Ia Taofimau i le Faatuatua ma le Loto Fuatiaifo Lelei

Mea Tāua mai le Muamua Timoteo

I LE pe tusa ma le 56 T.A., na lapatai ai le aposetolo o Paulo i toeaina o le faapotopotoga i Efeso faapea o “luko saua” o le a manu aʻe mai ia i latou ma “tautala mai i mea faapiopio, e fetoso ese ai le au soo ia mulimuli ia i latou.” (Galuega 20:29, 30) I ni nai tausaga, sa oo ai ina matuā mataʻutia aʻoaʻoga faaaposetate o lea na uunaia ai e Paulo Timoteo ina ia tau le taua faaleagaga i totonu o le faapotopotoga ina ia faasaoina lona tulaga mamā ma fesoasoani i uso talitonu ina ia tutumau i le faatuatua. O le pogai sili lena na tusia ai e Paulo lana uluai tusi ia Timoteo mai Maketonia pe tusa o le 61-64 T.A.

Sa faatonu atu ia Timoteo e uiga i tiute o se toeaina, le tulaga o fafine na tofia i ai e le Atua, agavaa o toeaina ma auauna o le faiva, ma isi lava mataupu. O na faatonuga o loo aogā foi mo i tatou i aso nei.

Apoapoaiga ia Faatuatua

Na amata Paulo i le fautuaga ina ia taofimau i le faatuatua ma le loto fuatiaifo lelei. (1 Timoteo 1:1-20) Sa ia faalaeiauina Timoteo ina ia nofo ai pea i Efeso ma ia “vavao atu i nisi, aua foi neʻi latou aʻoaʻo i upu ese.” Sa loto faafetai tele Paulo mo le faiva na tofia atu ia te ia, i lona ioe faapea sa gaoioi o ia ma le valea ma le leai o se faatuatua ina o ia sauāina soʻo o Iesu. Sa faatonu atu e le aposetolo Timoteo ina ia alu atu e tau le taua faaleagaga, “ia taofimau i le faatuatua ma le loto fuatiaifo lelei” [NW] ae aua neʻi pei o i latou o ē “faavaatuʻia i latou i la le faatuatua.”

Fautuaga i le Tapuaiga

Ona sosoo ai lea ma le avatu e Paulo o se fautauga i le avea o se “aʻoaʻo [faiaʻoga] o nuu ese i le faatuatua ma le upu moni.” (2:1-15) O tatalo sa tatau ona ofoina atu faatatau ia i latou o i tulaga maualuluga ina ia mafai e Kerisiano ona ola ai ma le filemu. O le finagalo o le Atua faapea ia faaolaina ituaiga uma lava o tagata, ma o se aʻoaʻoga matuā tāua le faapea o Keriso “na foaifuaina e ia ia te ia e fai ma togiola mo tagata uma lava.” Na faaalia e Paulo faapea e tatau i se fafine ona teuteu o ia i le teu onomea ma e lē tatau ona pule o ia i luga o le tamaloa.

E tatau ona maopoopo lelei le faapotopotoga. (3:1-16) O lea sa faataatia ai e Paulo agavaa manaomia mo ovasia ma auauna o le faiva. Mai mea na tusia e le aposetolo, o le a iloa ai e Timoteo le auala e amioai ai o ia i totonu o le faapotopotoga, “o le pou tu foi lea ma le lagolago o le upu moni.”

Sa avatu e Paulo ia Timoteo fautuaga totino e fesoasoani ai ia te ia e leoleo faasaga i aʻoaʻoga sese. (4:1-16) I ni taimi mulimuli ane sa paʻūū ese ai nisi mai le faatuatua. Ae e ala i le uaʻi atu pea ia te ia lava ma i ana aʻoaʻoga, o le a mafai ai e Timoteo ona ‘⁠faasaoina o ia lava ma i latou o ē o faalogologo ia te ia.’

Sa maua foi e Timoteo fautuaga i le feagai ai ma tagata taitoatasi, talavou ma ē matutua. (5:1-25) Mo se faaaʻoaʻoga, o sauniuniga talafeagai sa tatau ona faia mo fafine matutua ua oti a latou tane sa iai se talaaga lelei faa-Kerisiano. Na i lo o le faitala, e ao i fafine laiti ua oti a latou tane ona faaipoipo ma faia ni fanau. O toeaina o loo pule i se auala lelei sa tatau ona manatu i ai ua ono ma tatau ona faateleina atu i ai le mamalu.

Tuutoina i le Atua Faatasi ma le Loto Malie

Sa faaiʻuina le tusi a Paulo i fautuaga faatatau i le tuutoina i le Atua. (6:1-21) “O le [tuutoina i le Atua] ma le loto malie” o le ala lea i le oloa sili, ae o le faanaunau ina ia mauʻoa e taʻitaʻiina atu ai i le faaumatiaga ma le faaleagaina. Na uunaia e Paulo Timoteo ina ia tau le taua lelei o le faatuatua ma ‘taofimau i le ola e faavavau.’ Ina ia taofimau i lena ola moni, sa tatau ai i tagata mauʻoa ona “aua foi le faatuatua i le oloa e faaletumau, a o le Atua.”

[Pusa/Ata i le itulau 23]

Faasaoina e Ala i le Fanau Tama: Sa leʻi talanoaina e Paulo le faaolataga i le ola e faavavau ae o le vaega tatau a se fafine amioatua ina ua ia tusia: “A e faaolaina ia i le fanauga o tama, pe afai e tutumau pea i latou i le faatuatua, ma le alofa, ma le amio lelei, atoa ma le faamatuāfafine.” (1 Timoteo 2:11-15) E ala i le fanau tama, le tausia o ana fanau, ma le pulea o le auaiga, o le a “faaolaina” ai se fafine mai le avea o sē e faitala e leai ni mea e faia ma aiā fua i mataupu a isi tagata. (1 Timoteo 5:11-15) O ana galuega faaleaiga o le a atoatoa ai lana auaunaga ia Ieova. O le mea moni, e ao i Kerisiano uma ona leoleo a latou amio ma ia faaaogā ma le atamai o latou taimi.—Efeso 5:15, 16.