le manatu faapito, teteega, ma le faaaogā sese o alagāoa. E lē gata i lea, na valoia e Iesu faapea “o oge” o le a avea o se vaega o le “faailoga” o lona faatasi mai i nei aso e gata ai. (Mataio 24:3, 7) Ae leai se tasi o nei mea ua tupu ona faapea ua lē mafaia pe ua lē lava mea ua saunia e Ieova. Seʻi manatu i le faitauafe miliona o meafaiola o loo olaola pea! Ae lē gata i lea, ua saunia e lenei salamo le faamautinoaga faapea i lalo o le pulega a le Malo, pe a ‘lē pulea e le isi tagata le isi tagata e leaga ai o ia,’ o le a mafai ai e le Atua ona faamalie o tatou manaoga faaletino ma le faaleagaga. (Failauga 8:9; Isaia 25:6) E oo lava i aso nei, e lē manaomia ona tatou fia ʻaai mo meaʻai faaleagaga, auā ua saunia e le Atua le anoanoai i ona itu aso e tatau ai e ala i “le auauna faamaoni ma le mafaufau.” (Mataio 24:45-47; 1 Peteru 2:2) Pe a tautala i le faaleagaga, o Molimau a Ieova o tagata ia ua matuā sili atu le lelei ona fafagaina i le lalolagi. Pe e te faaalia lou talisapaia loloto mo na mea e tele?
E Leoleo Ieova i Ē Alolofa ia te Ia
14. Aiseā na mafai ai e Tavita ona faapea mai “e amiotonu Ieova i ona ala uma ma faamaoni i ana galuega uma”?
14 O lo tatou valea atonu o le a ‘faapiopio ai o tatou ala’ ma aumaia ai tulaga faigata ia i tatou, ae aua lava neʻi o tatou tuuaʻia le Atua mo nei tulaga faigata. (Faataoto 19:3) Ua faaalia e Tavita le pogai ina ua ia faapea mai: “E amiotonu Ieova i ona ala uma ma faamaoni i ana galuega uma.” (Salamo 145:17, NW) E gaoioi pea le Atua i se auala saʻo, tonu, ma alofa mutimutivale. Ae maise lava i lona alofa mutimutivale ua faaalia i lana sauniuniga mo le faaolataga e ala i le taulaga togiola a Iesu. (Galuega 2:21; 4:8-12) O Ieova foi e “faamaoni i ana galuega uma,” e faamaoni pea, e alofa, ma e lē faailoga tagata. I le avea o ni ē “faaaʻoaʻo . . . i le Atua,” o lea, seʻi o tatou amio saʻo, tonu, alofa mutimutivale, lē faailoga tagata ma ia faamaoni.—Efeso 5:1, 2; Teuteronome 32:4; Salamo 7:10; 25:8; Isaia 49:7; Galuega 10:34, 35.
15. Ua faapefea ona tatou ‘valaau i le Atua i le faamaoni,’ ma o le ā ua iʻu i ai i lo tatou faia faapea?
15 Talu ai ona o le Atua e amiotonu ma faamaoni, ua tatou lalata atu ai ia te ia. E lē gata i lea, ua faamautinoa mai i tatou e Tavita: “E latalata mai Ieova ia i latou uma o e valaau ia te ia, o i latou uma o e valaau atu ia te ia ma le faamaoni.” (Salamo 145:18) I le papatisoina e avea o ni tagata talitonu tuuina atu, ua tatou valaau atu ai i le suafa o Ieova. (Galuega 8:12; 18:8; Roma 10:10-15) Talu ai ona o lea ua tatou lalata atu ai i le Atua, ua latalata mai ai foi o ia ia i tatou. (Iakopo 4:8) Ua tatou “valaau atu ia te ia ma le faamaoni” ona ua tatou faia faapea i le auala moni, e ala ia Iesu Keriso. Ma o le a tumau pea ona latalata Ieova ia i tatou pe afai tatou te tapuai ia te ia “i le agaga ma le upu moni,” [NW] e faaalia i le “faatuatua lē faatagafai,” ma ‘faaauau ona tumau e pei o loo vaai atu i Lē e lē o vaaia.’ (Ioane 4:23, 24, NW; 1 Timoteo 1:5, NW; Eperu 11:27) Ona lē avea lea o a tatou tatalo o ni ʻai a le matagi po o le fesagaʻi atu i le na o le lalolagi lava a Satani, ae o le a faaauau ona tatou olioli i le fesoasoani ma le taʻitaʻiga tauatua. (Salamo 65:2; 1 Ioane 5:19) Maeu le saogalemu o lea mea!
