Ia Nofo Sauni mo le Aso o Ieova!

Mea Tāua mai le Muamua Tesalonia

LE ASO o Ieova! Sa manatu Kerisiano i Tesalonia anamua faapea ua oo mai. Pe sa moni i latou? O afea o le a oo mai ai? O se tasi lena o mataupu matuā tāua na taʻua i le uluai tusi a le aposetolo o Paulo i Tesalonia, na auina atu mai Korinito i le pe ā ma le tausaga e 50 T.A.

Sa faavaeina e Paulo ma Sila le faapotopotoga i Tesalonia, le nofoaga o le pulega a le itumalo Roma o Maketonia. (Galuega 17:1-4) Mulimuli ane, i lana uluai tusi i tagata Tesalonia, na ofo atu ai e Paulo ni upu faamalo, saunia ni apoapoaiga, ma talanoaina ai le aso o Ieova. E mafai foi e i tatou ona maua aogā mai lenei tusi, ae maise lava ona o le aso o Ieova ua matuā lata mai.

Faamalo ma Faalaeiau

Sa muamua lava ona faamalo atu Paulo i tagata Tesalonia. (1 Tesalonia 1:1-10) Sa tatau lea faamalo e tusa ai i la latou galuega faamaoni ma le onosai. Sa tatau foi le faamalo, auā sa latou “talia le upu i le puapuaga tele, ma le olioli mai le Agaga Paia.” Pe e te faamalo i isi, pei ona sa faia e Paulo?

Sa faataatia e le aposetolo se faaaʻoaʻoga lelei. (2:1-12) E ui lava i faiga leaga na tigaina ai i Filipi, ae sa ia ‘maua le lototele mai le Atua e tautala atu ai i le tala lelei’ i tagata Tesalonia. Sa ia teena le faia o upu faaviivii, le matapeapea, ma le sailia o le mamalu. Sa leʻi avea Paulo o se avega taugatā ae sa agalelei ia i latou e pei o se tinā ona tausi i lana tama. Maeu se faaaʻoaʻoga lelei mo toeaina i aso nei!

O isi upu na sosoo ai a Paulo na faalaeiauina ai tagata Tesalonia ina ia tutumau mausalī pe a sauāina. (2:13–3:13) Sa tumau i latou i sauaga mai i tagata o lo latou nuu, ma na aumaia ai e Timoteo se tala lelei ia Paulo e uiga i lo latou tulaga faaleagaga. Sa tatalo le aposetolo faapea ia tele lo latou alofa ma ia mausalī o latou loto. E faapena foi, ona tatalo nei Molimau a Ieova mo o latou uso talitonu o sauāina, faalaeiauina i latou pe afai e mafai, ma olioli i tala o lo latou faamaoni.

Tumau i le Mataala Faaleagaga!

Ona sosoo ai lea ma le maua e tagata Tesalonia o se fautuaga. (4:1-18) Sa tatau ona latou savavali ma le matuā atoatoa i se auala e faafiafia ai le Atua, ia faaalia le tele o le alofa faaleuso ma galulue i o latou lima ina ia faafetaiaia ai o latou manaoga. Ae lē gata i lea, sa tatau ona latou fefaamafanafanaaʻi o le tasi i le isi ma le faamoemoe faapea i le faatasi mai o Iesu o le a muamua ona faatutūina ai tagata talitonu fanauagagaina ua maliliu, ma aufaatasi atu ma ia. Mulimuli ane, o i latou faauuina e faasaoolaina atu o le a maliliu ma toe faatutūina ma aufaatasi atu ai ma Keriso ma i latou ua uma ona toe faatutūina i le ola faalelagi.

Ona sosoo ai lea ma le talanoaina e Paulo o le aso o Ieova ma ofoina atu fautuaga atili. (5:1-28) O le aso o Ieova e sau e pei o se gaoi, ma se faaumatiaga e faafuaseʻi lava pe a uma se alaga: ‘Ua filemu ma saogalemu!’ O lea sa tatau ai i tagata Tesalonia ona tumau i le mataala faaleagaga, ia puipuia e le ufifatafata o le faatuatua ma le alofa ma e ala i le faamoemoe i le faaolataga e pei o se puloutau. Sa tatau ona ia i latou le manatu loloto mo i latou o taʻitaʻi i le faapotopotoga ma ia faamamao ese i mea leaga, e pei ona tatau ai ia i tatou.

O le uluai tusi a Paulo i tagata Tesalonia e ao ona uunaia ai i tatou e avatu le faamalo ma faalaeiauga i uso talitonu. E ao foi ona uunaia ai i tatou e avea o ni faaaʻoaʻo i amio ma uiga. Ma e mautinoa o ana fautuaga e mafai ona fesoasoani ia i tatou e nofo sauni ai mo le aso o Ieova.

[Pusa/Ata i le itulau 21]

Le Ufifatafata ma le Puloutau: I le uunaia o le mataala faaleagaga, na tusi ai Paulo: “Ia faautauta i tatou, ia tatou oofu i le ufifatafata o le faatuatua ma le alofa, ma le puloutau o le faamoemoe i le ola.” (1 Tesalonia 5:8) O se ufifatafata sa avea o se auupega a se fitafita e puipui ai lona fatafata, e iai una, filifili, po o apamemea malō. E faapena foi, o le ufifatafata o le faatuatua e puipuia ai i tatou faaleagaga. Ma e faapefea e uiga i le puloutau anamua? E masani lava sa faia i le apa memea, sa avea o se pulou faafitafita sa fuafuaina e puipuia ai se tagata tau i le taimi o le taua. I le pei o se puloutau e puipuia ai le ulu o se fitafita, ua faapena foi i le faamoemoe o le faaolataga ona puipuia ai malosi faalemafaufau, i lea e mafai ai e se Kerisiano ona tausisia le faamaoni. Maeu le tāua faapea ua ofuina e tagata o Ieova lea ofutau faaleagaga!—Efeso 6:11-17.