16. Aiseā ma e faapefea ona ‘faatino e Ieova le manaoga o i latou o loo matataʻu ia te ia’?
16 Ua tatou maua foi le saogalemu moni, ona o isi mea ua faia e Ieova mo i tatou. Na faapea mai Tavita: “E faia e ia le mea e manao i ai o e matatau ia te ia; e faafofoga foi o ia i la latou alaga atu, ma faaolaina i latou.” (Salamo 145:19) E ‘faatinoina e Ieova o tatou faanaunauga’ auā ua ia i tatou se faaaloalo loloto mo le Atua ma se mataʻu e atoatoa ona mamā ina ia lē faia se mea e lē fiafia ai o ia. (Faataoto 1:7) O o tatou loto usiusitai ua uunaia ai i tatou e faia se tuuina atu ia Ieova ma o lo tatou uiga faaalia o le, “Ia faia lou finagalo.” Talu ai o lona finagalo ia tatou folafola atu le feau o le Malo, na te faataunuuina ai o tatou faanaunauga i le faia o lena galuega. (Mataio 6:10; Mareko 13:10) E ‘faatinoina e le Atua o tatou faanaunauga’ auā tatou te lē o tatalo ma le manatu faapito ae ole atu mo mea e ōgatasi ma lona finagalo. Na te talia mea e tusa ma lona finagalo ma e mo lo tatou lelei.—1 Ioane 3:21, 22; 5:14, 15; faatusatusa Mataio 26:36-44.
17. Aiseā e mafai ai ona tatou mautinoa faapea o la tatou “alaga atu” mo se fesoasoani o le a faafofogaina e le Atua?
17 I le avea o Molimau faamaoni a Ieova, e mafai foi ona tatou mautinoa faapea o a tatou “alaga atu” mo le fesoasoani o le a lē mafai ona lē faafofogaina. Na faasaoina e Ieova Tavita mai mala ma faasaoina Iesu, e oo lava i le toe faatuina o ia mai le oti. I lalo o osofaiga a fili, ae maise lava i le taimi o le osofaiga a Koku, e mafai ona tatou mautinoa faapea o le a laveaiina i tatou e Ieova. (Esekielu 38:1–39:16) O le mea moni, i so o se taimi lava o faalavelave, i le pei o Tavita e mafai ona tatou tatalo ma le mautinoa: “Ieova e, ia e alofa mai ia te au, auā ua ou puapuaga. . . . Auā ua ou faalogo i le faaleaga mai e le toatele; ua siosiomia aʻu e le mataʻu, ona ua latou taupulepule faatasi ia te au, ua latou manatu i se togafiti ou te oti ai. A e peitai aʻu nei, ou te faalagolago ia te oe Ieova e, ou te faapea atu, O oe lava loʻu Atua.”—Salamo 31:9-14.
18. E faapefea ona aogā ia i tatou le iloaina faapea ‘e leoleo Ieova ia i latou uma o ē alolofa ia te ia’ ae o le a ia ‘faatamaʻia ē amio leaga’?
18 E nofo sauni pea Ieova le Atua e fesoasoani ia i tatou. E pei ona faapea mai Tavita: “E tausi Ieova i e alolofa atu ia te ia uma lava; a e fano ia te ia o e amio leaga atoa uma.” (Salamo 145:20) Ioe, afai tatou te alolofa i le Atua, o le a ia faamanuia ma tausia i tatou. (Numera 6:24-26) Na te ‘tauia ē faamaualuluga’ ae leoleoina ana auauna loto maulalo, i le lē faatagaina o se mea e tupu e faamanuaina ai e faavavau i latou. Talu ai o loo faatasi Ieova ma i tatou, seʻi o tatou lototetele. (Salamo 31:20-24; Galuega 11:19-21) ‘E leai ni auupega ua fuafua e faasagatau mai ia i tatou o le a manuia.’ (Isaia 54:17; Salamo 9:17; 11:4-7) O le mea lena na tupu ia i latou o ē ua faamaonia lo latou alofa mo le Atua i le avea o ana auauna faamaoni tuuina atu. I le avea o se vaega, o le a sao atu ai ma le saogalemu Molimau a Ieova i le “puapuaga tele” o le a aumaia i luga o ē amio leaga. (Faaaliga 7:14) Ma maeu se faamanuiaga o le a iai i le foiaina o le finauga sili i le pule tautupu faalevateatea a Ieova, mo i latou uma o “e alolofa atu ia te ia”!
Ia Faaauau ona Faamanū i le Suafa Paia o Ieova
19. Aiseā e tautatala atu ai o tatou gutu i “vii o Ieova”?
19 Ua faaiʻu e Tavita lenei salamo e faagaee ai i upu nei: “O vii o Ieova e taʻu atu e loʻu gutu; e faafetaia e tagata uma o lona suafa paia, e faavavau faavavau lava.” (Salamo 145:21) I le avea o Molimau a Ieova, tatou te talisapaia ai le silisili ese o le Atua, lona lelei, le pulega tautupu alofa, le lagolagosua lē maletaulau, ma le tausiga e lē mafai ona faavaivai. O lea, i le pei o Tavita, ia taʻu atu ai e o tatou gutu viiga o le Atua. Ua uunaia i tatou ina ia avatu ia te ia le tuutoina atoatoa, faafetai atu ia te ia mo ana faamanuiaga e tele, ma vivii atu i lona “suafa mamalu.”—1 Nofoaiga a Tupu 29:10-13; Esoto 20:4-6.
20. I le vaai atu i le ola e faavavau, o le ā e ao nei loa ona avea ma lo tatou faanaunauga autū?
20 Talu ai ona e faamanuia i tatou e Ieova i aso taitasi, seʻi o tatou faamanū atu foi ia te ia e lē aunoa, pe ia tautala i ni tala lelei e uiga ia te ia. Seʻi o tatou talaʻi atu le tala lelei ma le maelega i le viiga o le Atua, i le taʻu atu i isi faapea ua lē pine ae ‘faamanū atu tagata uma lava i lona suafa paia.’ Maeu le matagofie o le a iai i le ola ai pea pe a vivii atu i latou uma o ē o ʻaināina le lalolagi—ioe, meafaiola atamamai uma i le vateatea—i viiga o lo tatou Tamā faalelagi! (Salamo 148:1-13) Ia faamanūina Ieova mo le faaalia o lona suafa ma le tuuina mai ia i tatou o le faaeaga o le avea o ana Molimau. (Salamo 83:18; Isaia 43:10-12) Seʻi tau ina tatou faafoi atu i tatou i se uiga e talafeagai ma i latou o ē o faapaiaina lena suafa ma tatalo atu mo lona faapaiaina. (Luka 11:2) Seʻi o tatou auauna ma le faamaoni i le Atua, ina ia mafai ona lagonaina i lana faiga fou o tatou leo, i pesega a i latou o ē o faamanū atu i le suafa paia o Ieova e faavavau.
O ā Au Tali?
□ O le ā o le a tatou faia pe afai e pele ia i tatou le tulaga tautupu o Ieova?
□ O le ā ua fai ai ma sui le tulaga tautupu a le Atua i aso nei?
□ Ua faapefea ona ‘faatusaʻoina e Ieova i latou uma o ē ua faanoʻunoʻu’?
□ I ā auala ua ‘faamafola ai e le Atua lona aao ma faamaoona manao o mea ola uma’?
□ E mafai faapefea ona tatou faamanū i le suafa paia o Ieova?
[Fesili mo le Suʻesuʻega]
[Ata i le itulau 17]
I le 1922 o upu ‘faalauiloa le Tupu ma le Malo’ na faagaee ai ē na lagolagoina le tulaga tautupu a Ieova i se gaoioiga aupito sili